SUƐI LEBOLII 47
A Suliŋ Pa le Yiŋɔɔ Sɔlaa?
Chɔŋ a teleŋ ŋ kandu Baabuiyo pɛɛkoo wo, a sina niŋ sɔɔŋ tau a Chɛhowa okɔɔ. A tosa niŋ dɔɔ vɛlɛ siŋgaŋndaŋ tau ma wa dɔwɔɔ nyɛ ŋ cho pɛɛkoo wo o wali niŋ. Kɛ, naapum, sɔɔŋ pum cho ŋ cho num kuunaa le yɔŋgɔŋndo o Chɛhowa lo, nduyɛ ma sɔla yiŋɔɔ wo. Suɛi lebolle hei cho num chɔm simulta komal wana le yiŋɔɔ laŋ lapum. Nduyɛ, ma che mɛɛ ŋ chɔulaba laŋ yɛ.
1. Vɛɛ kpɛ ŋ nɔ yɛ ma sina Baabuiyo tuupa ma sɔla yiŋɔɔ?
Tuupa ma sɔla yiŋɔɔ, a nɔ fɛŋ ma “sina kɔl kalu kpeekpei cho a tonyaa okɔɔ wo.” (1 Timoti 2:4) Hei sim naa maa a nɔ fɛŋ ma sina Baabuiyo kpou malaŋ ŋ sɔla yiŋɔɔ le. Kilisiɔŋaa yiŋ niŋ bɛɛ le teleŋ vilɛi ya cho wɔ hiouwɔɔ lachi a pɛɛkoo. (Koloosiaŋnda 1:9, 10) Kɛ o wa bɛɛ lende, a nɔ ma bii sɔɔŋ taseŋ Baabuiyo pɛɛku woŋ bila. Bɛnduaa kundaa cho num mala le sinaa mɛɛ kpɛ ŋ bii niŋ sɔɔŋ muŋ bila yɛ.
2. Sɔɔŋ kuɛɛ ŋ nɔ yɛ fɛŋ ma tosa tuupa ma sɔla yiŋɔɔ?
Le ma sɔla yiŋɔɔ, a nɔ fɛŋ ma ‘mal yɔŋnda numnda wɔɔŋndaŋ ma muliŋ.’ (Nuawɔ Walta Kiilaa 3:19.) Hei sim ni maa, a nɔ ma tambu kɔl le yɔŋnda wɔɔŋnda ŋ tosa paandu laŋ, nduyɛ ma nyuna Chɛhowa le mbo mal num haki. A nɔ vɛlɛ ma kɛɛsiaŋ o kɔl le ma mal sɔɔŋ Mɛlɛka kɛɛ woŋ, nduyɛ ma tosa sɔɔŋ nɛŋi ndu kɔllo woŋ. Le handɔɔ lechoo, a nɔ ma yɔŋguŋ le wallo tosaa a kundaa latulu. Koŋ cho ni, kɔlaŋ o bɔŋaŋndaŋ a yooŋgu kɛndɔɔ dimioo.
3. Le yɛɛ siooŋnde nɔ mii kuuna num yiŋɔɔ le?
Mi apum yɔŋ siooŋnde maa te a yiŋ pɛ, a nɔla niŋ ma tosa nyɛ nda chuel Chɛhowa buŋgɛi yo le. Tonya i cho ni maa lepum, a cho wa biondɔŋndaŋ tosaa. Nduyɛ, hali puaa a waŋ laanduaa wa sindɛ Chɛhowa piɛiyo o laalaŋndo choo wa bɛɛ, mi ndaa tosa biondɔŋndaŋ. Kɛ Chɛhowa sina maa ŋ cho wanaa walaŋ te. (Nuawɔ Sam 103:13, 14.) Te a kindiŋ pɛ kpoke ma tosa o num tiuba wo, mbo naŋ kɔl tau! O cho num mala. Chɛhowa dimi pɛŋ maa nyɛ o nyɛ “nɔla naa faŋa o kaala [ndɔɔ] . . . bɛŋgu le.”—Nuawɔ Luomaŋnda 8:38, 39.
CHƆƆLU YAASIAA
Chɛhowa sinaa nyɛkɛndɛi, a mala ndɔɔ chɛlɔɔ tosa ma chɔulaba simultaŋ le yiŋɔɔ. Pɛɛku wɔ ma che mɛɛ hei yɔŋnuŋ yɛ.
4. Kindiŋ ma sina Chɛhowa nyɛkɛndɛi
Vɛɛ kpɛ ŋ nɔ yɛ ma sina Chɛhowa tuupa ma sɔla yiŋɔɔ? A nɔ ma sina ndu nyɛkɛndɛi. Kanifuule, koŋ cho tosa ni ma kaala ndu nduyɛ ma yeema le nyɛ nɛŋi ndu kɔllo wo tosaa. Handu VIDUEIYO ma che mɛɛ wanaa cho Baabuiyo pɛɛkoo chieeŋndo balɔɔ silɔ wa tosa niŋ hei yɛ. Okoŋ, mi la suukaŋ o nyunaa hoo choo:
O vidueiyo hoo niŋ, yɛɛ mala yɛ waŋnda apum ma suliŋ le yiŋɔɔ?
Nuawɔ Luomaŋnda 12:2, okoŋ mi la suukaŋ o nyunalaŋ ndaŋ choo:
Baa kiisaŋndo cho num pa a nyɛ ŋ cho pɛɛkoo o Baabuiyo niŋndo okɔɔ? Baa kiisaŋndo cho num pa te Seiyaa Chɛhowaa cho o pɛɛku tonyaa choo ni?
Te lende i cho ni, mɛɛ yɛɛ ŋ nɔ yɛ ma tosa a ndi okɔɔ?
5. Chɔulaba simulta cho num kuunaa le yiŋɔɔ laŋ
Te ŋ kɛɛsiaa pɛ le yɔŋgɔŋndo o Chɛhowa lo nduyɛ miŋ sɔla yiŋɔɔ, mi simultaŋ la komal naa tau. Le tamaseliiyo chɔɔ a hei okɔɔ, handu VIDUEIYO, okoŋ mi la suukaŋ o nyunalaŋ ndaŋ choo:
O vidueiyo hoo niŋ, simulta yɛɛ Nalaŋkele ndoo chɔulaba yɛ, le halikpeŋ mbo piɛi Chɛhowa?
Vɛɛ kaala o nɔ le Chɛhowa wo mala yɛ ndu mbo tiu simulta laŋ ba?
Nuawɔ Pulɔwaa 29:25 a 2 Timoti 1:7, okoŋ mi la suukaŋ o nyunaa hoo choo:
Yɛɛ ke yɛ naa kɔl simulaa le simultaŋ chɔulabaa?
6. Tiindaŋ Chɛhowa le mbo mala num
Chɛhowa cho num mala le ma nɔla hɛnaŋ ndɔɔ tosaa. Handu VIDUEIYO, okoŋ mi la suukaŋ o nyunalaŋ ndaŋ choo:
O vidueiyo hoo niŋ, yɛɛ wa yɛ po wa Baabuiyo pɛɛkoo wo kuunaa le yiŋɔɔ?
Yɛɛ o pɛɛku yɛ mbo mala ndu le tiindaŋndo dɔwɔɔ o Chɛhowa niŋ?
Nuawɔ Aisaya 41:10, 13, okoŋ mi la suukaŋ o nyunaa hoo choo:
Le yɛɛ ŋ nɔ yɛ ma nɔ tiindaŋndo maa, te a yɔŋguŋ pɛ o Chɛhowa lo ma chua buŋgɛi, a nɔla ma peelu ndi?
7. Chɔɔlu balika melaa nɔ le kaala Chɛhowa nɔ le numndo
Te a wa pɛ yiyaŋndo a mɛɛ kpɛ Chɛhowa kaala num yɛ okɔɔ, a cho chɔɔlu balika melaa nɔ le ndu, nduyɛ ma yeema ndu piɛiyo lefafɛɛŋ. Nuawɔ Sam 40:5, okoŋ mi la suukaŋ o nyunaa hoo choo:
Sɔɔŋ kɛndɛŋ kuɛɛ Chɛhowa tosallɛ num niŋ ma nɔ balika melaa tau le muŋ?
Wana ndoo suaa le Mɛlɛka wo Chɛluimaya wa ni, nduyɛ ndoo kaala bɔɔ Chɛhowa a diom ndɔɔ. Ndoo nɔ balika melaa le mɛɛ diola Chɛhowa laŋ la wa ndu choo yɛ. Mbo dimi aa: “Diomnda numndaŋ la tosa mi duaunuŋ nyaale nduyɛ mi naŋ kɔl tau. Kanifuule, diola numndaŋ la cho ya choo, Chɛhowa Mɛlɛka.” (Chɛluimaya 15:16, NWT) Muli wɔ nyunalaŋ ndaŋ:
Le yɛɛ i cho yɛ dikeŋnaŋ bɛndu le mi waŋndo simnuŋ Sei Chɛhowaa?
A yeema pa ma yiŋ ma simnuŋ Sei Chɛhowaa?
Baa nyɛ o nyɛ cho num pa kuunaa le hei tosaa?
Yɛɛ ŋ yiyaŋ yɛ maa a nɔ ma tosa le ma suliŋ le yiŋɔɔ?
TE WAŊNDO DIMI PƐ AA: “Ya I nɔla niŋ buŋgɛi chuaa o Mɛlɛka lo le mi yiŋ te, yɔŋii ya kɛɛ le ndi peeloo.”
Baa lende num bɛɛ yiyaŋ ni?
SƆƆŊ KULLOŊ
A mala Chɛhowaa, a nɔla ma chɔulaba simulta kuuna num le yiŋɔɔ sɔlaa laŋ.
Nyunala miiŋgaa choo laŋ
Vɛɛ kpɛ ŋ nɔ yɛ ma sina Baabuiyo tuupa ma sɔla yiŋɔɔ?
Siŋgaŋ kuɛɛ ŋ nɔ yɛ ma tosa tuupa ma sɔla yiŋɔɔ?
Le yɛɛ siooŋnde nɔ mii kuuna num yiŋɔɔ le?
CHƆƆLU SƆƆŊ PUM TOFA
Tofawɔ ma che nyɛ nɔ mbo nyindu num ma tosa kɛɛsiaa le yiŋɔɔ sɔlaa wo.
Pɛɛku ma sina mɛɛ ŋ chɔulaba simultaŋ lapum, la kuuna wana le yiŋɔɔ sɔlaa wo.
“Yɛɛnɛ Kuuna yɛ Ya Yiŋɔɔ Sɔlaa?” (Bandu Mɛŋgɛlaa, Fuoo 2019)
Tofawɔ ma che nyɛ mala po pilɛ le chɔulabaa sɔɔŋ wa ndu kuunaa le yiŋɔɔ sɔlaa woŋ.
O tasela ndɔ, mi po pilɛ diolaŋ Ataa kiisaŋ le yiŋɔɔ sɔlaa. Tofawɔ nyɛ mala ndu mbo soliŋ kiisaŋ koŋ o kɔl mbo yiŋ ndo.