O Cho Mɛlɛka Kpou Kpou kɛ Mbo Chɔm Sinapɛŋgoo

1, 2. (a) Teŋgeŋ yɛɛ cho yɛ mɛɛ Chɛhowa bii waŋnda yɛ, a mɛɛ wanaa nɔ kpaayaa wa bii waŋnda yɛ? (b) Yɛɛ naŋ cho yɛ pɛɛku o buŋgɛi hei niŋ?

MI WANAA nɔ kpaayaa wa teleŋnda bɔɔbɔɔ kindila wanaa cho nda o ba bɛŋgu wa ɔɔ naapum pɛɛŋ ma tusi nda kotaa choo. (Maatiu 20:​25; Ikilisiaatii 8:​9) Chɛhowa ndu tosa keŋ kposoŋ te! Mi che bɛɛ ndu cho Mɛlɛka Kpou Kpou wo ni, wana hiou kpaayaa nɔ le chieeŋndo kpou wo, kɛ o nɔ sinapɛŋgoo a mɛɛ o bii waŋchieeyaa lahakiaa yɛ. O nɔ kɛndɛi nduyɛ o buulaŋ a yiyaŋnda naalaŋ, vɛlɛ a nyɛm naŋ hau ba woŋ. O sina maa wanaa lahakiaa naŋ cho ni, nduyɛ o sina vɛlɛ nyɛ naŋ tiuba le tosa le wo. Lelaŋ, fɛɛŋ bɛɛ Chɛhowa dimul naa le tosaa mbo hiou mɛɛ naŋ nɔla le tosaa yɛ le. —Sam 103:​13, 14.

² O Baabuiyo niŋ, ŋ pɛɛku mɛɛ Chɛhowa chɔm wanaa nduaa sinapɛŋgoo yɛ. Ŋ soonuŋndɔ a taamaseliilaŋ la yaa okɔɔ: O tasoo, mɛɛ Chɛhowa mala Saamiɛɛ o nɛi lebɛɛ niŋ le Ila Masa Wanaa Soliaa Lasalaa yooŋgu kpundɔɔ dimullo yɛ. O diiŋ ndɔɔ, mɛɛ Chɛhowa biunuŋ Muuse yɛ teleŋ ndoo yiyaŋ maa o nɔla mbo sim Isɔluɛiya lachi le nda solioo Ichipi le wo. Nduyɛ o yaa ndɔɔ, mɛɛ Chɛhowa chɔm Isɔluɛiya sinapɛŋgoo yɛ teleŋ nda mal Ichipi wo. Yɛɛ naŋ pɛɛku yɛ Chɛhowa o ba o taamaseliilaŋ ndaŋ niŋ, nduyɛ vɛɛ naŋ tuallɛ taamasi ndɔɔ kɔɔli?

MBO CHƆM POOMBƆƆ SINAPƐŊGOO

3. Suɛi kɔndɔfili kuɛɛ yɔŋnuŋ feleŋgɔnɔɔ Saamiɛɛ nyuma pilɛ, nduyɛ naapum nyuna kuɛɛ huŋ yɛ naa o kɔl? (Tofa fotueiyo o peele naŋ kandu leŋ choo.)

³ Saamiɛɛ wa wɔ o pɔmbɔ mbo kandu wallo o maaŋndo niŋ. (Saamiɛɛ Tasoo 3:​1) Nyuma pilɛ, mɛɛ o wa o luaŋ, mi suɛi kɔndɔfille yɔŋnuŋ ndu.a (Tofa tɛɛsiaa amatou.) (Nuawɔ Saamiɛɛ Tasoo 3:​2-10.) Mbo tuɛi waŋndo diola ndɔlaŋ veeloo. Saamiɛɛ ndoo yiyaŋ ko maa fallo Ila Masa Wanaa Soliaa Lasalaa wa ndu veeloo ni. Okoŋ mbo chaŋ a lebɛɛ mbo kua a kiltaŋ naa Ila chua nduyɛ mbo dimi aa, “Mi cheŋ ya, kɛkɛ. I tuei ma wa ya veeloo.” Kɛ mi Ila dimul ndu aa, “I veelu num te.” Okoŋ kɔɔli, mi nyɛ pilɛ koŋ kpe yɔŋnuŋ vɛlɛ lediiŋ, mi Ila sina maa Mɛlɛka wa Saamiɛɛ veeloo ni. Okoŋ, mi Ila dimul Saamiɛɛ nyɛ o nɔ mbo dimi wo te o tuei niŋ pɛ veeloo nduyɛ mi Saamiɛɛ diikuŋ ndu. Le yɛɛ Chɛhowa kɛɛ yɛ Saamiɛɛ dimullo o kandɔŋndo maa ndu wa Saamiɛɛ veeloo ni? Baabuiyo suu a keŋ okɔɔ le. Kɛ naapum Chɛhowa tosa keŋ kanifuule ndoo buulaŋ a yiyaŋnda Saamiɛɛ laŋ okɔɔ.

4, 5. (a) Yɛɛ Saamiɛɛ ndoo tosa yɛ mɛɛ Chɛhowa ke ndu yooŋgoo le lla dimullo? (b) Yɛɛ nyɛ yɔŋnuŋ hoo wo pɛɛku yɛ naa a Chɛhowa okɔɔ?

⁴ Nuawɔ Saamiɛɛ Tasoo 3:​11-18. Sawa Chɛhowaa dimi maa Chuaambuaa nɔ ma ke kaasoŋnda bɛɛleŋ, taama taama wanaa wa chilaŋ chuaa wa. (Ɛsɔdɔɔ 22:​28; Lɛvitikɔɔ 19:​32) Le hei, wanaa ve kɔl pɛɛŋ maa poombɔ feleŋgɔnɔɔ maa Saamiɛɛ ndoo kua o lla lo idiiyo, mbo bii kɔllo, okoŋ mbo dimul ndu yooŋgu Mɛlɛkaa le. Baabuiyo dimul naa aa, “siooŋnde wa Saamiɛɛ le mbo dimul lla nyɛ o che o yilaŋnde niŋ ndo.” Kɛ mi Mɛlɛka chɔm lla kpendekele maa ndu Mɛlɛka wa Saamiɛɛ veeloo ni. Fulamakɔɔlioo wa ni, mi IIa dimul Saamiɛɛ maa o viaŋ nyɛ o nyɛ Mɛlɛka dimul ndu wo le. Okoŋ, mi Saamiɛɛ diikuŋ Ila, “mbo chɔm ndu nyɛ o nyɛ Mɛlɛka dimul ndu.”

⁵ O kpeekpei niŋ, yooŋgoo hoo ve yooŋgu kɔndɔfili le lla le. Kanifuule tuupa mi hei yɔŋnuŋ, mi “wana suaa le Mɛlɛka wo” dimul Ila yooŋgu suu waa lende. (Saamiɛɛ Tasoo 2:​27-36) Nyɛ yɔŋnuŋ hoo wo pɛɛku naa mɛɛ Chɛhowa chɔm sinapɛŋgoo vɛlɛ a mɛɛ o cho wana taasi yɛ.

6. Yɛɛ naŋ pɛɛku yɛ a mɛɛ Mɛlɛka mala feleŋgɔnɔɔ Saamiɛɛ yɛ?

⁶ Baa feleŋgɔnɔɔ ŋ cho ni? Te lende i cho ni, mɛɛ nyɛ yɔŋnuŋ feleŋgɔnɔɔ Saamiɛɛ wo chɔm maa Chɛhowa bii bahawɛila numndaŋ bila vɛlɛ a yiyaŋnda numndaŋ. Naapum wana lasiɔmboo ŋ cho ni, nduyɛ ma che ndi ikala kpoke le kaasoŋnda yooŋgu kɛndɔɔ dimullo ɔɔ le waa teŋgeŋ a wanaa nya cho wɔsila pilɛ laŋ nda. Kɛsiŋ o kɔl maa Chɛhowa yeema mbo mala num. Lelaŋ, piɛi o ndu lo nduyɛ chɔm ndu yiyaŋnda numndaŋ. (Sam 62:​8) Yiyaŋ yiŋgoloŋ o taamaseliila feleŋguaa cho o Baabuiyo niŋndaŋ choo mɛɛ Saamiɛɛ cho naa yɛ. Nduyɛ suukaŋ a puaapiliaa vɛlɛ a ndepiliaa nya cho wɔsila pilɛlaŋ nda ɔɔ kaasoŋnda a sɔla niŋ batiuwaa a bahawɛila suu ŋ nɔ laŋ okɔɔ wo. A tiuba ma chɔm num teleŋnda Chɛhowa mala ndalaŋ, naapum o nɛila nda pila ve bɛɛ kɔl te laŋ niŋ.

MBO CHƆM MUUSE SINAPƐŊGOO

7, 8. Vɛɛ Chɛhowa chɔm yɛ maa ndoo buulaŋ tau a yiyaŋnda Muuselaŋ?

⁷ Mɛɛ Muuse fuuluu wɔsilaŋ 80, mi Chɛhowa ke ndu wali kala kalaa le tosaa. Wali koŋ wa ni, le mbo kɔ soli Isɔluɛiya o chɛleŋ niŋ Ichipi. (Ɛsɔdɔɔ 3:​10) Wallo hoo wa bɔɔ suɛi kɔndɔfili le Muuse kanifuule, ndoo chua niŋ wɔsilaŋ 40 saa mandaa o lɛŋnde Midiaŋ ndeŋ niŋ. Mi Muuse dimi aa, “Wana maavɛɛ ya l cho yɛ mi kuɛ naa masa bɛndoo Ichipi chua, le mi kɔ soli Isɔluɛiya o chɛleŋ niŋ Ichipi?” Okoŋ mi Chɛhowa ke Muuse tiindaŋndo nduyɛ mbo dimul ndu aa, “I cho wa latulu a num.” (Ɛsɔdɔɔ 3:​11, 12) Mi Chɛhowa dimul ndu vɛlɛ maa, bɛnduaa o Isɔluɛi niŋ cho “laalaŋ a ndu.” Kɛ a koŋ kpou, mi Muuse nyuna vɛlɛ aa, “Kɛ te o wa yɛ mi waŋnda Isɔluɛi a kɛɛ le laalaŋndo a nyɛ ya l dimul nda wo, nduyɛ ma yeŋ ya lani le?” (Ɛsɔdɔɔ 3:​18; 4:​1) Mɛɛ dimioo Muuse wa kpendekele ni maa naapum Chɛhowa ve o nɛi le! Kɛ mi Chɛhowa biunuŋ Muuse. Mbo ke ndu pɛɛŋ kpaayaa le mbo tosa kaamaalaŋ. O kpeekpei niŋ, Muuse wa wana chiee tase Baabuiyo soo okɔɔ wo ni le kpaaya suu waa naa sɔlaa.—Ɛsɔdɔɔ 4:​2-9, 21.

⁸ A suukaŋ kɛndɔɔ hoo kpou, mi Muuse nuuviaa nɛi cheleŋ le fulaŋndo leniŋ. Mbo dimi maa o cho wana chaa isɔɔ le. Okoŋ, mi Mɛlɛka dimul ndu aa, “I cho num mala ma soo. Nduyɛ nyɛ o nyɛ ŋ nɔ le dimioo I cho num chɔm.” Baa Muuse wa niko o bɛɛndiaŋ le kɔlaŋ? Sako. Mbo dimul Mɛlɛka le mbo vem wana cheleŋ! Okoŋ, mi Chɛhowa tuulu kɔl a Muuse. Kɛ ndoo buulaŋ ndɔ kɛ a mɛɛ Muuse ndoo yiyaŋ yɛ. Lelaŋ, mbo yɔŋ Elɔŋ le mbo wa sondo suaa le Muuse.—Ɛsɔdɔɔ 4:​10-16.

9. Vɛɛ biuwɔŋ Chɛhowaa vɛlɛ a kɛndɛi nduɛi mala yɛ Muuse le simnɔŋndo sim lachinɔ kɛndɛ?

⁹ Yɛɛ nyɛ yɔŋnuŋ hoo wo pɛɛku yɛ naa a Chɛhowa okɔɔ? Le mɛɛ Chɛhowa cho Mɛlɛka Kpou Kpou wo yɛ, ndoo tiuba mbo soliŋ kpaaya ndɔɔ kpeku le Muuse siooŋnde lueiyo, okoŋ mi Muuse diikuŋ ndu. Kɛ mi Chɛhowa biuŋ ndu nduyɛ mbo ke buɛi ndɔ tusiaŋ koŋ tiindaŋndo maa o cho wa latulu a ndu. Baa mi sɔɔŋ bɛnda o nɛi koŋ choo? Ei, miŋ bɛnda! Nduyɛ mi Muuse simnuŋ sim lachinɔ sɔviɔɔ le wanaa Mɛlɛkaa. Mbo kindiŋ le acheleŋnda sinapɛŋgoo chɔmndo vɛlɛ a nda biyɔɔ mɛɛ mɛɛ Chɛhowa wa a ndu yɛ.—Nɔmbaa 12:​3.

10. Tɔnɔ yɛɛ naŋ sɔla yɛ te ŋ chɔm pɛ acheleŋnda sinapɛŋgoo maa Chɛhowa?

¹⁰ Yɛɛ hei pɛɛku yɛ naa hau? Te pɔnɔɔ, kala chuaa ɔɔ bɛndu kundaa ŋ cho ni, mɛɛ a nɔ kpaayaa o tiŋ acheleŋnda choo. Le saboo hoo, i cho bɔɔ suɛi sɔvɛ le ma tol taamasi Chɛhowaa kɔɔli le ma chɔm laa num, chuauwaa numnda vɛlɛ a wanaa cho o kundaa niŋnda sinapɛŋgoo, kɛndɛi, nduyɛ ma wa wana biuwaŋ. (Kolosiaŋnda 3:​19-21; Pitɛ Tasoo 5:​1-3) Te a kindiŋ pɛ ma tol taamasi Chɛhowa Mɛlɛka nda Chiisu Kiliti wo kɔɔli, o cho wa tɛtɛlɛ le mi acheleŋnda soo o numndo nduyɛ ma ke nda kɔl dɛɛniaa. (Maatiu 11:​28, 29) A cho vɛlɛ wa taamasi kɛndɛ le nda.—Hibuluiya 13:​7.

WANA PIŊIAA KPAAYA BƐNDOO KƐ MBO CHƆM SINAPƐŊGOO

11, 12. Vɛɛ Chɛhowa tosa yɛ le mi Isɔluɛiya sinaŋ kɛsɛ maa a choŋnuŋ hɛnɛkɛ mɛɛ o wa nda solioo o lɛŋnde Ichipileŋ niŋ?

¹¹ Naapum Isɔluɛiya hiouwɔɔ miiliɔŋndaŋ layaa fula Ichipi ni a wɔsi 1513 tuupa mi Chiisu vialuŋ. Chuaambuaa, kaasoŋnda, naapum a wanaa wa a naalaŋ ɔɔ a namtaleŋ nda wa o faŋga koŋ tɛɛŋ. Le faŋga bɛndu waa naa malaa, simlachinɔ ndoo buulaŋ a waŋnda nduyɛ mbo bii nda bila wo ndoo yeemaŋ ni. Nduyɛ wana waa lende kpeekpei Chɛhowa wa le nda ni, sanaa a Muuse. Fulamakɔɔlioo wa ni, Isɔluɛiya ve a isiooŋ kposoŋ te mɛɛ nda wa fondaŋ ndaa sina nyɛkɛndɛiyo malɔɔ.—Sam 78:​52, 53.

¹² Vɛɛ Chɛhowa tosa yɛ le mi wanaa nduaa sinaŋ kɛsɛ maa a choŋnuŋ hɛnɛkɛ? Mbo kɔɔna Isɔluɛiya le ma “bɛɛndiaŋ nyɛ kɛndɛ kɛndɛi” mɛɛ nda fula Ichipi. (Ɛsɔdɔɔ 13:​18) Le mɛɛ nda wa a kɔɔnaa nyɛkɛndɛi o nɛiyo hoo choo yɛ, ma cha kpendekele maa Mɛlɛka ndaa wa sɔɔŋ bɛɛndiaa le nda ni. Mi Chɛhowa “simi nyɔɔ nda lachi maa hala tiŋi le nda nɛiyo chɔmndo ipala” nduyɛ a nyumndaŋ, mbo tosa mi “yiŋndeŋ le kua nda lachi” le nda yiyalaŋndo maa o wa latulu a nda nduyɛ maa ndu wa nda mandaa ni. (Sam 78:​14) Nduyɛ Isɔluɛiya ndaa yeema tiindaŋ waa lende kanifuule, nyɛ cheleŋ wa nda hunɔɔ yɔŋnɔŋ.

13, 14. (a) Vɛɛ Chɛhowa manda yɛ Isɔluɛiya o Pee Siaŋa Mɛŋma Ihɛllo? (b) Vɛɛ Chɛhowa chɔm yɛ maa o nɔ kpaayaa mbo hiau Ichipiaŋnda poloŋ?

¹³ Nuawɔ Ɛsɔdɔɔ 14:​19-22. Yiyaŋndɔ maa num bɛɛ wa loŋ a Isɔluɛiya latulu. La nɔ naa kuaa cheleŋ te. Sovɛiyaa Ichipiaŋnda cho nya kiltaŋ kɔɔli, nduyɛ Pee Siaŋa Mɛŋma Ihɛllo cho nya lachi. Okoŋ, mi nyɛ wa nya lachi maa hala tiŋi wo miiŋgu nya amakɔɔ, mbo sim nya a Ichipiaŋnda tɛɛŋ. Nda cho niŋ o nyumndaŋ niŋ, kɛ mi kaamaa yɔŋnuŋ mi nyɛ teŋgaa wa nya choo! Okoŋ, ma che mi Muuse siɛndi ba ndɔɔ o pioo choo, nduyɛ mi hueiyii bɛnduei fula ba paaleŋ le chaŋndo, mi pioo tɛnda tɛɛŋ kpala haaa kumbuei i pilɛi. Okoŋ, mi yuŋgu numndo, visiaa numnda a wana cheleŋnda bɛɛ kpou kei o pee koŋ tɛɛŋ a kɔɔnaa nyɛkɛndɛi. Mi kɔndɔfillo bii num kanifuule, looli cho lɛŋ te nduyɛ fondaa cho o chulukɛi le. Lɛŋndeŋ le cho le vesɛi sɛɛŋ nduyɛ le cho le kala poŋ, o cho tɛtɛlɛ le kɔlaŋ lechoo. Le hei, wanaa kua bɛɛŋ bɛɛŋ nda bɛɛ lo kɔlaŋ haaa ma fuuluu kpeŋgei i pilɛi.

¹⁴ Nuawɔ Ɛsɔdɔɔ 14:​23, 26-30. A nyɛ cho hoo yɔŋnɔŋndo wo kpou, mi Feloo, wana yoŋga bɛndoo a diɔmii nduɛi kandu num a chaaŋaa numaa Isɔluɛiya kiltaŋ kɔɔli. Okoŋ, mi Muuse siɛndi vɛlɛ ba ndɔɔ o mɛŋndaŋ choo, mi mɛŋndaŋ ma miiŋgu o foofola ndɔla paandulaŋ. Nduyɛ mi ma kumbu Feloo nda sovɛiyaa nduaa. O pilɛ bɛɛ fula le!—Ɛsɔdɔɔ 15:​8-10.

15. Yɛɛ nyɛ yɔŋnuŋ hoo wo pɛɛku yɛ num a Chɛhowa okɔɔ?

¹⁵ Nyɛ yɔŋnuŋ hoo wo pɛɛku naa nyɛ cheleŋ a Chɛhowa okɔɔ. Mɛlɛka tosa sɔɔŋ laasi laasi le, nduyɛ suliŋndo hoo mala naa miŋ sinaŋ kɛsɛ maa ŋ choŋnuŋ hɛnɛkɛ. (Kɔliŋtiaŋ Tasoo 14:​33) Maa wana mandaa lasaa o kaala saa nduaa wo, Chɛhowa chɔm maa o buulaŋ le wanaa nduaa o nɛila bɔɔbɔɔ niŋ. Mbo manda nda yaamɔɔwaa ndaa o ba. Hei ke naa tiindaŋndo vɛlɛ a kɔl dɛɛniaa, taama taama mɛɛ naŋ cho niŋ sɔɔŋgoo o mɛɛlula chieeŋndo hoo kpɛɛluŋ yɛ.—Pulɔwaa 1:​33.

16. Vɛɛ naŋ sɔla yɛ tɔnɔɔ te ŋ yaasiaa pɛ mɛɛ Chɛhowa piŋi Isɔluɛiya yɛ?

¹⁶ Hau bɛɛ, Chɛhowa buulaŋ le wanaa nduaa mɛɛ nda cho kunda kpou. Mbo mala nda le ma nɔ chaŋyɛi kɛndɛi a ndu nduyɛ mbo manda nda yaamɔɔwaa ndaa o ba. Nduyɛ o cho hiouwɔɔ lachi a hei tosaa haaa mbo lo okoŋ mi nyɛpalaa bɛndoo fuuluu. (Sɔɔŋ Chɔɔmaŋndoŋ 7:​9, 10) Lelaŋ, a wa feleŋguaa ɔɔ yuuwa, a wa kɛndiaa ɔɔ namtaa, wanaa Mɛlɛkaa nɔ ma wa a isiooŋ ɔɔ ma nyiiya a teleŋ nyɛpalaa bɛndoo le.b (Tofa tɛɛsiaa amatou.) Nduyɛ pɛɛŋ, nyɛ nda cho tosa wo cho wa teŋgeŋ! A cho loonɔŋ diomnda Chiisulaŋ aa, “La wa niko lehɔl o nɛi, kani fondole . . . boondii Mɛlɛka cho nya piŋi ve i cho niŋ kpɛɛluŋ.” (Luku 21:​28) O yɔŋ bɛɛ mi Kɔki chiŋalaŋ nda, ndu cho ni, lɛŋii cho chuuŋgiaŋ diompilɛ ve, kɛ mi i nɔ kpaayaa mbo hiau Feloo wo, wanaa Mɛlɛkaa cho nɔ tiindaŋndo maa Chɛhowa cho nda manda. (Isikiaa 38:​2, 14-16, NW) Le yɛɛ? Kanifuule a sina maa Chɛhowa siŋgaŋ te. O cho vɛlɛ chɔm maa o nɔ kaalaa vɛlɛ maa ndu cho wana piŋi wanaa nduaa wo ni.—Aisaya 26:​3, 20.

17. (a) Vɛɛ naŋ sɔla yɛ tɔnɔɔ te ŋ pɛɛku pɛ sɔɔŋ yɔŋnaŋndoŋ o Baabuiyo niŋ a mɛɛ Chɛhowa manda wanaa nduaa yɛ? (b) Yɛɛ naŋ cho yɛ pɛɛku o buŋgɛi cho lachi ve niŋ?

¹⁷ O buŋgɛi hei niŋ, ŋ che taamaseliilaŋ lapum a mɛɛ Chɛhowa chɔm sinapɛŋgoo vɛlɛ a kɛndɛi yɛ mɛɛ o wa wanaa nduaa malaa, nɛi chɔmaa kioo vɛlɛ a nda piŋioo yɛ. Te a yiyaŋ pɛ o sɔɔŋ yɔŋnaŋ waa naa choo, kindiŋ ma pɛɛku nyɛ sɛnɛi cheleŋ a Chɛhowa okɔɔ, o bii fau sɔɔŋ yiŋgoloŋ ŋ sina wɔ bɛɛ paandu le woŋ. Mɛɛ ŋ pɛɛku fau a suliŋnda kɛndɛla Chɛhowalaŋ okɔɔ yɛ, lende kaala numndo le ndu vɛlɛ a tiindaŋ numndo o ndu niŋ cho kalu poŋ ni. O buŋgɛi cho lachi ve niŋ, ŋ cho pɛɛku nɛila naŋ tual taamasi Chɛhowaa kɔɔli laŋ le sinapɛŋgoo chɔmndo le waŋnda o yuŋgu naa niŋ, o kundaa niŋ, vɛlɛ a o wali pollo niŋ.