Baa Kafalaŋ la Chuu Niŋ pa o Masale Chieeŋndeŋ Leŋ Niŋ?

Mi kafala masaa waa tosa chieeŋndo balɔɔ silɔ laŋ la hiŋ a fulamakɔɔlila wɔɔŋndaŋ.a Le tamaseliiyo, a teleŋ naa Kolonaa dello, ma bii wanaa bɛnduaa o lɛŋii bɔɔbɔɔ niŋ tɔɔyaŋ maa a de nyɛsɔlaa ndaa nɔ mi ndaa mala wanaa naa Kolonaa bii ya. Mi kafalaŋ ndaŋ la tosa waŋnda ndaa sɔla lɛ mala ndoo yeemaŋ le kɛndiaa ndaa wo le, nduyɛ mi hei chuu nda saŋgaa a piɔmndaŋ.

Kafala masaa haa cho paaliaŋndo wana o wana. Mi Deeve Kɛmɛluŋ masa paandoo o Bilitiŋ niŋ dimi aa: “Kafalaŋ la cho ko maa kɔmii sooŋ tɛndiaa, nduyɛ lelɛŋ o lelɛŋ le hau niŋ hau o ndi niŋ.”

Kɛ, ŋ nɔ laalaŋndo maa kafalaŋ kpou la cho suŋ hunɔɔ chuwɔɔ. Le sabu yɛɛ? Tofawɔ nyɛ Baabuiyo dimi a nyɛ Mɛlɛka cho hunɔɔ tosa wo okɔɔ.

Vɛɛ naŋ looku yɛ sina maa Mɛlɛka cho nyɛ tosa le kafalaŋ chiiyo?

Nyɛ Mɛlɛka dimi o Baabuiyo niŋndo cho hoo ni, mbo dimi aa: “Ya Mɛlɛka, sakpoyɛi ya I kala ni, nduyɛ mi tul kafalaŋ a yɔŋ wɔɔŋndo leyɛ.”b (Aisaya 61:​8) Te Waŋnda wa pɛ saŋgaa le kafala acheleŋnda tosal nda laŋ, Mɛlɛka sina a ndi okɔɔ. (Pulɔwaa 14:​31) Mbo mɛi lediom aa: “I che nyɛ palaa nda cho wanaa nɔ wana malaa le wa tusioo choo wo. . . . I cho hunɔɔ mi huŋ chiindiaa nda.”—Sam 12:​5.

Yɛɛ Mɛlɛka cho nyɛ tosa? Mɛlɛka cho hunɔɔ le Masɛi chieeŋnde toosiaa le. Kɛ, o cho hunɔɔ ndi siŋga a masale ndɔleŋ. Leŋ naŋ veelu ni aa: “Masale Mɛlɛkaleŋ.” (Maki 1:​14, 15; Maatiu 6:​10) Mi Baabuiyo dimi aa: “Mɛlɛka cho choo choo wo cho hunɔɔ masale cheleŋ hɛli. . . Masɛi paanduei kinɛi, masaleŋ ndeŋ le cho ndi hunɔɔ pesi pesi, i ve lɛ le. Mi masale sɛnɛileŋ ndeŋ le lo le fɛɛŋ a fɛɛŋ.” (Daaniɛɛ 2:​44) Mɛlɛka cho hunɔɔ faŋa kafala kɛ kɛ naŋ cho hau chɔɔ.

Masale nɔ niŋ lakafa o lakafa le leŋ

Vɛɛ naŋ looku yɛ sina maa kafala ve niŋ o Masale Mɛlɛkaleŋ niŋ te? Ŋ yaasiaŋndɔ sɔɔŋ muŋ amatou.

1. 1. Kpaayaa. Mɛlɛka Kpou Kpou Wo o ba kpaayaa leMasaa fula niŋ.—Sɔɔŋ Chɔɔmaŋndoŋ 11:​15.

   Le yɛɛ hei cho yɛ suɛi sɔvɛ: Le mi masale chieeŋndeŋ le tosa wallo, mɛɛ ma bii waŋnda nyɛsɔlaa o ba. Teleŋnda bɔɔbɔɔ mi hei tosa ma sɔla fondaa le luɛiyɔɔ niŋndo, viileŋ, a nyɛsɔlaa waŋnda dioo o kafalaŋ choo. Kɛ Mɛlɛka Kpaaya Kpou Kpou Wo cho Masaleŋ ndeŋ toolu ni. Lelaŋ, wanaa cho wa o leŋ bɛŋgu wa cho sɔla nyɛm nda hauba woŋ.—Sam 145:​16.

2. 2. Masaa. Mɛlɛka yulu Chiisu iso le mbo wa Masaa le Masale ndɔleŋ.—Daaniɛɛ 7:​13, 14.

   Le yɛɛ hei cho yɛ suɛi sɔvɛ: A yɔŋ bɛɛ mi waŋndo wa masa kɛndɛ, mi wanaa cho ndu ikɛiya nyindu ndu le iwɔɔŋnde tosaa. (Ikilisiaatii 7:​20) Kɛ Chiisu ndu chɔm maa o chɛl luɛiyɔɔ niŋ te. (Maatiu 4:​8-11) Chiisu nɔ kaala kpeekpeiyo le waŋnda chieeya. Nduyɛ o nɔ yeemɛi le nda nyɛm nda hauba woŋ kioo.—Sam 72:​12-14.

3. 3. Sawalaŋ. Sawala cho o Masale Mɛlɛkaleŋ bɛŋgulaŋ la cho walaŋ, nduyɛ te ŋ diikuŋ laŋ pɛ miŋ wa a kɔl kɛndɛ.—Sam 19:​7, 8.

   Le yɛɛ hei cho yɛ suɛi sɔvɛ: Teleŋnda bɔɔbɔɔ mi i wa ikala le sawala waŋchieeya biyɔɔ bila, ma tosa yɛ yiɔɔ o laŋ biyɔɔ niŋ, nduyɛ pɛŋ mi la ke nda fondaa le kafalaŋ tosaa. Kɛ o baa pilɔɔ choo, sawala Mɛlɛkalaŋ la cho teŋgeŋ, te ŋ diikuŋ laŋ pɛ miŋ sɔla tɔnɔlaŋ tau. (Aisaya 48:​17, 18) O faŋaŋ okoŋ kɔɔli, o cho ko malaa le sawalaŋ ndaŋ la mala naa le, kɛ mi la tosa miŋ siŋga yiyaŋnda naalaŋ. (Maatiu 22:​37, 39) Mɛlɛka sina nyɛ cho naa o kɔllo, nduyɛ mbo chɔm nyiɛɛye o sawala ndɔlaŋ niŋ.—Chɛluimaya 17:​10.

Le chɔɔloo sinaa a nyɛ Mɛlɛka dimi le hunɔɔ tosaa a kafalaŋ okɔɔ wo, ŋ cho num dɛɛniaa le ma chɔɔlu pɛɛku a diomnda mɛyaala cho o Baabuiyo niŋndaŋ.

• Veelu diomndaŋ o suɛi lebolle hei niŋ, “Masale Mɛlɛkaleŋ—O Cho Masale Nɔ Lakafa Le.” Le ma chɔɔlu sina sɔɔŋ ŋgaa le sabu Masale Mɛlɛkaleŋ le nɔ niŋ lakafa le wo.

• Te a yeema pɛ ma chɔɔlu sina a masale Mɛlɛkaleŋ okɔɔ nduyɛ a nyɛ le cho hunɔɔ tosa o chieeŋndo choo wo, tofa vidueiyo hoo Yɛɛ Cho yɛ Masale Mɛlɛkaleŋ?

• Le ma sɔla tɔnɔɔ o diomnda mɛyaalaŋ ndaŋ niŋ, a cho o veelaa le pɛɛku Baabui ŋ paawa nyɛ o nyɛ le wo tosaa.