Mɛɛ Nya Soli Bahawɛilaŋ Yɛ

Te la chal pɛ sɛnɛi o nɔɔ niŋ, bahawɛilaŋ la cho fula. Bahawɛilaŋ latiŋ cho fula o yiyaŋnda yɛyɛla nya nɔ laŋ niŋ, yeemaŋ, vɛlɛ a mɛɛ wana o wana fee bii sɔɔŋ komal ndu o yoomoo niŋndoŋ yɛ. Lepum yɛ, mi bahawɛilaŋ la fula naa cheleŋ, o sɔɔŋ nya ve bɛɛ kɔl te woŋ niŋ.

Le hei ma yeema le kpakpalaa nyɛ yɔŋnuŋndo. Kɛ Baabuiyo sila naa maa ŋ nɔ miŋ simul bahawɛila naalaŋ. (Maatiu 5:​23, 24) Te la tol pɛ silala Baabuiyo kɔɔli, la nɔla mila soli bahawɛila nyalaŋ.

1 LA SUUKAŊ O BAHAWƐI KALAA CHOO

NYƐ BAABUIYO DIMI WO: “Teleŋndo cho . . . le suɛi.” (Ikilisiaatii 3:​1, 7) Tosa a sabu mila chua teleŋndo le suukaŋndo o bahawɛi kalaa choo. Dimul wana nya cho o nɔɔ niŋndo tonyaa a yeemɛi numnde, nduyɛ mɛɛ ŋ yiyaŋ a suɛi keŋ okɔɔ yɛ. “Dimi tonyaa” lɔɔlɔɔ o wana nya cho o nɔɔ niŋndo lo. (Ɛfisiaŋnda 4:​25) O yɔŋ bɛɛ mi kɔllo tuulu num, tuunuŋ o kɔl le sɔŋga le. Kɛ te a muli pɛ dɛɛ, sɔŋgɔ fula o suukaŋ nya cho wo niŋ te.—Pɔlɔwaa 15:​4; 26:​20.

O yɔŋ bɛɛ mi nyɛ o dimi wo ve o nɛi le, chɔm nyɛiye. Puɛɛnuŋ le kaalaa a bɛɛleŋ chɔmndo o wana nya cho o nɔɔ niŋndo lo le. (Kolosiaŋnda 4:​6) La kindiŋ mila soli bahawɛi koŋ chɔ chɔ. Nduyɛ, la kialu baltaŋ dɔuwɔɔ le.—Ɛfisiaŋnda 4:26.

NYƐ Ŋ NƆ MA TOSA WO:

• Tofa le teleŋ bɛnda wo mila chal mila suukaŋ a bahawɛi koŋ okɔɔ

• Te chaŋ num wa pɛ suɛi, yaŋ ndu nilaŋ. Kialu ndu suɛi o sondo le. Num bɛɛ teleŋ numndo cho fuuluu le ma soo

2 YAŊ NILAŊ, NDUYƐ MA NƆ SINALAPƐŊGOO

NYƐ BAABUIYO DIMI WO: “La kaaliaŋ vellaa velle maa wanaa laalaŋ. Nduyɛ wana o wana la ke chaaŋaa nyaa bɛɛleŋ mbo hiou bɛɛ mɛɛ nda nda ke nya yɛ.” (Luomaŋnda 12:​10) Mɛɛ ŋ yaŋ nilaŋ yɛ cho nyɛ sɔvɛ. Kindiŋ ma chɔm sinalapɛŋgoo, nyɛiye, a tuisiŋndo o nyɛ waŋndo o pilɔɔ cho dimioo wo. (1 Pitɛ 3:​8; Chemisi 1:​19) Chɔm kɛsɛ maa nilaŋ ŋ cho ndu yaŋɔɔ ni. Te o bɛnda pɛ, kɛsi nyɛ ŋ cho tosaa wo ma yaŋ nilaŋ yekeŋ o nyɛ chaŋ num yeema le dimioo wo. Te koŋ te, nyuna ndu le mbo chum mila suukaŋ lechoo teleŋ cheleŋ. Te o wa pɛ ma yiyaŋ a wana nya cho o nɔɔ niŋndo maa wana malaa o cho ni, kɛ o cho yaamɔɔnɔ le, a “ve chɔ chɔ le tumboo dɔunɔŋndo le.”—Ikilisiaatii 7:​9.

NYƐ Ŋ NƆ MA TOSA WO:

• Yaŋ nilaŋ a kɔl numndo fau, o yɔŋ bɛɛ mi nyɛ ŋ cho tueiyɔɔ wo o hɛnaŋ num te

• Yaŋ nilaŋ le sinaa sabu o cho diomnda waa lende dimioo wo. Tofa mɔnɛla o cho wa solioo o suɛi niŋndaŋ, nduyɛ a mɛɛ diomnde ndɔleŋ le cho wa yɛ

3 LA LO O LEDIOM CHOO

NYƐ BAABUIYO DIMI WO: “Wali o wali kɛndɛ o nɔ tɔnɔɔ. Kɛ suɛi yɔŋɛi ndi tɔnɔ bɛɛ cho leniŋ te.” (Pɔlɔwaa 14:​23) Kɛɛsiaa kɛndɔɔ chɛlɔɔ cho letuu le. La nɔ mila dɔu nyɛ nya kɛɛsiaa wo o wali niŋ. Nyɛ yeemaŋndo cho ni, kindiŋndo le baalaa tosaa lechoo. Nduyɛ fulamakɔɔli kɛndɔɔ cho wa. (Pɔlɔwaa 10:​4) Te la tosa baalaa pɛ diompilɛ le maaliaŋndo vellaa velle, “la cho tɔnɔɔ sɔla” le wali nya kɛndɔɔ.—Ikilisiaatii 4:​9.

NYƐ Ŋ NƆ MA TOSA WO:

• La kɛɛsiaa nyɛ nya nɔ mila tosa le mi bahawɛiyo o fula wo

• Teleŋ o teleŋ la tofa te la cho pɛ hiouwɔɔ lachioo tosaa