စံၣ်ညီၣ်ကွီၢ်
၆ တၢ်လၢယဟိဝၤယွၤ ထံၣ်ဝဲလၢအအၢန့ၣ် ပှၤအံၣ်စရ့လးဖိ မၤကဒီးဝဲလီၤ.+ အဃိ ယဟိဝၤယွၤ ဟ့ၣ်လီၤအဝဲသ့ၣ် လၢပှၤမံးဒယၣ်ဖိ အစုပူၤ နွံနံၣ်လီၤ.+ ၂ ဒီးပှၤမံးဒယၣ်ဖိတဖၣ် ဆီၣ်တံၢ်မၤနၢၤဝဲ ပှၤအံၣ်စရ့လးဖိလီၤ.+ ခီဖျိလၢ ပှၤမံးဒယၣ်ဖိတဖၣ်အဃိ ပှၤအံၣ်စရ့လးဖိ လဲၤအိၣ်ခူသူၣ်လၢ ကစၢၢ်ကလိကျါ, လ့တဖၣ်အကိပူၤ ဒီးလၢတၢ်လီၢ်လၢ ပှၤဘၣ်လဲၤဝဲ ကီကီခဲခဲတဖၣ်လီၤ.+ ၃ ပှၤအံၣ်စရ့လးဖိ မ့ၢ်ဖှံလီၤတၢ်ချံန့ၣ် ပှၤမံးဒယၣ်ဖိ, ပှၤဧမၤလ့းဖိ+ ဒီးပှၤမုၢ်ထီၣ်ဖိတဖၣ်+ ဟဲထီဒါအဝဲသ့ၣ်လီၤ. ၄ အဃိ အဝဲသ့ၣ် ဟဲဆီလီၤအသး လၢကီၢ်ပူၤ ဒီးမၤဟးဂီၤကွံာ် တၢ်လၢအ မဲထီၣ်သၣ်ထီၣ်တဖၣ် တုၤလီၤလၢ ဝ့ၢ်ဂါစၤလီၤ. ဒီးသိမ့ၢ်ဂ့ၤ, ကျီၢ်မ့ၢ်ဂ့ၤ, ကသ့ၣ်ယီၤမ့ၢ်ဂ့ၤ, တၢ်လၢပှၤအီၣ်သ့မ့ၢ်ဂ့ၤ အဝဲသ့ၣ်တပာ်တ့ၢ်ဝဲလၢ ပှၤအံၣ်စရ့လးဖိအဂီၢ် နီတမံၤဘၣ်.+ ၅ ဒီးအဝဲသ့ၣ် ဟဲကိးဃုာ်ဒီး အဆၣ်ဖိကီၢ်ဖိတဖၣ် ဒီးဟဲစိာ်အဒဲတဖၣ်လီၤ. အဝဲသ့ၣ် အိၣ်ဝဲအါအါဂီၢ်ဂီၢ် ဒ်ဒွဲၣ်တဖၣ်အသိး+ ဒီးအကီၤလၤအူးတဖၣ် အါဝဲတုၤဒၣ်လဲာ် ပှၤဂံၢ်အီၤ တဘၣ်ဘၣ်.+ ဒီးဒ်သိး အဝဲသ့ၣ် ကမၤဟးဂီၤကွံာ်ဝဲ ကီၢ်အဂီၢ် အဝဲသ့ၣ် ဟဲနုာ်လီၤ လၢကီၢ်ပူၤလီၤ. ၆ ခီဖျိလၢ ပှၤမံးဒယၣ်ဖိအဃိ ပှၤအံၣ်စရ့လးဖိ ဖှီၣ်လီၤယာ်လီၤဒိၣ်မးလီၤ. အဃိ အဝဲသ့ၣ် ဃ့ယဟိဝၤယွၤ အတၢ်မၤစၢၤလီၤ.+
၇ ဖဲပှၤအံၣ်စရ့လးဖိ ဃ့ယဟိဝၤယွၤ လၢကမၤ ထူၣ်ဖျဲးထီၣ် အဝဲသ့ၣ်လၢ ပှၤမံးဒယၣ်ဖိ အစုပူၤအခါ+ ၈ ယဟိဝၤယွၤ ဆှၢလီၤဝဲ ဝံတဂၤ လၢအဝဲသ့ၣ် အအိၣ်လီၤ. ဒီးဝံတဂၤန့ၣ် တဲဘၣ်အဝဲသ့ၣ်လၢ “အံၣ်စရ့လး အကစၢ် ယဟိဝၤယွၤ တဲဝဲဒ်အံၤ ‘ယဒုးဟးထီၣ်ကွံာ်သုလၢ ကီၢ်အဲၤကူပတူးလၢ သုဘၣ်ကဲကုၢ်လၢအပူၤလီၤ.+ ၉ ဒီးယမၤပူၤဖျဲးသု လၢပှၤအဲၤကူပတူးဖိ ဒီးပှၤလၢအဆီၣ်တံၢ်မၤနၢၤသု ခဲလၢာ် အစုပူၤလီၤ. ဒီးယနီဟးထီၣ်ကွံာ် သုဒုၣ်သုဒါတဖၣ် လၢသုမဲာ်ညါ ဒီးယဟ့ၣ်သုလၢ အဝဲသ့ၣ်အကီၢ်လီၤ.+ ၁၀ ဒီးယတဲဘၣ်သုလၢ “ယမ့ၢ် သုကစၢ် ယဟိဝၤယွၤလီၤ.+ ပှၤအမိၢ်ဖိလၢ သုအိၣ်သုဆိးလၢ အကီၢ်ပူၤန့ၣ် သုတဘၣ် ဘူၣ်ထီၣ်ဘါထီၣ်* အယွၤတဖၣ်ဘၣ်.”+ ဘၣ်ဆၣ် သုတဒိကနၣ် ယကလုၢ်ဘၣ်.’”+
၁၁ လၢခံ ယဟိဝၤယွၤ အမူခိၣ်ကလူး+ ဟဲဆ့ၣ်နီၤဝဲလၢ ပှၤအဘံဧ့စၢ်ဖိ+ စီၤယိးအၣ် အသ့ၣ်ဖးဒိၣ်တထူၣ်အခီၣ်ထံး လၢဝ့ၢ်ဧိးဖြၤလီၤ. ဒ်သိး ပှၤမံးဒယၣ်ဖိ သုတထံၣ်ဝဲ ဘုတဂ့ၤအဂီၢ် စီၤယိးအၣ် အဖိခွါ စီၤကံးဒဧိၣ်န့ၣ်+ တီၢ်လီၤဆှုဝဲဘုလၢ စပံးထံအကျိးပူၤလီၤ. ၁၂ ယဟိဝၤယွၤ အမူခိၣ်ကလူး ဟဲအိၣ်ဖျါထီၣ်လၢ စီၤကံးဒဧိၣ်အမဲာ်ညါ ဒီးတဲအီၤလၢ “ပှၤသုးဖိလၢ အဂံၢ်ဆူၣ်ဘါဆူၣ်တဂၤဧၢ, ယဟိဝၤယွၤ အိၣ်ဒီးနၤလီၤ.”+ ၁၃ ဒီးစီၤကံးဒဧိၣ် တဲအီၤလၢ “ကစၢ်ဧၢ, ဝံသးစူၤယၤနီၤ, ဘၣ်ဆၣ် ယဟိဝၤယွၤ မ့ၢ်အိၣ်ဒီးပှၤန့ၣ် ဘၣ်မနုၤအဃိ ပတူၢ်ဘၣ်တၢ် ထဲအံၤညါလဲၣ်.+ ပပၢ်တဖၣ် တဲပှၤလၢ ယဟိဝၤယွၤ မၤဝဲ တၢ်လီၤလးအါမး+ ဒီးဒုးဟးထီၣ်ကွံာ်ပှၤလၢ ကီၢ်အဲၤကူပတူးအပူၤအဃိ+ ဘၣ်မနုၤလၢ အဝဲတမၤ တၢ်လီၤလးတဖၣ်အံၤ လၢၤဘၣ်လဲၣ်. ခဲအံၤန့ၣ် ယဟိဝၤယွၤ လဲၤသဒၣ်ပှၤ+ ဒီးဟ့ၣ်လီၤကွံာ်ပှၤလၢ ပှၤမံးဒယၣ်ဖိ အစုပူၤလံ.” ၁၄ ယဟိဝၤယွၤ* ကွၢ်ဃီၤအီၤ ဒီးတဲအီၤလၢ “ယဆှၢလီၤနၤလံအဃိ လဲၤဒီး သူနဂံၢ်နဘါ ဒ်သိးနကမၤထူၣ်ဖျဲးထီၣ် ပှၤအံၣ်စရ့လးဖိလၢ ပှၤမံးဒယၣ်ဖိ အစုပူၤတက့ၢ်.”+ ၁၅ စီၤကံးဒဧိၣ် တဲဆၢအီၤလၢ “ယဟိဝၤယွၤဧၢ, ဝံသးစူၤယၤနီၤ, ဘၣ်ဆၣ် ယမၤထူၣ်ဖျဲးထီၣ် ပှၤအံၣ်စရ့လးဖိ ကသ့ဒ်လဲၣ်. ယဒူၣ်ဖိထၢဖိမ့ၢ် ဒူၣ်ဖိထၢဖိလၢ အရ့တဒိၣ်ဘၣ်တဒူၣ်လၢ မနၤၡ့ၤအဒူၣ်အကျါလီၤ. ဒီးယမ့ၢ်ပှၤလၢ အဆံးကတၢၢ်လၢ ယပၢ်အဒူၣ်ဖိထၢဖိ အကျါလီၤ.” ၁၆ ဒီးယဟိဝၤယွၤ တဲအီၤလၢ “မ့ၢ်လၢ ယကအိၣ်ဒီးနၤ+ အဃိ နကမၤနၢၤကွံာ် ပှၤမံးဒယၣ်ဖိ ညီညီဖိလီၤ.”
၁၇ ဒီးစီၤကံးဒဧိၣ် တဲအီၤလၢ “နမ့ၢ်ဘၣ်သူၣ်ဘၣ်သးယၤန့ၣ် ဒုးနဲၣ်ယၤ တၢ်ပနီၣ်တခါလၢ နမ့ၢ်ပှၤတဂၤလၢ အတဲတၢ်ဒီးယၤနီၢ်ကီၢ်မီၤ. ၁၈ တချုးလၢ ယဟဲက့ၤကဒါ ဒီးပာ်လီၤ တၢ်အီၣ်တၢ်အီ လၢနဂီၢ် ဒံးဘၣ်န့ၣ် ဝံသးစူၤ တဘၣ်ဟးထီၣ်ကွံာ် ဖဲအံၤတဂ့ၤ.”+ အဃိ မူခိၣ်ကလူး တဲဆၢက့ၤအီၤလၢ “ယကအိၣ်ဖဲအံၤ တုၤလၢနဟဲက့ၤကဒါက့ၤလီၤ.” ၁၉ ဒီးစီၤကံးဒဧိၣ် လဲၤကတဲာ်ကတီၤဝဲ မဲာ်တဲးလဲးဖိတဒု ဒီးတ့ဝဲ ကိၣ်လၢတပၣ်ဒီး ကိၣ်မံၣ်ဘၣ် လၢကိၣ်ကမူၣ် တအ့ဖးလီၤ.*+ ဒီးအဝဲပၢနုာ်ဝဲ တၢ်ညၣ်လၢ ဃၤတဖျၢၣ်အပူၤ ဒီးကသူထံလၢ သပၢၤအပူၤလီၤ. ဒီးစီၤကံးဒဧိၣ် ဟဲစိာ်ဝဲ တၢ်အီၣ် ဒီးဒုးအီၣ်အီၤ လၢသ့ၣ်ဖးဒိၣ် အခီၣ်ထံးလီၤ.
၂၀ ယွၤလၢအမ့ၢ်အတီ အမူခိၣ်ကလူး တဲဘၣ် စီၤကံးဒဧိၣ်လၢ “ဟံးန့ၢ်တၢ်ညၣ် ဒီးကိၣ် ဒီးပာ်လီၤအီၤလၢ လၢၢ်ဖးဒိၣ်အလိၤဖဲန့ၣ် ဒီးလူလီၤ ကသူထံတက့ၢ်.” ဒီးစီၤကံးဒဧိၣ် မၤဝဲဒ်န့ၣ်လီၤ. ၂၁ ဝံၤဒီးယဟိဝၤယွၤ အမူခိၣ်ကလူး ယူာ်ဃီၤနီၣ်ထိးဘိလၢ အစိာ်ဝဲလၢ အစုပူၤ တုၤလၢ နီၣ်ထိးဘိအခိၣ်ထိး ဘၣ်ထံးဒီးတၢ်ညၣ် ဒီးကိၣ်လီၤ. ဒီးမ့ၣ်အူ ကဲၤကပျီၤထီၣ်လၢ လၢၢ်အဖီခိၣ် ဒီးအီၣ်ကွံာ်တၢ်ညၣ် ဒီးကိၣ်လီၤ.+ ဒီးယဟိဝၤယွၤ အမူခိၣ်ကလူး ဟါမၢ်ကွံာ်လၢ စီၤကံးဒဧိၣ် အမဲာ်ညါလီၤ. ၂၂ ဖဲန့ၣ်အခါ စီၤကံးဒဧိၣ် သ့ၣ်ညါဝဲလၢ ပှၤတဂၤန့ၣ် မ့ၢ်ဝဲ ယဟိဝၤယွၤ အမူခိၣ်ကလူးလီၤ.+
ဒီးတဘျီဃီန့ၣ် စီၤကံးဒဧိၣ် တဲဝဲလၢ “အၣ်လါ, တၢ်ပၢကစၢ် ယဟိဝၤယွၤဧၢ, ယထံၣ်ဘၣ် ယဟိဝၤယွၤ အမူခိၣ်ကလူး လၢမဲာ်သကိးမဲာ်လံ.”+ ၂၃ ဘၣ်ဆၣ် ယဟိဝၤယွၤ တဲအီၤလၢ “ပာ်နသးမုာ်မုာ်ခုၣ်ခုၣ်တက့ၢ်.* ပျံၤတၢ်တဂ့ၤ.+ နတသံဘၣ်.” ၂၄ အဃိ စီၤကံးဒဧိၣ် တ့ထီၣ်ဝဲ တၢ်လုၢ်လီၢ်တဖျၢၣ် လၢယဟိဝၤယွၤအဂီၢ် ဖဲန့ၣ်လီၤ. ဒီးပှၤကိးတၢ်လုၢ်လီၢ်အံၤ အမံၤလၢ ယဟိဝၤၡၤလိၣ်*+ တုၤလၢ မုၢ်မဆါ တနံၤအံၤလီၤ. ဒီးတၢ်လုၢ်လီၢ်န့ၣ် အိၣ်ဒံးဝဲလၢ ပှၤအဘံဧ့စၢ်ဖိအဝ့ၢ် ဧိးဖြၤအပူၤလီၤ.
၂၅ ဒီးဖဲတၢ်တနၤန့ၣ် ယဟိဝၤယွၤ တဲအီၤလၢ “ဟံးန့ၢ်နပၢ်အကျီၢ်ဖါ* ခံဒုတဒု လၢအသးနံၣ်အိၣ်နွံနံၣ် ဒီးမၤလီၤပှီၢ်ကွံာ် နပၢ်အတၢ်လုၢ်လီၢ်လၢ အမၤဝဲလၢ ဘဧၤလးအဂီၢ် ဒီးကူာ်လီၤကွံာ် တၢ်စီဆှံအထူၣ်* လၢအအိၣ်လၢ တၢ်လုၢ်လီၢ် အကပၤတက့ၢ်.+ ၂၆ ပာ်လီၤလၢၢ်တကျိၤ ဒီးတ့ထီၣ်တၢ်လုၢ်လီၢ် လၢနကစၢ် ယဟိဝၤယွၤအဂီၢ်လၢ တၢ်ဘံၣ်တၢ်ဘၢအလီၢ်အံၤ အဖီခိၣ်တက့ၢ်. ဝံၤဒီး ဟံးန့ၢ်ကျီၢ်ဖါ ခံဒုတဒုန့ၣ် ဒီးဟ့ၣ်လုၢ်ထီၣ်အီၤလၢ သ့ၣ်လၢ နန့ၢ်ဘၣ်အီၤ ခီဖျိလၢ နကူာ်လီၤကွံာ် တၢ်စီဆှံအထူၣ်န့ၣ် အဖီခိၣ် ဒ်တၢ်လုၢ်ဒွဲၣ်အူ အသိးတက့ၢ်.” ၂၇ အဃိ စီၤကံးဒဧိၣ် ကိးန့ၢ်ဝဲ အခ့အပှၤ အဂၤတဆံ ဒီးမၤဝဲဒ် ယဟိဝၤယွၤ တဲအီၤအသိးလီၤ. ဘၣ်ဆၣ် မ့ၢ်လၢ အဝဲပျံၤ အပၢ်အဒူၣ်ဖိထၢဖိ ဒီးပိာ်ခွါတဖၣ်လၢ အအိၣ်လၢ ဝ့ၢ်ပူၤအဃိ အမၤဝဲလၢ မုၢ်ဆါခီတဘူၣ်ဘၣ် ဒီးအမၤဝဲလၢ မုၢ်နၤခီလီၤ.
၂၈ လၢခံတဂီၤ ဖဲပှၤပိာ်ခွါ လၢအအိၣ်လၢ ဝ့ၢ်ပူၤတဖၣ် ဂဲၤဆၢထၢၣ် ဂီၤဂီၤအခါ အဝဲသ့ၣ်ထံၣ်ဘၣ်ဝဲလၢ ဘဧၤလး အတၢ်လုၢ်လီၢ်န့ၣ် ဘၣ်တၢ်မၤလီၤပှီၢ်ကွံာ်အီၤ, တၢ်စီဆှံအထူၣ် လၢအအိၣ်လၢ တၢ်လုၢ်လီၢ် အကပၤန့ၣ် ဘၣ်တၢ်ကူာ်လီၤကွံာ်အီၤ ဒီးကျီဖါ ခံဒုတဒုန့ၣ် ဘၣ်တၢ် လုၢ်ထီၣ်အီၤလၢ တၢ်လုၢ်လီၢ်လၢ ပှၤတ့ထီၣ်ဝဲ သီသီတဖျၢၣ် အလိၤလီၤ. ၂၉ အဃိ အဝဲသ့ၣ် သံကွၢ်လိာ်သး တဂၤဒီးတဂၤလၢ “မတဂၤမၤတၢ် ဒ်အံၤလဲၣ်.” ဒီးဖဲအဝဲသ့ၣ် ဃုသ့ၣ်ညါ တၢ်ဂ့ၢ်ဝံၤအခါ အဝဲသ့ၣ် တဲဝဲလၢ “စီၤယိးအၣ်အဖိခွါ စီၤကံးဒဧိၣ် မၤဝဲလီၤ.” ၃၀ အဃိ ပှၤပိာ်ခွါ လၢအအိၣ်လၢ ဝ့ၢ်ပူၤတဖၣ် တဲဘၣ် စီၤယိးအၣ်လၢ “မ့ၢ်လၢ နဖိခွါ မၤလီၤပှီၢ်ကွံာ် ဘဧၤလး အတၢ်လုၢ်လီၢ် ဒီးကူာ်လီၤကွံာ်ဝဲ တၢ်စီဆှံအထူၣ် လၢအအိၣ်လၢ တၢ်လုၢ်လီၢ်အကပၤအဃိ ဟဲကိးထီၣ်နဖိခွါ ဒီးပကမၤသံ ကွံာ်အီၤလီၤ.” ၃၁ ဝံၤဒီး စီၤယိးအၣ်+ တဲဘၣ်ပှၤလၢ အဆၢထၢၣ် ထီဒါအီၤတဖၣ်လၢ “ဘၣ်မနုၤအဃိ သုဘၣ်ဒီသဒၢ ဘဧၤလးလဲၣ်. ဘၣ်မနုၤအဃိ သုဘၣ်မၤပူၤဖျဲး အီၤလဲၣ်. ပှၤတဂၤဂၤလၢ အဒီသဒၢအီၤန့ၣ် တဂီၤအံၤ ကဘၣ် တၢ်မၤသံအီၤလီၤ.+ ပှၤမၤလီၤပှီၢ်ကွံာ် ဘဧၤလး အတၢ်လုၢ်လီၢ်လံအဃိ ဘဧၤလး မ့မ့ၢ်ယွၤတဂၤန့ၣ် မၢအဒီသဒၢလီၤ အနီၢ်ကစၢ်သးသၢၤ.”+ ၃၂ ဒီးစးထီၣ်ဖဲနံၤအဝဲန့ၣ် စီၤယိးအၣ်ကိးဝဲ စီၤကံးဒဧိၣ်လၢ စီၤယရူဘဧၤလး* မ့ၢ်လၢ စီၤယိးအၣ် တဲဝဲလၢ “ပှၤမၤလီၤပှီၢ်ကွံာ် ဘဧၤလး အတၢ်လုၢ်လီၢ်လံအဃိ ဘဧၤလး မ့မ့ၢ်ယွၤတဂၤန့ၣ် မၢအဒီသဒၢလီၤ အနီၢ်ကစၢ်သးသၢၤ.”
၃၃ ဒီးကယဲၢ်ပှၤမံးဒယၣ်ဖိ,+ ပှၤဧမၤလ့းဖိ+ ဒီးပှၤမုၢ်ထီၣ်ဖိ ပာ်ဖှိၣ်ထီၣ်အသး+ ဒီးခီဂာ်ထံကျိ ဒီးဆီလီၤအသးဖဲ ယံးစရ့လး အတၢ်တြီၤပူၤလီၤ. ၃၄ ဒီးယဟိဝၤယွၤ အသးစီဆှံ ဟဲလီၤလၢ စီၤကံးဒဧိၣ်+ အလိၤ ဒီးအဝဲအူထီၣ်ကွဲၤ+ ဒီးပှၤအဘံဧ့စၢ်ဖိ+ ဟဲဆီၣ်ထွဲအီၤလီၤ. ၃၅ ဒီးအဝဲဆှၢလီၤ ပှၤစိာ်တၢ်ကစီၣ်ဖိတဖၣ် လၢပှၤမနၤၡ့ၤဖိ အဂၤတဖၣ်အအိၣ် ဒီးအဝဲသ့ၣ်စ့ၢ်ကီး ဟဲဆီၣ်ထွဲအီၤလီၤ. ဒီးအဝဲဆှၢလီၤစ့ၢ်ကီး ပှၤစိာ်တၢ်ကစီၣ်ဖိတဖၣ်လၢ အၤၡ့ၢ်အဒူၣ်, စဘူလိၣ်အဒူၣ် ဒီးနးသၤလံအဒူၣ် အအိၣ် ဒီးအဝဲသ့ၣ် ဟဲထီၣ်ထံၣ်လိာ်သး ဒီးအီၤလီၤ.
၃၆ ဝံၤဒီးစီၤကံးဒဧိၣ် တဲဘၣ် ယွၤလၢအမ့ၢ်အတီ တဂၤလၢ “ဒ်နအၢၣ်လီၤ ပာ်စၢၤအသိး နမ့ၢ်ကမၤထူၣ်ဖျဲးထီၣ် ပှၤအံၣ်စရ့လးဖိ ခီဖျိလၢယၤန့ၣ်+ ၃၇ ဖဲအံၤ ယကပာ်လီၤ သိအဆူၣ်လၢ ကြဲၢ်ပူၤလီၤ. ပစီၤထံ မ့ၢ်အိၣ်ထဲလၢ သိဆူၣ်အလိၤ ဘၣ်ဆၣ် ဟီၣ်ခိၣ်လၢအဃၢၤဝးဝး မ့ၢ်ဃ့ထီန့ၣ် ယကသ့ၣ်ညါလၢ ဒ်နအၢၣ်လီၤ ပာ်စၢၤအသိး နကမၤထူၣ်ဖျဲးထီၣ် ပှၤအံၣ်စရ့လးဖိ ခီဖျိလၢယၤန့ၣ်လီၤ.” ၃၈ ဒီးတၢ်ကဲထီၣ်သးဒ်န့ၣ်လီၤ. လၢခံတဂီၤ စီၤကံးဒဧိၣ် ဂဲၤဆၢထၢၣ်ဂီၤဂီၤ ဒီးအဝဲဝံာ်သံးဝဲ သိအဆူၣ် ဒီးပစီၤထံ ဟဲလီၤဝဲ ပှဲၤလီခီဖးဒိၣ် တဖျၢၣ်ညါလီၤ. ၃၉ ဘၣ်ဆၣ် စီၤကံးဒဧိၣ် တဲဘၣ် ယွၤလၢအမ့ၢ်အတီ တဂၤလၢ “ယကဃ့နၤတဘျီကဒီး ဘၣ်ဆၣ် တဘၣ်သးပှံၢ်ထီၣ် ယၤတဂ့ၤ. ဝံသးစူၤ ပျဲယမၤကွၢ်ကဒီးတၢ်လၢ သိအဆူၣ် တဘျီကဒီး. ဝံသးစူၤ မၤဃ့ထီထဲ သိအဆူၣ် ဘၣ်ဆၣ် မၤဘၣ်စီၣ် ဟီၣ်ခိၣ်လၢ ပစီၤထံဝးဝးတက့ၢ်.” ၄၀ အဃိ ဖဲနၤအဝဲန့ၣ် ကစၢ်ယွၤ မၤဝဲဒ်န့ၣ်လီၤ. သိအဆူၣ်န့ၣ် ဃ့ထီဝဲ, မ့မ့ၢ်လၢ ဟီၣ်ခိၣ်လၢအဃၢၤန့ၣ် ဘၣ်စီၣ်ဝဲလၢ ပစီၤထံလီၤ.