ယံးရမံယၤ
၂၃ ယဟိဝၤယွၤ တဲဝဲလၢ “ပှၤကွၢ်သိတဖၣ်လၢ အမၤဟးဂီၤ ဒီးမၤလီၤပြံလီၤပြါ ယသိတဖၣ်လၢ ယကရၢပူၤန့ၣ် ကဘၣ်ကီဘၣ်ခဲ သပှၢ်တၢၢ်လီၤ.”+
၂ ယၤ, အံၣ်စရ့လး အကစၢ် ယဟိဝၤယွၤ တဲဘၣ် ယပှၤဂီၢ်မုၢ် အပှၤကွၢ်သိတဖၣ်လၢ “သုမၤလီၤပြံလီၤပြါ ယသိတဖၣ်လံ ဒီးသုဆဲးမၤလီၤမုၢ်ပြံပြါ အဝဲသ့ၣ် ဒီးသုတကွၢ်ထွဲ အဝဲသ့ၣ်ဘၣ်.+
အဃိ ယကကွၢ်ကျဲၤက့ၤသုလၢ သုမၤတၢ်အၢအၢသီသီ အဃိလီၤ.” ယဟိဝၤယွၤ တဲဝဲဒ်န့ၣ်လီၤ.
၃ “ဝံၤဒီး ယသိတဖၣ်လၢ အအိၣ်တ့ၢ်ဒံး လၢကီၢ်အဂၤတဖၣ် ဖဲယမၤလီၤပြံလီၤပြါ အဝဲသ့ၣ်အလီၢ်န့ၣ် ယကပာ်ဖှိၣ်ထီၣ်က့ၤ အဝဲသ့ၣ်+ ဒီးဒုးဟဲက့ၤအဝဲသ့ၣ်လၢ အတၢ်အီၣ်ဆၣ်အလီၢ်လီၤ.+ ဒီးအဝဲသ့ၣ် ကသၣ်ထီၣ် ဒီးအါထီၣ်ဂီၢ်ထီၣ်လီၤ.+ ၄ ဒီးယကပာ်ထီၣ် ပှၤကွၢ်သိတဖၣ်လၢ ကကွၢ်ထွဲအဝဲသ့ၣ် မူာ်မူာ်နီၢ်နီၢ်လီၤ.+ အဝဲသ့ၣ် တဘၣ်ယိၣ်တၢ် ဒီးပျံၤတၢ်ဖုးတၢ်လၢၤဘၣ်. ဒီးအဝဲသ့ၣ် တဒုမး တလီၤမၢ်ဘၣ်.” ယဟိဝၤယွၤ တဲဝဲဒ်န့ၣ်လီၤ.
၅ ယၤ, ယဟိဝၤယွၤ တဲဝဲလၢ “တၢ်ဆၢကတီၢ်ကဟဲလၢ ယကဃုထၢထီၣ် ပှၤ* လၢအတီအလိၤတဂၤလၢ အလီၤစၢၤလၢ စီၤဒၤဝံးလီၤ.+ အဝဲ ကပၢတၢ်ဒ် စီၤပၤအသိး+ ဒီးအကပာ်ဖျါထီၣ် တၢ်နၢ်ပၢၢ် လီၤတံၢ်လီၤဆဲး ဒီးကဆီၣ်ထွဲ တၢ်တီတၢ်လိၤ ဒီးတၢ်စံၣ်ညီၣ်တီလၢ ကီၢ်ပူၤလီၤ.*+ ၆ ဖဲအစိၤန့ၣ် ယူဒၤ အပှၤဂီၢ်မုၢ် ကပူၤဖျဲး+ ဒီးအံၣ်စရ့လး အပှၤဂီၢ်မုၢ် ကအိၣ်ဘၣ် ဘံၣ်ဘံၣ်ဘၢဘၢလီၤ.+ ဒီးအဝဲကဘၣ် တၢ်ကိးအမံၤလၢ ယဟိဝၤယွၤ မ့ၢ်ဝဲ ပတၢ်တီတၢ်လိၤ အဂံၢ်ခီၣ်ထံးလီၤ.”+
၇ ယဟိဝၤယွၤ တဲဝဲလၢ “အဃိ တၢ်ဆၢကတီၢ်ကဟဲဝဲ ဖဲအဝဲသ့ၣ် အၢၣ်လီၤတၢ်အခါ အဝဲသ့ၣ် တတဲဝဲလၢ ‘ဒ်ယဟိဝၤယွၤလၢ အဒုးဟးထီၣ်ကွံာ် ပှၤအံၣ်စရ့လးဖိလၢ ကီၢ်အဲၤကူပတူးအပူၤတဂၤ မူဝဲသပှၢ်တၢၢ်အသိး’ န့ၣ်လၢၤဘၣ်.+ ၈ လၢတၢ်န့ၣ်အလီၢ် ဖဲအဝဲသ့ၣ် အၢၣ်လီၤတၢ်အခါ အဝဲသ့ၣ် ကတဲဝဲလၢ ‘ဒ်ယဟိဝၤယွၤလၢ အဟဲက့ၤကိးထီၣ် အံၣ်စရ့လးအပှၤဂီၢ်မုၢ် အစၢၤအသွဲၣ်လၢ ကီၢ်လၢကလံၤစိးတခီ ဒီးလၢကီၢ်အဂၤတဖၣ် ဖဲအမၤလီၤပြံလီၤပြါ အဝဲသ့ၣ်အလီၢ်တဂၤန့ၣ် မူဝဲသပှၢ်တၢၢ်အသိး’ လီၤ. ဒီးအဝဲသ့ၣ် ကအိၣ်ဘၣ်က့ၤလၢ အနီၢ်ကစၢ် အတၢ်လီၢ်လီၤ.”+
၉ တၢ်ဂ့ၢ်လၢ အဘၣ်ထွဲဒီး ဝံတဖၣ်အဂ့ၢ်န့ၣ် အိၣ်ဝဲဒ်လၢလာ်အံၤ အသိးလီၤ.
ယသးသ့ၣ်ဖးလၢ ယသးနါပှၢ်အပူၤ
ဒီးယကနိးကစုာ် ဒီဂၤညါလီၤ.
ယလီၤဂာ် ဒ်သိးဒီးပှၤမူၤသံး
ဒီးပှၤတဂၤလၢ အအီစပံးထံ အါတလၢ
ခီဖျိလၢ ယဟိဝၤယွၤ ဒီးအတၢ်ကတိၤစီဆှံတဖၣ် အဃိလီၤ.
၁၀ ကီၢ်အံၤပှဲၤဝဲဒီး ပှၤအဲၣ်ဘၢမါ အဲၣ်ဘၢဝၤလီၤ.*+
အဝဲသ့ၣ်အိၣ်မူ တၢ်အိၣ်မူလၢ အအၢအသီ ဒီးသူကမၣ် အတၢ်စိ တၢ်ကမီၤလီၤ.
၁၁ ယဟိဝၤယွၤ တဲဝဲလၢ “ဝံမ့ၢ်ဂ့ၤ ပှၤလုၢ်တၢ်ဒိၣ်မ့ၢ်ဂ့ၤ မ့ၢ်ပှၤလၢ အတကဆှီဘၣ်.*+
လၢယဟံၣ်ပူၤဒၣ်လဲာ် ယထံၣ်ဘၣ် အဝဲသ့ၣ် အတၢ်အၢတၢ်သီလီၤ.”+
၁၂ ယဟိဝၤယွၤ တဲဝဲလၢ “အဝဲသ့ၣ် အကျဲန့ၣ် ကဘျ့ ဒီးကခံးသူဝဲလီၤ.+
အဝဲသ့ၣ် ကဘၣ်တၢ်ဆီၣ်လီၤဃံၢ်အီၤ ဒီးအဝဲသ့ၣ် ကလီၤဃံၢ်လီၤ.
ဖဲတၢ်စံၣ်ညီၣ်အနံၣ်န့ၣ်
ယကဒုးလီၤဘၣ် တၢ်နးတၢ်ဖှီၣ် လၢအဝဲသ့ၣ်အလိၤလီၤ.”
၁၃ “ယထံၣ်ဘၣ် ၡၤမရံအဝံတဖၣ်+ မၤတၢ်လၢ အလီၤသးဘၣ်အၢလံ.
အဝဲသ့ၣ် တဲတၢ်ဒ်ဝံအသိး လၢ ဘဧၤလးအမံၤပူၤ
ဒီးဆှၢကမၣ် ယပှၤဂီၢ်မုၢ် ပှၤအံၣ်စရ့လးဖိတဖၣ်လီၤ.
၁၄ ယထံၣ်ဘၣ် ဝ့ၢ်ယရူၤၡလ့ၣ် အဝံတဖၣ် မၤတၢ်အၢအၢသီသီလံ.
အဝဲသ့ၣ် အဲၣ်ဘၢမါအဲၣ်ဘၢဝၤ+ ဒီးတဲလံၣ်တဲလီတၢ်လီၤ.+
အဝဲသ့ၣ် ဆီၣ်ထွဲ ပှၤမၤအၢ မၤသီတၢ်တဖၣ်
ဒီးအဝဲသ့ၣ် တပတုာ်မၤ တၢ်အၢ တၢ်သီဘၣ်.
ယထံၣ် အဝဲသ့ၣ်ခဲလၢာ် ဒ်သိးဒီး ပှၤလၢ အအိၣ်လၢ ဝ့ၢ်စဒိၣ်အပူၤ+
ဒီးပှၤလၢအအိၣ်လၢ ဝ့ၢ်ပူၤတဖၣ်န့ၣ် လီၤဂာ်ဒ်သိးဒီး ပှၤလၢ အအိၣ်လၢ ဝ့ၢ်ဂမိရၤ အပူၤလီၤ.”+
၁၅ အဃိ ဘၣ်ဃးဒီး ဝံတဖၣ်န့ၣ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ
“ယကဟ့ၣ်ဒုးအီၣ် အဝဲသ့ၣ်လၢ တၢ်မုၢ်တၢ်ဘိလၢအခၣ်
ဒီးဟ့ၣ်ဒုးအီ အဝဲသ့ၣ်လၢ ထံလၢ အအိၣ်ဒီးအစုၣ်လီၤ.+
ခီဖျိလၢ ဝ့ၢ်ယရူၤၡလ့ၣ် အဝံတဖၣ်အံၤအဃိ ပှၤပာ်တ့ၢ်ကွံာ်ယၤ* လၢကီၢ်ဒီဘ့ၣ်ညါလီၤ.”
၁၆ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ တဲဝဲလၢ
“ဝံတဖၣ်လၢ အတဲသုလၢ ဝံအတၢ်စံးပာ်န့ၣ် တဘၣ်ကနၣ်ဃုာ်တဂ့ၤ.+
အဝဲသ့ၣ် ဆှၢကမၣ်သုလီၤ.
တၢ်ထံၣ်လၢညါခီ လၢအဝဲသ့ၣ် တဲဝဲန့ၣ် ဟဲထီၣ်လၢ အနီၢ်ကစၢ် အသးပူၤလီၤ.+
အတဟဲထီၣ်လၢ ယဟိဝၤယွၤ အထးခိၣ်ဘၣ်.+
၁၇ အဝဲသ့ၣ်တဲဘၣ် ပှၤလၢ အတပာ်ကဲယၤဘၣ်တဖၣ် ခဲအံၤခဲအံၤလၢ
‘ယဟိဝၤယွၤ တဲဝဲလၢ “သုကအိၣ်ဘၣ် မုာ်မုာ်ခုၣ်ခုၣ်လီၤ.”’+
ဒီးအဝဲသ့ၣ် တဲဘၣ် ပှၤလၢအခိၣ်ကိၤ ဒီးမၤထွဲဒ် အသးဟံးစုနဲၣ်ကျဲအီၤ ကိးဂၤဒဲးလၢ
‘တၢ်နးတၢ်ဖှီၣ် တလီၤဘၣ်သု နီတမံၤဘၣ်.’+
၁၈ မ့ၢ်မတဂၤ ဆၢထၢၣ်လၢ ပှၤလၢ အရ့ဒီး ယဟိဝၤယွၤ ဘူးဘူးတံၢ်တံၢ်တဖၣ် အကျါ
ဒ်သိး အကနၢ်ဟူ ဒီးနၢ်ပၢၢ် အ တၢ်ကတိၤ အဂီၢ်န့ၣ်လဲၣ်.
မ့ၢ်မတဂၤ သးစၢၢ်ဆၢ အတၢ်ကတိၤ ဒ်သိး အကနၢ်ဟူဘၣ်ဝဲ အဂီၢ်လဲၣ်.
၁၉ ကွၢ်မီၤ, ယဟိဝၤယွၤ အတၢ်သးဒိၣ် ကဖျိးထီၣ်ဝဲ ဒ်ကလံၤမုၢ်အသိးလီၤ.
ဒီးဒ်ကလံၤသဝံးအသိး အတၢ်သးဒိၣ် ကအူသဝံးလၢ ပှၤအၢပှၤသီ အခိၣ်သၣ်ဃံအဖီခိၣ်လီၤ.+
၂၀ တချုးလၢ ယဟိဝၤယွၤ မၤလၢပှဲၤ ဒီးမၤဝံၤဝဲ တၢ်လၢအတိာ်ပာ်ဝဲလၢ အသးပူၤတဖၣ် ဒံးဘၣ်န့ၣ်
အတၢ်သးထီၣ် တခုၣ်လီၤဘၣ်.
ဖဲမုၢ်နံၤခံကတၢၢ်တဖၣ် အတီၢ်ပူၤန့ၣ် သုကနၢ်ပၢၢ် တၢ်ဂ့ၢ်တခါအံၤ ၡဲၡဲလီၤ.
၂၁ ဝံတဖၣ်န့ၣ် ယတဆှၢလီၤအဝဲသ့ၣ်ဘၣ် ဘၣ်ဆၣ် အဝဲသ့ၣ် ကရီ လဲၤဝဲလီၤ.
ယတတဲတၢ်ဒီး အဝဲသ့ၣ်ဘၣ် ဘၣ်ဆၣ် အဝဲသ့ၣ် တဲတၢ်ဒ် ဝံအသိးလီၤ.+
၂၂ ဘၣ်ဆၣ် အဝဲသ့ၣ် မ့ၢ်ဆၢထၢၣ်လၢ ပှၤလၢအရ့ဒီးယၤ ဘူးဘူးတံၢ်တံၢ်တဖၣ် အကျါန့ၣ်
အဝဲသ့ၣ် ကဒုးနၢ်ဟူဘၣ် ယပှၤဂီၢ်မုၢ်လၢ ယတၢ်ကတိၤတဖၣ်,
အဝဲသ့ၣ် ကဒုးဃၣ်ကွံာ် ယပှၤဂီၢ်မုၢ်လၢ အကျဲအၢကျဲသီတဖၣ် ဒီးအတၢ်မၤလၢ အအၢအသီ တဖၣ်လီၤ.”+
၂၃ ယဟိဝၤယွၤ တဲဝဲလၢ “ယကဲ ကစၢ်ယွၤ ဖဲယအိၣ်ဘူး အခါလီၤဧါ. ဖဲယအိၣ်ယံၤအခါ ယတကဲ ကစၢ်ယွၤဧီၤ.”
၂၄ ယဟိဝၤယွၤ တဲဝဲလၢ “ပှၤအိၣ်ခူသူၣ်လၢ တၢ်လီၢ်လၢ ယထံၣ်တသ့ဘၣ်န့ၣ် အိၣ်တဂၤဂၤဧါ.”+
ယဟိဝၤယွၤ တဲကဒီးဝဲလၢ “တၢ်လၢအအိၣ်လၢ မူခိၣ်ဒီးဟီၣ်ခိၣ်န့ၣ် ယထံၣ်အီၤတသ့ ကိးမံၤဒဲးဧီၤ.”+
၂၅ “ယနၢ်ဟူဘၣ် ဝံတဖၣ်လၢ အတဲဝံအတၢ်စံးပာ် လၢအတမ့ၢ်တတီဘၣ်တဖၣ် လၢယမံၤအပူၤန့ၣ် တဲဝဲလၢ ‘ယမံမီၢ်တၢ်. ယမံမီၢ်တၢ်.’+ ၂၆ ဝံတဖၣ် ကဆဲးတဲ ဝံအတၢ်စံးပာ် လၢအတမ့ၢ်တတီဘၣ်တဖၣ်န့ၣ် ယံာ်ဒံးထဲလဲၣ်. အဝဲသ့ၣ် မ့ၢ်ဝံတဖၣ်လၢ အတဲဖျါထီၣ် တၢ်လံၣ်တၢ်လီလၢ အအိၣ်လၢ အနီၢ်ကစၢ် အသးပူၤလီၤ.+ ၂၇ ဝံတဖၣ်အံၤ တဲဖျါထီၣ် အတၢ်မံမီၢ်တဖၣ်အဂ့ၢ်လၢ ပှၤတဂၤဒီးတဂၤ ဒ်သိး ကဒုးသးပ့ၤနီၣ် ယပှၤဂီၢ်မုၢ်လၢယမံၤ ဒ်အဝဲသ့ၣ် အပၢ်တဖၣ် သးပ့ၤနီၣ်ကွံာ် ယမံၤခီဖျိလၢ ဘဧၤလးအဃိလီၤ.+ ၂၈ ဝံတဂၤလၢ အအိၣ်ဒီး တၢ်မံမီၢ်န့ၣ် မ်အတဲဖျါထီၣ် တၢ်မံမီၢ်တက့ၢ်. ဘၣ်ဆၣ် မ့မ့ၢ်ပှၤတဂၤလၢ အအိၣ်ဒီး ယတၢ်ကတိၤန့ၣ် အဝဲကဘၣ်တဲဖျါထီၣ်အီၤ တီတီလိၤလိၤလီၤ.”
“တၢ်လၢ လီၢ်ဘိန့ၣ် ပှၤထိၣ်သတြီၤအီၤဒီးဘု ကသ့ဧါ.” ယဟိဝၤယွၤ တဲဝဲဒ်န့ၣ်လီၤ.
၂၉ ယဟိဝၤယွၤ တဲဝဲလၢ “ယတၢ်ကတိၤန့ၣ် အလီၤဂာ် ဒ်သိးဒီး မ့ၣ်အူ+ ဒီးအလီၤဂာ် ဒ်သိးဒီး တူၤတဘ့ၣ်လၢ အမၤသဘှံးလၢၢ်ဧိၤလ့ဧိၤ, တမ့ၢ်ဧီၤ.”+
၃၀ ယဟိဝၤယွၤ တဲဝဲလၢ “ဝံတဖၣ်လၢ အဆီတလဲက့ၤ ယတၢ်ကတိၤတဖၣ် ဒီးတဲပှၤဂီၢ်မုၢ်လၢ တၢ်လၢအဝဲသ့ၣ် အဲၣ်ဒိးတဲဝဲန့ၣ် ယကစံၣ်ညီၣ် အဝဲသ့ၣ်လီၤ.”+
၃၁ ယဟိဝၤယွၤ တဲဝဲလၢ “ဝံတဖၣ်လၢ အသူအပျ့ၤ ဒ်သိးကတဲဝဲလၢ ‘ကစၢ်ယွၤ တဲဝဲဒ်အံၤ’ န့ၣ်ယကစံၣ်ညီၣ် အဝဲသ့ၣ်လီၤ.”+
၃၂ ယဟိဝၤယွၤ တဲဝဲလၢ “ဝံတဖၣ်လၢ အအိၣ်ဒီး တၢ်မံမီၢ်လၢ အတမ့ၢ်တတီဘၣ်တဖၣ်န့ၣ် ယကစံၣ်ညီၣ် အဝဲသ့ၣ်လီၤ. အဝဲသ့ၣ် တဲဖျါထီၣ် အတၢ်မံမီၢ်တဖၣ် ဒီးဆှၢကမၣ် ယပှၤဂီၢ်မုၢ် ခီဖျိလၢ အဝဲသ့ၣ် အတၢ်လံၣ်တၢ်လီ ဒီးအတၢ်ပတြၢၤလီၤသး အဃိလီၤ.+
ဝံတဖၣ်အံၤ ယတဆှၢလီၤအီၤဘၣ် ဒီးယတဟ့ၣ်လီၤ အဝဲသ့ၣ် တၢ်ကလုၢ်ဘၣ် အဃိအဝဲသ့ၣ် တကဲဘျုးလၢ ယပှၤဂီၢ်မုၢ်အံၤ အဂီၢ်နီတစဲးဘၣ်.”+ ယဟိဝၤယွၤ တဲဝဲဒ်န့ၣ်လီၤ.
၃၃ ယဟိဝၤယွၤ တဲဝဲလၢ “ဖဲပှၤဂီၢ်မုၢ်, ဝံ မ့တမ့ၢ် ပှၤလုၢ်တၢ်ဒိၣ် သံကွၢ်နၤလၢ ‘တၢ်ဝံဃၢ* လၢအဟဲလၢ ယဟိဝၤယွၤ အအိၣ်န့ၣ် မ့ၢ်မနုၤလဲၣ်’ အခါ နကဘၣ် တဲဆၢအဝဲသ့ၣ်လၢ သုန့ၣ် သုမ့ၢ် တၢ်ဝံဃၢလီၤ. အဃိ အကပာ်တ့ၢ်ကွံာ်သုလီၤ.+ ၃၄ ဝံမ့ၢ်ဂ့ၤ, ပှၤလုၢ်တၢ်ဒိၣ်မ့ၢ်ဂ့ၤ, ပှၤဂီၢ်မုၢ်မ့ၢ်ဂ့ၤ မ့ၢ်တဲဝဲလၢ ‘တၢ်ကစီၣ်အံၤ မ့ၢ်တၢ်ဝံဃၢလၢ အဟဲလၢ ယဟိဝၤယွၤ အအိၣ်’ န့ၣ်ယကစံၣ်ညီၣ်အီၤ ဒီးအဟံၣ်ဖိဃီဖိလီၤ. ၃၅ သုဝဲတဂၤစုာ်စုာ်န့ၣ် သုတဲသုသကိး ဒီးသုဒီပုၢ်ဝဲၢ်လၢ ‘ယဟိဝၤယွၤ စံးဆၢဒ်လဲၣ်. ယဟိဝၤယွၤ တဲတၢ်မနုၤလဲၣ်.’ ၃၆ ဘၣ်ဆၣ် သုတဘၣ်တဲလၢ တၢ်ကစီၣ်လၢ အဟဲလၢ ယဟိဝၤယွၤ အအိၣ်န့ၣ် မ့ၢ်တၢ်ဝံဃၢ လၢၤတဂ့ၤ, မ့ၢ်လၢ တၢ်ဝံဃၢန့ၣ် မ့ၢ်ဝဲ သုဝဲတဂၤစုာ်စုာ် အတၢ်ကတိၤ ဒီးသုဆီတလဲ ပကစၢ်လၢအမူဝဲတဂၤ လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အတၢ်ကတိၤတဖၣ်လီၤ.
၃၇ “နကဘၣ်တဲဘၣ်ဝံလၢ ‘ယဟိဝၤယွၤ စံးဆၢသုဒ်လဲၣ်. ယဟိဝၤယွၤ တဲသုတၢ်မနုၤလဲၣ်. ၃၈ ဒီးသုမ့ၢ်ဆဲးတဲလၢ “တၢ်ကစီၣ်အံၤ မ့ၢ်တၢ်ဝံဃၢလၢ အဟဲလၢ ယဟိဝၤယွၤ အအိၣ်” န့ၣ်ယၤ, ယဟိဝၤယွၤ တဲသုလၢ “သုတဘၣ်တဲလၢ ‘တၢ်ကစီၣ်အံၤ မ့ၢ်တၢ်ဝံဃၢလၢ အဟဲလၢ ယဟိဝၤယွၤ အအိၣ်’ ဘၣ်န့ၣ် ယတဲသုဝံၤလံ သနာ်က့ သုတဲဒံးလၢ ‘တၢ်ကစီၣ်အံၤ မ့ၢ်တၢ်ဝံဃၢလၢ အဟဲလၢ ယဟိဝၤယွၤ အအိၣ်’ လီၤ. ၃၉ လၢတၢ်န့ၣ်အဃိ ယကစိာ်ထီၣ်သု ဒီးဝ့ၢ်လၢ ယဟ့ၣ်ပာ်စၢၤသုဒီး သုမိၢ်ပၢ်ဖံဖု လၢပျၢၤတဖၣ် ဒီးယကတၢၤကွံာ်သုဒီး ဝ့ၢ်အံၤလၢ ယမဲာ်ညါဖးယံၤလီၤ. ၄၀ ဒီးယကဒုးလီၤဘၣ်သုလၢ တၢ်မဲာ်ဆှး လီၤထူလီၤယိာ် လၢပှၤတသးပ့ၤနီၣ်အီၤ နီတဘျီလၢၤဘၣ်လီၤ.”’”+