၁ ကရံၣ်သူး

၄ ပှၤဂၤကြၢးထံၣ်ပှၤဒ် ခရံာ်အခ့အပှၤတဖၣ် ဒီးပှၤလၢ အဘၣ်တၢ်အးလီၤအီၤလၢ ကစၢ်ယွၤ အတၢ်ခူသူၣ် စီဆှံတဖၣ်အသိးလီၤ. ၂ ဒီးပှၤလၢတၢ်အးလီၤအီၤ လၢတၢ်တမံၤမံၤန့ၣ် အကဘၣ်အိၣ်ဒီး တၢ်သးတီလီၤ. ၃ ခဲအံၤ သုမ့ၢ်သမံသမိးယၤမ့ၢ်ဂ့ၤ, စံၣ်ညီၣ်ကွီၢ် မ့ၢ်သမံသမိးယၤမ့ၢ်ဂ့ၤ, တမ့ၢ်တၢ်လၢ အရ့ဒိၣ်လၢယဂီၢ်ဘၣ်. နီၢ်ကီၢ်န့ၣ် ယနီၢ်ကစၢ်ဒၣ်လဲာ် ယတသမံသမိးလီၤ ယသးဘၣ်. ၄ ယသးလၢ အသ့ၣ်ညါဒၣ်တၢ် တပာ်တၢ်ကမၣ်လၢယလိၤ နီတမံၤဘၣ်. ဘၣ်ဆၣ် တၢ်အဝဲန့ၣ် အခီပညီ တအဲၣ်ဒိးတဲဝဲလၢ ယကဲပှၤတီပှၤလိၤဘၣ်. ပှၤလၢ အသမံသမိးယၤန့ၣ် မ့ၢ်ယဟိဝၤယွၤလီၤ. ၅ အဃိ တချုးလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ ဟဲတုၤဒံးဘၣ်န့ၣ် တဘၣ်စံၣ်ညီၣ်တၢ် နီတမံၤဒံးတဂ့ၤ, မ့မ့ၢ် အိၣ်ခိးတုၤလၢ ကစၢ်ဟဲတုၤတက့ၢ်. အဝဲကပာ်ဖျါထီၣ်ဝဲ တၢ်ခူသူၣ်လၢအအိၣ်လၢ တၢ်ခံးကျါ ဒီးကပာ်ဖျါထီၣ်စ့ၢ်ကီးဝဲ တၢ်ကူၣ်ထီၣ်ဖးလီၤ လၢအအိၣ်လၢ ပှၤသးပူၤလီၤ. ဒီးပှၤတဂၤစုာ်စုာ် ကဒိးန့ၢ်ဘၣ် တၢ်စံးပတြၢၤလၢ ကစၢ်ယွၤအအိၣ်လီၤ.

၆ ဒီပုၢ်ဝဲၢ်သ့ၣ်ဧၢ, ယဒုးဘၣ်ထွဲ တၢ်ဂ့ၢ်တဖၣ်အံၤဒီးယၤ ဒီးစီၤအပီးလိၤန့ၣ် မ့ၢ်ဒၣ်လၢ သုဘျုးအဂီၢ်လီၤ. ခီဖျိလၢပဝဲအဃိ သုကန့ၢ်ဘၣ်တၢ်မၤလိ လၢအမ့ၢ် “တဘၣ်မၤအါန့ၢ်ဒံး တၢ်ကွဲးအသးတဖၣ် တဲဝဲအသိးန့ၣ်တဂ့ၤ.” သုမ့ၢ်မၤထွဲဒ်အံၤန့ၣ် တမ့ၢ်လၢ သုကပာ်ကဖၢလၢသုသး, ကွၢ်မဲာ်တၢ် ဒီးအိၣ်ဃူလိာ်သး တဂၤဒီးတဂၤဘၣ်. ၇ မ့ၢ်မတၤဒုးလီၤဆီနၤဒီး ပှၤအဂၤလဲၣ်. တၢ်လၢအအိၣ်ဒီးနၤလၢ နတဒိးန့ၢ်ဘၣ်အီၤလၢ ကစၢ်ယွၤအအိၣ်န့ၣ် အိၣ်တမံၤမံၤဧါ. ဒီးနမ့ၢ်ဒိးန့ၢ်ဘၣ်အီၤန့ၣ် ဘၣ်မနုၤအဃိ နပာ်ကဖၢလၢနသး ဒ်သိးနမၤန့ၢ်အီၤလၢ နနီၢ်ကစၢ် အဂံၢ်အဘါလဲၣ်.

၈ မ့ၢ်တၢ်အိၣ်ဒီးသု လၢလၢပှဲၤပှဲၤလံဧါ. မ့ၢ်သုကဲပှၤထူးပှၤတီၤလံဧါ. မ့ၢ်သုစးထီၣ်ပၢဆိတၢ် ဒ်စီၤပၤတဖၣ်အသိး လၢပမဲာ်ညါလံဧါ. ယဆၢမုၢ်လၢ်သပှၢ်ကတၢၢ်လၢ သုကစးထီၣ်ပၢတၢ် ဒ်စီၤပၤတဖၣ်အသိး, ဒ်သိးပဝဲသ့ၣ်တဖၣ် ကပၢဃုာ်တၢ်ဒီးသု ဒ်စီၤပၤတဖၣ်အသိး စ့ၢ်ကီးလီၤ. ၉ ဖျါဘၣ်ယၤလၢ ကစၢ်ယွၤဟဲကိးထီၣ် ပဝဲပှၤတၢ်မၢဖိတဖၣ်လၢ ပှၤခဲလၢာ်အမဲာ်ညါ ဒ်ပှၤလၢ အလီၢ်ခံကတၢၢ်တဒူၣ်လၢ အဘၣ် တၢ်စံၣ်ညီၣ်သံအီၤအသိး, မ့ၢ်လၢပကဲထီၣ် တၢ်ကွၢ်ကီအလီၢ်လၢ ဟီၣ်ခိၣ်အဂီၢ် ဒီးလၢမူခိၣ်ကလူး ဒီးလၢပှၤကညီအဂီၢ်လီၤ. ၁၀ ပဝဲဒၣ်အံၤ လၢခရံာ်အဃိ ပမ့ၢ်ပှၤဟးဂီၤဖိ မ့မ့ၢ် သုဝဲသ့ၣ်န့ၣ် သုမ့ၢ်ပှၤကူၣ်တၢ်သ့လၢ ခရံာ်အပူၤလီၤ. ပဝဲဒၣ်အံၤ ပမ့ၢ် ပှၤဂံၢ်စၢ်ဘါစၢ် မ့မ့ၢ်သုဝဲသ့ၣ်န့ၣ် သုဂံၢ်ဆူၣ်ဘါဆူၣ်လီၤ. ပဝဲဒၣ်အံၤ ပလၤကပီၤတအိၣ်ဘၣ် မ့မ့ၢ်သုဝဲသ့ၣ်န့ၣ် သုလၤကပီၤအိၣ်ဝဲလီၤ. ၁၁ တုၤလီၤလၢ နၣ်ရံၣ်ခဲအံၤဒၣ်လဲာ် တၢ်သၣ်ဝံၤပသး, တၢ်သူပသးလၢထံ, ပတၢ်ကူတၢ်ကၤ တလၢတလီၣ်ဘၣ်, ပဘၣ်တၢ်တီၢ်ပှၤ, ပဟံၣ်ပဃီတအိၣ်ဘၣ်, ၁၂ ဒီးပမၤတၢ်ဆူၣ်ဆူၣ်လၢ ပနီၢ်ကစၢ်အစုဒၣ်ဝဲလီၤ. ဖဲပှၤတဲဆါပှၤအခါ ပဆိၣ်ဂ့ၤအဝဲသ့ၣ်, ဖဲပှၤမၤအၢမၤသီပှၤအခါ ပတူၢ်တၢ်လၢ တၢ်ဝံသးစူၤအပူၤ, ၁၃ ဖဲပှၤတဲဟးဂီၤပှၤအခါ ပစံးဆၢတၢ်မုာ်မုာ်လီၤ. တုၤလီၤလၢ ဆၢကတီၢ်ခဲအံၤန့ၣ် ပဘၣ်တၢ်ပာ်ပှၤဒ် ဟီၣ်ခိၣ်အတၢ်ကမှံၤ ဒီးတၢ်ဘၣ်အၢဘၣ်သီ အသိးန့ၣ်လီၤ.

၁၄ ယကွဲးတၢ်သ့ၣ်တဖၣ်အံၤန့ၣ် တမ့ၢ်ဒ်သိး ယကမၤမဲာ်ဆှးသု အဂီၢ်ဘၣ်. မ့ၢ်ဒ်သိး ယကဟ့ၣ်ကူၣ်ဟ့ၣ်ဖးသု ဒ်ယဖိသးဘိတဖၣ် အသိးလီၤ. ၁၅ ပှၤလၢအသိၣ်လိသုလၢ ခရံာ်အပူၤ မ့ၢ်အိၣ်အဂၤ ၁၀,၀၀၀ ဘၣ်ဆၣ် သုပၢ်တအိၣ်အါဂၤဘၣ်. ခီဖျိလၢ တၢ်သးခုကစီၣ်အဃိ ယကဲထီၣ်သုပၢ် လၢခရံာ်အပူၤလီၤ. ၁၆ ဒီးယဟ့ၣ်သဆၣ်ထီၣ်သုဒ်သိး သုကကွၢ်လိမၤဒိးယၤ အဂီၢ်လီၤ. ၁၇ အဃိ ယကဆှၢလီၤ စီၤတံၤမသ့းလၢသုအိၣ် မ့ၢ်လၢအဝဲမ့ၢ်ပှၤလၢ ယအဲၣ်အီၤ ဒီးမ့ၢ်ဖိလၢအသးတီ လၢကစၢ်အပူၤလီၤ. အဝဲကဒုးသ့ၣ်နီၣ်ထီၣ်က့ၤသုလၢ ယတၢ်မၤ အကျိၤအကျဲတဖၣ်လၢ အဘၣ်ဃးဒီး ယ့ၣ်ၡူးခရံာ် ဒ်ယသိၣ်လိ တၢ်အိၣ်ဖှိၣ်ကိးဖျၢၣ်ဒဲး လၢတၢ်လီၢ်ဝးဝး အသိးန့ၣ်လီၤ.

၁၈ ပှၤတနီၤနီၤ ဆိကမိၣ်ဝဲလၢ ယတလဲၤလၢ သုအိၣ်ဘၣ်အဃိ အဝဲသ့ၣ် ပာ်ထီၣ်ထီအသးလီၤ. ၁၉ ဘၣ်ဆၣ် တယံာ်လၢၤဘၣ်န့ၣ် မ့ၢ်ဘၣ်ယဟိဝၤယွၤအသးဒီး ယကလဲၤလၢ သုအိၣ်လီၤ. ဒီးပှၤလၢ အပာ်ထီၣ်ထီအသးတဖၣ်အံၤ ယတအဲၣ်ဒိးသ့ၣ်ညါ အဝဲသ့ၣ် အတၢ်ကတိၤဘၣ်. ယအဲၣ်ဒိးသ့ၣ်ညါလၢ မ့ၢ်အဝဲသ့ၣ်အိၣ်ဒီး ကစၢ်ယွၤ အတၢ်စိကမီၤဧါ တအိၣ်ဘၣ်ဧါန့ၣ်လီၤ. ၂၀ ယွၤအဘီအမုၢ်န့ၣ် တဒိးသန့ၤထီၣ်အသးလၢ တၢ်ကတိၤတဖၣ် အဖီခိၣ်ဘၣ်, မ့ၢ်အဒိးသန့ၤထီၣ်အသးလၢ ကစၢ်ယွၤ အတၢ်စိကမီၤတခီလီၤ. ၂၁ ဖဲယလဲၤလၢ သုအိၣ်အခါ မ့ၢ်ယကြၢးလဲၤစိာ် နီၣ်တီၢ်ဧါ မ့တမ့ၢ် ယကြၢးလဲၤလၢ တၢ်အဲၣ်တၢ်ကွံ ဒီးတၢ်သူၣ်စူၤ သးစူၤအပူၤဧါ, သုလီကီ ဖဲလဲၣ်တခါလဲၣ်.