Wooluŋ Wooluŋ Lemasa Peelu Huului Baabuiye Wo
Hau, wanaa bɔɔbɔɔ nɔ yiyaŋnda teŋgeŋ teŋgeŋndaŋ a masaleŋ okɔɔ. Ma kɛɛ le sawala piiliaŋ yoomula ndalaŋ lepaa o lepaa laŋ biyɔɔ, nduyɛ ma simul masaleŋ a dialuŋ fulaa le yiyaŋ ndalaŋ chɔmndo. O masaleŋ niŋ bɛɛ, mi wanaa bɛnduaa a wanaa kɛsi sawalaŋ nda simulaŋ o foofolaŋ choo nduyɛ mii wa ikala le ma tuɛiyaŋ ladiom. Mi sɔɔŋ waa nuaa tosa mi wooluŋ wooluŋ lemasaa kanduŋ nduyɛ mbo tosa masaa waa sɔla lɛ batiuwaa o wali ndaa niŋ te.
Taama taama wooluŋ wooluŋ cho Amɛlika a Bilitiŋ (o nda veelu vɛlɛ aa United Kingdom) tɛɛŋndo cho bɔɔ o sɔvɛ. Le sabu yɛɛ? Kanifuule mi Baabuiyo dimi maa wooluŋ wooluŋndo cho wa masɛi ŋiiŋnde hei tɛɛŋ—nduyɛ a teleŋ pilɛ koŋ kpeekpei Masale Mɛlɛka kila o choo choo niŋndeŋ le cho hunɔɔ bahawɛila cho o lɛŋndeŋ choo laŋ chii ni.
Wooluŋ wooluŋ lemasaa “o palɛi mɛɛlɛi niŋ”
Baabuiyo nɔ huului kɔndɔfille i poonyiaa o yau Daaniɛɛ wo niŋ. O huului keŋ niŋ, mi Mɛlɛka chɔm “nyɛ nɔ le yɔŋnɔŋndo o palɛi mɛɛlɛi niŋndo.” A chilaŋ okɔɔ huuluei hei cho ni, nduyɛ i cho suɛi sɔvɛ o yoomu wanachioo niŋ—Daaniɛɛ 2:28.
Huului hei, o lɔma sɔlaŋ niŋ Mɛlɛka chɔm masaa Babilɔŋ ni. Mi Mɛlɛka chɔm masaa piɔm bɛndu bɛndoo o toosiaa a nyɛm yɛ yiɔɔŋ. Okoŋ kɔɔli, mi Daaniɛɛ wana suaa le Mɛlɛka wo tɛɛsiaa a piɔmndo hoo okɔɔ maa, chɔŋ o bolleŋ haaa o poloŋ, o sim le kpaayala lemasala cho wa chɔnɔŋndo o chieeŋndo choo nduyɛ mi la del taŋ.a O mɛɛlulaŋ kpɔŋ, pou sim le masale Mɛlɛka kila leŋ ndo cho piɔmndo hoo hunɔɔ pesi pesi.—Daaniɛɛ 2:36-45.
A mɛɛ huuluei hei dimi yɛ, Masale Mɛlɛkaleŋ le cho masɛi hei pesi pesi nduyɛ mi le lo isisi le fɛɛŋ a fɛɛŋ. A masale pilɛŋ ndeŋ okɔɔ koni Chiisu pɛɛku buɛiyaa nduaa ni le ma wa piɛileŋ. Mbo dimi aa: “Maa Masale numndeŋ le huŋ.”—Maatiu 6:10.
Kuɛɛ huului Baabuiye hei dimi yɛ maa wooluŋ wooluŋ lemasa cho wa? Bɛŋgula piɔmndo hoo “la wa la muuliaŋ a chiliŋnde vɛlɛ a puuloo.” (Daaniɛɛ 2:33) Nyɛm ndaa soliŋ kpeku ma muuliaŋ le buŋgaŋ piɔmndo hoo toosiaa woŋ wa teŋgeŋ. Keŋ sim ni maa, kpaaya lemasaa o pilɛ cho wa teŋgeŋ a la tɔlaŋ. Yɛɛ hei sim yɛ? Mi Daaniɛɛ hiau lachi a tɛɛsiaa aa:
A mɛɛ huului hei dimi yɛ, masale sim lewundu le bɛŋgula piɔmndo hoo leŋ, wooluŋ wooluŋ lemasa cho wa o leŋ bɛŋgu. Wanaa cho wa o masale leŋ bɛŋgu wa cho tosa ni mi kpaaya ndɔ lemasaa dɔɔnaŋ.
Huului Daaniɛɛ Dimi Ve Cho Hau Peelɔŋndo
Bɛŋgula piɔmndo hoo sim le Amɛlika nda Bilitiŋ, masɛi cho wallo diompilɛ mii nɔ kpaayaa chieeŋndo kpou choo ve. Vɛɛ sɔɔŋ cho hau yɔŋnɔŋndo woŋ toolu yɛ hei?
Bɛŋgulaŋ vɛlɛ a sooŋ cho ŋ “muuliaŋ a puulu ŋkpɛɛnɔɔ vɛlɛ a chiliŋnde.” Muuliaŋndo hoo chɔm ni kɛsɛ maa masaleŋ ndeŋ le nɔ yoomuma bɔɔ le. (Daaniɛɛ 2:42) Kpaaya Amɛlika nda Bilitiŋ nɔ wo cho hau dɔɔnaŋndo sanaa a wanaa cho nda o ba bɛŋgu wa. Le tamaseliiyo, mi pilachieeya o masɛi ŋiiŋnde hei bɛŋgu mal chɔulaŋ ndapila tɛɛŋ. Mi apum simul masaleŋ le dila ndalaŋ. Nduyɛ buŋgaŋ Masaa ndaa chua a teleŋ nda wa challe o masaleŋ choo woŋ, a peelu muŋ te. A sɔla batiuwaa le sɔɔŋ nda dimi woŋ tosa le, kanifuule diompilɛ cho wanaa ndaa tɛɛŋ te.
Mi Daaniɛɛ 2 suaa a kpaayala lemasalaŋ okɔɔ
Ŋ tofaŋndɔ nyɛ sɔɔŋ ŋpum a huului Daaniɛɛ ve okɔɔ sim lewundu woŋ, nduyɛ miŋ che mɛɛ ŋ cho hau peelɔŋndo yɛ.
Huuluei: “Masaleŋ ndeŋ le cho wa le piɔuwaŋ. Kɛ le nɔ niŋ tiŋ kpaaya ichiliŋndo.”—Daaniɛɛ 2:41.
Nyɛ hei simndo: Mi che bɛɛ sɔŋgɔla lemasalaŋ a wooluŋ wooluŋnda lemasa cheleŋ cho o masɛi Amɛlika nda Bilitiŋ nde bɛŋgu, kɛ kpaayaa puaa chɔuwaa nda nɔ wo hiou poloŋ. Le saboo hoo, a nɔla ma soliŋ kpaaya nda cho maa ichiliŋndo kpeku.
Peelɔŋndo
Mi kɔɔnaa hoo Stockholm International Peace Research Institute dimi maa, te a dɔu pɛ nyɛsɔlaa Amɛlika nda Bilitiŋ soliŋ kpeku o wɔsii 2023 niŋ, le puaa chɔuwaa ndaa tooloo wo naapilɛ, o hiau o lɛŋii 12 cho o yauwo choo ma wa kilulaŋndo ve soliŋ kpeku wo.
Mi kɔɔna cheleŋ dimi aa: “Chɛlaŋ cho Amɛlika nda Bilitiŋ tɛɛŋ le lɛŋii ndɛi mandaa wo . . . simnuŋ kɔɔna nɔ kpaayaa mbo hiau lɛŋii kɛ kɛ wo, o yɔŋ bɛɛ ma dɔu ndi i ŋiiŋ naapilɛ. Nduyɛ nda hiou nyɛm mapuuluŋ sɛnɛiyoŋ nɔ poloŋ.”—Strategic Command, U.K. Ministry of Defence, Nyaakuɛiyo 2024.
Huuluei: “Mɛɛ ŋ che nuaa sooŋ ndɔŋ labɛŋgoŋ ŋ muuliaŋ a chiliŋnde vɛlɛ a puuloo yɛ, lende koni masaleŋ ndeŋ le nɔ niŋ kpaayaa ni vɛlɛ a dialuŋ vilɛiyoŋ.”—Daaniɛɛ 2:42.
Nyɛ hei simndo: Mi che bɛɛ Amɛlika nda Bilitiŋ nɔ kpaaya puaa chɔuwa tau, kɛ sɔɔŋ cho yɔŋnɔŋndo o masɛi ndɛi bɛŋgu woŋ chɛl nda ma tosa nyɛ o nyɛ nda yeema pɛ le. Teleŋndaŋ lapum, te o cho mi wanaa cho nda o ba bɛŋgu wa chɛl nda le nyɛ tosa le, mɛɛ mɛɛ nda kindiŋ a nɔla ndu tosa le.
Peelɔŋndo
“Wanaa pɛɛku a sɔɔŋ lemasaŋ okɔɔ wa dimi maa piɔuwaŋ cho o masaleŋ Amɛlika niŋndo tosa ni ma dema le nyɛ nda kɛɛsiaa le tosaa le chieeŋndo balɔɔ silɔ wo tosaa. Le tamaseliiyo, mɛɛ a hɛnɛkɛyɛi vɛlɛ a yulaleŋ okɔɔ cho nuaa yɛ.”—“The Wall Street Journal.”
“Wooluŋ wooluŋ lemasaa cho suŋ suŋ o masaleŋ Bilitiŋ niŋ mbo hiau maa paandu, nduyɛ mi hei tosa wanaa tosa wallo o masaleŋ bɛŋgu wab nɔla lɛ sɔɔŋ kɔɔna le. Fulamakɔɔlioo cho ni, masaa waa nɔla lɛ wallo le siŋgaŋnda yeemaŋ ndaŋ tosaa le pilachieeyaa ndaa malaa le.”—Institute for Government.
Huuluei: “Masaleŋ ndeŋ le wa niŋ le muuliaŋ a waŋnda chieeya. Kɛ . . . a ve niŋ o diompilɛ niŋ te.” Daaniɛɛ 2:43, tɛɛsiaa amatou.
Nyɛ hei simndo: Mi pilachieeya o masɛi ndɛi niŋ sɔla dio le yiyaŋnda ndalaŋ chɔmndo o sɔɔŋ choo, kɛ nda ni, masaa waa ni wana o wana sɔla tɔnɔ leniŋ te.
Peelɔŋndo
“Hau, wanaa cho o Amɛlika niŋnda ve ko a kɔl kɛndɛ le masaa ndaa vɛlɛ wanaa nda cho wallo latulu wa le.”—Pew Research Center.
“Tiindaŋ waŋnda nɔ hau o masaa waa niŋndo cho hiouwɔɔ lachi a dɔɔnaŋndo o wɔsiŋ bele ŋuɛɛnuŋ hiou woŋ bɛŋgu.”—“National Centre for Social Research.”
Vɛɛ huului Daaniɛɛ ve cho yɛ peelɔŋ o chilaŋ niŋ?
A mɛɛ huului Daaniɛɛ ve dimi yɛ, Amɛlika nda Bilitiŋ cho hiouwɔɔ lachi a kpaayaa lemasaa nɔɔ haaa mi Masale Mɛlɛkaleŋ le huŋ siŋga masɛi waŋnda chieeya kpou.—Daaniɛɛ 2:44.
O huului toolu huului Daaniɛɛ ve niŋ, mi Baabuiyo dimi o Sɔɔŋ Chɔɔmaŋndoŋ niŋ maa “masaa o lɛŋndeŋ choo kpou” cho chuuŋgiaŋ naapilɛ le Chɛhowac Mɛlɛka simullo le chɔu Amakɛdɔŋ ndo, “chɔuwo o paale Mɛlɛka Kpaaya Kpou Kpou Wo leŋ choo.” (Sɔɔŋ Chɔɔmaŋndoŋ 16:14, 16; 19:19-21) A teleŋ chɔuwo hoo, Chɛhowa cho masɛi waŋnda chieeya kpou tɛɛmbuu, nduyɛ mbo wɔɔsuu nyɛ o nyɛ kpaayala lemasalaŋ la tosa, la sim lewundu le piɔm huului Daaniɛɛ ve soo a ndu okɔɔ wo.
Le chɔɔloo sinaa, tofawɔ buŋgɛi hei “Yɛɛ Cho Yɛ Chɔu Amakɛdɔŋ ndo?”
Pɛɛku o huului Daaniɛɛ dimi a wooluŋ wooluŋ lemasaa okɔɔ ve niŋ
Mi Baabuiyo suaa kpendekele a wooluŋ wooluŋ lemasa cho Amɛlika a Bilitiŋ ndo okɔɔ. Nduyɛ, te ŋ pɛɛku pɛ a hei okɔɔ miŋ bii sɔɔŋ yɛ yɛŋ cho hau yɔŋnɔŋndo woŋ bila.
A cho sina le sabu Chiisu dimul buɛiyaa nduaa le ma wa yuŋyeŋ te o hiŋ a sɔɔŋ lemasaŋ chieeŋndo hoo okɔɔ wo. (Chɔŋ 17:16) Nduyɛ a cho vɛlɛ chɔɔlu sina le sabu Chiisu, wana Mɛlɛka hɛli le mbo wa masaa le masale ndɔleŋ ndo dimi aa: “Masale nileŋ le cho masale waa chieeŋ nanuŋ te” wo.—Chɔŋ 18:36.
A cho kɔl dɛɛniaa sɔla le sinaa maa masale Mɛlɛkaleŋ le suŋ kandɔŋ nduyɛ maa le cho hunɔɔ a salala Mɛlɛka chuel waŋnda chieeya buŋgɛi laŋ o chieeŋndo choo.—Sɔɔŋ Chɔɔmaŋndoŋ 21:3, 4.
A cho tiindaŋndo nɔ le chilaŋ, nduyɛ fɛɛŋ bɛɛ a yɔŋ niŋ isiooŋ maa sɛɛŋgiaŋnda cho hau kaalaŋ tɛɛŋ ndaŋ la cho chieeŋndo tɛɛmbuu le.—Sam 37:11, 29, 29.
Huuluei Daaniɛɛ ve chɔm kpendekele maa Amɛlika nda Bilitiŋ, a sim lewundu le bɛŋgula piɔmndo wa, cho kpaaya lemasaa mɛɛlaa le chieeŋndo ni. Te masaleŋ ndeŋ le faŋaŋ pɛ, masale walaŋndeŋ o choo choo niŋ le cho wa waŋnda chieeŋ choo ni. Leŋ le cho masale Mɛlɛkaleŋ ni!
Le chɔɔloo sina a nyɛ Masale Mɛlɛkaleŋ le tosa niŋ le waŋnda chieeyaa wo, tofa vidueiyo hoo, Yɛɛ Cho yɛ Masale Mɛlɛkaleŋ?
a Tofa kɔfoo hoo “Kpaaya Lemasa Suu Kuɛɛ Huului Daaniɛɛ Ve Soo Yɛ a Ndu Okɔɔ?”
b Wanaa tosa wallo o masaleŋ bɛŋgu wa cho “wana o wana masaleŋ le hɛli ma wa nda wallo o ba bɛŋgu ma paawa nda wa ni.”—Merriam-Webster’s Unabridged Dictionary.
c Diola Mɛlɛka laŋ la cho Chɛhowa ni. (Sam 83:18) Tofa buŋgɛi hei “Nɛɛnɛ Cho Yɛ Chɛhowa?”