Nɔŋgɔwaa, Tapioo 2
“Nyina diandaa nɔla mbo yaasiaa nyɛ o nyɛ, o yɔŋ bɛɛ aa sɔɔŋ cho ŋ viaŋnaŋ a Mɛlɛka okɔɔ woŋ.”—1 Kɔl. 2:10.
Te o yɔŋ pɛ maa o kunda bɛndoo niŋ ŋ cho ni, heelu bɛɛ baa a chue num teleŋ o teleŋ te, lepum ma yiyaŋ maa o bɛnda ma chalnuŋ. Kɛ wu ŋdial le mulioo yɔŋgoo le. Bɛɛndiaa mulilaŋ tau le bɔŋaŋ kɛ kɛ. Okoŋ te a chue num o bɔŋaŋndo kandɔŋndo le, naapum a cho num chua tuupa mi bɔŋaŋndo chuu. Te a wa pɛ buŋgɛi Bandu Mɛŋgɛlaa bɛɛndiaa, yiyaŋ a mɛɛ pɛl kɛ kɛ chɛlaŋ a suɛi lebolii buŋgɛi keŋ yɛ. Hei tosaa cho num mala ma bɛɛndiaa mulila kɛndɛlaŋ tau. Le handɔɔ lechoo, naapum a bɛɛndiaŋ le mulioo yɔŋgoo o pɛlta nɔ tonyala kendu bila biyɔɔ laŋ choo. Le yɛɛ? Kanifuule lepum wanaa bɔɔ yɔŋguŋ le mulioo yɔŋgoo o pɛlta waa lende choo le. Te o wa yɛ maa o bɔŋaŋnda bɔɔbɔɔ a chue num le mulioo yɔŋgoo le? Tuupa mi bɔŋaŋndo kanduŋ, chɔm wana cho chilaŋ chuaa wo pɛl ŋ yeema mulioo yɔŋgoo wo. w23.04 21-22 ¶9-10
Kpekedoo, Tapioo 3
“[Mi] Choosɛ . . . tosa nyɛ maalikɛinɔ Chɛhowa wo dimul ndu wo. Mbo chua niko Meele o nɔɔ niŋ.”—Mat. 1:24.
Choosɛ wa o bɛɛndiaŋ teleŋ o teleŋ le nɛi chɔmaa Chɛhowaa tolɔɔ kɔɔli. Nduyɛ, mi keŋ tosa mbo simnuŋ pɔnɔ kɛndɛ. Bɛmbɔɔ le yaa kpulukuu, mi Chɛhowa ke ndu nɛi chɔmaa a yuŋgu ndɔɔ okɔɔ. Nduyɛ teleŋ kɛ kɛ, haupa mi ndoo dɔu nɛi chɔmaa koŋ o wali niŋ, o yɔŋ bɛɛ mi ndii wa ikala ndu o ba le tosaa. (Mat. 1:20; 2:13-15, 19-21) Mɛɛ Choosɛ tol nɛi chɔmaa Mɛlɛkaa kɔɔli, mi keŋ mala ndu le mbo manda Meele, mbo toolu ndu, vɛlɛ mbo ke ndu nyɛm o hauba woŋ. A tonya, naapum mi hei tosa mi Meele chɔɔlu Choosɛ kaala, nduyɛ mbo chɔɔlu bɛɛleŋ nɔ le ndu. Piaanduaa, la tual tamasi Choosɛ wo kɔɔli, te la wa pɛ silala tɔlnuŋ o Baabuiyo choo laŋ tolɔɔ kɔɔli le yuŋgula nyalaŋ biyɔɔ nyɛkɛndɛi. Te la wa pɛ hei tosaa o yɔŋ bɛɛ mi i wa ikala, keŋ tosa mi la chɔm kaalaa le landaa nyaa, nduyɛ mi la kindi nɔla nyalaŋ poŋ. Mi ndepilɛnɔ pilɛ o Vanuatu niŋ, o cho niŋ o nɔɔ le wɔsilaŋ hiouwɔɔ 20 ndo dimi aa: “Te pɔnɔ nuu tol pɛ nɛi chɔmaa Chɛhowaa kɔɔli, mi keŋ tosa mi chɔɔlu ndu bɛɛleŋ ke tau. Mi i tosa vɛlɛ mi wa hɛnɛkɛ nduyɛ mi chɔɔlu tiindaŋndo dɔwɔɔ o kɛɛsiaala ndɔlaŋ niŋ.” w23.05 21 ¶5
Kɔɔlumaa, Tapioo 4
“Nɛi bɛndoo o wa niŋ o fondaa hoo. Nɛi bɛndoo hoo a veelu ndu niŋ aa, ‘Nɛi Diandaa Mɛlɛkaa.”—Aisaya 35:8.
Chuuwaa wa fula Babilɔŋ ma miiŋgu o lɛŋnde ndaleŋ niŋnda wa simnɔŋ a diandaa Mɛlɛka ndaa o hɔl. (Ditɔ. 7:6) Kɛ keŋ sim nuaa maa ndaa nɔ lɛ ma siŋgaŋ le ma nɛŋi Chɛhowa kɔl te le. Chuuwa haa a bɔɔbɔɔ o Babilɔŋ niŋ ndaa veluŋ ni. Nduyɛ naapum ndaa dɛli niŋ a sɔɔŋ tosaa, mɛɛ Babiloniaŋnda ndaa tosa yɛ. Mɛɛ Chuuwa haa miiŋgu Isɔluɛi, wɔsiŋ bɔɔbɔɔ okoŋ kɔɔli, mi kɔndɔfillo bii Masa iBuŋgaa Nɛhimaya, mɛɛ o saaluŋ maa chuauwaa Isɔluɛiya apum ndaa chiee suɛi maŋgalɛi Chuuwa ndaa dimi ve le. (Ditɔ. 6:6, 7; Nɛhi. 13:23, 24) O Hibuluiye niŋ Diom Mɛlɛkaa wa o poonyiaa ni. Lelaŋ, vɛɛ chuaambuaa feleŋguaa kaŋ wa yɛ pɛɛku le Chɛhowa kaalaa, nduyɛ ma piɛi ndu, te ndaa chiee Hibuluiye le? (Ɛsi. 10:3, 44) A tonya, Chuuwa haa ndaa nɔ ma tosa siŋgaŋndaŋ. Kɛ i wa tɛtɛlɛ le ma tosa siŋgaŋndaŋ o Isɔluɛi niŋ, naa piɛile tonyaleŋ le wa miiŋgoo o pɔmpɔmbɔ wa.—Nɛhi. 8:8, 9. w23.05 15 ¶6-7