လီၣ်ဖျါ

၁၄ ဒီးယထံၣ်ဘၣ် သိဖိ ဆၢထၢၣ်လၢ ကစၢၢ်စံယိၣ်အလိၤ ဒီးပှၤလၢအအိၣ်ဒီးအီၤန့ၣ် အိၣ်ဝဲအဂၤ ၁၄၄,ဝ၀၀ လၢအအိၣ်ဒီး အဝဲဒၣ်အမံၤ ဒီးအပၢ်အမံၤ အိၣ်ကွဲးအသးလၢ အဝဲသ့ၣ်အမဲာ်တူၢ်ခိၣ်န့ၣ်လီၤ. ၂ ဒီးယနၢ်ဟူ တၢ်အသီၣ်ဟဲလၢမူခိၣ် ဒ်ထံအါအါဂီၢ်ဂီၢ် သီၣ်ဝဲအသိး ဒီးဒ်လီသီၣ်ဖးဒိၣ် အသိးန့ၣ်လီၤ. ဒီးတၢ်အသီၣ်လၢ ယနၢ်ဟူအီၤအံၤ လီၤဂာ်ဒီး ပှၤသးဝံၣ်တၢ်တဖၣ်အကလုၢ် ဖဲအဝဲသ့ၣ် ဒ့အတနၢ်တဖၣ် အခါန့ၣ်လီၤ. ၃ ဒီးအဝဲသ့ၣ်သးဝံၣ် တၢ်လၢအလီၤဂာ်ဒ် တၢ်သးဝံၣ်အသီတယုၢ်လၢ လီၢ်ပစိာ်အမဲာ်ညါ ဒီးလၢခ့ရူာ်လွံၢ်ဂၤ ဒီးပှၤသူၣ်က့သးပှၢ်တဖၣ် အမဲာ်ညါလီၤ. ဒီးတၢ်သးဝံၣ်တယုၢ်အံၤ ပှၤမၤလိအီၤတသ့နီတဂၤဘၣ်, သ့ဒၣ်ထဲပှၤ ၁၄၄, ၀၀၀ လၢအဘၣ် တၢ်ပှ့ၤက့ၤအီၤလၢ ဟီၣ်ခိၣ်ချၢန့ၣ်လီၤ. ၄ ပှၤတဖၣ်အံၤ မ့ၢ်ပှၤလၢ အတမၤဘၣ်အၢအသးဒီး ပိာ်မုၣ်ဘၣ်. ဒီးအနီၢ်ကီၢ်န့ၣ် အဝဲသ့ၣ်လီၤဂာ်ဒ် မုၣ်ကနီၤ စီဆှံတဖၣ်လီၤ. အဝဲသ့ၣ်မ့ၢ် ပှၤလၢအဆဲးပိာ်ဝဲ သိဖိအခံ ဖဲသိဖိလဲၤဝဲ တပူၤဂ့ၤ တပူၤဂ့ၤန့ၣ်လီၤ. အဝဲသ့ၣ်တဖၣ်န့ၣ် ဘၣ်တၢ်ပှ့ၤအီၤလၢ ပှၤဟီၣ်ခိၣ်ဖိတဖၣ်အကျါ ဒ်တၤသၣ်ဆိတဖၣ်လၢ ကစၢ်ယွၤဒီး သိဖိအဂီၢ်န့ၣ်လီၤ. ၅ ဒီးတၢ်တထံၣ်န့ၢ် တၢ်လီတၢ်ဝ့ၤလၢ အဝဲသ့ၣ် အထးခိၣ်ဘၣ် ဒီးအဝဲသ့ၣ်န့ၣ် အတၢ်လီၤတူာ်လီၤကာ် တအိၣ်ဘၣ်.

၆ ဒီးယထံၣ်ဘၣ် မူခိၣ်ကလူးလၢအဂၤတဂၤ ယူၤဝဲလၢတၢ်ဖးဖီ ဒီးအဝဲအိၣ်ဒီး တၢ်သးခုကစီၣ်အထူအယိာ် ဒ်သိးကစံၣ်တဲၤတဲလီၤ ပှၤလၢအအိၣ်လၢဟီၣ်ခိၣ်ချၢ လၢအမ့ၢ် ပှၤကိးကလုာ်ဒဲး, ကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ်ကိးကျိာ်ဒဲး ဒီးပှၤကိးဒူၣ်ဒဲးအအိၣ်န့ၣ်လီၤ. ၇ ဒီးအဝဲတဲဝဲလၢ အကလုၢ်ဖးဒိၣ်လၢ “ပျံၤကစၢ်ယွၤ ဒီးဟ့ၣ်အီၤတၢ်လၤကပီၤတက့ၢ်, မ့ၢ်လၢ အဝဲကစံၣ်ညီၣ်တၢ် အနၣ်ရံၣ် ဟဲတုၤလံအဃိလီၤ. လၢတၢ်န့ၣ်အဃိ ဘူၣ်ထီၣ်ဘါထီၣ် တၢ်ဘၣ်တ့ကစၢ်လၢ အတ့လီၤမူခိၣ် ဒီးဟီၣ်ခိၣ် ဒီးပီၣ်လဲၣ် ဒီးထံထီၣ်ပၢၢ်တဖၣ်န့ၣ်တက့ၢ်.”

၈ ဝံၤဒီးမူခိၣ်ကလူးခံဂၤတဂၤ ဟဲထီၣ်တဲဝဲလၢ “အဝဲလီၤပှီၢ်လံ, ဘၤဘူၤလိၣ်ဖးဒိၣ် လီၤပှီၢ်လံ, အဝဲ မ့ၢ်ပှၤလၢအမၢဆူၣ် ပှၤကိးကလုာ်ဒဲး ဒ်သိးကအီဝဲ တၢ်သးကတၢ အစပံးထံလၢ အဘၣ်ဃးဒီး အဝဲဒၣ် အတၢ်မၤ ကမၣ်မုၣ်ကမၣ်ခွါန့ၣ်လီၤ.”*

၉ ဝံၤဒီး မူခိၣ်ကလူး သၢဂၤတဂၤ ဟဲထီၣ်တဲဝဲလၢ အကလုၢ်ဖးဒိၣ်လၢ “ပှၤတဂၤဂၤမ့ၢ် ဘူၣ်ထီၣ်ဘါထီၣ် ဆၣ်ဖိကီၢ်ဖိလၢ အအၢတဒု ဒီးအဂီၤ ဒီးဒိးန့ၢ်ဘၣ် တၢ်ပနီၣ်လၢ အမဲာ်တူၢ်ခိၣ် မ့တမ့ၢ် လၢအစုန့ၣ် ၁၀ အဝဲစ့ၢ်ကီးကအီ ကစၢ်ယွၤအတၢ်သးဒိၣ်ထီၣ် အစပံးထံလီၤ. စပံးထံအံၤ တဃါဃုာ်အသးလၢ တၢ်နီတမံၤဘၣ် ဒီးဘၣ်တၢ်လူလီၤအီၤလၢ ကစၢ်ယွၤ အတၢ်သးဒိၣ်ထီၣ်အခွးပူၤ ဒီးအဝဲ ကဘၣ် တၢ်မၤနးမၤဖှီၣ်အီၤလၢ မ့ၣ်အူဒီးကး လၢမူခိၣ်ကလူးစီဆှံတဖၣ် အမဲာ်ညါ ဒီးသိဖိအမဲာ်ညါလီၤ. ၁၁ တၢ်မၤနးမၤဖှီၣ်အဝဲသ့ၣ်န့ၣ် အခုၣ်ဟဲထီၣ်ဝဲ အစိၤစိၤအဃၣ်ဃၣ် လီၤထူလီၤယိာ်လီၤ. ဒီးပှၤတဖၣ်အံၤလၢ အဘူၣ်ထီၣ်ဘါထီၣ် ဆၣ်ဖိကီၢ်ဖိလၢ အအၢတဒု ဒီးအဂီၤဒီး ဒိးန့ၢ်ဘၣ်တၢ်ပနီၣ် ဘၣ်ဃးဒီးအမံၤန့ၣ် လၢမုၢ်ဆါမ့ၢ်ဂ့ၤ, လၢမုၢ်နၤမ့ၢ်ဂ့ၤ, တၢ်အိၣ်ဘှံးလၢ အဝဲသ့ၣ်အဂီၢ် တအိၣ်ဘၣ်. ၁၂ လၢတၢ်အံၤအဃိ ပှၤစီဆှံတဖၣ်လၢ အမၤထွဲကစၢ်ယွၤ အတၢ်မၤလိာ်တဖၣ် ဒီးဟံးဃာ်အတၢ်နာ်ယ့ၣ်ၡူးန့ၣ် လိၣ်ဘၣ်တၢ်တူၢ်န့ၢ်ခီၣ်ကဲလီၤ.”

၁၃ ဒီးယနၢ်ဟူ တၢ်ကလုၢ်သီၣ်လၢမူခိၣ် တဲဝဲလၢ “ကွဲးလီၤတက့ၢ်. စးထီၣ်လၢ ဆၢကတီၢ်ခဲအံၤ ဒီးခါဆူညါ ပှၤလၢအသံလၢ ကစၢ်အပူၤန့ၣ် ကသးခုဝဲလီၤ. သးစီဆှံတဲဝဲလၢ မ့ၢ်လံ, မ့ၢ်လၢ တၢ်လၢအဝဲသ့ၣ်မၤတ့ၢ်တဖၣ်န့ၣ် ပိာ်ထွဲထီၣ် အဝဲသ့ၣ်အခံ တဘျီဃီအဃိ မ်အဝဲသ့ၣ် အိၣ်ဘှံးလၢ အတၢ်ဖံးတၢ်မၤန့ၣ်တက့ၢ်.”

၁၄ ကွၢ်မီၤ, ယထံၣ် တၢ်အၢၣ်ဝါဝါတလိၣ် ဒီးပှၤလၢအဆ့ၣ်နီၤလၢ တၢ်အၢၣ်အလိၤတဂၤန့ၣ် လီၤဂာ်ဒီး ပှၤကညီဖိခွါလီၤ. လၢအခိၣ်လိၤန့ၣ် အိၣ်ဒီးခိၣ်သလုးထူ ဒီးလၢအစုပူၤန့ၣ် အိၣ်ဒီးထါဂဲာ်လၢ အကနၣ်အ့ၣ်တဘ့ၣ်လီၤ.

၁၅ ဒီးမူခိၣ်ကလူးအဂၤတဂၤ ဟဲထီၣ်လၢတၢ်လုၢ်ဟံၣ် အတၢ်စီဆှံအလီၢ် ဒီးကိးပသူထီၣ်လၢ အကလုၢ်ဖးဒိၣ်ဆူ ပှၤတဂၤလၢအဆ့ၣ်နီၤလၢ တၢ်အၢၣ်အလိၤအအိၣ်လၢ “ဟီၣ်ခိၣ်အဘုန့ၣ် ဘီထီၣ်ဂ့ၤဂ့ၤလံ. အဃိ ကူးတၢ်အနၣ်ရံၣ်ဘၣ်လံ. သူနထါဂဲာ်ဒီးကူးတၢ်တက့ၢ်.” ၁၆ ဒီးပှၤတဂၤလၢအဆ့ၣ်နီၤလၢ တၢ်အၢၣ်အလိၤန့ၣ် သူဝဲအထါဂဲာ်လၢ ဟီၣ်ခိၣ်ချၢ ဒီးဟီၣ်ခိၣ်အဘု ဘၣ်တၢ်ကူးအီၤလီၤ.

၁၇ ဒီးမူခိၣ်ကလူး အဂၤတဂၤ လၢအအိၣ်စ့ၢ်ကီးဒီး ထါဂဲာ်လၢအကနၣ်အ့ၣ်တဘ့ၣ်န့ၣ် ဟဲထီၣ်လၢ တၢ်လုၢ်ဟံၣ်အတၢ်စီဆှံအလီၢ် လၢအအိၣ်လၢမူခိၣ်န့ၣ်လီၤ.

၁၈ ဒီးမူခိၣ်ကလူး အဂၤတဂၤ ဟဲထီၣ်လၢတၢ်လုၢ်လီၢ် ဒီးအအိၣ်ဒီးတၢ်စိတၢ်ကမီၤလၢ မ့ၣ်အူအဖီခိၣ်လီၤ. အဝဲကိးပသူထီၣ်လၢ အကလုၢ်ဖးဒိၣ် ဆူပှၤလၢ အအိၣ်ဒီး ထါဂဲာ်လၢအကနၣ်အ့ၣ်အအိၣ် ဒီးတဲဝဲလၢ “သူနထါဂဲာ်လၢ အကနၣ်အ့ၣ် ဒီးပာ်ဖှိၣ်ဟီၣ်ခိၣ် အစပံးမုၢ် အချုၣ်တဖၣ်တက့ၢ်, မ့ၢ်လၢအစပံးသၣ်တဖၣ် မံထီၣ်လံအဃိလီၤ.” ၁၉ မူခိၣ်ကလူးန့ၣ် သူဝဲအထါဂဲာ်လၢ ဟီၣ်ခိၣ်ချၢ ဒီးကူးဝဲ စပံးမုၢ်လၢ ဟီၣ်ခိၣ်ချၢ ဒီးကွံာ်လီၤဝဲလၢ စပံးထံအကျိးဖးဒိၣ်အပူၤ လၢအအဲၣ်ဒိးတဲဝဲ ကစၢ်ယွၤအတၢ်သးဒိၣ်ထီၣ်န့ၣ်လီၤ. ၂၀ ဒီးစပံးသၣ်တဖၣ်န့ၣ် ဘၣ်တၢ်ယီၢ်အီၤလၢ ဝ့ၢ်အချၢ ဒီးတၢ်သွံၣ်ဟဲဖျိးထီၣ်လၢ စပံးထံအကျိးချၢန့ၣ် အကစီၤထီဝဲ တုၤလၢကသ့ၣ်အထးခိၣ် လၢအတၢ်ဒ့ၣ်စၢၤအိၣ်အမံးလာ် ၂၀၀ ဃၣ်ဃၣ်လီၤ.*