“Kɔl Nyulu Mɛlɛka Yɔŋgu wo O Wana Chiee Nɔla Mbo Sina Bɛɛ Pɛŋgu le Wo”

1, 2. Yɛɛ ndoo yɔŋnuŋ yɛ Pɔɔl nda Sailaa o Filipai niŋ? (Tofa fotueiyo o peeleŋ ndeŋ choo.)

YIYAŊ ndɔ a hei okɔɔ. O wa a teleŋ ditɛɛŋndo. Misiɔnalueiya a ŋiɔɔŋ, Pɔɔl nda Sailaa wa o chiɛi manyum kpiŋgbi yiŋgilɛiyo niŋ o chioo Filipai niŋ. Ndaa nɔla ma kela le kanifuule, peluŋ ndaŋ wa ŋ baŋaa o kpiɔɔ. Nduyɛ kɔɔlaŋ la wa nda nɛiyo a lɔɔ bɛndu nda sɔla wo. (Walta Wanaa Chiisuaa 16:​23, 24) Tuupa ma kota nda paale leŋ, mi faŋgaa sasu Pɔɔl nda Sailaa o lɔɔniŋ, nduyɛ ma kua a nda o lemasa chɔ chɔ. Ma sɛɛsiaa nda nyɛlaŋ lekɔɔ nduyɛ ma luaa nda lɔɔ pila. (Walta Wanaa Chiisuaa 16:​16-22) Nuawɔ niilu lakafa se! Pilachioo Pɔɔl wa ni, nduyɛ ndaa nɔ ma kɔɔsa ndu nyɛkɛndɛi.a—Tofa tɛɛsiaa amatou.

² Teleŋ nda wa o chiɛi manyumndo niŋndo, Pɔɔl wa yiyaŋndo a nyɛ ndoo yɔŋnuŋ paale leŋ ndo nduyɛ a wanaa wa o Filipai niŋnda okɔɔ. Ndaa nɔ pɛŋ chiɛi Chuuwa ndaa piɛi Mɛlɛka wo o Filipai niŋ maa o chieeŋ bɔɔbɔɔ Pɔɔl ndoo kuɛ woŋ niŋ te. Lelaŋ, o diola kpakilaŋ kɔɔli o pioo ikɛi Chuuwa ndaa piɛi Mɛlɛka ni. (Walta Wanaa Chiisuaa 16:​13, 14) Baa le mɛɛ Chuuwa ndaa fuuluu ŋwaŋ tɔ o chiee koŋ niŋ te yɛ, a ndaa yeemaŋ le chiɛi piɛiyaa Mɛlɛkaa sɔlaa wo le? Wanaa wa Filipai ya ndaa pɛɛluŋ bɔɔ le mɛɛ nda wa pilachieeya maLuomaŋnda yɛ. (Walta Wanaa Chiisuaa 16:​21) Kɛlɛŋgaa le saboo hoo ndaa yiyaŋ ni maa Chuuwa Pɔɔl nda Sailaa wa ni, kɛ o cho Luomaŋnda le nda wa le. O kpeekpei niŋ, ŋ sina a hei okɔɔ le. Kɛ ŋ sina maa i wa suɛi lakafa le Pɔɔl nda Sailaa dɔuwɔɔ o chiɛi manyumndo niŋ.

3. Le yɛɛ kɔllo ndoo laasiaŋ yɛ Pɔɔl mɛɛ nda dɔu ndu o chiɛi manyumndo niŋ? Nduyɛ kaa yɛɛ ndoo chɔm yɛ?

³ Kɛlɛŋgaa mi Pɔɔl yiyaŋ vɛlɛ a sɔɔŋ yɔŋnuŋ ndu o Filipai niŋndoŋ. Tuupa mi Pɔɔl huŋ Filipai, mbo chua paŋgoŋ ŋtiŋ o Pioo Ichiyaŋ leeloo o Eesia Mainɔ niŋ. Teleŋ o wa loŋ ndo, mi nyina diandaa kpaa ndu daandi daandi maa o dimi yooŋgu kɛndɔɔ o fondaŋ ndaŋ lapum te. Mii yɔŋnuŋ maa nyina diandaa wa ndu nyindɔɔ le mbo kuɛ o fondaŋ cheleŋ. (Walta Wanaa Chiisuaa 16:​6, 7) Kɛ kuɛɛnɛ? Tuma o wa Towaa chiee wo, mi Pɔɔl cha yilaŋnde, nduyɛ ma dimul ndu aa, “Yandii, taŋ ma huŋ mala naa o lɛŋnde Masidooniaaleŋ niŋ.” Sabu Chɛhowaa wa kpendekele! Okoŋ, mi Pɔɔl kua chɔ chɔ Masidooniaa. (Nuawɔ Walta Wanaa Chiisuaa 16:​8-10.) Kɛ yɛɛ ndoo yɔŋnuŋ yɛ okoŋ kɔɔli? Mɛɛ o fuuluu dɔɔ Masidooniaa, ma duau ndu o chiɛi manyumndo niŋ! Le yɛɛ Chɛhowa chɛllɛ mi hei yɔŋnuŋ Pɔɔl? Vɛɛ kpɛ o cho yɛ viouwɔɔ o chiɛi manyumndo niŋ? O yɔŋ bɛɛ aa Pɔɔl wa buulaŋndo a sɔɔŋ muŋ okɔɔ, mi tiindaŋ ndɔɔ lo o kala poŋ nduyɛ o wa a nyaale. Mi Pɔɔl nda Sailaa “saaŋ Mɛlɛka piɛiyo ma soli chondoŋ ma chuunduu Mɛlɛka.” (Walta Wanaa Chiisuaa 16:​25) Mi kɔl nyulu Mɛlɛkaa dɛɛniaa nda kɔltaŋ.

4, 5. (a) Vɛɛ bahawɛi naa a o Pɔɔllo velaŋ yɛ lepum? (b) Vɛɛ Bahawɛi Pɔɔllo ndoo siŋgaŋ yɛ o lepilɛ niŋ kpe?

⁴ Baa num bɛɛ yiyaŋ niŋ maa Pɔɔl? Kɛlɛŋgaa a nyuna niŋ Mɛlɛka teleŋndaŋ lapum o yoomu numndo niŋ le mbo mala num kɛɛsiaa tosaa, nduyɛ ma sina maa a cho nɛi chɔmaa nyina diandaa tolɔɔ kɔɔli. Kɛ okoŋ kɔɔli, ma sɔla simultaŋ tau, ɔɔ num oo nɔ le kɛɛsiaala bɛndaŋ tosaa o yoomu numndo niŋ. (Ikilisiaatii 9:​12) Suŋ suŋ, te a yiyaŋ pɛ a bahawɛi ŋ cho niŋndo, mi kaamaa bii num le sabu Chɛhowa chɛl mi sɔɔŋ pum yɔŋnuŋndo. Yɛɛ mala yɛ num le hiouwɔɔ lachi a biuwɔŋndo, vɛlɛ a tiindaŋ numndo dɔuwɔɔ kpou o Chɛhowa niŋ? Ŋ saaluŋ mulioo o nyɛ ndoo yɔŋnuŋ vɛlɛ Pɔɔl nda Sailaa wo.

⁵ Mɛɛ Pɔɔl nda Sailaa wa chondoŋ solioo, mi sɔɔŋ bɔɔbɔɔ nda ve kɔl te woŋ kandu yɔŋnɔŋndo. I tasei, mi lɛŋndeŋ le nyiiya a kpaaya bɛndoo. Mi diola chiɛi manyumndo la kumbiŋ o lepilɛ niŋ kpe. Okoŋ, mi yɔlɔŋ nda yii wanaa wa o chiɛi manyumndo niŋnda tiimbuŋ. Okoŋ kɔɔli, mi Pɔɔl kuuna wana dɔu nda o chiɛi manyumndo niŋndo maa o diinuŋ ndupila le. Nduyɛ, mi wana dɔu nda hoo o chiɛi manyumndo niŋndo a yuŋgu ndɔɔ sɔla yiŋɔɔ. Diimandɔɔ puŋ, mi masaa chieeya yɔŋ wanaa sawaa le ma kɔ soli Pɔɔl nda Sailaa o chiɛi manyumndo niŋ nduyɛ ma dimul nda le ma mal chioo a kɔl nyuloo. Mɛɛ wanaa sawaa sina maa Luomaŋnda Pɔɔl nda Sailaa wa ni, ma sina biondɔŋ bɛndu nda tosa wo. Mi ndapila liila nda le ma mal chioo. Kɛ tuupa ma mal chioo, mi Pɔɔl nda Sailaa dimi maa mɛɛ ma choŋguŋ Lediaa, ndepilɛnɔ ndoo sɔla yiŋɔɔ sɛnɛiyo. Nduyɛ ma soliŋ teleŋndo hoo kpeku le puaapiliaa cheleŋnda o Filipai niŋ yoomuaŋ lueiyo. (Walta Wanaa Chiisuaa 16:​26-40) Nuawɔ se mɛɛ nyɛ o nyɛ siŋgaŋ chɔ chɔ yɛ!

“O WANA CHIEE NƆLA MBO SINA BƐƐ PƐŊGU LE WO”

6. Yɛɛ naŋ cho yɛ niko yaasiaa nduyɛ miŋ miŋgi hɔlteŋ keeku lechoo?

⁶ Yɛɛ naŋ pɛɛku yɛ o sɔɔŋ yɔŋnuŋ muŋndoŋ niŋ? Chɛhowa nɔla mbo tosa nyɛ naŋ ve kɔl te wo. Lelaŋ te simultaŋ la komal naa pɛ, ŋ nɔ miŋ buulaŋ te. Ŋ sina maa mi nyɛ Pɔɔl pɛɛku o keŋ niŋndo nɛŋi ndu kɔllo tau. Nyɛ o poonyial puaapiliaa o Filipai niŋ a buulaŋndo vɛlɛ a kɔl nyulu Mɛlɛkaa okɔɔ wo tosa ni miŋ sina hei. O buŋgɛi hei niŋ, ŋ cho isɔɔ a nyɛ Pɔɔl poonyiaa o Filipiaŋnda 4:​6, 7 wo. (Nuawɔ.) Nduyɛ, ŋ cho vɛlɛ miŋgi hɔlteŋ keeku o bundɔŋ Baabuiyo choo, ŋ Chɛhowa tosa sɔɔŋ waŋnda ve kɔl te wo. O mɛɛlulaŋ kpɔŋ, ŋ cho vɛlɛ isɔɔ a mɛɛ “kɔl nyulu Mɛlɛka yɔŋgu wo” mala naa le simultaŋ biuwɔŋndo a tiindaŋ naa dɔuwɔɔ kpou o Chɛhowa niŋ yɛ.

7. Yɛɛ Pɔɔl ndoo pɛɛku yɛ puaapiliaa o poonyial o Filipai niŋnda? Nduyɛ yɛɛ naa bɛɛ pɛɛku yɛ?

⁷ Mɛɛ puaapiliaa o Filipai niŋ veelu diomndaŋ o yau Pɔɔl poonyial nda wo niŋ, a yɛɛ okɔɔ ndaa yiyaŋ yɛ? Kɛlɛŋgaa mi a bɔɔbɔɔ yiyaŋ nyɛ ndoo yɔŋnuŋ Pɔɔl nda Sailaa wo, mɛɛ Chɛhowa ndoo mala nda a ve kɔl te yɛ. Yɛɛ Pɔɔl wa yɛ nda pɛɛkoo o yau o poonyial nda wo niŋ? Nyɛ o wa nda pɛɛkoo wo wa ni, la buulaŋ te. La piɛi, nduyɛ la cho sɔla “kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo.” Yɛɛ nyɛ Pɔɔl dimi koŋndo sim yɛ? Dimioo Pɔɔl wa ni maa “kɔl nyulu Mɛlɛka yɔŋgu wo” cho bɔɔ suɛi kaamaa naŋ nɔla miŋ yiyaŋ a ndi okɔɔ le ve. Teleŋndaŋ lapum, ŋ sina pɛŋ mɛɛ naŋ soli bahawɛila naalaŋ yɛ le. Kɛ Chɛhowa ndu sina. Nduyɛ mbo tosa nyɛ naŋ ve kɔl te wo.—Nuawɔ Pitɛ Diiŋ Ndɔɔ 2:​9.

8, 9. (a) Mi che bɛɛ naa mi kafalaŋ la saaŋgiaa Pɔɔl o Filipai niŋ, fulamakɔɔli kɛndɛ kuɛɛ wa yɛ o sɔɔŋ yɔŋnuŋ muŋ ndoŋ niŋ? (b) Le sabu yɛɛ puaapiliaa o Filipai niŋ ndaa dɔu yɛ tiindaŋ ndaa kpou o nyɛ Pɔɔl dimi wo niŋ?

⁸ Mi yau Pɔɔl poonyiaa wo luei puaapiliaa o Filipai niŋ yoomuaŋ mɛɛ nda yiyaŋ a nyɛ Chɛhowa ndoo tosal nda o wɔsiŋ tɔ hiou woŋ niŋndo. Mi che bɛɛ naa mi Chɛhowa chɛl le mi kafalaŋ la saaŋgiaa Pɔɔl nda Sailaa, kɛ mi sɔɔŋ yɔŋnuŋ nda o tase ndɔɔ woŋ tosa mi “Yooŋgu Kɛndɛ Mɛlɛkaa . . . sim o kala yi.” (Filipiaŋnda 1:​7) Masaa kaŋ o Filipai niŋ ndaa piiliaa lɛ le kunda leKilisiɔŋndo nyɛpalaa tusioo choo le. Kɛlɛŋgaa le mɛɛ Pɔɔl ndoo dimi maa Luomaŋnɔɔ o cho ni yɛ, keŋ tosa ni mi buɛi Chiisoo Luku lo Filipai mɛɛ Pɔɔl nda Sailaa kuɛŋnuŋ. Luku ndoo nɔla mbo ke Kilisiɔŋaa sɛnɛiya o Filipai niŋ mala teŋgeŋndo.

⁹ Mɛɛ puaapiliaa kaŋ o Filipai niŋ veelu diomndaŋ o yau Pɔɔl poonyiaa wo niŋ, ma sina maa diomnda Pɔɔl soliŋ kpeku laŋ la ve ko yiyaŋnda ndupila le. Mi Pɔɔl sɔla simulta kala kalalaŋ tau. Nduyɛ teleŋ o poonyial bɛɛ puaapiliaa kaŋ ndo, o wa o biyɔɔ bɛŋgu o chiɛi ndɔɔ niŋ Luom. Kɛ o wa wɔ chɔmndo maa ndoo nɔ “kɔl nyulu Mɛlɛka yɔŋgu wo.”—Filipiaŋnda 1:​12-14; 4:​7, 11, 22.

“LA NƆ BUULAŊ O ISƆƆ O ISƆƆ NIŊ TE”

10, 11. Yɛɛ naŋ nɔ yɛ miŋ tosa te ŋ buulaŋ pɛ a bahawɛilaŋ okɔɔ, nduyɛ yɛɛ naŋ nɔ yɛ miŋ wa kɔl?

¹⁰ Yɛɛ mala yɛ naa ŋ nɔ “buulaŋ o isɔɔ o isɔɔ niŋ te” kɛ miŋ nɔ “kɔl nyulu Mɛlɛka yɔŋgu wo”? Diomnda Pɔɔl dimul Filipiaŋnda laŋ la chɔm maa te ŋ buulaŋ pɛ a bahawɛiyo okɔɔ, nyɛ mala naa wo cho piɛileŋ ni. Lelaŋ, te ŋ wa pɛ buulaŋndo, ŋ nɔ miŋ siŋga buulaŋnda naalaŋ a piɛileŋ. (Nuawɔ Pitɛ Tasoo 5:​6, 7.) Te a piɛi pɛ o Chɛhowa lo, nɔ tiindaŋndo maa o buulaŋ le num. Yil ndu balikaa lɔɔlɔɔ le sala o sala ŋ sɔla pɛ. Nduyɛ puɛɛnuŋ maa Chɛhowa nɔla mbo ke num “nyɛ o nyɛ naa ŋ nyuna ndu le ndu, mbo tosal naa ndu mbo hiou bɛɛ mɛɛ naa ŋ nyuna yɛ, nduyɛ mbo hiou bɛɛ nyɛ naa ŋ tuunuŋ o kɔl lo poloŋ poloŋ bɛndu.”—Ɛfisiaŋnda 3:​20.

¹¹ Maa Pɔɔl nda Sailaa, kɛlɛŋgaa mi kaamaa bii naa a nyɛ Chɛhowa tosa le naa malaa wo. O ve lepum nyɛ bɛndu bɛndu le, kɛ nyɛ naŋ hau ba lɔɔlɔɔ wo. (Kɔliŋtiaŋ Tasoo 10:​13) Hei chɔm naa maa ŋ nɔ miŋ chalnuŋ ŋ tosa nyɛ le le, nduyɛ miŋ chal Chɛhowa chumndo le mbo siɛɛnduu sɔɔŋ ɔɔ mbo soli bahawɛi naa le. Ŋ nɔ miŋ dɔu nyɛ naŋ piɛi le ndu wo o wali niŋ. (Luomaŋnda 12:​11) Sɔɔŋ naŋ cho tosa woŋ chɔm maa a kɔl naa kpou naŋ piɛi ni nduyɛ miŋ ke Chɛhowa nyɛ o nɔ mbo dɔu sala wo. Ŋ loonuŋ maa Chɛhowa nɔla mbo tosa mbo hiou bɛɛ nyɛ naŋ nyuna ndu le ndu wo ɔɔ nyɛ naŋ wa ndu kɔl le tosaa wo. Teleŋndaŋ lapum, mbo tosal naa nyɛ naŋ ve bɛɛ kɔl te wo. Lelaŋ, ŋ yaasiaŋndɔ taamaseliilaŋ lapum la luei naa yoomuaŋ le tiindaŋndo maa Chɛhowa nɔla mbo tosa nyɛ naŋ ve kɔl te wo.

TAAMASELIILAŊ A SƆƆŊ CHƐHOWA TOSA Ŋ VE KƆL TE WOŊ OKƆƆ

12. (a) Yɛɛ Masaa Hɛsɛkiya ndoo tosa yɛ mɛɛ Masaa Sɛnachɛluibi kɔŋgɔlaŋ ndu? (b) Yɛɛ naŋ pɛɛku yɛ a mɛɛ Chɛhowa soli bahawɛi koŋ yɛ?

¹² O Baabuiyo niŋ, miŋ saaluŋ taamaseliilaŋ tau a sɔɔŋ Chɛhowa tosa ŋ ve kɔl te woŋ okɔɔ. Le taamaseliiyo, teleŋ Hɛsɛkiya wa masaa le Chuda wo, mi Sɛnachɛluibi, masaa le Asiiliaa huŋ del Chuda choo a sɔŋgɔɔ nduyɛ mbo biu chieeŋ bɛndoŋ kpou. Chulusɛlɛm kinɛi ndoo lo niŋ le biyɔɔ ni. (Masaa Bɛnduaa Diiŋ Nduaa 18:​1-3, 13) Okoŋ, mi Sɛnachɛluibi huŋ le Chulusɛlɛm chiŋalaŋndo a sɔŋgɔɔ. Yɛɛ Masaa Hɛsɛkiya ndoo tosa yɛ? Nyɛ tasoo, mbo piɛi o Chɛhowa lo le malaa nduyɛ mbo nyuna Aisaya, wana ndoo suaa le Mɛlɛka wo le mbo kindi ndu kɔl. (Masaa Bɛnduaa Diiŋ Nduaa 19:​5, 15-20) Okoŋ kɔɔli, mi Hɛsɛkiya paawa fɛɛnii Sɛnachɛluibi fɛɛni nda wo le chɔmndo maa o ve wana bolle kala le. (Koloniko Diiŋ Ndɔɔ 18:​14, 15) O mɛɛlulaŋ kpɔŋ, mi Hɛsɛkiya luei chioo o piŋndo niŋ le teleŋ vilɛi. (Koloniko Diiŋ Ndɔɔ 32:​2-4) Yɛɛ ndoo mɛɛlu yɛ yɔŋnɔŋ? Mi Chɛhowa yɔŋ maalikɛinɔɔ le tɛɛmboo puaa chɔuwaa Sɛnachɛluibi wa 185,000 o nyumndaŋ ma pilɛ niŋ kpe. Hɛsɛkiya ve pɛŋ kɔl maa keŋ cho yɔŋnɔŋ te!—Masaa Bɛnduaa Diiŋ Nduaa 19:​35.

13. (a) Yɛɛ nyɛ yɔŋnuŋ Choosɛ wo pɛɛku yɛ naa? (b) Yɛɛ ndoo yɔŋnuŋ yɛ Selua o ve kɔl te?

¹³ Yiyaŋndɔ vɛlɛ a nyɛ ndoo yɔŋnuŋ po feleŋgɔnɔɔ Choosɛ wo. Mɛɛ Choosɛ wa ichali o sooŋ chiɛi manyumndo niŋ Ichipi, o ve kɔl maa o wa niŋ masa kpaaya diiŋ ndɔɔ o Ichipi niŋ te. Ɔɔ Chɛhowa ndoo nɔla mbo soliŋ ndu kpeku le mbo piŋi yuŋgu ndɔɔ boondii yiaaŋ ma del kpulɛŋndo. (Chɛnɛsee 40:​15; 41:​39-43; 50:​20) A tonya, mi Chɛhowa tosa sɔɔŋ Choosɛ ve bɛɛ kɔl te woŋ. Yiyaŋndɔ vɛlɛ a Selua, kala mama makɔɔli Choosɛ wo. Selua yuwɛiyo wa pa kɔl maa Chɛhowa wa ndu chɛlɔɔ le mbo velu poo o ndɔɔ, o ve ko le mi chuaambɔ ndɔ buɛiyo vilul ndu le? Kposoŋ bɛɛ Selua ve kɔl maa o cho Aase violɔɔ le.—Chɛnɛsee 21:​1-3, 6, 7.

14. Tiindaŋ yɛɛ naŋ nɔ yɛ o Chɛhowa niŋ?

¹⁴ Ŋ nɔ o kɔl maa Chɛhowa cho kaamaalaŋ tosa le mbo faŋa bahawɛila naalaŋ tuupa mi chieeŋ sɛnɛiyo hiŋ te. Nduyɛ ŋ cho Chɛhowa dimul le sɔɔŋ bɛndu bɛndoŋ tosaa o yoomu naa niŋ te. Kɛ ŋ sina maa mi Chɛhowa mala buɛiyaa nduaa laalaŋnda o sindɔɔ niŋ o nɛila kɔndɔfiltaŋ niŋ. Nduyɛ Chɛhowa siŋgaŋ ndɔ le. (Nuawɔ Aisaya 43:​10-13.) Keŋ tosa ni miŋ dɔu tiindaŋndo o ndu niŋ. Nduyɛ ŋ nɔ tiindaŋndo maa o cho naa kpaaya naŋ hau ba wo ke, le hɛnaŋ ndɔɔ tosaa. (Kɔliŋtiaŋ Diiŋ Ndɔɔ 4:​7-9) Yɛɛ naŋ pɛɛku yɛ o taamaselii Hɛsɛkiya, Choosɛ, a Selua wo niŋ ? Nduyɛ Chɛhowa nɔla mbo mala naa teleŋ naŋ wa o bahawɛila kala kalalaŋ niŋndo, te o yɔŋ pɛ miŋ dɔu tiindaŋ naa o ndu niŋ.

15. Yɛɛ mala yɛ naa le miŋ sɔla “kɔl nyulu Mɛlɛka yɔŋgu wo” o yɔŋ bɛɛ miŋ nɔ bahawɛilaŋ? Nduyɛ vɛɛ hei looku yɛ yɔŋnɔŋ?

¹⁵ Vɛɛ naŋ sɔla yɛ “kɔl nyulu Mɛlɛka yɔŋgu wo” o yɔŋ bɛɛ miŋ nɔ bahawɛilaŋ? Ŋ nɔ miŋ kɛsi chaŋyɛi nɛi a Chɛhowa ikala poŋ. Sala baŋaa Chiisu Kiliti wo tosa ni miŋ nɔ chaŋyɛi waa naa a Mɛlɛka. Baŋaa cho walta kaamaala Chɛhowalaŋ opilɛ ni. Baŋaa tosa mbo mal naa le hakila naalaŋ, miŋ sɔla kɔl iyama walaŋndo, nduyɛ miŋ sɔɔŋguu Chɛhowa ikɛi kpɛɛluŋ.—Chɔŋ 14:​6; Chemisi 4:​8; Pitɛ Tasoo 3:​21.

O NƆLA MBO MANDA KƆLTA NAALAŊ A YIYAŊNDA NAALAŊ

16. Yɛɛ yɔŋnuŋ yɛ te ŋ sɔla pɛ “kɔl nyulu Mɛlɛka yɔŋgu wo”? Chɔmndɔ taamaseliiyo.

¹⁶ Yɛɛ yɔŋnuŋ yɛ te ŋ nɔ pɛ “kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo”? Baabuiyo dimi maa mbo “manda” kɔlta naalaŋ a yiyaŋnda naalaŋ. (Filipiaŋnda 4:​7) Diomndo hoo “manda,” o chɛŋ tum o diom ndaa soliŋ kpeku le puaa chɔuwaa kundaa ndaa ke wallo le chioo mandaa wa. Mi kunda waa naa ndoo manda wanaa wa Filipai chiee wa. Mi ndaa lɔl ichɔl nyɛkɛndɛi kanifuule ndaa sina maa waŋnda cho chiee ndaa mandaa. O nɛi pilɛ koŋ choo kpe, te ŋ nɔ pɛ “kɔl nyulu Mɛlɛka yɔŋgu wo,” ŋ buulaŋ te, nduyɛ mi kɔlta naalaŋ a yiyaŋnda naalaŋ la wa la nyulu fɛɛ. Ŋ sina maa Chɛhowa buulaŋ le naa nduyɛ o yeema naa miŋ sɔla batiuwaa. (Pitɛ Tasoo 5:​10) Nduyɛ mi keŋ mala naa ŋ hiu kɔl landɛiyo nɔ ɔɔ miŋ tambu kɔl te.

17. Yɛɛ cho yɛ naa mala le miŋ tiindaŋ Chɛhowa a teleŋ nyɛpalaa bɛndoo?

¹⁷ Nyɛpalaa bɛndoo cho suŋ hunɔɔ le waŋchieeya kpou. (Maatiu 24:​21, 22) Ŋ sina kpeekpei nyɛ cho naa yɔŋnɔŋndo le. Kɛ, ŋ nɔ miŋ hiu buulaŋ le teleŋ koŋ te. Mi che bɛɛ naa ŋ sina sɔɔŋ Chɛhowa cho tosa fau woŋ te, kɛ ŋ sina Mɛlɛka naa. Ŋ sina nyɛ o tosa o sindɔɔ niŋ le buɛiyaa nduaa laalaŋnda wa. Ŋ che maa nyɛ o nyɛ yɔŋnuŋ pɛ, Chɛhowa cho tosa mi sabu ndɔɔ peeluŋ. Naapum o cho ndi tosa o nɛi naŋ ve niŋ kɔl te wo choo! Lelaŋ, teleŋ o teleŋ naŋ piɛi pɛ o Chɛhowa lo, mbo ke naa “kɔl nyulu . . . wana chiee nɔla mbo sina bɛɛ pɛŋgu le wo.”