Baa Intanɛtiiyo Cho pa Chuauwaa Numnda Paaliaŋndo?—Vɛɛ Baabuiyo Mala yɛ Kalaŋ Chuauwa

“Bahawɛi mahullo cho hau nyɔɔ opilɛ o cho feleŋguaa paaliaŋndo tau wo, nduyɛ ŋ saaluŋ maa nyɛ kpeekpeiyo opilɛ o cho hunɔɔ a bahawɛiyo hoo wo cho Intanɛtiiyo soliŋndo kpeku tau ni.”—Dr. Vivek Murthy, U.S. surgeon general, New York Times, Kooŋndo 17, 2024.

Vɛɛ Kalaŋ chuauwa manda yɛ chuauwaa ndaa le ma fafaŋ kpundɛla intanɛtiiyo chuu chuaambuaa laŋ? Baabuiyo nɔ silala sɔvɛlaŋ a hei okɔɔ

Yɛɛ kalaŋ chuauwa nɔ yɛ ma tosa?

Ŋyaasiaŋndɔ sawala mandaalaŋ lapum o Baabuiyo niŋ.

“Mi wana taasioo yiyaŋ fɛŋ tuupa mbo tosa nyɛ o nyɛ.”—Polowaa 14:​15.

Le mɛɛ Intanɛtiiyo soliŋndo kpeku nɔ kpundɛlaŋ tau yɛ, chɛl mi nyɛ o nyɛ nyindu num le chuauwaa numnda chɛlɔɔ ma soliŋ ndu kpeku le. Tuupa ma chɛl mi chuauwaa numnda soliŋ intanɛtiiyo kpeku, kindiŋ fɛɛŋ ma sina maa a nɔ niŋ taasioo tau le ma tol sawala ŋ kɛsul nda a intanɛtiiyo soliŋndo kpeku okɔɔ laŋ kɔɔli, ma a tiuba ma hiou lachi a chaŋyaŋ kɛndɔŋ nɔɔ, nduyɛ ma fafaŋ nyɛm wɔɔŋ nda handu o intanɛtiiyo choo woŋ.

• Le ma chɔɔlu sina a hei okɔɔ, veelu diomndaŋ o sɔɔŋ lebolloŋ muŋ bɛŋgu “Baa chua Nuu Nɔ Pa Mbo Soliŋ Intanɛtiiyo Kpeku?” a “Chuauwaa Numnda Pɛɛkoo Mɛɛ Nda Soliŋ Intanɛtiiyo Kpeku Nyɛkɛndɛi Yɛ.”

“La soliŋ teleŋ nyaa kpeku nyɛkɛndɛi.”—Ɛfisiaŋnda 5:​16.

Te a chɛl pɛ le mi chua numndo soliŋ intanɛtiiyo kpeku, mɛɛ kɛsul ndu sawalaŋ a mɛɛ o soliŋ ndu kpeku yɛ, nduyɛ ma tɛɛsial ndu mɛɛ hei cho ndu manda yɛ. Wa lahɔl teleŋ o teleŋ. Te a chiikuu ndɔɔ pɛ chua numndo siŋgaŋndo o kaalaŋ niŋ, kindiŋ ma tosa a sabu le ma dɔɔniaa teleŋ chua numndo chua le intanɛtiiyo soliŋndo kpeku wo.

• Soliŋ viduei nda cho wa poonyiaa o pɛŋgɛi humbuei choo wo Tosa Suukaŋndo o Intanɛtiiyo Choo a Taasi le chuauwaa numnda malaa ma bii bila le sabu i cho suɛi sɔvɛ le kpeleŋndo nɔɔ le intanɛtiiyo soliŋndo kpeku wo

Chɔɔlu pɛɛku

Baabuiyo dimul naa “maa o palɛi mɛɛlɛi niŋ [naŋ cho ni, nduyɛ] nyɔɔ kiandu niŋ bɔɔ” (2 Timoti 3:​1-5) Kɛ a koŋ kpou, o nɔ silala sɔvɛla naŋ tual kɔɔli laŋ le mala miŋ biunuŋ ndo. Yaula tɔlnuŋ o Baabuiyo choo laŋ la cho hiouwɔɔ 20 le kalaŋ chuauwa a chuauwaa ndaa malaa, a saaluŋ laŋ o fondaa hoo Naa Mahul Cho Feleŋguaa Palaa Wo.