ဧ့ၤဘြံၤ
၁၀ စီၤမိၤၡ့ အတၢ်သိၣ်တၢ်သီန့ၣ် မ့ၢ်တၢ်အကဒုလၢ+ အပာ်ဖျါထီၣ် တၢ်လၢအဂ့ၤလၢ အကဟဲဝဲတဖၣ်လီၤ.+ ဘၣ်ဆၣ် အတမ့ၢ် တၢ်လၢအနီၢ်ကီၢ်တဖၣ်န့ၣ်ဘၣ်. ဒီးစီၤမိၤၡ့ အတၢ်သိၣ်တၢ်သီ ဒီးတၢ်လုၢ်တၢ်ပာ် အလီၢ်လီၢ်တဖၣ် လၢအဘၣ် တၢ်ဟ့ၣ်လုၢ်ထီၣ်အီၤ တနံၣ်ဘၣ်တနံၣ်န့ၣ် ဒုးကဲထီၣ် ပှၤလၢအဘူၣ်ထီၣ်ဘါထီၣ် ကစၢ်ယွၤလၢ ပှၤလၢပှၤပှဲၤ တသ့နီတဘျီဘၣ်.+ ၂ တၢ်လုၢ်တၢ်ပာ်တဖၣ် ဒုးကဲထီၣ်အဝဲသ့ၣ်လၢ ပှၤလၢပှၤပှဲၤမ့ၢ်သ့န့ၣ် ဖဲပှၤလၢ အဘူၣ်ထီၣ်ဘါထီၣ် ကစၢ်ယွၤန့ၣ်* ဘၣ်တၢ်မၤကဆှီထီၣ်အဝဲသ့ၣ် ဝံၤအလီၢ်ခံ တမ့ၢ်လၢအဝဲသ့ၣ် အသးလၢအသ့ၣ်ညါဒၣ်တၢ် ကတူၢ်ဘၣ်တၢ်ကမၣ်လၢ တၢ်ဒဲးဘးအဃိလၢၤဘၣ်. ဒီးတၢ်မ့ၢ်ကဲထီၣ်အသးဒ်န့ၣ်န့ၣ် တၢ်ဟ့ၣ်လုၢ်ထီၣ် တၢ်လုၢ်တၢ်ပာ်တဖၣ် ကပတုာ်ကွံာ် တမ့ၢ်ဘၣ်ဧါ. ၃ လၢတၢ်န့ၣ်အလီၢ် တၢ်လုၢ်တၢ်ပာ်သ့ၣ်တဖၣ်အံၤ ကဲဝဲတၢ်လၢ အဒုးသ့ၣ်နီၣ် ပှၤဂီၢ်မုၢ် တနံၣ်ဘၣ်တနံၣ်လၢ အဝဲသ့ၣ်အိၣ်ဒီးတၢ်ဒဲးဘးလီၤ.+ ၄ နီၢ်ကီၢ်န့ၣ် ကျီၢ်ဖါ ဒီးမဲာ်တဲးလဲးတဖၣ် အသွံၣ်န့ၣ် ဟံးထီၣ်ကွံာ် တၢ်ဒဲးဘးတသ့ဘၣ်.
၅ အဃိ ဖဲခရံာ်ဟဲလီၤလၢ ဟီၣ်ခိၣ်ချၢအခါ အတဲဝဲလၢ “‘နတသးလီ တၢ်လုၢ်တၢ်ပာ် ဒီးတၢ်လုၢ်ထီၣ်တဖၣ်ဘၣ်. နကတဲာ်ကတီၤန့ၢ် နီၢ်ခိလၢယဂီၢ်လီၤ. ၆ ဒီးတၢ်လုၢ်ဒွဲၣ်အူ ဒီးတၢ်လုၢ်လၢ တၢ်ဒဲးဘးအဂီၢ်န့ၣ် နတတူၢ်လိာ်ဘၣ်.’+ ၇ ဒီးယတဲလၢ ‘ကွၢ်လၢအံၤ, ယဟဲလံ. လၢလံာ်ထူအပူၤန့ၣ် တၢ်ကွဲးအသးလၢ ယဂ့ၢ်လီၤ. အိ ကစၢ်ယွၤဧၢ, ယဟဲဒ်သိး ယကမၤ နတၢ်ဘၣ်သးအဂီၢ်လီၤ.’”+ ၈ အဆိကတၢၢ် အဝဲတဲဝဲလၢ “တၢ်လုၢ်တၢ်ပာ်တဖၣ်, တၢ်လုၢ်ထီၣ်တဖၣ်, တၢ်လုၢ်ဒွဲၣ်အူ ဒီးတၢ်လုၢ်လၢ တၢ်ဒဲးဘးအဂီၢ်န့ၣ် နတသးလီဘၣ် ဒီးနတတူၢ်လိာ်ဘၣ်.” တၢ်သ့ၣ်တဖၣ်န့ၣ် မ့ၢ်တၢ်လုၢ်တၢ်ပာ်တဖၣ်လၢ ပှၤဟ့ၣ်လုၢ်ထီၣ်အီၤဒ် စီၤမိၤၡ့ အတၢ်သိၣ်တၢ်သီ အိၣ်ဝဲအသိးလီၤ. ၉ ဝံၤဒီး အတဲဝဲလၢ “ကွၢ်လၢအံၤ, ယဟဲဒ်သိး ယကမၤ နတၢ်ဘၣ်သးအဂီၢ်လီၤ.”+ အဃိန့ၣ် အဝဲမၤကတၢၢ်ကွံာ် တၢ်အဆိကတၢၢ်တမံၤ ဒ်သိးအကဒုးအိၣ်ထီၣ် တၢ်ခံမံၤတမံၤအဂီၢ်လီၤ. ၁၀ ဒီးဒ်ကစၢ်ယွၤအ “တၢ်ဘၣ်သး”+ အံၤအိၣ်ဝဲအသိး ပဘၣ်တၢ်ပာ်စီဆှံပှၤ ခီဖျိယ့ၣ်ၡူးခရံာ် အနီၢ်ခိလၢ အဘၣ်တၢ်လုၢ်ထီၣ်အီၤ ထဲတဘျီလီၤ.+
၁၁ ပှၤလုၢ်တၢ်ဒိၣ် ကိးဂၤဒဲးန့ၣ် ဟံးန့ၢ်အလီၢ်ဒၣ်ဝဲ ဒ်သိးကမၤတၢ်မၤစီဆှံ+ တနံၤဘၣ်တနံၤ ဒီးဒ်သိးကလုၢ်ထီၣ် တၢ်လုၢ်အလီၢ်လီၢ်တဖၣ် ခဲအံၤခဲအံၤဘၣ်ဆၣ်+ တၢ်လုၢ်တၢ်ပာ်တဖၣ်အံၤ ဟံးထီၣ်ကွံာ်တၢ်ဒဲးဘး လၢာ်လၢာ်ဆ့ဆ့ တသ့ဘၣ်.+ ၁၂ မ့မ့ၢ် ခရံာ်န့ၣ် လုၢ်ထီၣ်တၢ်လုၢ်တၢ်ပာ် ထဲတခါလၢ တၢ်ဒဲးဘးအဂီၢ် လၢအကကဲဘျုး လီၤထူလီၤယိာ် ဝံၤဒီး အဝဲဆ့ၣ်နီၤဝဲလၢ ကစၢ်ယွၤ အစုထွဲတခီလီၤ.+ ၁၃ စးထီၣ်ဖဲန့ၣ်ဝံၤဒီး အဝဲအိၣ်ခိးတၢ် တုၤလၢ အဒုၣ်အဒါတဖၣ် ကဘၣ်တၢ်ပာ်လီၤ အဝဲသ့ၣ်ဒ် တၢ်ယီၢ်လီၤခီၣ်အလီၢ်လၢ အခီၣ်အဂီၢ်လီၤ.+ ၁၄ လၢတၢ်လုၢ်တၢ်ပာ် ထဲတခါအဃိ အဝဲဒုးကဲထီၣ် ပှၤလၢအဘၣ် တၢ်ပာ်စီဆှံအီၤတဖၣ် လၢပှၤလၢပှၤပှဲၤ+ အစိၤစိၤအဃၣ်ဃၣ်လီၤ. ၁၅ တကးဒံးဘၣ် သးစီဆှံစ့ၢ်ကီး အုၣ်အသးလၢပအိၣ် ဝံၤဒီးတဲဝဲလၢ ၁၆ “ယဟိဝၤယွၤ* တဲဝဲလၢ ‘လၢမုၢ်နံၤတဖၣ်န့ၣ် ဝံၤအလီၢ်ခံ ယကမၤ တၢ်အၢၣ်လီၤအီလီၤအံၤ ဒီးအဝဲသ့ၣ်လီၤ. ယကပၢနုာ်လီၤ ယတၢ်သိၣ်တၢ်သီလၢ အဝဲသ့ၣ်အသးပူၤ ဒီးယကကွဲးလီၤအီၤလၢ အဝဲသ့ၣ် အတၢ်ဆိကမိၣ်အပူၤလီၤ.’”+ ၁၇ ဒီးလၢခံ အတဲဝဲလၢ “ဒီးယတသ့ၣ်နီၣ်ထီၣ် အဝဲသ့ၣ်အတၢ်ဒဲးဘး ဒီးအတၢ်မၤလၢ အတတီတလိၤတဖၣ် လၢၤဘၣ်.”+ ၁၈ ဘၣ်ဆၣ် ကစၢ်ယွၤမ့ၢ်ပျၢ်ကွံာ် တၢ်ဒဲးဘးတဖၣ်အံၤန့ၣ် ပှၤတလိၣ် လုၢ်ထီၣ်တၢ်လုၢ်တၢ်ပာ်လၢ တၢ်ဒဲးဘးအဂီၢ်လၢၤဘၣ်.
၁၉ အဃိ ဒီပုၢ်ဝဲၢ်သ့ၣ်ဧၢ, ကျဲလၢ ပှၤကလဲၤနုာ်လၢ တၢ်စီဆှံအလီၢ်န့ၣ်+ ပသူအီၤလၢ တၢ်သူၣ်ဒူသးဒူအပူၤဘူၣ်ဝဲ ခီဖျိလၢ ယ့ၣ်ၡူးအသွံၣ်အဃိလီၤ. ၂၀ ဒီးအဝဲအိးဟိထီၣ်န့ၢ်ပှၤ ကျဲတဘိအံၤ ဒ်ကျဲလၢအသီ ဒီးကျဲလၢအမူဝဲတဘိ အသိးလီၤ. အဝဲမၤဝဲဒ်န့ၣ်န့ၣ် ခီဖျိလၢ အလဲၤခီဖျိ ယၣ်ဘျးသဒၢ+ လၢအမ့ၢ် အဖံးအညၣ်လီၤ. ၂၁ ဒီးမ့ၢ်လၢပအိၣ်ဒီး ပှၤလုၢ်တၢ်ဒိၣ် ဖးဒိၣ်တဂၤလၢ အတီခိၣ်ရိၤမဲဝဲ ကစၢ်ယွၤ အဟံၣ်ဖိဃီဖိ*+ အဃိ ၂၂ မ်ပသုးဃီၤပသးလၢ ကစၢ်ယွၤအအိၣ် လၢတၢ်သူၣ်ဘျၢသးဘျၢ ဒီးတၢ်နာ်လၢလၢပှဲၤပှဲၤအပူၤ, မ့ၢ်လၢပသး ဒီးပသးလၢ အသ့ၣ်ညါဒၣ်တၢ် လၢအအၢအသီန့ၣ်+ ဘၣ်တၢ်ဖှံကဆှီထီၣ်အီၤ ဒီးပနီၢ်ခိန့ၣ် ဘၣ်တၢ်သ့စီအီၤလၢ ထံလၢအကဆှီအဃိလီၤ.+ ၂၃ မ်ပဆဲးတဲဖျါထီၣ် ပတၢ်မုၢ်လၢ်လၢ ပှၤဂၤအမဲာ်ညါ ဒီးမ်ပသး သုတဒံဝ့ၤဒံဝီၤတဂ့ၤ,+ မ့ၢ်လၢကစၢ်ယွၤလၢ အအၢၣ်လီၤတၢ်တဂၤန့ၣ် မ့ၢ်ပှၤလၢအတီအဃိလီၤ. ၂၄ မ်ပဆိကမိၣ်န့ၢ်တၢ်လၢ တဂၤဒီးတဂၤအဂီၢ် ဒ်သိးကထိၣ်ဟူးထိၣ်ဂဲၤထီၣ်လိာ်သး လၢပကပာ်ဖျါထီၣ် တၢ်အဲၣ်တၢ်ကွံ ဒီးတၢ်မၤလၢအဂ့ၤတဖၣ်+ န့ၣ်တက့ၢ်. ၂၅ မ်ပသုတဟးဆှဲး ပတၢ်အိၣ်ဖှိၣ်+ ဒ်ပှၤတနီၤနီၤအလုၢ်အလၢ် အိၣ်ဝဲအသိးတဂ့ၤ. မ်ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ+ ဒီးဒ်သုထံၣ်မုၢ်နံၤ ဟဲဘူးထီၣ်ဝဲအသိး+ မ်သုမၤအါထီၣ် တၢ်သ့ၣ်တဖၣ်န့ၣ်တက့ၢ်.
၂၆ ဖဲပဒိးန့ၢ်ဘၣ် တၢ်သ့ၣ်ညါ တၢ်မ့ၢ်တၢ်တီလီၤတံၢ်လီၤဆဲး+ ဝံၤအလီၢ်ခံ ပမ့ၢ်ဆဲးမၤ တၢ်ဒဲးဘးလၢ တၢ်သူၣ်အိၣ်သးအိၣ်အပူၤန့ၣ် တၢ်လုၢ်တၢ်ပာ်လၢ ပတၢ်ဒဲးဘးအဂီၢ် တအိၣ်လၢၤဘၣ်.+ ၂၇ အိၣ်ဒၣ်ပခိးကွၢ်လၢ် တၢ်စံၣ်ညီၣ်လၢ တၢ်သူၣ်ပျံၤသးဖုးအပူၤ ဒီးကစၢ်ယွၤအတၢ်သးဒိၣ်ထီၣ် လၢအလီၤဂာ်ဒီးမ့ၣ်အူန့ၣ် ကအီၣ်ကွံာ် ပှၤလၢ အထီဒါတၢ်တဖၣ်လီၤ.+ ၂၈ ပှၤတဂၤဂၤ မ့ၢ်တမၤထွဲ စီၤမိၤၡ့ အတၢ်သိၣ်တၢ်သီဘၣ်ဒီး ပှၤအုၣ်အသးမ့ၢ်အိၣ်ဝဲ ခံဂၤသၢဂၤန့ၣ်+ အကဘၣ်တၢ်စံၣ်ညီၣ်သံအီၤ ဒီးတၢ်တသးကညီၤအီၤဘၣ်. ၂၉ မ့မ့ၢ် ပှၤတဂၤလၢအပာ်ဝဲ တၢ်အၢၣ်လီၤအီလီၤ အသွံၣ်လၢအပာ်စီဆှံထီၣ်အီၤန့ၣ် ဒ်တၢ်ယိယိဖိတခါအသိး+ ဒီးယီၢ်တံၢ်ဝဲ ကစၢ်ယွၤအဖိခွါ ဒီးလၢတၢ်တပာ်ကဲဘၣ်အပူၤ မၤအၢမၤသီ ကစၢ်ယွၤအသးစီဆှံလၢ အဘၣ်ထွဲဒီး တၢ်သးကညီၤ ဒိၣ်ဒိၣ်မုၢ်မုၢ်န့ၣ် ဆိကမိၣ်ကွၢ်လၢ အကြၢးဘၣ် တၢ်စံၣ်ညီၣ်အီၤ နးန့ၢ်အန့ၣ်ထဲလဲၣ်.+ ၃၀ ပသ့ၣ်ညါလၢ ကစၢ်ယွၤတဲဝဲလၢ “တၢ်ဟ့ၣ်ကၣ်န့ၣ် မ့ၢ်ယတၢ်လီၤ, ယကဟ့ၣ်ကၣ်တၢ်လီၤ.” ဒီးတၢ်ကွဲးအသး အိၣ်ဝဲလၢ “ယဟိဝၤယွၤ ကစံၣ်ညီၣ် အပှၤဂီၢ်မုၢ်လီၤ.”+ ၃၁ ကစၢ်ယွၤလၢ အမူဝဲတဂၤ မ့ၢ်စံၣ်ညီၣ်ပှၤန့ၣ် မ့ၢ်တၢ်လၢ အလီၤပျံၤလီၤဖုးလီၤ.
၃၂ ဘၣ်ဆၣ် ဆဲးသ့ၣ်နီၣ်ထီၣ် မုၢ်နံၤလၢအပူၤကွံာ်တဖၣ် ဖဲသုဒိးန့ၢ်ဘၣ် တၢ်ကပီၤ+ ဝံၤအလီၢ်ခံန့ၣ်တက့ၢ်. ဖဲန့ၣ်အဆၢကတီၢ် သုဘၣ်လဲၤခီဖျိ တၢ်အါမံၤ ကီကီခဲခဲ ဃုာ်ဒီးတၢ်နးတၢ်ဖှီၣ်တဖၣ်လီၤ. ၃၃ တဘျီတခီၣ် သုဘၣ်တၢ်ဒုၣ်ဒွဲၣ် ဒီးပှၤမၤအၢမၤနးသုလၢ ပှၤအါဂၤအမဲာ်ညါ ဒီးတဘျီတခီၣ် သုဆီၣ်ထွဲမၤစၢၤ ပှၤလၢအလဲၤခီဖျိဘၣ်တၢ် ဒ်န့ၣ်တဖၣ်လီၤ. ၃၄ သုပာ်ဖျါထီၣ် တၢ်သးကညီၤလၢ ပှၤလၢအအိၣ်လၢ ဃိာ်ပူၤတဖၣ်အဖီခိၣ် ဒီးဖဲပှၤဂုာ်န့ၢ် သုတၢ်ဖိတၢ်လံၤတဖၣ်အခါ+ သုတူၢ်အီၤလၢ တၢ်သးခုအပူၤ မ့ၢ်လၢ သုသ့ၣ်ညါလၢ သုတၢ်လၢအဂ့ၤန့ၢ်အန့ၣ် အိၣ်ဝဲတခါ လၢအကအိၣ်ဂၢၢ်ဆိးကျၢၤဝဲ ထီဘိအဃိလီၤ.+
၃၅ အဃိ ဆဲးတဲတၢ်လၢ တၢ်သးဒူအပူၤတက့ၢ်. လၢသုတၢ်သးဒူအဃိ သုကဒိးန့ၢ်ဘၣ်ခိၣ်ဖး ထူးထူးတီၤတီၤလီၤ.+ ၃၆ ဖဲသုမၤ ကစၢ်ယွၤအတၢ်ဘၣ်သး ဝံၤအလီၢ်ခံ ဒ်သိးသုကဒိးန့ၢ်ဘၣ် ကစၢ်ယွၤအတၢ်စံးပာ်အဂီၢ် သုလိၣ်ဘၣ် တၢ်တူၢ်န့ၢ်ခီၣ်ကဲလီၤ.+ ၃၇ “အိၣ်ဒံးတစိၢ်ဖိ”+ ဒီး “ပှၤလၢအဟဲတဂၤန့ၣ် ကဟဲတုၤဝဲ ဒီးအတမၤယံာ်မၤနီၢ်အသးဘၣ်.”+ ၃၈ “ဘၣ်ဆၣ် ယခ့ယပှၤလၢ အတီအလိၤန့ၣ် ကမူဝဲလၢအတၢ်နာ်အဃိလီၤ.”+ ဒီး “အဝဲမ့ၢ်ဂုၤက့ၤလၢအလီၢ်ခံန့ၣ် ယတဘၣ်သူၣ်ဘၣ်သးအီၤဘၣ်.”+ ၃၉ မ့မ့ၢ်ပဝဲဒၣ်အံၤ ပတမ့ၢ်ပှၤလၢ အဂုၤက့ၤလၢအလီၢ်ခံ ဆူတၢ်ဟးဂီၤဘၣ်.+ လၢတၢ်န့ၣ်အလီၢ် ပမ့ၢ်ပှၤလၢ အိၣ်ဒီးတၢ်နာ် ဒီးပသးသမူတလီၤမၢ်ဘၣ်.