၁ ၡမူၤအ့လး
၇ အဃိ ပှၤပိာ်ခွါတဖၣ်လၢ ဝ့ၢ်ကံးရယးယဧၤရံၣ်အပူၤန့ၣ် ဟဲဟံးန့ၢ် ယဟိဝၤယွၤ အတလါစီဆှံ ဒီးလဲၤဆှၢဝဲလၢ စီၤအဘံနဒာ် အဟံၣ်ပူၤ+ လၢအအိၣ်လၢ တၢ်လူၢ်ခိၣ်လီၤ. ဒီးအဝဲသ့ၣ် ပာ်စီဆှံ စီၤအဘံနဒာ်အဖိခွါ စီၤအလၤဧစၢ် ဒ်သိးအကခိးကွၢ် ယဟိဝၤယွၤ အတလါစီဆှံ အဂီၢ်လီၤ.
၂ တလါစီဆှံ အိၣ်ဝဲလၢ ဝ့ၢ်ကံးရယးယဧၤရံၣ်အပူၤ ယံာ်ဝဲအနံၣ် ၂၀ ညါ. ဝံၤဒီး ပှၤအံၣ်စရ့လးဖိခဲလၢာ် ဃ့တၢ်မၤစၢၤလၢ ယဟိဝၤယွၤ အအိၣ်လီၤ.+ ၃ ဒီးစီၤၡမူၤအ့လး တဲဘၣ် ပှၤအံၣ်စရ့လးဖိ ခဲလၢာ်လၢ “သုမ့ၢ်ဟဲက့ၤလၢ ယဟိဝၤယွၤအအိၣ် လၢသုသးဒီဖျၢၣ်ညါန့ၣ်+ သုကဘၣ်တၢၤကွံာ် ယွၤအဂၤတဖၣ်+ ဒီးဧၤၡတြိး တၢ်ဂီၤတၢ်ဖှီၣ်တဖၣ်လီၤ.+ ဒီးသုမ့ၢ်ဟ့ၣ်လီၤသုသးလၢ ယဟိဝၤယွၤအအိၣ် လၢာ်လၢာ်ဆ့ဆ့ ဒီးဘူၣ်ထီၣ်ဘါထီၣ်* ထဲအီၤတဂၤန့ၣ်+ အဝဲကမၤထူၣ်ဖျဲးထီၣ် သုလၢ ပှၤဖလ့ၡသးဖိ အစုပူၤလီၤ.”+ ၄ အဃိ ပှၤအံၣ်စရ့လးဖိ တၢၤကွံာ်ဝဲ ဘဧၤလး ဒီးဧၤၡတြိး တၢ်ဂီၤတၢ်ဖှီၣ်တဖၣ် ဒီးဘူၣ်ထီၣ်ဘါထီၣ်ထဲ ယဟိဝၤယွၤ တဂၤလီၤ.+
၅ ဝံၤဒီး စီၤၡမူၤအ့လး တဲဝဲလၢ “ကိးဖှိၣ် ပှၤအံၣ်စရ့လးဖိ ခဲလၢာ် လၢဝ့ၢ်မံးစပၤ တက့ၢ်.+ ဒီးယကဃ့ဘါထုကဖၣ် လၢယဟိဝၤယွၤအအိၣ် လၢသုဂီၢ်လီၤ.”+ ၆ အဃိ အဝဲသ့ၣ် ပာ်ဖှိၣ်ထီၣ်သး တပူၤဃီလၢ ဝ့ၢ်မံးစပၤ ဒီးဒၢၣ်န့ၢ်ထံ ဒီးလူလီၤဝဲလၢ ယဟိဝၤယွၤ အမဲာ်ညါ ဒီးဒုၣ်တၢ်အီၣ် ဖဲတၢ်တနံၤန့ၣ်လီၤ.+ ဖဲန့ၣ် အဝဲသ့ၣ် တဲဝဲလၢ “ပမၤကမၣ်ဘၣ် ယဟိဝၤယွၤလံ.”+ ဒီးစီၤၡမူၤအ့လး စးထီၣ်မၤတၢ်ဒ် စံၣ်ညီၣ်ကွီၢ်တဂၤအသိး+ လၢပှၤအံၣ်စရ့လးဖိအဂီၢ် ဖဲဝ့ၢ်မံးစပၤန့ၣ်လီၤ.
၇ ဖဲပှၤဖလ့ၡသးဖိ နၢ်ဟူဝဲလၢ ပှၤအံၣ်စရ့လးဖိ ပာ်ဖှိၣ်ထီၣ်အသး တပူၤဃီလၢ ဝ့ၢ်မံးစပၤအခါ ပှၤဖလ့ၡသးဖိ အခိၣ်အနၢ်တဖၣ်+ လဲၤထီၣ် ဒ်သိးကဒုးဝဲ ပှၤအံၣ်စရ့လးဖိလီၤ. ဖဲပှၤအံၣ်စရ့လးဖိ နၢ်ဟူဝဲအခါ အဝဲသ့ၣ်ပျံၤဝဲ ပှၤဖလ့ၡသးဖိလီၤ. ၈ အဃိ ပှၤအံၣ်စရ့လးဖိ တဲဘၣ် စီၤၡမူၤအ့လးလၢ “ဝံသးစူၤ ဆဲးကိးထီၣ် ယဟိဝၤယွၤ ဒ်သိးအကမၤစၢၤပှၤ+ ဒီးမၤထူၣ်ဖျဲးထီၣ်ပှၤလၢ ပှၤဖလ့ၡသးဖိ အစုပူၤအဂီၢ်တက့ၢ်.” ၉ ဒီးစီၤၡမူၤအ့လး ဟံးန့ၢ်သိဖိလၢ အအီနုၢ်တဒု ဒီးလုၢ်ထီၣ်ဝဲ ဒ်တၢ်လုၢ်ဒွဲၣ်အူ+ ဒီတဒုအသိး လၢယဟိဝၤယွၤအဂီၢ်လီၤ. ဒီးစီၤၡမူၤအ့လး ဃ့တၢ်မၤစၢၤလၢ ယဟိဝၤယွၤအအိၣ် လၢပှၤအံၣ်စရ့လးဖိအဂီၢ် ဒီးယဟိဝၤယွၤ စံးဆၢအီၤလီၤ.+ ၁၀ ဖဲစီၤၡမူၤအ့လး လုၢ်ထီၣ် တၢ်လုၢ်ဒွဲၣ်အူအခါ ပှၤဖလ့ၡသးဖိ ဟဲထီၣ်ဝဲ ဒ်သိးကဒုး ပှၤအံၣ်စရ့လးဖိ အဂီၢ်လီၤ. ဒီးတၢ်တနံၤန့ၣ် ယဟိဝၤယွၤ ဒုးသီၣ်ထီၣ်လီဖးဒိၣ်+ ဒီးမၤဘံဘူ ပှၤဖလ့ၡသးဖိ အခိၣ်နူာ်+ ဒီးပှၤအံၣ်စရ့လးဖိ မၤနၢၤအဝဲသ့ၣ်လီၤ.+ ၁၁ ဖဲန့ၣ်န့ၣ် ပှၤအံၣ်စရ့လးဖိ ဟးထီၣ်လၢ ဝ့ၢ်မံးစပၤ ဒီးလူၤဝဲပှၤဖလ့ၡသးဖိ ဒီးမၤသံအဝဲသ့ၣ် ပၢၢ်တုၤလၢ ဘ့ၤသကၢ် အကလံၤထံး တခီလီၤ. ၁၂ ဝံၤဒီး စီၤၡမူၤအ့လး ဟံးန့ၢ်လၢၢ်တဖျၢၣ်+ ဒီးဆီလီၤဝဲလၢ ဝ့ၢ်မံးစပၤ ဒီးဝ့ၢ်ယၡၤနၤ အဘၢၣ်စၢၤလီၤ. မ့ၢ်လၢအတဲဝဲလၢ “ယဟိဝၤယွၤ မၤစၢၤပှၤ တုၤလၢခဲအံၤ”+ အဃိ အကိးန့ၢ်ဝဲ လၢၢ်အမံၤလၢ အ့ဘ့ၣ်န့စၢ်လီၤ.* ၁၃ ဒီးပှၤဖလ့ၡသးဖိ ၡူကွံာ်ဝဲ ဒီးအဝဲသ့ၣ် တဟဲကဒီးလၢ ပှၤအံၣ်စရ့လးဖိ အဟီၣ်ကဝီၤ လၢၤဘၣ်.+ ဒီးယဟိဝၤယွၤ ဆဲးထီဒါဝဲ ပှၤဖလ့ၡသးဖိ ဖဲစီၤၡမူၤအ့လး အိၣ်မူ အဆၢကတီၢ်လီၤ.+ ၁၄ တကးဒံးဘၣ် ဝ့ၢ်တဖၣ်လၢ ပှၤဖလ့ၡသးဖိ မၤန့ၢ်ပာ်စၢၤလၢ ပှၤအံၣ်စရ့လးဖိအအိၣ် စးထီၣ်လၢ ဝ့ၢ်ဧ့ကြိၣ် ပၢၢ်တုၤလၢ ဝ့ၢ်ကၤသး ဒီးဝ့ၢ်တဖၣ်အံၤ အဟီၣ်ကဝီၤတဖၣ်န့ၣ် ဘၣ်တၢ်ဟ့ၣ်လီၤက့ၤအီၤလၢ ပှၤအံၣ်စရ့လးဖိလီၤ.
ဒီးလၢ ပှၤအံၣ်စရ့လးဖိ ဒီးပှၤအမိၢ်ဖိ+ အဘၢၣ်စၢၤန့ၣ် တၢ်ဃူတၢ်ဖိး အိၣ်ဝဲစ့ၢ်ကီးလီၤ.
၁၅ ဒီးစီၤၡမူၤအ့လး ဆဲးမၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိ အဂီၢ် လၢအတၢ်အိၣ်မူ ဒီတစိၤညါလီၤ.+ ၁၆ တနံၣ်ဘၣ် တနံၣ်န့ၣ် အဝဲလဲၤဟးလၢ ဝ့ၢ်ဘ့ၤသ့လး,+ ဝ့ၢ်ကံးလကၤလး,+ ဝ့ၢ်မံးစပၤ+ ဒီးအဝဲမၤတၢ်ဒ် စံၣ်ညီၣ်ကွီၢ်တဂၤအသိး လၢအံၣ်စရ့လးအဂီၢ် လၢတၢ်လီၢ် သ့ၣ်တဖၣ်န့ၣ်လီၤ. ၁၇ ဘၣ်ဆၣ် မ့ၢ်လၢ အဟံၣ်အိၣ်လၢ ဝ့ၢ်ရၤမါအဃိ+ အဝဲဟဲက့ၤ ကဒါက့ၤဝဲဖဲန့ၣ်လီၤ. ဒီးဖဲန့ၣ်န့ၣ် အဝဲမၤတၢ်ဒ် စံၣ်ညီၣ်ကွီၢ် တဂၤအသိး လၢပှၤအံၣ်စရ့လးဖိ အဂီၢ်စ့ၢ်ကီးလီၤ. ဒီးအဝဲတ့ထီၣ် တၢ်လုၢ်လီၢ် တဖျၢၣ်လၢ ယဟိဝၤယွၤအဂီၢ် ဖဲန့ၣ်လီၤ.+