ဧ့ၤဘြံၤ

၁၃ မ်သုတၢ်အဲၣ်ပုၢ်အဲၣ်ဝဲၢ်န့ၣ် ဆဲးအိၣ်ထီဘိတက့ၢ်.+ ၂ ခီဖျိပှၤတနီၤနီၤ သးအိၣ်တူၢ်လိာ် ပှၤတမှံၤအဃိ လၢတၢ်တပာ်သူၣ်ပာ်သးအပူၤန့ၣ် အဝဲသ့ၣ်တူၢ်လိာ်ခီၣ်ဆၢဘၣ်ဝဲ မူခိၣ်ကလူးတဖၣ်လီၤ.+ အဃိ တဘၣ်သးပ့ၤနီၣ် ပာ်ဖျါထီၣ် တၢ်သးအိၣ်တူၢ်လိာ် ပှၤတမှံၤတဂ့ၤ.+ ၃ ပှၤလၢအအိၣ်လၢ ဃိာ်ပူၤန့ၣ် သ့ၣ်နီၣ်ထီၣ်အဝဲသ့ၣ်+ ဒ်သိးဒီးသုအိၣ်ဒီးအဝဲသ့ၣ်လၢ ဃိာ်ပူၤန့ၣ်တက့ၢ်.+ ဒီးပှၤလၢအဘၣ် တၢ်မၤအၢမၤနးအီၤတဖၣ်န့ၣ် သ့ၣ်နီၣ်ထီၣ် အဝဲသ့ၣ် ဒ်သိးဒီးသုဝဲစ့ၢ်ကီး ဘၣ်တၢ်မၤအၢမၤနးသုဃုာ်ဒီး အဝဲသ့ၣ်န့ၣ်တက့ၢ်. ၄ မ်တၢ်ဆီဟံၣ်ဆီဃီ ကမ့ၢ်တၢ်လၢ အအိၣ်ဒီးအလၤကပီၤ လၢပှၤခဲလၢာ် အမဲာ်ညါတက့ၢ်. ဒီးနီၢ်ဒီမါဝၤအလီၢ်မံန့ၣ် မ်အသုတဘၣ်အၢတဂ့ၤ.+ ကစၢ်ယွၤကစံၣ်ညီၣ် ပှၤလၢ အမၤကမၣ်မုၣ်ကမၣ်ခွါ* ဒီးပှၤလၢ အအဲၣ်ဘၢမါအဲၣ်ဘၢဝၤလီၤ.+ ၅ မ်သုတၢ်အိၣ်မူန့ၣ် ပူၤဖျဲးဒီး တၢ်အဲၣ်ကျိၣ်အဲၣ်စ့တက့ၢ်.+ သးမံဒီးတၢ်လၢ အအိၣ်ဒီးသုခဲအံၤတက့ၢ်.+ ကစၢ်ယွၤတဲဝဲလၢ “ယတလဲၤသဒၣ်နၤ နီတဘျီဘၣ် ဒီးယတပာ်တ့ၢ်နၤ နီတဘျီဘၣ်.”+ ၆ အဃိ လၢတၢ်သူၣ်ဒူသးဒူ လၢလၢပှဲၤပှဲၤအပူၤ ပတဲသ့လၢ “ယဟိဝၤယွၤ* မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်. ပှၤဟီၣ်ခိၣ်ဖိ မၤယၤတၢ်မနုၤကသ့လဲၣ်.”+

၇ သ့ၣ်နီၣ်ထီၣ် ပှၤလၢအတီခိၣ်ရိၤမဲတၢ်လၢ သုကျါတက့ၢ်.+ ပှၤတဖၣ်အံၤ တဲဘၣ်သုလၢ ကစၢ်ယွၤ အကလုၢ်ကထါလီၤ. ဒီးကွၢ်ထံကွၢ်ဆး အဝဲသ့ၣ် အလုၢ်လၢ်သကဲာ်ပဝး ကဲဘျုးဒ်လဲၣ် ဒီးကွၢ်လိမၤဒိး အဝဲသ့ၣ် အတၢ်နာ်တက့ၢ်.+

၈ မဟါမ့ၢ်ဂ့ၤ, တနံၤအံၤမ့ၢ်ဂ့ၤ ဒီးဆူညါ အစိၤစိၤဃၣ်ဃၣ်မ့ၢ်ဂ့ၤ ယ့ၣ်ၡူးခရံာ် မ့ၢ်တၢ်ဒ် အလီၢ်လီၢ်လီၤ.

၉ တဘၣ်ပျဲတၢ်သိၣ်လိ အကလုာ်ကလုာ်လၢ အလီၤတိၢ်လီၤဆီတဖၣ်န့ၣ် ဆှၢကမၣ်သုတဂ့ၤ. သးအဂံၢ်ဘါမ့ၢ်ဆူၣ်ထီၣ် ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ်အဃိ ဒီးတမ့ၢ်လၢ တၢ်အီၣ်တၢ်အီအဃိဘၣ်န့ၣ် ဂ့ၤဒိၣ်ဝဲလီၤ. ပှၤလၢအပာ်ဒိၣ် တၢ်အီၣ်တၢ်အီတဖၣ်န့ၣ် တန့ၢ်ဘၣ်အဘျုးဘၣ်.+

၁၀ ပအိၣ်ဒီးတၢ်လုၢ်လီၢ်တခါ ဘၣ်ဆၣ် ပှၤလၢအမၤတၢ်လၢ ဒဲစီဆှံအပူၤန့ၣ် တအိၣ်ဒီးတၢ်ခွဲးတၢ်ယာ်လၢ ကအီၣ်တၢ်လၢအအိၣ်လၢ အဖီခိၣ်ဘၣ်.+ ၁၁ ဆၣ်ဖိကီၢ်ဖိလၢ ပှၤလုၢ်တၢ်ခိၣ် အဒိၣ်ကတၢၢ် လဲၤစိာ်အသွံၣ်လၢ တၢ်စီဆှံအလီၢ်* ဒ်တၢ်လုၢ်လၢ တၢ်ဒဲးဘးအဂီၢ်အသိးန့ၣ် အစိၣ်ဘၣ်တၢ် ဒွဲၣ်အူထီၣ်ကွံာ်အီၤလၢ ဒဲကဝီၤအချၢလီၤ.+ ၁၂ အဃိ ယ့ၣ်ၡူးစ့ၢ်ကီး တူၢ်ဘၣ်တၢ်မၤအၢမၤနး လၢဝ့ၢ်တြဲၤအချၢ+ ဒ်သိးကပာ်စီဆှံပှၤဂၤ ခီဖျိအနီၢ်ကစၢ်အသွံၣ်လီၤ.+ ၁၃ လၢတၢ်န့ၣ်အဃိ မ်ပလဲၤလၢအအိၣ်လၢ ဒဲကဝီၤအချၢ ဒီးတူၢ်တၢ်ဒုၣ်ဒွဲၣ်လၢ အဝဲတူၢ်ဝဲန့ၣ်တက့ၢ်.+ ၁၄ ဖဲအံၤန့ၣ် ပတအိၣ်ဒီးဝ့ၢ်တဖျၢၣ်လၢ အအိၣ်ဝဲထီဘိဘၣ်. အဃိ ဝ့ၢ်လၢအကဟဲတဖျၢၣ်န့ၣ် ပခိးကွၢ်လၢ်အီၤလၢ တၢ်သူၣ်ဆူၣ်သးဆူၣ်အပူၤလီၤ.+ ၁၅ မ်ပလုၢ်ထီၣ် တၢ်စံးထီၣ်ပတြၢၤလၢ+ ကစၢ်ယွၤအအိၣ် ခီဖျိလၢ ယ့ၣ်ၡူး ထီဘိတက့ၢ်. အဝဲအံၤ မ့ၢ်ပထးခိၣ်အတၤသၣ်ဒီး+ ပမၤသ့ခီဖျိလၢ ပအၢၣ်လီၤအမံၤလၢ ပှၤဂၤအမဲာ်ညါလီၤ.+ ၁၆ တကးဒံးဘၣ် တဘၣ်သးပ့ၤနီၣ် မၤတၢ်ဂ့ၤ ဒီးတဘၣ်သးပ့ၤနီၣ် ဟ့ၣ်နီၤလီၤပှၤဂၤလၢ တၢ်လၢအအိၣ်ဒီးနၤန့ၣ်တဂ့ၤ.+ တၢ်လုၢ်ဒ်အံၤတဖၣ်န့ၣ် ကစၢ်ယွၤ ဘၣ်သူၣ်ဘၣ်သးဝဲ ဒိၣ်မးလီၤ.+

၁၇ ပှၤလၢအတီခိၣ်ရိၤမဲတၢ် လၢသုကျါန့ၣ် ဒိကနၣ်အဝဲသ့ၣ်အကလုၢ်+ ဒီးဒိးပၢသုသးလၢ အဝဲသ့ၣ်အဖီလာ်တက့ၢ်.+ အဝဲသ့ၣ်ကွၢ်ထွဲသု ဒ်ပှၤလၢအကဘၣ်ဟ့ၣ် တၢ်စံးဆၢလၢ ကစၢ်ယွၤအအိၣ်လီၤ.+ သုမ့ၢ်မၤဒ်န့ၣ်န့ၣ် အဝဲသ့ၣ် ကမၤအမူဒါလၢ တၢ်သးခုအပူၤ ဒီးတမ့ၢ်လၢ တၢ်သူၣ်လီၤဘှံးသးလီၤတီၤအပူၤ လၢအကကဲထီၣ် တၢ်ဘၣ်ဒိဘၣ်ထံး လၢသုဂီၢ်န့ၣ်ဘၣ်.

၁၈ မ့ၢ်လၢ ပနာ်လၢပအိၣ်ဒီး သးလၢအသ့ၣ်ညါဒၣ်တၢ် လၢအကဆှီ ဒီးပအဲၣ်ဒိး မၤတၢ်တီတီလိၤလိၤလၢ တၢ်ခဲလၢာ်အပူၤအဃိ+ ဆဲးဃ့ထုကဖၣ်တၢ် လၢပဂီၢ်တက့ၢ်. ၁၉ ဒီးယဟ့ၣ်သဆၣ်ထီၣ် သုလီၤလီၤဆီဆီလၢ သုကဃ့ထုကဖၣ်တၢ် ဒ်သိးယလဲၤလၢသုအိၣ် လၢအဆိအချ့ ကန့ၢ်အဂီၢ်လီၤ.

၂၀ ဒီးကစၢ်ယွၤလၢ အဟ့ၣ်ဝဲ တၢ်သူၣ်မံသးမုာ်တဂၤန့ၣ် ဒုးဂဲၤဆၢထၢၣ် ပကစၢ် ယ့ၣ်ၡူးလၢအမ့ၢ် ပှၤကွၢ်သိဖးဒိၣ်တဂၤ+ လၢတၢ်သံအပူၤ ဃုာ်ဒီးတၢ်အၢၣ်လီၤအီလီၤ အထူအယိာ်အသွံၣ်လီၤ. ၂၁ မ်အဟ့ၣ်လီၤသုလၢ တၢ်လၢအဂ့ၤကိးမံၤဒဲး ဒ်သိးသုကမၤ အတၢ်ဘၣ်သးအဂီၢ်တက့ၢ်. ခီဖျိ ယ့ၣ်ၡူးခရံာ်အဃိ အဝဲထိၣ်ဟူးထိၣ်ဂဲၤထီၣ်ပှၤလၢ ပကမၤ အတၢ်ဘၣ်သးအဂီၢ်လီၤ. မ်တၢ်လၤကပီၤ အိၣ်ဒီးကစၢ်ယွၤ လီၤထူလီၤယိာ်တက့ၢ်. အၤမ့ၣ်.

၂၂ ဒီပုၢ်ဝဲၢ်သ့ၣ်ဧၢ, ယကွဲးန့ၢ်သု လံာ်ပရၢဖုၣ်ဖုၣ်ဖိ တဘ့ၣ်အံၤအဃိ ယဟ့ၣ်သဆၣ်ထီၣ်သုလၢ သုကဒိကနၣ် တၢ်ကတိၤဟ့ၣ်ဂံၢ်ဟ့ၣ်ဘါအံၤ လၢတၢ်သးစူၤအပူၤလီၤ. ၂၃ ယအဲၣ်ဒိးဒုးသ့ၣ်ညါသုလၢ ပဒီပုၢ်ဝဲၢ်ခွါ စီၤတံၤမသ့း ထူၣ်ဖျဲးထီၣ်လံ. တယံာ်တမီၢ် အဝဲမ့ၢ်ဟဲတုၤန့ၣ် ယကလဲၤဒီးအီၤ ဒ်သိး ကလဲၤထံၣ်လိာ်သးဒီးသုအဂီၢ်လီၤ.

၂၄ ဆၢဂ့ၤဆၢဝါန့ၢ်ယၤ ပှၤလၢ အတီခိၣ်ရိၤမဲတၢ်လၢ သုကျါကိးဂၤဒဲး ဒီးပှၤစီဆှံခဲလၢာ်တက့ၢ်. ဒီးပှၤအိၣ်လၢ ကီၢ်အံၤတလံစ့ၢ်ကီး+ ဆၢဂ့ၤဆၢဝါသုလီၤ.

၂၅ မ်သုဝဲခဲလၢာ်ဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်တက့ၢ်.