မးသဲ
၁၃ ဖဲတၢ်တနံၤန့ၣ် ယ့ၣ်ၡူး ဟးထီၣ်လၢ ဟံၣ်တဖျၢၣ်န့ၣ် ဒီးလဲၤဆ့ၣ်နီၤဝဲလၢ ပီၣ်လဲၣ်နံၤလီၤ. ၂ ဒီးပှၤဂီၢ်မုၢ်ဖးဒိၣ်ဟဲလၢ ယ့ၣ်ၡူးအအိၣ်လီၤ. အဃိ အဝဲလဲၤထီၣ်လၢ ကဘီပူၤ ဒီးဆ့ၣ်နီၤဝဲလီၤ. ဒီးပှၤဂီၢ်မုၢ်ခဲလၢာ်န့ၣ် ဆၢထၢၣ်ဝဲလၢ ပီၣ်လဲၣ်နံၤလီၤ.+ ၃ ဒီးယ့ၣ်ၡူးသိၣ်လိ အဝဲသ့ၣ်တၢ်ဂ့ၢ်အါမံၤ ခီဖျိလၢ တၢ်ကတိၤဒိတဖၣ်လီၤ.+ ဒီးအတဲဝဲလၢ “ပှၤဖှံတၢ်ချံတဂၤ လဲၤဖှံလီၤတၢ်လီၤ.+ ၄ ဖဲအဝဲဖှံတၢ်အခါ တၢ်ချံတနီၤန့ၣ် လီၤဘၣ်လၢ ကျဲကပၤ ဒီးထိၣ်တဖၣ် ဟဲအီၣ်ကွံာ်ဝဲလီၤ.+ ၅ တၢ်ချံအဂၤတနီၤန့ၣ် လီၤဘၣ်လၢ လၢၢ်အဖီခိၣ် လၢဟီၣ်ခိၣ်တအိၣ် အါအါဘၣ်န့ၣ်လီၤ. ဒီးမ့ၢ်လၢ ဟီၣ်ခိၣ်ညၣ် ဘူဝဲအဃိ တၢ်ချံတဖၣ်မဲထီၣ်ဝဲ တဘျီဃီလီၤ.+ ၆ ဘၣ်ဆၣ် ဖဲမုၢ်ဟဲထီၣ် ဒီးဆဲးလီၤဘၣ်ဝဲ တၢ်မုၢ်တၢ်ဘိတဖၣ်အံၤအခါ အဃ့ထီဝဲ မ့ၢ်လၢ အဂံၢ်တစဲၤလီၤဘၣ် အဃိလီၤ. ၇ ဒီးတၢ်ချံအဂၤတနီၤန့ၣ် လီၤဘၣ်လၢ တၤဆှုၣ်တၤမဲအကျါအဃိ တၤဆှုၣ်တၤမဲတဖၣ် မဲထီၣ်ဒီး ခဲဘၢအီၤလီၤ.+ ၈ မ့မ့ၢ် တၢ်ချံအဂၤတနီၤနီၤန့ၣ် လီၤဘၣ်လၢ ဟီၣ်ခိၣ်ညၣ်လၢ အဂ့ၤအဖီခိၣ်အဃိ သၣ်ထီၣ်ဝဲလီၤ. တနီၤန့ၣ် သၣ်ထီၣ်ဝဲ အါန့ၢ်အလီၢ်အစး ၁၀၀ ဒီးတနီၤန့ၣ် ၆၀ ဒီးအဂၤတနီၤန့ၣ် ၃၀ လီၤ.+ ၉ ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ် ထံထံတက့ၢ်.”+
၁၀ ယ့ၣ်ၡူးအပျဲၢ်အဘီၣ်တဖၣ် ဟဲလၢအအိၣ် ဒီးတဲအီၤလၢ “ဖဲနတဲတၢ်ဒီး အဝဲသ့ၣ်အခါ နသူတၢ်ကတိၤဒိ ဘၣ်လဲၣ်.”+ ၁၁ ယ့ၣ်ၡူးတဲဆၢက့ၤ အဝဲသ့ၣ်လၢ “သုဝဲသ့ၣ်အံၤ တၢ်ဟ့ၣ်လီၤသုအခွဲးလၢ သုကနၢ်ပၢၢ် တၢ်ခူသူၣ်စီဆှံတဖၣ်+ လၢအဘၣ်ဃးဒီး မူခိၣ်အဘီအမုၢ် ဘၣ်ဆၣ် မ့မ့ၢ်အဝဲသ့ၣ်န့ၣ် တၢ်တဟ့ၣ်အီၤအခွဲးဘၣ်. ၁၂ ပှၤလၢအအိၣ်ဒီး တၢ်သ့ၣ်ညါနၢ်ပၢၢ်န့ၣ် အကန့ၢ်ဘၣ်အါထီၣ်ဝဲ ဘၣ်ဆၣ် ပှၤလၢ အတအိၣ်ဒီး တၢ်သ့ၣ်ညါနၢ်ပၢၢ်ဘၣ်န့ၣ် တၢ်သ့ၣ်ညါနၢ်ပၢၢ်လၢ အိၣ်ဒီးအီၤဒၣ်လဲာ် ကလီၤမၢ်ကွံာ်ဝဲလီၤ.+ ၁၃ အဝဲသ့ၣ်န့ၣ် ကွၢ်တၢ်ဘၣ်ဆၣ် တထံၣ်ဝဲဘၣ်, နၢ်ဟူတၢ်ဘၣ်ဆၣ် တဒိကနၣ်ဝဲဘၣ် ဒီးအဝဲသ့ၣ် တနၢ်ပၢၢ်ဝဲ အခီပညီစ့ၢ်ကီးဘၣ်.+ အဃိ ဖဲယတဲတၢ်ဒီး အဝဲသ့ၣ်အခါ ယသူ တၢ်ကတိၤဒိလီၤ. ၁၄ တၢ်လၢ ဝံယၡါယၤ တဲဆိပာ်စၢၤဝဲ ဘၣ်ဃးဒီး အဝဲသ့ၣ်န့ၣ် ဟဲလၢထီၣ်ပှဲၤထီၣ်ဝဲလံ. ဝံယၡါယၤ တဲဆိပာ်စၢၤဝဲလၢ ‘သုကနၢ်ဟူတၢ် ဘၣ်ဆၣ် လ့ၤတက့ၤ သုတနၢ်ပၢၢ် အခီပညီဘၣ်. ဒီးသုကကွၢ်တၢ် ဘၣ်ဆၣ် လ့ၤတက့ၤ သုတထံၣ်အီၤဘၣ်.+ ၁၅ ပှၤတဖၣ်အံၤ အခိၣ်ကိၤဝဲဒိၣ်မးလီၤ. အဝဲသ့ၣ်နၢ်ဟူတၢ် ဘၣ်ဆၣ် တဒိကနၣ်ဝဲဘၣ် ဒီးအဝဲသ့ၣ် ဘံၣ်ဃာ်အမဲာ်ဒ်သိး အသု တထံၣ်တၢ်တဂ့ၤ ဒီးပံးအနၢ်ဒ်သိး အသု တနၢ်ဟူတၢ်တဂ့ၤ ဒီးအသု တနၢ်ပၢၢ်တၢ်တဂ့ၤအဂီၢ်လီၤ. အဝဲသ့ၣ် တပီၢ်ယၢ်လီၤက့ၤအသး ဘၣ်အဃိ ယမၤဘျါက့ၤ အဝဲသ့ၣ်တသ့ဘၣ်.’+
၁၆ “မ့ၢ်လၢ သုမဲာ်ထံၣ်တၢ် ဒီးသုနၢ်န့ၣ် နၢ်ဟူတၢ်သ့ၣ်တဖၣ်အံၤအဃိ သုကသးခုလီၤ.+ ၁၇ ယကတဲဘၣ်သု တီတီလၢ ဝံဒီးပှၤတီပှၤလိၤအါဂၤ ဆၢထံၣ်ဝဲတၢ်လၢ သုထံၣ်ဘၣ်တဖၣ် ဘၣ်ဆၣ် တထံၣ်ဘၣ်ဝဲဘၣ်.+ ဒီးအဝဲသ့ၣ် ဆၢနၢ်ဟူ တၢ်လၢသုနၢ်ဟူဘၣ်တဖၣ် ဘၣ်ဆၣ် တနၢ်ဟူဘၣ်ဝဲဘၣ်.
၁၈ “ခဲအံၤဒိကနၣ် တၢ်ကတိၤဒိတခါလၢ အဘၣ်ဃးဒီး ပှၤဖှံတၢ်ချံတဂၤ အဂ့ၢ်တက့ၢ်.+ ၁၉ တၢ်ချံလၢ အလီၤဘၣ်လၢ ကျဲကပၤန့ၣ် လီၤဂာ်ဒ်သိးဒီးပှၤလၢ အနၢ်ဟူဘၣ် ဘီမုၢ်အဂ့ၢ် ဘၣ်ဆၣ် တနၢ်ပၢၢ်ဝဲဘၣ်အဃိ မုၣ်ကီၤလံၢ်*+ ဟဲဟံးထီၣ်ကွံာ် တၢ်လၢ အဘၣ်တၢ်ဖှံလီၤအီၤလၢ အသးပူၤလီၤ.+ ၂၀ ဒီးတၢ်ချံလၢ အလီၤဘၣ်လၢ လၢၢ်အဖီခိၣ်န့ၣ် လီၤဂာ်ဒ်သိးဒီးပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ ဒီးတူၢ်လိာ်ဝဲလၢ တၢ်သးခုအပူၤ တဘျီဃီလီၤ.+ ၂၁ ဘၣ်ဆၣ် အဂံၢ်တစဲၤလီၤလၢ အသးပူၤဘၣ်အဃိ အဝဲတူၢ်လိာ်ဝဲ တစိၢ်တလီၢ်လီၤ. ဖဲတၢ်ကီတၢ်ခဲ ဒီးတၢ်မၤအၢမၤနး ဟဲဘၣ်အီၤခီဖျိလၢ ကစၢ်ယွၤ အကလုၢ်ကထါအဃိအခါ အလီၤဃံၢ်ဝဲတဘျီဃီလီၤ. ၂၂ မ့မ့ၢ်တၢ်ချံလၢ အဘၣ်တၢ်ဖှံလီၤအီၤလၢ တၤဆှုၣ်တၤမဲအကျါန့ၣ် လီၤဂာ်ဒ်သိးဒီး ပှၤလၢအနၢ်ဟူဘၣ် ကစၢ်ယွၤ အကလုၢ်ကထါ ဘၣ်ဆၣ် စိၤခဲအံၤ အတၢ်ကိၢ်တၢ်ဂီၤတဖၣ်+ ဒီးတၢ်ထူးတၢ်တီၤ အတၢ်လီတၢ်ဝ့ၤ ခဲဘၢကွံာ် ကစၢ်ယွၤ အကလုၢ်ကထါအဃိ တသၣ်ထီၣ်ဝဲဘၣ်.+ ၂၃ မ့မ့ၢ် တၢ်ချံလၢ အလီၤဘၣ်လၢ ဟီၣ်ခိၣ်ညၣ်လၢ အဂ့ၤအဖီခိၣ်န့ၣ် လီၤဂာ်ဒ်သိးဒီး ပှၤလၢ အနၢ်ဟူဘၣ် ကစၢ်ယွၤ အကလုၢ်ကထါ ဒီးနၢ်ပၢၢ်ဝဲအခီပညီလီၤ. အဝဲသ့ၣ်န့ၣ် သၣ်ထီၣ်ဝဲလီၤ. တနီၤန့ၣ် သၣ်ထီၣ်ဝဲ အါန့ၢ်အလီၢ်အစး ၁၀၀ ဒီးတနီၤန့ၣ် ၆၀ ဒီးအဂၤတနီၤန့ၣ် ၃၀ လီၤ.”+
၂၄ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိ အဂၤတခါလၢ “ယွၤအဘီအမုၢ်န့ၣ် လီၤဂာ်ဒီးပှၤတဂၤလၢ အဖှံလီၤ တၢ်ချံလၢအဂ့ၤလၢ အစံာ်ပျီပူၤလီၤ. ၂၅ ဖဲပှၤမံ အဆၢကတီၢ်န့ၣ် အဒုၣ်အဒါတဂၤ ဟဲဖှံလီၤဝဲနီၣ်* အချံတဖၣ်လၢဘု* အကျါဒီး ဟးထီၣ်ကွံာ်ဝဲလီၤ. ၂၆ ဖဲဘု ဟဲမဲထီၣ်သၣ်ထီၣ်အခါ နီၣ်တဖၣ် ဟဲမဲထီၣ်ဃုာ်ဝဲစ့ၢ်ကီးလီၤ. ၂၇ အဃိ ကုၢ်တဖၣ် လဲၤတဲဘၣ် ဟံၣ်ကစၢ်လၢ ‘သရၣ်ဧၢ, နဖှံလီၤတၢ်ချံလၢအဂ့ၤလၢ နစံာ်ပျီအပူၤ တမ့ၢ်ဧီၤ. ဘၣ်မနုၤအဃိ နီၣ်တဖၣ် ဟဲမဲထီၣ်ဝဲလဲၣ်.’ ၂၈ ဒီးအဝဲတဲဆၢ အကုၢ်တဖၣ်လၢ ‘ဒုၣ်ဒါတဂၤန့ၣ် ဟဲမၤဝဲမီၤ.’+ ဒီးအကုၢ်တဖၣ်န့ၣ် တဲအီၤလၢ ‘နအဲၣ်ဒိးလၢ ပကလဲၤ ထဲးထီၣ်ကွံာ်နီၣ်ဧါ.’ ၂၉ အဝဲတဲဆၢဝဲလၢ ‘မၤတဂ့ၤ, ယဘၣ်ယိၣ်လၢ သုမ့ၢ်ထဲးထီၣ်ကွံာ် နီၣ်တဖၣ်န့ၣ် သုကထဲးထီၣ်ဘၣ်ဖုး ဒီးဘုလီၤ. ၃၀ ပျဲနီၣ်ဒီးဘု ဒိၣ်ထီၣ်ဃုာ်တုၤလၢ ပှၤကူးဘု အဆၢကတီၢ်တက့ၢ်. ဖဲပှၤကူးဘု အဆၢကတီၢ်န့ၣ် ယကတဲဘၣ် ပှၤကူးဘုဖိတဖၣ်လၢ ထဲးထီၣ်ဆိ နီၣ်တဖၣ် ဒီးစၢကဒိၣ်ထီၣ်အီၤ တကဒိၣ် တကဒိၣ် ဒ်သိးကဒွဲၣ်အူကွံာ်အီၤ အဂီၢ်တက့ၢ်. ဝံၤဒီး မ့မ့ၢ်ဘုန့ၣ် ပာ်ဖှိၣ်အီၤလၢ ယဘုဖီအပူၤတက့ၢ်.’”+
၃၁ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိ အဂၤတခါ ဒီးတဲဝဲလၢ “မူခိၣ်အဘီအမုၢ်န့ၣ် လီၤဂာ်ဒီး သဘၣ်အချံ* လၢပှၤတဂၤဟံးန့ၢ်ဝဲ ဒီးသူၣ်လီၤဝဲလၢ အစံာ်ပျီပူၤလီၤ.+ ၃၂ လၢတၢ်ချံခဲလၢာ်အကျါန့ၣ် အမ့ၢ်တၢ်ချံလၢ အဆံးကတၢၢ် ဘၣ်ဆၣ် ဖဲအမဲထီၣ်အခါ အဒိၣ်န့ၢ်ဒံး တၢ်ဒိးတၢ်လၣ် အထူၣ်အဂၤတဖၣ် ဒီးအကဲထီၣ်ဝဲသ့ၣ်တထူၣ် ဒီးထိၣ်လၢ တၢ်ဖးဖီတဖၣ် ဟဲအိၣ်ဝဲလၢ အဒ့တဖၣ်အလိၤလီၤ.”
၃၃ ယ့ၣ်ၡူး တဲဘၣ်အဝဲသ့ၣ် တၢ်ကတိၤဒိ အဂၤတခါ ဒီးတဲဝဲလၢ “မူခိၣ်အဘီအမုၢ်န့ၣ် လီၤဂာ်ဒီး ကိၣ်မံၣ်လၢ ပိာ်မုၣ်တဂၤ ဃါဃုာ်ဝဲဒီးကိၣ်ကမူၣ် သၢတလိး* တုၤလၢ အပွးထီၣ်ဝဲခဲလၢာ်လီၤ.”+
၃၄ ဖဲယ့ၣ်ၡူးတဲဘၣ် ပှၤဂီၢ်မုၢ် တၢ်ဂ့ၢ်သ့ၣ်တဖၣ်န့ၣ် ခဲလၢာ်အခါ အဝဲသူ တၢ်ကတိၤဒိတဖၣ်လီၤ. မ့ၢ်လီၤ, တၢ်ကတိၤဒိ မ့ၢ်တပၣ်ဘၣ်န့ၣ် အဝဲတတဲတၢ်ဒီး အဝဲသ့ၣ်ဘၣ်.+ ၃၅ အဃိ တၢ်မၤအသးတဖၣ်အံၤ မၤလၢထီၣ်ပှဲၤထီၣ် ဝံအတၢ်စံးပာ်လၢ အတဲဝဲလၢ “ယကအိးထီၣ် ယထးခိၣ်လၢ တၢ်ကတိၤဒိတဖၣ်လီၤ. တၢ်လၢ အအိၣ်ခူသူၣ်အသးလၢ အခီၣ်ထံးလံၤလံၤန့ၣ်* ယကတဲဖျါထီၣ်အီၤလီၤ.”+
၃၆ ယ့ၣ်ၡူးပျဲက့ၤ ပှၤဂီၢ်မုၢ် ဝံၤအလီၢ်ခံ အဝဲက့ၤနုာ်လီၤဝဲလၢ ဟံၣ်ပူၤလီၤ. ဒီးအပျဲၢ်အဘီၣ်တဖၣ် ဟဲတဲအီၤလၢ “တၢ်ကတိၤဒိလၢ အဘၣ်ဃးဒီး နီၣ်တဖၣ်လၢ စံာ်ပျီပူၤန့ၣ် တဲနၢ်ပၢၢ်ပှၤ အခီပညီမီၤ.” ၃၇ ယ့ၣ်ၡူးတဲဆၢအဝဲသ့ၣ်လၢ “ပှၤလၢအဖှံလီၤတၢ်ချံ လၢအဂ့ၤတဂၤန့ၣ် မ့ၢ်ဝဲပှၤကညီဖိခွါအံၤလီၤ. ၃၈ စံာ်ပျီန့ၣ် မ့ၢ်ဝဲဟီၣ်ခိၣ်+ ဒီးတၢ်ချံလၢအဂ့ၤန့ၣ်မ့ၢ်ဝဲ ဘီမုၢ်အဖိခွါတဖၣ် ဒီးနီၣ်န့ၣ်မ့ၢ်ဝဲ မုၣ်ကီၤလံၢ်* အဖိခွါတဖၣ်လီၤ.+ ၃၉ ဒီးဒုၣ်ဒါလၢ အလဲၤဖှံလီၤတၢ်တဂၤန့ၣ် မ့ၢ်ဝဲမုၣ်ကီၤလံၢ်လီၤ. ဒီးပှၤကူးဘု အဆၢကတီၢ်န့ၣ် မ့ၢ်ဝဲတၢ်အစိၤလၢ အလီၢ်ခံကတၢၢ်လီၤ. မ့မ့ၢ် ပှၤကူးဘုဖိတဖၣ်န့ၣ် မ့ၢ်ဝဲမူခိၣ်ကလူးတဖၣ်လီၤ. ၄၀ ဒ်နီၣ်တဖၣ် ကဘၣ် တၢ်စၢကဒိၣ်ထီၣ်အီၤ တကဒိၣ် တကဒိၣ် လၢတၢ်ကဒွဲၣ်အူကွံာ်အီၤ လၢမ့ၣ်အူအဂီၢ်အသိး တၢ်အစိၤလၢ အလီၢ်ခံကတၢၢ် မ့ၢ်ဘၣ်အခါန့ၣ် တၢ်ကမၤအသး ဒ်န့ၣ်စ့ၢ်ကီးလီၤ.+ ၄၁ ပှၤကညီဖိခွါအံၤ ကဆှၢလီၤ အမူခိၣ်ကလူးတဖၣ် ဒီးအဝဲသ့ၣ် ကထုးထီၣ်ကွံာ် ကယဲၢ်တၢ်အိၣ်လၢ အဘီမုၢ်အပူၤ လၢအကဲထီၣ် တၢ်လီၤဃံၢ်အလီၢ် ဒီးပှၤလၢအမၤ တၢ်အၢတၢ်သီတဖၣ်လီၤ. ၄၂ ဒီးမူခိၣ်ကလူးတဖၣ် ကတၢၤလီၤကွံာ် အဝဲသ့ၣ်လၢ ဖၣ်ကပူၤ လၢမ့ၣ်အူကဲၤဝဲအပူၤလီၤ.+ ဖဲန့ၣ်န့ၣ် အဝဲသ့ၣ် ကဟီၣ်ကယၢၤ ဒီးကအ့ၣ်တဃံးအမဲလီၤ. ၄၃ ဖဲန့ၣ်အခါ ပှၤတီပှၤလိၤတဖၣ် ကကပီၤထီၣ် ကပြုၢ်ကပြီၤဒ်မုၢ်အသိး+ လၢအဝဲသ့ၣ် အပၢ်အဘီမုၢ်အပူၤလီၤ. ပှၤလၢ အနၢ်ဟူတၢ်သ့န့ၣ် မ်အဒိကနၣ်တၢ် ထံထံတက့ၢ်.
၄၄ “မူခိၣ်အဘီအမုၢ်န့ၣ် လီၤဂာ်ဒီး တၢ်လုၢ်ဒိၣ်ပှ့ၤဒိၣ်တခါလၢ အဘၣ်တၢ်ပာ်ခူသူၣ်အီၤလၢ စံာ်ပျီပူၤလီၤ. ဒီးပှၤလၢ အထံၣ်န့ၢ်ဝဲတဂၤန့ၣ် ပာ်ခူသူၣ်ကဒီးအီၤဖဲန့ၣ် ဒီးခီဖျိလၢ အသးခုဝဲအဃိ အဝဲ လဲၤဆါလီၤကွံာ်ဝဲ တၢ်လၢအိၣ်ဒီးအီၤခဲလၢာ် ဒီးပှ့ၤဝဲ စံာ်ပျီတဘ့ၣ်န့ၣ်လီၤ.+
၄၅ “တကးဒံးဘၣ် မူခိၣ်အဘီအမုၢ်န့ၣ် လီၤဂာ်ဒီး ပှၤပှ့ၤတၢ်ဆါတၢ်တဂၤလၢ အဟးဃုဝဲ ပလဲလၢ အလုၢ်ဒိၣ်ပှ့ၤဒိၣ်တဖၣ်လီၤ. ၄၆ ဖဲအထံၣ်ဝဲ ပလဲလၢ အလုၢ်ဒိၣ်ပှ့ၤဒိၣ် တဖျၢၣ်အခါ တဘျီဃီ အဝဲက့ၤဆါလီၤကွံာ်ဝဲ တၢ်လၢအိၣ်ဒီးအီၤခဲလၢာ် ဒီးပှ့ၤဝဲ ပလဲတဖျၢၣ်န့ၣ်လီၤ.+
၄၇ “တကးဒံးဘၣ် မူခိၣ်အဘီအမုၢ်န့ၣ် လီၤဂာ်ဒီးစၤ* တဘ့ၣ်လၢ အဘၣ်တၢ်ကွံာ်လီၤအီၤလၢ ပီၣ်လဲၣ်အပူၤ ဒီးဖီၣ်န့ၢ်ဝဲ ညၣ်အကလုာ်ကလုာ်လီၤ. ၄၈ ဖဲစၤပှဲၤဝဲအခါ ပှၤတွံၢ်ထီၣ်က့ၤအီၤလၢ ပီၣ်လဲၣ်ကၢၢ်နံၤလီၤ. အဝဲသ့ၣ်ဆ့ၣ်နီၤ ထၢဖှိၣ်ဝဲ ညၣ်အဂ့ၤတဖၣ်+ လၢကုပူၤလီၤ. မ့မ့ၢ်ညၣ်လၢ အအုၣ်တဖၣ်န့ၣ်+ အဝဲသ့ၣ် တၢၤကွံာ်ဝဲလီၤ. ၄၉ တၢ်အစိၤလၢ အလီၢ်ခံကတၢၢ်န့ၣ် ကမၤအသးဒ်န့ၣ်လီၤ. မူခိၣ်ကလူးတဖၣ် ကလဲၤနီၤဖးဝဲ ပှၤအၢလၢ အအိၣ်လၢ ပှၤတီပှၤလိၤအကျါလီၤ. ၅၀ ဒီးကကွံာ်လီၤ အဝဲသ့ၣ်လၢ ဖၣ်ကပူၤ လၢမ့ၣ်အူကဲၤဝဲအပူၤလီၤ. ဖဲန့ၣ်န့ၣ် အဝဲသ့ၣ် ကဟီၣ်ကယၢၤ ဒီးကအ့ၣ်တဃံးအမဲလီၤ.
၅၁ “တၢ်ဂ့ၢ်သ့ၣ်တဖၣ်န့ၣ် မ့ၢ်သုနၢ်ပၢၢ်အီၤခဲလၢာ်လံဧါ.” အဝဲသ့ၣ်စံးဆၢ ယ့ၣ်ၡူးလၢ “မ့ၢ်, နၢ်ပၢၢ်လံ.” ၅၂ ဒီးယ့ၣ်ၡူး တဲအဝဲသ့ၣ်လၢ “အဃိ ကယဲၢ်သရၣ်လၢ ဘၣ်တၢ်သိၣ်လိအီၤလၢ မူခိၣ်အဘီမုၢ်အဂ့ၢ်န့ၣ် လီၤဂာ်ဒီး ဟံၣ်ကစၢ်တဂၤလၢ အထုးထီၣ်ဝဲ တၢ်အသီဒီး တၢ်အလီၢ်လံၤလၢ အအိၣ်လၢ အတၢ်ပာ်ဖှိၣ် တၢ်လုၢ်ဒိၣ်ပှ့ၤဒိၣ်အလီၢ်လီၤ.”
၅၃ ဖဲယ့ၣ်ၡူးတဲဝဲ တၢ်ကတိၤဒိတဖၣ်အံၤ ဝံၤအလီၢ်ခံ အဝဲဟးထီၣ်ကွံာ်ဝဲ ဖဲန့ၣ်လီၤ. ၅၄ ဖဲအဟဲက့ၤတုၤလၢ အနီၢ်ကစၢ် အဟီၣ်ကဝီၤအခါ+ အဝဲလဲၤသိၣ်လိတၢ်လၢ ဘူၣ်ဘျီၣ်ပူၤလီၤ. ဒီးပှၤဖဲန့ၣ်တဖၣ် ကမၢကမၣ်ဝဲအဃိ တဲဝဲလၢ “ပှၤတဂၤအံၤ ဒိးန့ၢ်ဘၣ် တၢ်ကူၣ်သ့ ဖဲလဲၣ် ဒီးဒ်သိး အဝဲကမၤတၢ်လီၤလးတဖၣ်အံၤအဂီၢ် အန့ၢ်ဘၣ် တၢ်စိတၢ်ကမီၤဖဲလဲၣ်.+ ၅၅ ပှၤတဂၤအံၤ မ့ၢ်ပှၤစုသ့ဖိတဂၤ အဖိခွါ တမ့ၢ်ဧီၤ.+ အမိၢ်အမံၤမ့ၢ် နီၢ်မၤရံ ဒီးအပုၢ်တဖၣ်န့ၣ်မ့ၢ်ဝဲ စီၤယၤကိာ်, စီၤယိၤသး, စီၤၡံမိၣ် ဒီးစီၤယူဒၤ တမ့ၢ်ဧီၤ.+ ၅၆ ဒီးအဒီပုၢ်ဝဲၢ်မုၣ်ခဲလၢာ် အိၣ်ဒီးပှၤဖဲအံၤ တမ့ၢ်ဧီၤ. မ့မ့ၢ်ဒ်န့ၣ်န့ၣ် အဝဲလဲၤမၤန့ၢ် တၢ်ကူၣ်သ့ဒီး တၢ်စိတၢ်ကမီၤဖဲလဲၣ်.”+ ၅၇ အဃိ အဝဲသ့ၣ်တနာ်* အီၤဘၣ်.+ ဘၣ်ဆၣ် ယ့ၣ်ၡူးတဲဘၣ် အဝဲသ့ၣ်လၢ “တၢ်လၢဝံန့ၣ် ပှၤပာ်ဒိၣ်အီၤလၢ တၢ်လီၢ်ကိးပူၤဒဲးလီၤ. မ့မ့ၢ်လၢ အနီၢ်ကစၢ် အဟီၣ်ကဝီၤအပူၤ ဒီးလၢအနီၢ်ကစၢ် အဟံၣ်ဖိဃီဖိအကျါန့ၣ် ပှၤတပာ်ဒိၣ်အီၤဘၣ်.”+ ၅၈ မ့ၢ်လၢအဝဲသ့ၣ် အတၢ်နာ် တအိၣ်ဘၣ်အဃိ ဖဲတၢ်လီၢ်အဝဲန့ၣ် ယ့ၣ်ၡူးတမၤတၢ်လီၤလး အါအါဘၣ်.