Diola Baabuilaŋ o Baabɔŋ maSindɔɔ Choo

O wɔsi 2012 niŋ, mi wanaa tuau nyɔɔŋ lɛŋnda saaluŋ tɛndula baabɔŋ nda chɔu a puuloo wo. O chii niŋ wɔsilaŋ 3,000. Wanaa pɛɛku a sɔɔŋ okɔɔ wa wa a kɔl kɛndɛ tau. Le sabu yɛɛ? O ve le tɛndula baabɔŋ koŋ te, kɛ le poonyiaa wa o tɛndula laŋ choo wo.

Mɛɛ wanaa tuau nyɔɔŋ lɛŋnda chii tɛndula laŋ bɔɔŋiaa naapilɛ, ma tiuba le diomnda wa la poonyiaa o Kenanaitiiye niŋ o baabɔŋ koŋ choo wo veeloo. Laŋ la wa ni, “Eshba’al Ben Beda.” La sim le “Ɛsibaal, po Beda wo.” Teleŋ tasoo wa hoo ni le mi wanaa tuau nyɔɔŋ lɛŋnda saaluŋ diola waa naa la poonyiaa o baabɔŋ masindɔɔ choo.

Mi Baabuiyo suaa a Ɛsibaal cheleŋ okɔɔ. Ndu wa puaa Masaa Sɔɔ wa opilɛ ni. (Koloniko Tasoo 8:​33; 9:​39) Wana pɛɛkaa pum diolaŋ Yosɛf Kafiŋkɛl wa wanaa saaluŋ baabɔŋndo hoo wa tɛɛŋ. Mbo dimi aa, “I cho suɛi kɛndɛ le sinaa maa diolaŋ ndaŋ Ɛsibaal cho o Baabuiyo niŋ, suŋ suŋ wanaa tuau nyɔɔŋ lɛŋnda nɔ konaa a diolaŋ ndaŋ okɔɔ, nduyɛ a boondii Deeve wa o masaleŋ choo wo hei sinaŋ ni.” Taamaselii cheleŋ cho hoo ni le chɔmndo mɛɛ wanaa tuau nyɔɔŋ lɛŋnda toolu Baabuiyo yɛ!

O Baabuiyo niŋ, po Sɔɔ wo Ɛsibaal nɔ vɛlɛ diolaŋ ni aa Isibosiɛti. (Saamiɛɛ Diiŋ Ndɔɔ 2:​10) Le yɛɛ nda siŋga yɛ “baal” a “bosiɛti”? Wanaa pɛɛku a sɔɔŋ okɔɔ wa tɛɛsiaa maa, kɛlɛŋgaa sabu wanaa poonyiaa Saamiɛɛ Diiŋ Ndɔɔ wa tosa heiyo cho ni, le Isɔluɛiya dimullo maa a nɔ ma kpakpala Ɛsibaal soliŋndo kpeku le nda loonɔŋndo a Baal okɔɔ, mɛlɛka mataŋndo, o Kenanaitiiya wa sooluuwo wo. Kɛ, diolaŋ ndaŋ Ɛsibaal cho wɔ o yau Koloniko Tasoo o Baabuiyo niŋ.