Baa Mɛlɛka Cho Ba o Ba Fee?
Muli Baabuiyo yɔŋgu wo
Mɛlɛka tiuba mbo che ba o ba fee, nduyɛ mbo tosa nyɛ o yeema le tosaa wo. (Pulɔwaa 15:3; Hibuluiya 4:13) Baabuiyo dimi naa maa Mɛlɛka cho ba o ba fee, vɛlɛ o nyɛ o nyɛ niŋ te. Kɛ o pɛɛku naa maa, wana kpeekpeiyo Mɛlɛka cho ni, nduyɛ maa o nɔ fondaŋ kpeekpei o cho wo.
Mɛɛ Mɛlɛka cho yɛ: O inyinaya Mɛlɛka cho ni. (Chɔŋ 4:24) Wana o wana chi ndu le. (Chɔŋ 1:18) Baabuiyo chɔm kpendekele maa, Mɛlɛka nɔ fondaŋ kpeekpei o cho wo vɛlɛ maa o cho ba o ba fee le.—Aisaya 6:1, 2; Sɔɔŋ Chɔɔmaŋndoŋ 4:2, 3, 8.
Fondaŋ Mɛlɛka cho wo: O choo choo niŋ Mɛlɛka cho ni. Nduyɛ o nɔ fondaŋ kpeekpeiyo, ‘naa o cho ichali’ o choo choo niŋnda. (Masaa Bɛnduaa Tasiaa 8:30) Baabuiyo chɔm maa “paale pilɛ, mi kiilaa Mɛlɛkaa a kua Mɛlɛka Yaawɛɛ lachi le ma kɔ chɔmnuŋ ndu.”a Hei chɔm maa, Mɛlɛka nɔ fondaŋ kpeekpei o cho wo.—Choobu 1:6.
Te o yɔŋ pɛ aa Mɛlɛka cho ba o ba fee le, baa o buulaŋ pa kpeekpei le ya?
Ei. O buulaŋ le num. Mi che bɛɛ o inyinaya Mɛlɛka cho ni, kɛ o buulaŋ a wanaa cho ndu piɛiyo wa, nduyɛ mbo tosa nyɛ le nda malaa. (Masaa Bɛnduaa Tasiaa 8:39; Koloniko Diiŋ Ndɔɔ 16:9) Tofawɔ mɛɛ Chɛhowa chɔm yeemɛi kpeekpeiye le wanaa cho ndu piɛiyo a kɔllo kpou wa yɛ:
Te a piɛi pɛ: Mi Chɛhowa tuei nyɛ ŋ dimi wo te a piɛi dɔɔ pɛ o ndu lo.— Koloniko Diiŋ Ndɔɔ 18:31.
Te sɔɔŋ kindilaŋ wa pɛ num choo: “Wanaa kɔltaŋ la wa haa la tambei a nya palaa a nɔ lɛ tiindaŋ te wa, Mɛlɛka Yaawɛɛ o kua nda levil te, piŋioo o piŋi nda ni.”—Sam 34:18.
Te a yeema pɛ nɛi chɔmaa: Chɛhowa dimi aa, “I cho num pɛɛku, mi chɔm num nɛi ŋ nɔ ma kuɛ choo wo.” O tosa hei sanaa a Diom ndɔɔ Baabuiyo.—Sam 32:8.
Choola waŋnda dimi a Mɛlɛka okɔɔ laŋ
Choolaŋ: Mɛlɛka cho ba o ba fee.
Tonyaa: O cho o chieeŋndo choo le Mɛlɛka cho le, nduyɛ o cho vɛlɛ o halaa niŋ te. (Masaa Bɛnduaa Tasiaa 8:27) I cho tonya maa, mi looŋ a nyɛm cheleŋ Mɛlɛka toosiaa woŋ “chɔm kɔndɔfiliyɛi” nduɛi. (Sam 19:1) Kɛ a koŋ kpou, Mɛlɛka cho o nyɛm muŋ niŋ te. Le taamaseliiyo, mi pɔu waŋndo suu o chiɛiyo wo chɔm mɛɛ o chaa pɔuwo suuwo yɛ. O nɛi pilɛ koŋ choo, nyɛm Mɛlɛka toosiaa miŋ wa muŋ chɔɔ wo, chɔm naa a suliŋnda ndɔlaŋ okɔɔ, mɛɛ kpaayaa, taasioo a kaalaa cho naa yɛ.—Luomaŋnda 1:20.
Choolaŋ: Mɛlɛka nɔ mbo wa ba o ba fee, le halikpeŋ mbo sina a sɔɔŋ kpou okɔɔ, nduyɛ mbo chɔm kpaaya ndɔɔ.
Tonyaa: Nyina diandaa Mɛlɛka soliŋ kpeku ni le sɔɔŋ tosaa. Sanaa a nyina ndɔ diandaa, o tiuba mbo che nyɛ o nyɛ, nduyɛ mbo tosa sɔɔŋ ba o ba fee vɛlɛ a teleŋ kɛ kɛ. Hali mbo ve bɛɛ loŋ o iwana chieeya niŋ te.—Sam 139:7.
Choolaŋ: Nyɛ dimiŋ o Sam 139:8 niŋndo chɔm maa Mɛlɛka cho ba o ba fee. Baabuiyo dimi loŋ aa, “Te I hel ɛchɛnɛ pɛ, a cho loŋ. Te I tol o lɛŋndeŋ bɛŋgu pɛ . . . a cho loŋ.”
Tonyaa: Bolle Baabuileŋ le cho isɔɔ a naa kpeekpeiyaa Mɛlɛka cho wa okɔɔ le. Kɛ le cho naa pɛɛkoo maa, fondaŋ o fondaŋ cho yololɛ mi Mɛlɛka kɛɛ chɔ, nduyɛ mbo mala naa le.
a A mɛɛ Baabuiyo dimi yɛ, diola Mɛlɛkalaŋ la cho Chɛhowa ni.