လူၤကၣ်

၁ ပှၤအါဂၤကွဲးလီၤဝဲ ကယဲၢ်တၢ်ဂ့ၢ်လၢ အကဲထီၣ်အသး သ့ၣ်တဖၣ်အံၤ ဒီးပဝဲသ့ၣ်တဖၣ်​ ပနာ်စ့ၢ်ကီးလီၤ.+ ၂ ပှၤအါဂၤလၢ အထံၣ်ဘၣ်ဝဲ တၢ်မၤအသးတဖၣ်အံၤ လၢအမဲာ် စးထီၣ်လၢ အခီၣ်ထံးလံၤလံၤ+ ဒီးစံၣ်တဲၤတဲလီၤ တၢ်ကစီၣ်တဖၣ်န့ၣ်+ တဲဘၣ်ပှၤ တၢ်ဂ့ၢ်တဖၣ်အံၤလီၤ. ၃ အဃိ ပှၤဒိၣ်ပှၤပှၢ် စီၤသီးဖံၤလူးဧၢ,+ ယဃုသ့ၣ်ညါ တၢ်ခဲလၢာ် စးထီၣ်လၢအခီၣ်ထံး လီၤတံၢ်လီၤဆဲး ဒ်သိးယကကွဲးလီၤန့ၢ်နၤ တၢ်ဂ့ၢ်တဖၣ်အံၤ တဆီဘၣ်တဆီလီၤ. ၄ ယမၤဒ်အံၤန့ၣ်​ မ့ၢ်ဒ်သိး နကသ့ၣ်ညါလၢ တၢ်လၢပှၤသိၣ်လိနၤန့ၣ်​ မ့ၢ်တၢ်လၢ အဘၣ်လီၤတံၢ်လီၤဆဲးလီၤ.+

၅ ဖဲစီၤဟ့ၤရိာ်* ကဲစီၤပၤလၢ ယူဒၤအဟီၣ်ကဝီၤ အဆၢကတီၢ်+ ပှၤလုၢ်တၢ်ဒိၣ်အိၣ်ဝဲတဂၤ လၢအမံၤမ့ၢ် စီၤစဃၤရံ ဒီးအဝဲမ့ၢ်ပှၤလၢ စီၤအဘံယၤ+ အပှၤလုၢ်တၢ်ဒိၣ်​ အကရူၢ်အကျါတဂၤလီၤ. ဒီးအမါ နီၢ်အ့းလံၤစါဘ့းန့ၣ်​ ဟဲလီၤစၢၤလီၤသွဲၣ်လၢ စီၤအၤဟရိၣ်လီၤ. ၆ အဝဲသ့ၣ်ခံဂၤလၢာ်န့ၣ်​ မ့ၢ်ဝဲ ပှၤတီပှၤလိၤလၢ ကစၢ်ယွၤအမဲာ်ညါလီၤ. မ့ၢ်လၢ အဝဲသ့ၣ်မၤထွဲဝဲ ယဟိဝၤယွၤ* အတၢ်မၤလိာ်ဒီး အတၢ်သိၣ်တၢ်သီ ခဲလၢာ်အဃိ ပှၤပာ်တၢ်ကမၣ်လၢ အဝဲသ့ၣ်အလိၤ အလီၢ်တအိၣ်ဘၣ်. ၇ ဘၣ်ဆၣ်​ နီၢ်အ့းလံၤစါဘ့း မ့ၢ်ပှၤတူာ်ဖိအဃိ အဝဲသ့ၣ်​ အဖိတအိၣ်ဘၣ်​ ဒီးအဝဲသ့ၣ်ခံဂၤလၢာ် အသးပှၢ်ထီၣ်ဖးဒိၣ်လံ.

၈ ဖဲစီၤစဃၤရံ အကရူၢ် လီၤဘၣ်မူဒါလၢ ကမၤဝဲ ပှၤလုၢ်တၢ်ဒိၣ်​ အတၢ်မၤလၢ+ ကစၢ်ယွၤအမဲာ်ညါအခါ ၉ ဒ်ပှၤလုၢ်တၢ်ဒိၣ်​ မၤညီနုၢ်ဝဲအသိး အဝဲကဘၣ်လဲၤနုာ်လီၤလၢ ယဟိဝၤယွၤ အတၢ်လုၢ်ဟံၣ်ပူၤ+ ဒ်သိးကဒွဲၣ်ထီၣ်​ တၢ်နၢမူအဂီၢ်လီၤ.+ ၁၀ ဖဲပှၤဒွဲၣ်ထီၣ်​ တၢ်နၢမူ အနၣ်ရံၣ်​ ဘၣ်ဝဲအခါ ပှၤဂီၢ်မုၢ်ခဲလၢာ် အိၣ်လၢတၢ်ချၢ ဒီးဃ့ထုကဖၣ်တၢ်လီၤ. ၁၁ ဒီးယဟိဝၤယွၤ အမူခိၣ်ကလူး ဟဲအိၣ်ဖျါထီၣ်လၢ စီၤစဃၤရံအမဲာ်ညါ ဒီးဆၢထၢၣ်​ လၢတၢ်လုၢ်လီၢ်လၢ တၢ်ဒွဲၣ်ထီၣ်​ တၢ်နၢမူအဂီၢ် အထွဲတခီလီၤ. ၁၂ ဖဲစီၤစဃၤရံ ထံၣ်ဝဲအခါ အသူၣ်ကိၢ်သးဂီၤတၢ် ဒီးပျံၤတၢ်ဒိၣ်မးလီၤ. ၁၃ ဘၣ်ဆၣ်​ မူခိၣ်ကလူး တဲအီၤလၢ “စီၤစဃၤရံဧၢ, ပျံၤတၢ်တဂ့ၤ. နတၢ်ဃ့ကညးန့ၣ်​ ကစၢ်ယွၤနၢ်ဟူဝဲလံ. ဒီးနမါ နီၢ်အ့းလံၤစါဘ့းန့ၣ်​ ကအိၣ်ဖျဲၣ်ထီၣ်န့ၢ်နၤ ဖိခွါတဂၤ ဒီးနကဘၣ်​ ကိးန့ၢ်အမံၤလၢ စီၤယိၤဟၣ်လီၤ.+ ၁၄ နကပှဲၤဒီး တၢ်သူၣ်ခုသးခု ဒီးပှၤအါဂၤ ကသးခုဝဲလၢ အဝဲဟဲအိၣ်ဖျဲၣ်ထီၣ်​ အဃိလီၤ.+ ၁၅ အဝဲကမ့ၢ် ပှၤအဒိၣ်တဂၤလၢ ယဟိဝၤယွၤ အမဲာ်ညါ,+ ဘၣ်ဆၣ်​ လ့ၤတက့ၤ အဝဲတဘၣ်အီ စပံးထံမ့ၢ်ဂ့ၤ တၢ်လၢ အပၣ်ဃုာ်ဒီးသံးမ့ၢ်ဂ့ၤ နီတစဲးဘၣ်.+ ဒီးတချုးလၢ အဝဲအိၣ်ဖျဲၣ်ထီၣ်ဒံးဘၣ်​ အခါဒၣ်လဲာ် အဝဲကပှဲၤဒီး သးစီဆှံလီၤ.+ ၁၆ ဒီးအဝဲကမၤစၢၤ ပှၤအံၣ်စရ့လးဖိအါဂၤ ဒ်သိး အဝဲသ့ၣ်​ ကဟဲက့ၤလၢ အကစၢ် ယဟိဝၤယွၤအအိၣ်လီၤ.+ ၁၇ တကးဒံးဘၣ်​ အဝဲကလဲၤလၢ ကစၢ်ယွၤအမဲာ်ညါ ဒီးအဝဲကအိၣ်ဒီး သးဒီးတၢ်စိတၢ်ကမီၤ* လၢအအိၣ်ပာ်စၢၤဒီး စီၤအ့ၤလံယၤလီၤ.+ ဒီးအဝဲ ကဒုးကဲထီၣ်က့ၤ ပၢ်တဖၣ်အသး ဒ်ဖိတဖၣ်အသး အသိး+ ဒီးအဝဲ ကမၤစၢၤ ပှၤလၢ အတဒိကနၣ်တၢ်တဖၣ်​ ဒ်သိး အဝဲသ့ၣ်​ ကမၤန့ၢ် ပှၤတီပှၤလိၤ အတၢ်ကူၣ်သ့ အဂီၢ်လီၤ. အဃိ အဝဲသ့ၣ်​ ကမ့ၢ် ပှၤတဒူၣ်လၢ အအိၣ်ကတဲာ်ကတီၤ အသးလၢ ယဟိဝၤယွၤ အဂီၢ်လီၤ.”+

၁၈ စီၤစဃၤရံ တဲမူခိၣ်ကလူးလၢ “ယသးပှၢ်လံ ဒီးယမါအသးပှၢ်လံအဃိ တၢ်ကကဲထီၣ်အသးဒ်အံၤ နီၢ်ကီၢ်န့ၣ်​ ယနာ်ကသ့ဒ်လဲၣ်.” ၁၉ မူခိၣ်ကလူး တဲဆၢက့ၤအီၤလၢ “ယမ့ၢ် ကၤဘြံၤအ့လး+ လၢအအိၣ်ဆၢထၢၣ်လၢ ကစၢ်ယွၤအမဲာ်ညါ+ ဒီးတၢ်ဆှၢလီၤယၤဒ်သိး ယကဟဲတဲတၢ်ဒီးနၤ ဒီးဒုးသ့ၣ်ညါနၤ တၢ်သးခုကစီၣ်အံၤလီၤ. ၂၀ ဒီးယတၢ်ကတိၤတဖၣ်​ ကဟဲလၢထီၣ်ပှဲၤထီၣ်​ ဖဲတၢ်ဆၢကတီၢ်လၢ အဘၣ်​ တၢ်ပာ်ပနီၣ်အီၤ ဘၣ်ဝဲအခါလီၤ. ဘၣ်ဆၣ်​ နတနာ်ဘၣ်​ အဃိ နကအိၣ်ဘှီၣ်ကလာ် ဒီးနတဲတၢ်တသ့လၢၤဘၣ်​ တုၤလၢ မုၢ်တနံၤလၢ တၢ်သ့ၣ်တဖၣ်န့ၣ်​ ဟဲကဲထီၣ်အသးလီၤ.” ၂၁ ဖဲန့ၣ်အဆၢကတီၢ် ပှၤဂီၢ်မုၢ်တဖၣ်​ အိၣ်ခိးဝဲ စီၤစဃၤရံလီၤ. ဒီးအဝဲသ့ၣ်​ ကမၢကမၣ်ဝဲ မ့ၢ်လၢ အဝဲလဲၤနုာ်လီၤဝဲလၢ တၢ်လုၢ်ဟံၣ်အပူၤ ယံာ်ဒိၣ်မးအဃိလီၤ. ၂၂ ဖဲအဟဲက့ၤထီၣ်အခါ အတဲတၢ်ဒီးအဝဲသ့ၣ်​ တသ့လၢၤဘၣ်. အဃိ အဝဲသ့ၣ်​ ဆိကမိၣ်ဝဲလၢ အဝဲထံၣ်​ တၢ်ထံၣ်လၢညါခီ တမံၤမံၤလၢ တၢ်လုၢ်ဟံၣ်အပူၤလီၤ. မ့ၢ်လၢ အတဲတၢ်တသ့ဘၣ်အဃိ အဝဲ နဲၣ်စုနဲၣ်ခီၣ်လၢ အဝဲသ့ၣ်အအိၣ်လီၤ. ၂၃ ဖဲမုၢ်နံၤတဖၣ်လၢ စီၤစဃၤရံ မၤဝဲတၢ်မၤစီဆှံလၢ တၢ်လုၢ်ဟံၣ်ပူၤ ပှဲၤထီၣ်အခါ အဝဲက့ၤလၢ အဟံၣ်လီၤ.

၂၄ လၢခံန့ၣ်​ အမါနီၢ်အ့းလံၤစါဘ့း ဒၢထီၣ်ဝဲ ဒီးအတဟးထီၣ်လၢ ဟံၣ်ချၢဘၣ်​ ယဲၢ်လါလီၤ. ဒီးနီၢ်အ့းလံၤစါဘ့း တဲဝဲလၢ ၂၅ “ခဲအံၤ ယဟိဝၤယွၤ မၤန့ၢ်တၢ်လၢ ယဂီၢ်ဒ်အံၤလီၤ. အဝဲသ့ၣ်နီၣ်ထီၣ်ယၤ ဒ်သိး ကမၤလီၤမၢ်ကွံာ် တၢ်လၢအမၤမဲာ်ဆှးယၤလီၤ.”+

၂၆ ဖဲအဒၢန့ၢ်ဃုလါအခါ ကစၢ်ယွၤ ဆှၢလီၤဝဲ မူခိၣ်ကလူး ကၤဘြံၤအ့လးလၢ+ ဝ့ၢ်နစၤရ့း လၢကၤလံၤလါ အဟီၣ်ကဝီၤအပူၤ ၂၇ ဒ်သိးကလဲၤလၢ မုၣ်ကနီၤတဂၤလၢ အမံၤမ့ၢ် နီၢ်မၤရံ+ အအိၣ်လီၤ. တၢ်အၢၣ်လီၤ အိၣ်ပာ်စၢၤလၢ မုၣ်ကနီၤအံၤ+ ကဖျီသးဒီး စီၤယိၤသး လၢအမ့ၢ် ပှၤလၢအဟဲလီၤစၢၤလီၤသွဲၣ်လၢ စီၤဒၤဝံးလီၤ. ၂၈ ဒီးမူခိၣ်ကလူးန့ၣ်​ ဟဲလၢအအိၣ်​ ဒီးတဲဘၣ်အီၤလၢ “နံၤလၢဂ့ၤ, ယဟိဝၤယွၤ ဘၣ်သူၣ်ဘၣ်သးနၤဒိၣ်မး ဒီးအအိၣ်ဒီးနၤလီၤ.” ၂၉ ဘၣ်ဆၣ်​ ခီဖျိလၢ တၢ်ကတိၤအံၤအဃိ နီၢ်မၤရံ သူၣ်ကိၢ်သးဂီၤတၢ်ဒိၣ်မး ဒီးအဝဲဆိကမိၣ်ဝဲလၢ မူခိၣ်ကလူး အတၢ်ဆၢဂ့ၤဆၢဝါအံၤ အခီပညီဒ်လဲၣ်လီၤ. ၃၀ ဒီးမူခိၣ်ကလူး တဲအီၤလၢ “နီၢ်မၤရံဧၢ, ဘၣ်ယိၣ်တၢ်တဂ့ၤ. ကစၢ်ယွၤ ဘၣ်သူၣ်ဘၣ်သးနၤလီၤ. ၃၁ နကဒၢထီၣ်​ ဒီးနကအိၣ်ဖျဲၣ်ထီၣ်​ ဖိခွါတဂၤ+ ဒီးနကဘၣ်​ ကိးန့ၢ်အမံၤလၢ ယ့ၣ်ၡူးလီၤ.+ ၃၂ အဝဲကမ့ၢ် ပှၤအဒိၣ်တဂၤ+ ဒီးကဘၣ်တၢ်ကိးအီၤလၢ တၢ်ထီကတၢၢ်တဂၤ အဖိခွါလီၤ.+ ယဟိဝၤယွၤ ကဟ့ၣ်လီၤအီၤလၢ အပၢ်စီၤဒၤဝံး အလီၢ်ပစိာ်လီၤ.+ ၃၃ ဒ်စီၤပၤတဂၤအသိး အဝဲကပၢ စီၤယၤကိာ်အစၢၤအသွဲၣ်​ လီၤထူလီၤယိာ် ဒီးအဘီအမုၢ်န့ၣ်​ အကတၢၢ်တအိၣ်ဘၣ်.”+

၃၄ ဘၣ်ဆၣ်​ နီၢ်မၤရံတဲဘၣ်​ မူခိၣ်ကလူးလၢ “တၢ်ကဲထီၣ်အသးဒ်အံၤ ကသ့ဒ်လဲၣ်. ယတမံဃုာ်ဘၣ်ဒီး ပိာ်ခွါ နီတဂၤ ဒံးဘၣ်.”+ ၃၅ မူခိၣ်ကလူး တဲအီၤလၢ “သးစီဆှံ ကဟဲလီၤလၢနလိၤ+ ဒီးတၢ်ထီကတၢၢ်တဂၤ အစိအကမီၤ ကလီၤဘၣ်နၤလီၤ. အဃိ ပှၤလၢ အကအိၣ်ဖျဲၣ်ထီၣ်တဂၤန့ၣ်​ ကဘၣ်တၢ်ကိးအီၤလၢ ပှၤစီဆှံ+ ဒီးကစၢ်ယွၤအဖိခွါလီၤ.+ ၃၆ ကွၢ်မီၤ, နဘူးနတံၢ် နီၢ်အ့းလံၤစါဘ့းန့ၣ်​ ပှၤကိးအီၤလၢ ပှၤတူာ်ဖိ ဒီးအသးပှၢ်လံ. ဘၣ်ဆၣ်​ အဝဲဒၢထီၣ်ဝဲ အဖိခွါ အိၣ်ဃုလါလံ. ၃၇ အဃိ တၢ်လၢကစၢ်ယွၤ မၤဝဲတသ့ဘၣ်န့ၣ်​ တအိၣ်နီတမံၤဘၣ်.”+ ၃၈ နီၢ်မၤရံတဲဝဲလၢ “ယမ့ၢ် ယဟိဝၤယွၤ အကုၢ်မုၣ်လီၤ. မ်တၢ်ကဲထီၣ်အသးဒီးယၤ ဒ်နတဲအသိးတက့ၢ်.” ဒီးမူခိၣ်ကလူးန့ၣ်​ ဟးထီၣ်ကွံာ်လၢအအိၣ်လီၤ.

၃၉ တယံာ်ဘၣ်ဒီး နီၢ်မၤရံလဲၤဝဲချ့ချ့လၢ ကစၢၢ်ကလိအကျါ လၢယူဒၤအဝ့ၢ်တဖျၢၣ်အပူၤလီၤ. ၄၀ ဒီးအဝဲလဲၤနုာ်လီၤလၢ စီၤစဃၤရံအဟံၣ်ပူၤ ဒီးဆၢဂ့ၤဆၢဝါဝဲ နီၢ်အ့းလံၤစါဘ့းလီၤ. ၄၁ ဖဲနီၢ်အ့းလံၤစါဘ့း နၢ်ဟူဝဲ နီၢ်မၤရံ အတၢ်ဆၢဂ့ၤဆၢဝါအခါ ဖိသၣ်လၢ အအိၣ်လၢ နီၢ်အ့းလံၤစါဘ့း အဟၢဖၢပူၤန့ၣ်​ ဟူးထီၣ်ဝဲ ဒီးသးစီဆှံဟဲလီၤလၢ နီၢ်အ့းလံၤစါဘ့းအလိၤ* ၄၂ ဒီးအဝဲ တဲထီၣ်ဝဲလၢ အကလုၢ်ဖးဒိၣ်လၢ “နမ့ၢ်ပှၤလၢ အဘၣ်ဆိၣ်ဂ့ၤလၢ ပိာ်မုၣ်တဖၣ်အကျါလီၤ. ဒီးနဒၢလီၢ် အတၤသၣ်န့ၣ်​ ဘၣ်ဆိၣ်ဂ့ၤဝဲလီၤ. ၄၃ ယကစၢ်အမိၢ် ဟဲဟးလၢ ယအိၣ်အဃိ မ့ၢ်တၢ်ခွဲးတၢ်ယာ် ဖးဒိၣ်တခါလၢ ယဂီၢ်လီၤ. ၄၄ ဖဲယနၢ်ဟူ နတၢ်ဆၢဂ့ၤဆၢဝါအခါ ဖိသၣ်လၢ ယဟၢဖၢပူၤန့ၣ်​ ဟူးထီၣ်ဝဲလၢ တၢ်သးခုအပူၤလီၤ. ၄၅ တၢ်လၢ ယဟိဝၤယွၤ အၢၣ်လီၤနၤတဖၣ်န့ၣ်​ ကဟဲလၢထီၣ်ပှဲၤထီၣ်ဝဲ ခဲလၢာ်အဃိ နမ့ၢ်နာ် တၢ်သ့ၣ်တဖၣ်အံၤန့ၣ်​ နကသးခုလီၤ.”

၄၆ နီၢ်မၤရံတဲဝဲလၢ “ယစံးထီၣ်ပတြၢၤ ယဟိဝၤယွၤလီၤ.+ ၄၇ ဒီးခီဖျိလၢ ကစၢ်ယွၤ လၢအမ့ၢ် ယတၢ်အုၣ်က့ၤခီၣ်က့ၤကစၢ်+ အဃိ ယသးခုဒိၣ်မးလီၤ. ၄၈ အဝဲကွၢ်လီၤ ယၤလၢအမ့ၢ် အကုၢ်မုၣ်လၢ အပတီၢ်ဖုၣ်​ တဂၤအံၤလီၤ.+ စးထီၣ်ခဲအံၤ ပှၤတစိၤဘၣ်တစိၤ ကကိးယၤလၢ ပှၤလၢအသးခု+ ၄၉ ခီဖျိ ပှၤလၢအစိဒိၣ်ကမီၤထီတဂၤအံၤ မၤတၢ်ဒိၣ်ဒိၣ်မုၢ်မုၢ် လၢယဂီၢ် အဃိလီၤ. ဒီးအမံၤန့ၣ်​ စီဆှံဝဲလီၤ.+ ၅၀ တစိၤဘၣ်တစိၤန့ၣ်​ အဝဲပာ်ဖျါထီၣ်​ တၢ်သးကညီၤလၢ ပှၤလၢအပျံၤအီၤတဖၣ်​ အဖီခိၣ်လီၤ.+ ၅၁ အဝဲပာ်ဖျါထီၣ်​ အစုတၢ်စိတၢ်ကမီၤ ဒီးမၤလီၤပြံလီၤပြါဝဲ ပှၤလၢ အပာ်ထီၣ်ထီအသးလီၤ.+ ၅၂ ပှၤလၢ အအိၣ်ဒီး တၢ်စိတၢ်ကမီၤတဖၣ်န့ၣ်​ အဝဲသုးကွံာ်ဝဲလၢ လီၢ်ပစိာ်အလိၤ+ ဒီးပာ်ထီၣ်ထီဝဲ ပှၤလၢ အပတီၢ်ဖုၣ်တဖၣ်လီၤ.+ ၅၃ ပှၤလၢအလိၣ်ဘၣ်​ တၢ်မၤစၢၤတဖၣ်န့ၣ်​ အဝဲဒုးသူၣ်မံသးမုာ် အဝဲသ့ၣ်​ လၢလၢပှဲၤပှဲၤလၢ တၢ်လၢအဂ့ၤတဖၣ်လီၤ.+ မ့မ့ၢ် ပှၤအထူးအတီၤန့ၣ်​ အဒုးက့ၤဝဲ ခီလီလီလီၤ. ၅၄ အဝဲဟဲမၤစၢၤ အခ့အပှၤ အံၣ်စရ့လး ဒီးသ့ၣ်နီၣ်ထီၣ်က့ၤ အတၢ်အၢၣ်လီၤလၢ အကပာ်ဖျါထီၣ်​ တၢ်သးကညီၤ+ ၅၅ လၢစီၤအၤဘြၤဟၣ်​ ဒီးအချံအသၣ်တဖၣ်+ အဖီခိၣ်​ လီၤထူလီၤယိာ် ဒ်အတဲပာ် ပမိၢ်ပၢ်ဖံဖု လၢပျၢၤတဖၣ်​ အသိးလီၤ.” ၅၆ ဒီးနီၢ်မၤရံ ဆဲးအိၣ်ဒီးအီၤ သၢလါဝံၤ က့ၤဝဲလၢအဟံၣ်လီၤ.

၅၇ တၢ်ဆၢကတီၢ်ဘၣ်လၢ နီၢ်အ့းလံၤစါဘ့း ကအိၣ်ဖျဲၣ်ထီၣ်အဖိ အဃိ အဝဲအိၣ်ဖျဲၣ်ထီၣ်ဝဲ ဖိခွါတဂၤလီၤ. ၅၈ ဒီးပှၤလၢအခိၣ်အဃၢၤ ဒီးအဘူးအတံၢ်တဖၣ်​ နၢ်ဟူဝဲလၢ ယဟိဝၤယွၤ ပာ်ဖျါထီၣ်​ တၢ်သးကညီၤလၢ နီၢ်အ့းလံၤစါဘ့း အဖီခိၣ်ဒိၣ်မး အဃိ အဝဲသ့ၣ်သးခုဃုာ်ဒီးအီၤလီၤ.+ ၅၉ ဖဲဃိးသီတသီ ဘၣ်အခါ အဝဲသ့ၣ်ဟဲဝဲဒ်သိး ကကူးတရံးဖိသၣ်လီၤ.+ ဒီးအဝဲသ့ၣ်​ ကကိးန့ၢ်ဝဲအမံၤလၢ စီၤစဃၤရံ ဒ်အပၢ်အမံၤအသိးလီၤ. ၆၀ ဘၣ်ဆၣ်​ အမိၢ်တဲဝဲလၢ “တမ့ၢ်ဘၣ်, ဘၣ်ကိးန့ၢ်အမံၤလၢ စီၤယိၤဟၣ်ဟီ.” ၆၁ ဖဲန့ၣ်န့ၣ်​ အဝဲသ့ၣ်​ တဲအီၤလၢ “လၢနဘူးနတံၢ်အကျါန့ၣ်​ ပှၤလၢအမံၤဒ်အံၤ တအိၣ်နီတဂၤဘၣ်.” ၆၂ ဒီးအဝဲသ့ၣ်​ နဲၣ်စုနဲၣ်ခီၣ်လၢ ဖိသၣ်အပၢ်အအိၣ်​ ဒ်သိးကသံကွၢ်အီၤလၢ အအဲၣ်ဒိးကိးန့ၢ်ဝဲ အမံၤဒ်လဲၣ်လီၤ. ၆၃ အဃိ အဝဲဃ့ဝဲ သ့ၣ်ဘ့ၣ်ဘၣ်​ ဒီးကွဲးလီၤဝဲလၢ “အမံၤမ့ၢ် စီၤယိၤဟၣ်လီၤ.”+ ဖဲန့ၣ်​ အဝဲသ့ၣ်ခဲလၢာ် ကမၢကမၣ်ဝဲလီၤ. ၆၄ တဘျီဃီန့ၣ်​ အထးခိၣ်​ အိးထီၣ်အသး ဒီးအပျ့ၤလီၤစၢ်ဝဲ ဒီးအဝဲစးထီၣ်တဲတၢ်+ ဒီးစံးထီၣ်ပတြၢၤ ကစၢ်ယွၤလီၤ. ၆၅ ဒီးပှၤလၢအဝဲသ့ၣ်​ အခိၣ်အဃၢၤတဖၣ်န့ၣ်​ ကမၢကမၣ်ဝဲဒိၣ်မး ဒီးပှၤလၢအအိၣ်လၢ ကစၢၢ်ကလိအကျါလၢ ယူဒၤအဟီၣ်ကဝီၤ ဒီတဘ့ၣ်န့ၣ်​ တဲဝဲဘၣ်ဃးဒီး တၢ်ကဲထီၣ်အသးတဖၣ်အံၤ အဂ့ၢ်လီၤ. ၆၆ ဒီးပှၤလၢ အနၢ်ဟူဝဲကိးဂၤဒဲးန့ၣ်​ တိၢ်န့ၢ်ဖံးဃာ်ဝဲလၢ အသးပူၤ ဒီးမ့ၢ်လၢ ယဟိဝၤယွၤ အစုအိၣ်ဒီးအီၤ နီၢ်ကီၢ်အဃိ အဝဲသ့ၣ်​ တဲဝဲလၢ “ဖိသၣ်တဂၤအံၤ မ့ၢ်ဒိၣ်ထီၣ်န့ၣ်​ အဝဲကကဲထီၣ်​ ပှၤဒ်လဲၣ်တဂၤလဲၣ်.”

၆၇ ဒီးသးစီဆှံဟဲလီၤလၢ အပၢ် စီၤစဃၤရံ အလိၤ ဒီးစီၤစဃၤရံ တဲတၢ်ဒ် ဝံအသိးလၢ ၆၈ “မ့ၢ်လၢ ပှၤအံၣ်စရ့လးဖိ အကစၢ် ယဟိဝၤယွၤ ဃၣ်ကဒါက့ၤ အသးဆူ အပှၤဂီၢ်မုၢ်အအိၣ်​ ဒ်သိး ကမၤပူၤဖျဲး အဝဲသ့ၣ်အဃိ+ မ်အဘၣ်​ တၢ်စံးထီၣ်ပတြၢၤအီၤတက့ၢ်.+ ၆၉ ဒီးအဝဲဒုးအိၣ်ထီၣ်​ တၢ်အုၣ်က့ၤခီၣ်က့ၤ အနၢၤတဘိ*+ လၢပဂီၢ် လၢအခ့အပှၤ စီၤဒၤဝံးအစၢၤအသွဲၣ်အကျါလီၤ.*+ ၇၀ ဒ်အတဲပာ်စၢၤဝဲခီဖျိ အဝံစီဆှံ လၢပျၢၤတဖၣ်အသိး+ ၇၁ အကအုၣ်က့ၤခီၣ်က့ၤပှၤလၢ ပဒုၣ်ပဒါ ဒီးပှၤလၢအသးဟ့ ပှၤတဖၣ်အစုပူၤလီၤ.+ ၇၂ အဝဲကပာ်ဖျါထီၣ်​ တၢ်သးကညီၤလၢ ပဖီခိၣ်​ ဒ်အအၢၣ်လီၤ ပမိၢ်ပၢ်ဖံဖု လၢပျၢၤတဖၣ်အသိး တကးဒံးဘၣ်​ အကသ့ၣ်နီၣ်ထီၣ်က့ၤဝဲ အတၢ်အၢၣ်လီၤစီဆှံ+ ၇၃ ဒီးတၢ်အၢၣ်လီၤလၢ အမၤဝဲဒီးပဖုဖးဒိၣ်​ စီၤအၤဘြၤဟၣ်လီၤ.+ ၇၄ ဒီးဖဲအမၤပူၤဖျဲးပှၤလၢ ပဒုၣ်ပဒါတဖၣ်​ အစုပူၤဝံၤအလီၢ်ခံ အကဟ့ၣ်ပှၤ တၢ်ခွဲးတၢ်ယာ်လၢ ပကမၤ အတၢ်မၤစီဆှံ ပှဲၤဒီးတၢ်သးဒူ, ၇၅ တၢ်သးတီ ဒီးတၢ်တီတၢ်လိၤ လၢအမဲာ်ညါ တစိၤပသးလီၤ. ၇၆ ဘၣ်ဆၣ်​ ယဖိခွါဧၢ, မ့မ့ၢ်နၤန့ၣ်​ နကကဲထီၣ်​ တၢ်ထီကတၢၢ်တဂၤ အဝံလီၤ. နကလဲၤတၢ်လၢ ယဟိဝၤယွၤအမဲာ်ညါ ဒ်သိးကကတဲာ်ကတီၤ အကျဲအဂီၢ်+ ၇၇ ဒီးဒ်သိးကဒုးသ့ၣ်ညါ အပှၤဂီၢ်မုၢ်တဖၣ်လၢ အဝဲကအုၣ်က့ၤခီၣ်က့ၤ အဝဲသ့ၣ်​ ခီဖျိ ကပျၢ်ကွံာ် အဝဲသ့ၣ်အတၢ်ဒဲးဘး,+ ၇၈ မ့ၢ်လၢ အဝဲ အိၣ်ဒီးတၢ်သးကညီၤအဃိလီၤ. တၢ်သးကညီၤအံၤ ကလီၤဂာ်ဒ်သိးဒီး မုၢ်ဝါထီၣ်​ အတၢ်ကပီၤလၢထးခီလၢ အဆဲးလီၤဘၣ်ပှၤ ၇၉ ဒ်သိးကဟ့ၣ်လီၤ တၢ်ကပီၤလၢ ပှၤလၢအဆ့ၣ်နီၤလၢ တၢ်ခံးကျါ ဒီးတၢ်သံအကဒုဖီလာ်တဖၣ်+ ဒီးဒ်သိးကဆှၢပခီၣ်လၢ တၢ်မုာ်တၢ်ခုၣ်အကျဲအဂီၢ်လီၤ.”

၈၀ ဖိသၣ်အံၤ ဒိၣ်ထီၣ်ဝဲလၢ နီၢ်ခိဒီးနီၢ်သး ခံကပၤလၢာ်လီၤ. ဒီးအဝဲဆဲးအိၣ်ဝဲလၢ ပှၢ်မုၢ်ကနၢအပူၤ တုၤလၢ မုၢ်တနံၤလၢ အပာ်ဖျါထီၣ်အသးလၢ ပှၤအံၣ်စရ့လးဖိတဖၣ်​ အမဲာ်ညါလီၤ.