စံၣ်ညီၣ်ကွီၢ်
၈ ပှၤအ့ဖရဲၣ်ဖိတဖၣ် ဟဲဃုအ့ၣ်လိာ်သးဒီး စီၤကံးဒဧိၣ်လီၤ. ဒီးအဝဲသ့ၣ် တဲဝဲလၢ “ဘၣ်မနုၤအဃိ နမၤပှၤဒ်အံၤလဲၣ်. ဖဲနလဲၤဒုး ပှၤမံးဒယၣ်ဖိအခါ+ ဘၣ်မနုၤအဃိ နတကိးဃုာ်ဒီး ပှၤဘၣ်လဲၣ်.”+ ၂ ဘၣ်ဆၣ် စီၤကံးဒဧိၣ် တဲအဝဲသ့ၣ်လၢ “ယမ့ၢ်ထိၣ်သတြီၤ တၢ်လၢယမၤတ့ၢ် ဒီးတၢ်လၢသုမၤန့ၣ် တၢ်လၢယမၤန့ၣ် တမ့ၢ်တၢ်နီတမံၤဘၣ်. တၢ်အဆံးတမံၤလၢ သုဝဲ ပှၤအ့ဖရဲၣ်ဖိတဖၣ်+ မၤဝဲန့ၣ် ဂ့ၤဒိၣ်န့ၢ်ဒံး တၢ်အဒိၣ်အမုၢ်တဖၣ်လၢ ပဝဲ အဘံဧ့စၢ်တဒူၣ်+ မၤဝဲန့ၣ် တမ့ၢ်ဘၣ်ဧါ.* ၃ ကစၢ်ယွၤ ဟ့ၣ်လီၤ ပှၤမံးဒယၣ်ဖိ အခိၣ်အနၢ် စီၤဧိရ့ာ် ဒီးစီၤစအ့ာ် လၢသုစုပူၤလီၤ.+ ယမ့ၢ် ထိၣ်သတြီၤ တၢ်လၢယမၤတ့ၢ် ဒီးတၢ်လၢသုမၤန့ၣ် တၢ်လၢယမၤန့ၣ် တမ့ၢ် တၢ်နီတမံၤဘၣ်.” ဖဲစီၤကံးဒဧိၣ် တဲဝဲ ဒ်န့ၣ်အခါ အဝဲသ့ၣ် အသးခုၣ်လီၤက့ၤဝဲလီၤ.
၄ ဝံၤဒီး စီၤကံးဒဧိၣ် လဲၤတုၤလၢ ထံကျိယၢ်ဒ့ၣ် ဒီးခီဂာ်ဝဲ ထံကျိလီၤ. အဝဲဒီး အပှၤသုးဖိ အဂၤ ၃၀၀ န့ၣ်လီၤဘှံးလီၤတီၤဝဲ ဘၣ်ဆၣ် အဝဲသ့ၣ် ဆဲးလူၤဝဲ အဒုၣ်အဒါတဖၣ်လီၤ. ၅ ဒီးစီၤကံးဒဧိၣ် တဲဘၣ် ပှၤပိာ်ခွါတဖၣ် လၢအိၣ်လၢ ဝ့ၢ်စူးကိၤသးလၢ “မ့ၢ်လၢ ပလူၤ ပှၤမံးဒယၣ်ဖိ အစီၤပၤတဖၣ် လၢအမ့ၢ် စီၤစ့ဘၤ ဒီးစီၤစးလမူနၤ ဒီးယပှၤသုးဖိတဖၣ် လီၤဘှံးလီၤတီၤအဃိ ဝံသးစူၤ ဟ့ၣ်အီၣ်အဝဲသ့ၣ် ကိၣ်မီၤ.” ၆ ဘၣ်ဆၣ် ဝ့ၢ်စူးကိၤသး အပှၤခိၣ်ပှၤနၢ်တဖၣ် တဲဝဲလၢ “ဘၣ်မနုၤအဃိ ပဘၣ်ဟ့ၣ် နပှၤသုးဖိတဖၣ် ကိၣ်လဲၣ်. မ့ၢ်နဖီၣ် စီၤစ့ဘၤ ဒီးစီၤစးလမူနၤ န့ၢ်လံဧါ, မ့ၢ်အဝဲသ့ၣ် အိၣ်လၢ နစုပူၤလံဧါ.” ၇ အဃိ စီၤကံးဒဧိၣ် တဲဝဲလၢ “မ့ၢ်လၢသုတဲဒ်န့ၣ်အဃိ ဖဲယဟိဝၤယွၤ ဟ့ၣ်လီၤ စီၤစ့ဘၤ ဒီးစီၤစးလမူနၤ လၢယစုပူၤအခါ ယကဖျ့သုလၢ ပှၢ်မုၢ်ကနၢ အတၤဆှုၣ်တၤမဲတဖၣ် တုၤလၢ သုညၣ် လီၤဘျဲးလီၤ.”+ ၈ ဒီးစီၤကံးဒဧိၣ် ဟးထီၣ်ဖဲန့ၣ် ဒီးလဲၤဝဲလၢ ဝ့ၢ်ပနူၤအ့လး ဒီးဃ့ဝဲ တၢ်တမံၤဃီလီၤ. ဘၣ်ဆၣ် ပှၤပိာ်ခွါတဖၣ် လၢအအိၣ်လၢ ဝ့ၢ်ပနူၤအ့လးန့ၣ် တဲဆၢက့ၤအီၤ ဒ်သိးဒီး ပှၤပိာ်ခွါတဖၣ် လၢအအိၣ်လၢ ဝ့ၢ်စူးကိၤသး တဲအီၤန့ၣ်လီၤ. ၉ အဃိ စီၤကံးဒဧိၣ် တဲစ့ၢ်ကီး ပှၤပိာ်ခွါ လၢအအိၣ်လၢ ဝ့ၢ်ပနူၤအ့လးလၢ “ဖဲယမၤနၢၤတၢ်ဝံၤအခါ ယကဟဲက့ၤ မၤလီၤပှီၢ်ကွံာ် သုတၢးတဖျၢၣ်အံၤလီၤ.”+
၁၀ မ့ၢ်လၢ ပှၤမုၢ်ထီၣ်ဖိအသုး+ လၢအစိာ်ဒီးနးအဂၤ ၁၂၀,၀၀၀ သံကွံာ်ဝဲအဃိ သုးမုၢ်ဒီတဖုန့ၣ် အိၣ်တ့ၢ်က့ၤဝဲ အဂၤ ၁၅,၀၀၀ လီၤ. ဒီးစီၤစ့ဘၤ ဒီးစီၤစးလမူနၤန့ၣ် အိၣ်ဝဲလၢ ကၢ်ကိၢ် ဃုာ်ဒီး အပှၤသုးဖိ တဖၣ်အံၤလီၤ. ၁၁ စီၤကံးဒဧိၣ် ဆဲးလဲၤပိာ်ဝဲကျဲလၢ ပှၤလၢအအိၣ်ဝဲဆိးဝဲ လၢဒဲပူၤတဖၣ် အကျဲ လၢနိဘၤ ဒီးဝ့ၢ်ယၤကဘၤ+ အမုၢ်ထီၣ်တခီ ဒီးဖဲဒုၣ်ဒါတဖၣ် တပလီၢ်အသးဘၣ်အခါ ဒုးဝဲ ဒုၣ်ဒါအဒဲကဝီၤလီၤ. ၁၂ ဖဲပှၤမံးဒယၣ်ဖိ အစီၤပၤခံဂၤ လၢအမ့ၢ် စီၤစ့ဘၤ ဒီးစီၤစးလမူနၤ ဃ့ၢ်ဝဲအခါ စီၤကံးဒဧိၣ် လူၤအဝဲသ့ၣ် ဒီးဖီၣ်န့ၢ်အဝဲသ့ၣ် အဃိ ဒုၣ်ဒါခဲလၢာ် လၢအအိၣ်လၢ ဒဲကဝီၤအပူၤန့ၣ် ပျံၤတၢ်ဖုးတၢ်လီၤ.
၁၃ ဖဲစီၤယိးအၣ်အဖိခွါ စီၤကံးဒဧိၣ် ဟဲက့ၤလၢ တၢ်ဒုးအခါ အဝဲဟဲက့ၤလၢ ကျဲအံၣ်အံၣ်ဖိလၢ အလဲၤထီၣ်ဆူ ဃ့ရ့းလီၤ. ၁၄ ဒီးလၢကျဲန့ၣ် အဝဲဖီၣ်န့ၢ် ပှၤသးစၢ်တဂၤလၢ အဟဲလၢ ဝ့ၢ်စူးကိၤသး ဒီးသမံသမိးအီၤလီၤ. အဃိ ပှၤသးစၢ်တဂၤန့ၣ် ကွဲးလီၤန့ၢ် စီၤကံးဒဧိၣ် လၢဝ့ၢ်စူးကိၤသး အပှၤခိၣ်ပှၤနၢ် ဒီးအပှၤသူၣ်က့သးပှၢ် ၇၇ ဂၤအမံၤလီၤ. ၁၅ ဝံၤဒီး စီၤကံးဒဧိၣ် လဲၤဝဲလၢ ပှၤပိာ်ခွါတဖၣ် လၢအအိၣ်လၢ ဝ့ၢ်စူးကိၤသးအပူၤ ဒီးတဲအဝဲသ့ၣ်လၢ “အံၤမီၤ, စီၤစ့ဘၤ ဒီးစီၤစးလမူနၤ. လၢညါ သုတဲဆဲးအဲးယၤလၢ ‘ဘၣ်မနုၤအဃိ ပဘၣ်ဟ့ၣ် နပှၤသုးဖိတဖၣ် ကိၣ်လဲၣ်. မ့ၢ်နဖီၣ်စီၤစ့ဘၤ ဒီးစီၤစးလမူနၤ န့ၢ်လံဧါ, မ့ၢ်အဝဲသ့ၣ်အိၣ်လၢ နစုပူၤလံဧါ.’”+ ၁၆ ဒီးဒ်သိး စီၤကံးဒဧိၣ် ကသိၣ်ဃီၣ် ဝ့ၢ်စူးကိၤသး အပှၤသူၣ်က့သးပှၢ် တဖၣ်အဂီၢ် အဖျ့ အဝဲသ့ၣ်ဒီး ပှၢ်မုၢ်ကနၢ အတၤဆှုၣ်တၤမဲတဖၣ်လီၤ.+ ၁၇ ဒီးအဝဲမၤလီၤပှီၢ်ကွံာ် ဝ့ၢ်ပနူၤအ့လး အတၢးတဖျၢၣ်+ ဒီးမၤသံကွံာ်ဝဲ ပှၤပိာ်ခွါတဖၣ် လၢဝ့ၢ်ပူၤလီၤ.
၁၈ စီၤကံးဒဧိၣ် သံကွၢ် စီၤစ့ဘၤ ဒီးစီၤစးလမူနၤလၢ “ပှၤတဖၣ်လၢ သုမၤသံအီၤလၢ ကစၢၢ်တၤဘိၢ်န့ၣ် မ့ၢ်ပှၤဒ်လဲၣ်.” ဒီးအဝဲသ့ၣ် တဲအီၤလၢ “အဝဲသ့ၣ်န့ၣ် လီၤဂာ်ဒ်သိးဒီးနၤ ဒီးလီၤဂာ်လၢ စီၤပၤအဖိခွါတဖၣ်လီၤ.” ၁၉ ဒီးစီၤကံးဒဧိၣ် တဲဝဲလၢ “အဝဲသ့ၣ် ကဲဝဲယမိၢ်အဖိခွါ လၢအမ့ၢ် ယဒီပုၢ်ဝဲၢ်ခွါတဖၣ်လီၤ. ဒ်ယဟိဝၤယွၤ မ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ သုမ့ၢ်ပာ်မူဒံး အဝဲသ့ၣ်န့ၣ် ယတမၤသံသုဘၣ်.” ၂၀ ဒီးစီၤကံးဒဧိၣ် တဲဘၣ်အဖိဝဲၢ်ကိ စီၤယ့သ့ၢ်လၢ “မၤသံကွံာ် အဝဲသ့ၣ်တထံၣ်.” ဘၣ်ဆၣ် မ့ၢ်လၢ စီၤယ့သ့ၢ် မ့ၢ်ဒံးပှၤပိာ်ခွါသးစၢ် ဒီးအဝဲပျံၤတၢ်အဃိ အဝဲ တထုးထီၣ်အနးဘၣ်. ၂၁ အဃိ စီၤစ့ဘၤ ဒီးစီၤစးလမူနၤ တဲစီၤကံးဒဧိၣ်လၢ “ပှၤပိာ်ခွါန့ၣ် အဂံၢ်ကဘၣ်ဆူၣ် တမ့ၢ်ဧီၤ, ဟဲမၤသံပှၤလၢ နနီၢ်ကစၢ်သၢၤ.” အဃိ စီၤကံးဒဧိၣ် မၤသံ စီၤစ့ဘၤ ဒီးစီၤစးလမူနၤ+ ဒီးဟံးန့ၢ် တၢ်ကယၢကယဲတဖၣ်လၢ* အအိၣ်လၢ အဝဲသ့ၣ် အကီၤလၤအူးတဖၣ် အကိာ်ဘိလိၤ န့ၣ်လီၤ.
၂၂ လၢခံ ပှၤအံၣ်စရ့လး ပိာ်ခွါတဖၣ် တဲဘၣ် စီၤကံးဒဧိၣ်လၢ “မ့ၢ်လၢ နမၤထူၣ်ဖျဲးထီၣ်ပှၤလၢ ပှၤမံးဒယၣ်ဖိ အစုပူၤအဃိ ပၢပှၤမီၤ. နဖိခွါ ဒီးနလံၤခွါစ့ၢ်ကီး မ်အပၢပှၤတက့ၢ်.”+ ၂၃ ဘၣ်ဆၣ် စီၤကံးဒဧိၣ် တဲအဝဲသ့ၣ်လၢ “ယတပၢသုဘၣ်. ယဖိခွါစ့ၢ်ကီး တပၢသုဘၣ်. ပှၤလၢ အကပၢသု တဂၤန့ၣ် မ့ၢ်ဝဲ ယဟိဝၤယွၤလီၤ.”+ ၂၄ ဒီးစီၤကံးဒဧိၣ် ဆဲးတဲဝဲလၢ “ယကဃ့သု တၢ်တမံၤ. ဟ့ၣ်ယၤ ထူကွီၤလၢနါဒ့အဂီၢ် လၢတၢ်လၢ သုဂုာ်န့ၢ်အီၤတဖၣ်အကျါတက့ၢ်.” (မ့ၢ်လၢ ပှၤလၢအဘၣ် တၢ်မၤနၢၤအီၤ တဖၣ်န့ၣ် ကဲဝဲပှၤယံးၡမၤဧ့လးဖိအဃိ အဝဲသ့ၣ် အိၣ်ဒီးထူကွီၤလၢ နါဒ့အဂီၢ်လီၤ.)+ ၂၅ အဝဲသ့ၣ် တဲဆၢဝဲလၢ “ပကဟ့ၣ်လီၤ တၢ်တဖၣ်န့ၣ် နီၢ်ကီၢ်လီၤ.” ဒီးအဝဲသ့ၣ် သလၣ်ထီၣ် ဆ့ဖးထီတဘ့ၣ် ဒီးပှၤပိာ်ခွါကိးဂၤဒဲး ကွံာ်လီၤဝဲ ထူကွီၤလၢနါဒ့အဂီၢ် လၢအဝဲသ့ၣ် ဂုာ်န့ၢ်ဝဲတဖၣ်လၢ ဆ့ဖးထီ အလိၤလီၤ. ၂၆ ဒီးထူကွီၤလၢ နါဒ့အဂီၢ် လၢစီၤကံးဒဧိၣ် ဃ့ဝဲတဖၣ်န့ၣ် အတယၢၢ်အိၣ်ဝဲ ၡက့လး* ၁,၇၀၀ လီၤ. တကးဒံးဘၣ် မၤန့ၢ်စ့ၢ်ကီးဝဲ တၢ်ကယၢကယဲတဖၣ်,* ဖဲသၣ်တဖၣ် ဒီးတၢ်ကူတၢ်သိးအလုး လၢပှၤတ့အီၤလၢသိဆူၣ် လၢပှၤမံးဒယၣ်ဖိ အစီၤပၤတဖၣ်သိးဝဲ ဒီးကီၤလၤအူး အဖဲတဖၣ်လီၤ.+
၂၇ ဒီးစီၤကံးဒဧိၣ် တ့ထီၣ်က့ၤဝဲလၢ အ့ဖိးတဘ့ၣ်+ ဒီးလဲၤပာ်လီၤဝဲလၢ အနီၢ်ကစၢ်အဝ့ၢ် လၢအမ့ၢ် ဝ့ၢ်ဧိးဖြၤအပူၤလီၤ.+ ဒီးပှၤအံၣ်စရ့လးဖိခဲလၢာ် ဘူၣ်ထီၣ်ဘါထီၣ်* အ့ဖိးတဘ့ၣ်အံၤဖဲန့ၣ်အဃိ+ အကဲထီၣ် ပျံၤသကွီၤလၢ စီၤကံးဒဧိၣ် ဒီးအဟံၣ်ဖိဃီဖိ အဂီၢ်လီၤ.+
၂၈ ဒီးပှၤအံၣ်စရ့လးဖိ မၤနၢၤဝဲ ပှၤမံးဒယၣ်ဖိလီၤ.+ အဃိ ပှၤမံးဒယၣ်ဖိ တထီဒါအဝဲသ့ၣ်လၢၤဘၣ်. ဒီးဖဲစီၤကံးဒဧိၣ်အိၣ်မူဝဲ အဆၢကတီၢ် တၢ်မုာ်တၢ်ခုၣ်အိၣ်ဝဲ လၢကီၢ်ပူၤ အနံၣ် ၄၀ ညါလီၤ.+
၂၉ အဃိ စီၤယိးအၣ်အဖိခွါ စီၤယရူဘဧၤလး+ က့ၤကဒါက့ၤ လၢအဟံၣ် ဒီးအိၣ်ဝဲဖဲန့ၣ်လီၤ.
၃၀ မ့ၢ်လၢ စီၤကံးဒဧိၣ် အမါအိၣ်အါမးအဃိ အဖိခွါအိၣ်ဝဲ အဂၤ ၇၀ လီၤ. ၃၁ ဒီးအသံၣ်မါ* လၢအအိၣ်လၢ ဝ့ၢ်ၡက့ၣ်န့ၣ် အိၣ်ဖျဲၣ်ထီၣ်န့ၢ်အီၤ ဖိခွါတဂၤ စ့ၢ်ကီးလီၤ. ဒီးစီၤကံးဒဧိၣ် ကိးန့ၢ်ဝဲ အမံၤလၢ စီၤအဘံၤမ့လ့းလီၤ.+ ၃၂ ဒီးစီၤယိးအၣ်အဖိခွါ စီၤကံးဒဧိၣ်န့ၣ် သံဘၣ်မုာ်မုာ်ခုၣ်ခုၣ် ဖဲအသးပှၢ်ထီၣ်အခါ ဒီးပှၤခူၣ်လီၤအီၤလၢ အပၢ်စီၤယိးအၣ် အတၢ်သွၣ်ခိၣ် အလီၢ် လၢပှၤအဘံဧ့စၢ်ဖိ အဝ့ၢ်ဧိးဖြၤလီၤ.+
၃၃ စီၤကံးဒဧိၣ် သံဝံၤအလီၢ်ခံ ပှၤအံၣ်စရ့လးဖိ ဘူၣ်ထီၣ်ဘါထီၣ် ကဒီး ဘဧၤလး အတၢ်ဂီၤတၢ်ဖှီၣ်တဖၣ်လီၤ.+ ဒီးအဝဲသ့ၣ် ပာ်ဝဲ ဘဧၤလးဘရံး ဒ်သိးဒီး အယွၤတဂၤလီၤ.+ ၃၄ ပှၤအံၣ်စရ့လးဖိတဖၣ် တသ့ၣ်နီၣ်ထီၣ်က့ၤ အဝဲသ့ၣ်အကစၢ် ယဟိဝၤယွၤ+ လၢအမၤထူၣ်ဖျဲးထီၣ်ကွံာ် အဝဲသ့ၣ်လၢ အဒုၣ်အဒါ လၢအအိၣ် ဝးတရံးအီၤတဖၣ် အစုပူၤဘၣ်.+ ၃၅ ဒီးတၢ်အဂ့ၤ ခဲလၢာ်လၢ စီၤကံးဒဧိၣ် မၤန့ၢ်ဝဲလၢ ပှၤအံၣ်စရ့လးဖိအဂီၢ်န့ၣ် အဝဲသ့ၣ် သးပ့ၤနီၣ်ကွံာ်ဝဲ ဒီးအဝဲသ့ၣ် တပာ်ဖျါထီၣ် တၢ်အဲၣ်လၢအတီ လၢစီၤယရူဘဧၤလး လၢအမ့ၢ် စီၤကံးဒဧိၣ် အဟံၣ်ဖိဃီဖိ အဖီခိၣ်ဘၣ်.+