Le Yɛɛ Seiyaa Chɛhowaa Yi Kindimɛsiiyo Le?
Choola Waŋnda Nyiinduu Naa Laŋ
Choolaŋ: Seiyaa Chɛhowaa yi kindimɛsii le kanifuule a laalaŋ o Chiisu niŋ te.
Tonyaa: Kilisiɔŋnda naŋ cho ni. Ŋ laalaŋ maa le mi wana o wana sɔla pioŋɔɔ, mɛɛ mbo laalaŋ o Chiisu Kiliti niŋ.—Walta Wanaa Chiisuaa 4:12.
Choolaŋ: Nya piɔu yuŋgulaŋ tɛɛŋ ni, kanifuule, la cho wanaa cho leniŋnda pɛɛkoo maa a ya kindimɛsii le.
Tonyaa: Ŋ buulaŋ tau tau le yuŋgulaŋ, nduyɛ, ŋ soliŋ Baabuiyo kpeku le chaŋyɛi cho o yuŋgoo niŋ nde chɔɔloo kindioo.
Choolaŋ: Te la yi kindimɛsiiyo le, la nɔla mi la tosa kɛndɛi, nduyɛ mi la dɔunuŋ nyaale o chieeŋndo choo le.
Tonyaa: Ŋ kindiŋ le kɛndɛi waŋnda tosallo teleŋ o teleŋ. (Talelaŋ 11:25; Luomaŋnda 12:18) Le tamaseliiyo, mɛɛ naŋ bii bɔŋaŋnda naalaŋ yɛ, a mɛɛ naŋ dimi yooŋgu kɛndɛ Mɛlɛka wo yɛ cho o chɛlaŋ a nyɛ Chiisu dimi wo. Mi Chiisu dimi aa, “Fondo Mɛlɛka ke nya kpaayaa hoo ni. Lelaŋ, te la tosal waŋnda sɔɔŋ muŋ pɛ, la bii nda nyɛ o nyɛ o ba sɔŋgɔ koŋ te.
” (Maatiu 10:8) Le handɔɔ lechoo, ŋ dimul waŋnda maa masale Mɛlɛkaleŋ koni le tiuba hunɔɔ a kɔl nyuloo o chieeŋndo hoo choo ni.—Maatiu 10:7.
Le yɛɛ la yi kindimɛsii le?
Chiisu dimul naa maa piɔm ndɔɔ koni naŋ loonuŋ ni, o cho paale o veluŋ ndeŋ te.—Luku 22:19, 20.
Wanaa Chiisu vem hɔlte ndɔ va, a buɛiyaa Chiisu wa yi kindimɛsii le. Yau nda veelu o puuluei niŋ aa, New Catholic Encyclopedia dimi aa, “
a kandu dunyɛi vialaŋnde hei o wɔsiŋ 243 niŋ mɛɛ Chiisu vi,
” Wɔsioŋ muŋ hiou niŋ kɛmɛ chɔm a teleŋ wana mɛɛlaa kpɔŋ vi o wanaa Chiisu vem hɔlte ndɔ wa choo.Nyɛ o nyɛ cho o chɔm maa Chiisu veluŋ o Yindimiiyo 25 choo le; paale ndɔle vialaŋ ndeŋ le cho le poonyiaa kposoŋ o Baabuiyo niŋ te.
Ŋ laalaŋ maa Mɛlɛka kuisiŋ Kindimɛsiiyo o kɔl kanifuule, o naamula wanaa sina Mɛlɛka le wa choo dunyɛi hei chɛŋ tum ni.—Kɔliŋtiaŋ Diiŋ Ndɔɔ 6:17.
Vɛ niŋ suɛi Kindimɛsiiye chuaa amayoomu?
Wanaa bɔɔ bɔɔ sina maa Kindimɛsiiyo cho o Baabuiyo niŋ te. Nduyɛ, a sina vɛlɛ maa o naamula wanaa sina Mɛlɛka le wa niŋ i chɛŋ tum ni. Kɛ a koŋ kpou, a cho wɔ Kindimɛsiiyo yolaŋ. Mi waŋnda haa nyuna dɔɔ aa, Le yɛɛ nya faŋaŋ yɛ Kilisiɔŋnda a tuaa choo? Vɛ niŋ suɛi Kindimɛsiiye chuaa amayoomu?
Baabuiyo dɛɛniaa naa le miŋ yiyaŋ le naapila, le miŋ “sina nyɛ Mɛlɛka hɛnaŋ ndo.
” (Luomaŋnda 12:1, 2) O pɛɛku naa maa naŋ bii tonyaa a bala tiɔɔŋ. (Chɔŋ 4:23, 24) Tonya i cho ni maa ŋ buulaŋ a mɛɛ waŋnda che naa yɛ, kɛ, nyɛ Baabuiyo dimi wo tolɔɔ kɔɔli naŋ che nyɛ sɔwɛ o yoomu naa niŋ ni. O yɔŋ bɛɛ mi waŋnda sina naa lapi le.
Mi che bɛɛ naa ŋ yi Kindimɛsii le, kɛ ŋ ke wana o wana bɛɛleŋ le mbo tosa chuaŋ chuaa le ndu pila. Ŋ pɛɛsa wanaa cho ndu yolaŋ nda le. Ŋ luɛi sondo naa o dunyɛi waŋnda haa niŋ te.