၁ ကရံၣ်သူး

၄ ပှၤဂၤကြၢးထံၣ်ပှၤဒ် ခရံာ်အခ့အပှၤတဖၣ် ဒီးဒ်ပှၤလၢ အဘၣ်တၢ်အးလီၤအီၤလၢ ကစၢ်ယွၤ အတၢ်ခူသူၣ် စီဆှံတဖၣ်အသိးလီၤ.+ ၂ ဒီးပှၤလၢတၢ်အးလီၤအီၤလၢ တၢ်တမံၤမံၤန့ၣ် အကဘၣ်အိၣ်ဒီး တၢ်သးတီလီၤ. ၃ ခဲအံၤ သုမ့ၢ်သမံသမိးယၤမ့ၢ်ဂ့ၤ, စံၣ်ညီၣ်ကွီၢ် မ့ၢ်သမံသမိးယၤမ့ၢ်ဂ့ၤ အရ့တဒိၣ်လၢယဂီၢ်ဘၣ်. နီၢ်ကီၢ်န့ၣ် ယနီၢ်ကစၢ်ဒၣ်လဲာ် ယတသမံသမိးလီၤ ယသးဘၣ်. ၄ ယသးလၢ အသ့ၣ်ညါဒၣ်တၢ် တပာ်တၢ်ကမၣ်လၢယလိၤ နီတမံၤဘၣ်. ဘၣ်ဆၣ် တၢ်အဝဲန့ၣ် အခီပညီ တအဲၣ်ဒိးတဲဝဲလၢ ယကဲပှၤတီပှၤလိၤဘၣ်. ပှၤလၢ အသမံသမိးယၤန့ၣ် မ့ၢ်ဝဲ ယဟိဝၤယွၤလီၤ.*+ ၅ အဃိ တချုးလၢ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤ ဟဲတုၤဒံးဘၣ်န့ၣ် တဘၣ်စံၣ်ညီၣ်တၢ် နီတမံၤဒံးတဂ့ၤ,+ အိၣ်ခိးတုၤလၢ ကစၢ်ဟဲတုၤတက့ၢ်. အဝဲကပာ်ဖျါထီၣ် တၢ်ခူသူၣ်လၢ အအိၣ်လၢ တၢ်ခံးကျါ ဒီးကပာ်ဖျါထီၣ်စ့ၢ်ကီးဝဲ တၢ်ကူၣ်ထီၣ်ဖးလီၤ လၢအအိၣ်လၢ ပှၤသးပူၤလီၤ. ဒီးပှၤတဂၤစုာ်စုာ် ကဒိးန့ၢ်ဘၣ် တၢ်စံးပတြၢၤလၢ ကစၢ်ယွၤအအိၣ်လီၤ.+

၆ ဒီပုၢ်ဝဲၢ်သ့ၣ်ဧၢ, ယဒုးဘၣ်ထွဲ တၢ်ဂ့ၢ်တဖၣ်အံၤဒီးယၤ ဒီးစီၤအပီးလိၤန့ၣ်+ မ့ၢ်ဒၣ်လၢ သုဘျုးအဂီၢ်လီၤ. ခီဖျိလၢပဝဲအဃိ သုကန့ၢ်ဘၣ်တၢ်မၤလိ လၢအမ့ၢ် “တဘၣ်မၤအါန့ၢ်ဒံး တၢ်ကွဲးအသးတဖၣ် အိၣ်ဝဲအသိးတဂ့ၤ.” သုမ့ၢ်မၤထွဲဒ်န့ၣ်န့ၣ် တမ့ၢ်လၢ သုကပာ်ကဖၢလၢသုသး,+ ကွၢ်မဲာ်တၢ် ဒီးပာ်ဒိၣ်တဂၤ ဒီးပာ်ဆံးအဝဲတဂၤဘၣ်. ၇ မ့ၢ်မတဂၤပာ်နၤ အပတီၢ်ထီန့ၢ်ဒံး ပှၤအဂၤလဲၣ်. တၢ်လၢအအိၣ်ဒီးနၤလၢ နတဒိးန့ၢ်ဘၣ်အီၤလၢ ကစၢ်ယွၤအအိၣ်ဘၣ်န့ၣ် အိၣ်တမံၤမံၤဧါ.+ ဒီးနမ့ၢ်ဒိးန့ၢ်ဘၣ်အီၤန့ၣ် ဘၣ်မနုၤအဃိ နပာ်ကဖၢလၢနသး ဒ်သိးနမၤန့ၢ်အီၤလၢ နနီၢ်ကစၢ် အဂံၢ်အဘါလဲၣ်.

၈ မ့ၢ်တၢ်အိၣ်ဒီးသု လၢလၢပှဲၤပှဲၤလံဧါ. မ့ၢ်သုကဲပှၤထူးပှၤတီၤလံဧါ. မ့ၢ်သုစးထီၣ်ပၢဆိတၢ် ဒ်စီၤပၤတဖၣ်အသိး+ လၢပမဲာ်ညါလံဧါ. ဒ်သိးပကပၢဃုာ်တၢ်ဒီးသု ဒ်စီၤပၤတဖၣ်အသိးအဂီၢ် ယမုၢ်လၢ်လၢ သုစးထီၣ်ပၢတၢ် ဒ်စီၤပၤတဖၣ်အသိး အနီၢ်ကီၢ်လံမၢၤ.+ ၉ ဖျါဘၣ်ယၤလၢ ကစၢ်ယွၤဟဲကိးထီၣ် ပဝဲပှၤတၢ်မၢဖိတဖၣ်လၢ ပှၤခဲလၢာ်အမဲာ်ညါ ဒ်ပှၤလၢ အလီၢ်ခံကတၢၢ်တဒူၣ် လၢအဘၣ် တၢ်စံၣ်ညီၣ်သံအီၤ အသိးလီၤ.+ ဒီးပကဲထီၣ် တၢ်ကွၢ်ကီအလီၢ်လၢ ဟီၣ်ခိၣ်အဂီၢ်+ ဒီးလၢမူခိၣ်ကလူး ဒီးလၢပှၤကညီအဂီၢ်လီၤ. ၁၀ ပဝဲဒၣ်အံၤ လၢခရံာ်အဃိ ပမ့ၢ်ပှၤတကျၢတခီဘၣ်+ မ့မ့ၢ် သုဝဲသ့ၣ်န့ၣ် သုမ့ၢ်ပှၤကူၣ်တၢ်သ့လၢ ခရံာ်အပူၤလီၤ. ပဝဲဒၣ်အံၤ ပမ့ၢ် ပှၤဂံၢ်စၢ်ဘါစၢ် မ့မ့ၢ်သုဝဲသ့ၣ်န့ၣ် သုဂံၢ်ဆူၣ်ဘါဆူၣ်လီၤ. ပဝဲဒၣ်အံၤ ပလၤကပီၤတအိၣ်ဘၣ် မ့မ့ၢ်သုဝဲန့ၣ် သုအိၣ်ဒီးသုလၤကပီၤလီၤ. ၁၁ တုၤလၢ ခဲအံၤဒၣ်လဲာ် ပလီၤဘဲ* အီၣ်တၢ်,+ အဲၣ်ဒိးအီထံ,+ ပတၢ်ကူတၢ်ကၤ တယၢဘၣ်, ပှၤတီၢ်ပှၤ,+ ပဟံၣ်ပဃီတအိၣ်ဘၣ် ၁၂ ဒီးပမၤတၢ်ဆူၣ်ဆူၣ်လၢ ပနီၢ်ကစၢ်အစုလီၤ.+ ဖဲပှၤတဲဆါပှၤအခါ ပဆိၣ်ဂ့ၤအဝဲသ့ၣ်,+ ဖဲပှၤမၤအၢမၤသီပှၤအခါ ပတူၢ်တၢ်လၢ တၢ်ဝံသးစူၤအပူၤ,+ ၁၃ ဖဲပှၤတဲဟးဂီၤပှၤအခါ ပတဲဆၢက့ၤတၢ်မုာ်မုာ်လီၤ.+ တုၤလၢ ခဲအံၤဒၣ်လဲာ် ပှၤအိၣ်လၢ ဟီၣ်ခိၣ်ချၢန့ၣ် ပာ်ပှၤဒ်သိးဒီး တၢ်ကမှံၤ ဒီးဒ်တၢ်ဘၣ်အၢဘၣ်သီ အသိးလီၤ.

၁၄ ယကွဲးတၢ်သ့ၣ်တဖၣ်အံၤန့ၣ် တမ့ၢ်ဒ်သိး ယကမၤမဲာ်ဆှးသု အဂီၢ်ဘၣ်. မ့ၢ်ဒ်သိး ယကဟ့ၣ်ကူၣ်ဟ့ၣ်ဖးသု ဒ်ယဖိသးဘိတဖၣ် အသိးလီၤ. ၁၅ ပှၤလၢအသိၣ်လိသုလၢ ခရံာ်အပူၤ မ့ၢ်အိၣ်အဂၤ ၁၀,၀၀၀ ဘၣ်ဆၣ် သုပၢ်တအိၣ်အါဂၤဘၣ်. ခီဖျိလၢ တၢ်သးခုကစီၣ်အဃိ ယကဲထီၣ်သုပၢ် လၢခရံာ်အပူၤလီၤ.+ ၁၆ ဒီးယဟ့ၣ်သဆၣ်ထီၣ်သုဒ်သိး သုကကွၢ်လိမၤဒိးယၤ အဂီၢ်လီၤ.+ ၁၇ အဃိ ယကဆှၢလီၤ စီၤတံၤမသ့းလၢသုအိၣ် မ့ၢ်လၢအဝဲမ့ၢ်ပှၤလၢ ယအဲၣ်အီၤ ဒီးမ့ၢ်ဖိလၢအသးတီ လၢကစၢ်အပူၤလီၤ. အဝဲကဒုးသ့ၣ်နီၣ်ထီၣ်က့ၤသုလၢ ယတၢ်မၤ အကျိၤအကျဲတဖၣ်လၢ အဘၣ်ဃးဒီး ယ့ၣ်ၡူးခရံာ်+ ဒ်ယသိၣ်လိ တၢ်အိၣ်ဖှိၣ်ကိးဖျၢၣ်ဒဲး လၢတၢ်လီၢ်ဝးဝး အသိးလီၤ.

၁၈ ပှၤလၢသုကျါတနီၤနီၤ ဆိကမိၣ်ဝဲလၢ ယတလဲၤလၢ သုအိၣ်ဘၣ်အဃိ အဝဲသ့ၣ် ပာ်ထီၣ်ထီအသးလံ. ၁၉ ဘၣ်ဆၣ် တယံာ်လၢၤဘၣ်န့ၣ် မ့ၢ်ဘၣ်ယဟိဝၤယွၤ အသးဒီး ယကလဲၤလၢ သုအိၣ်လီၤ. ဒီးပှၤလၢ အပာ်ထီၣ်ထီအသးတဖၣ်အံၤ ယတအဲၣ်ဒိးနၢ်ဟူ အဝဲသ့ၣ် အတၢ်ကတိၤဘၣ်. ယအဲၣ်ဒိးသ့ၣ်ညါလၢ မ့ၢ်အဝဲသ့ၣ်အိၣ်ဒီး ကစၢ်ယွၤ အတၢ်စိကမီၤဧါ တအိၣ်ဘၣ်ဧါလီၤ. ၂၀ ယွၤအဘီအမုၢ်န့ၣ် တဒိးသန့ၤထီၣ်အသးလၢ တၢ်ကတိၤတဖၣ် အဖီခိၣ်ဘၣ်. အဒိးသန့ၤထီၣ်အသးလၢ ကစၢ်ယွၤ အတၢ်စိကမီၤလီၤ. ၂၁ ဖဲယလဲၤလၢ သုအိၣ်အခါ မ့ၢ်ယကြၢးလဲၤစိာ် နီၣ်တီၢ်ဧါ+ မ့တမ့ၢ် ယကြၢးလဲၤလၢ တၢ်အဲၣ်တၢ်ကွံ ဒီးတၢ်သူၣ်စူၤသးစူၤ အပူၤဧါ. သုလီကီ ဖဲလဲၣ်တခါလဲၣ်.