သးသယုၢ်တၢ်
א *
၁ လၢညါန့ၣ် ပှၤအိၣ်ပှဲၤဝဲလၢ ဝ့ၢ်ယရူၤၡလ့ၣ်အပူၤ, ခဲအံၤ ဝ့ၢ်အံၤ လီၤဂာ်ဒီး ပှၤပိာ်မုၣ်လၢ ဘၣ်ဆ့ၣ်နီၤအိၣ်က့ၤ ထဲတဂၤလီၤမၢၤ.+
လၢပှၤကလုာ်တဖၣ် အကျါန့ၣ် အကဲဝ့ၢ်တဖျၢၣ်လၢ အပှၤနီၣ်ဂံၢ်အါ ဘၣ်ဆၣ် ခဲအံၤ အကဲထီၣ် ပှၤမုၣ်ကမဲလံ.+
လၢညါ အကဲနီၢ်ပၤမုၣ်လၢ ကီၢ်ရ့ၣ်တဖၣ်အပူၤ ဘၣ်ဆၣ် အကဲထီၣ်က့ၤ ကုၢ်လံ.+
ב
၂ ဖဲမုၢ်နၤခါ အဝဲဟီၣ်နးမး+ ဒီးမဲာ်ထံတဖၣ် အိၣ်ပှဲၤလၢ အဘိးပၤလိၤလီၤ.
အတၢ်အဲၣ်တီတဖၣ် တအိၣ်လၢ အကပၤ ဒ်သိးကမၤမုာ်ထီၣ်အီၤအဂီၢ် နီတဂၤဘၣ်.+
ဒီးအသကိးတဖၣ် တတီဒီးအီၤ နီတဂၤဘၣ်+ ဒီးအဝဲသ့ၣ်ကဲထီၣ် အဒုၣ်အဒါလီၤ.
ג
၃ ယူဒၤ ဘၣ်တၢ်က့ၤဖီၣ်အီၤ+ ဒီးတူၢ်ဘၣ်တၢ်နးတၢ်ဖှီၣ် ဒီးဘၣ် ကဲကုၢ်လီၤ.+
အဝဲဘၣ်အိၣ်လၢ ပှၤကလုာ်တဖၣ် အကျါ+ ဒီးတထံၣ်န့ၢ် တၢ်အိၣ်ဘှံးအလီၢ်ဘၣ်.
ဖဲအဘၣ်ကိၢ်ဘၣ်ဂီၤ အဆၢကတီၢ် ပှၤလၢအမၤနးမၤဖှီၣ်အီၤန့ၣ် ဖီၣ်န့ၢ်အီၤလီၤ.
ד
၄ မ့ၢ်လၢ ဖဲဘူၣ်ဘၣ် အဆၢကတီၢ်န့ၣ် ပှၤတဟဲနီတဂၤဘၣ် အဃိ စံယိၣ်အကျဲတဖၣ်န့ၣ် သးအုးဝဲလီၤ.+
အတြဲၤခဲလၢာ်န့ၣ် ဟးဂီၤဝဲ+ ဒီးအပှၤလုၢ်တၢ်ဒိၣ်တဖၣ် သါသဖှိလီၤဝဲလီၤ.
အပှၤမုၣ်ကနီၤတဖၣ် သးအုးဝဲ ဒီးစံယိၣ်န့ၣ် သူၣ်ကိၢ်သးဂီၤတၢ် ဖးဒိၣ်လီၤ.
ה
၅ အဒုၣ်အဒါတဖၣ်န့ၣ် ကဲထီၣ် အကစၢ်လံ ဒီးအဒုၣ်အဒါတဖၣ်န့ၣ် တလိၣ်ဘၣ်ယိၣ်တၢ် နီတမံၤဘၣ်.+
မ့ၢ်လၢ အတၢ်ကမၣ် အိၣ်ဝဲအါမးအဃိ ယဟိဝၤယွၤ ဒုးလီၤဘၣ် တၢ်သူၣ်အုးသးအုး လၢအလိၤလီၤ.+
ဒီးဒုၣ်ဒါတဖၣ် က့ၤဖီၣ် အဖိတဖၣ်လီၤ.+
ו
၆ စံယိၣ်အဖိမုၣ် အတၢ်ဃံတၢ်လၤ လီၤမၢ်လၢာ်လံ.+
အပဒိၣ်ဖးဒိၣ်တဖၣ် လီၤဂာ်ဒ်သိးဒီး တၤဟိဖါတဖၣ်လၢ အတထံၣ်န့ၢ် တၢ်အီၣ်ဆၣ်လီၢ် နီတပူၤဘၣ်.
ဒီးဖဲအဝဲသ့ၣ် ဘၣ်ဃ့ၢ်လၢ ပှၤလၢ အလူၤအီၤတဖၣ် အမဲာ်ညါအခါ အဝဲသ့ၣ် လီၤဘှံးလီၤတီၤညါ.
ז
၇ ဖဲဝ့ၢ်ယရူၤၡလ့ၣ် တူၢ်ဘၣ်တၢ်နးတၢ်ဖှီၣ် ဒီးအဟံၣ် တအိၣ်လၢၤဘၣ်အခါ အသ့ၣ်နီၣ်ထီၣ်
တၢ်လုၢ်ဒိၣ်ပှ့ၤဒိၣ်လၢ အအိၣ်ဒီးအီၤ လၢအပူၤကွံာ်ဖးယံာ်တဖၣ်လီၤ.+
ဖဲဒုၣ်ဒါတဖၣ် က့ၤဖီၣ် အပှၤတဖၣ်အခါ ပှၤမၤစၢၤအီၤ တအိၣ် နီတဂၤဘၣ်.+
ဒီးဖဲဒုၣ်ဒါတဖၣ် ထံၣ်ဘၣ်လၢ တၢ်မၤအသးဒီးအီၤ ဒ်န့ၣ်အခါ အဝဲသ့ၣ် နံၤဘၣ်အီၤ ခီဖျိလၢ အလီၤပှီၢ်ကွံာ် အဃိလီၤ.+
ח
၈ ဝ့ၢ်ယရူၤၡလ့ၣ် မၤတၢ်ကမၣ် ဖးဒိၣ်လံ.+
အဃိ အကဲထီၣ်တၢ်လၢ အလီၤသးဟ့လီၤ.
ကယဲၢ်ပှၤလၢ အယူးယီၣ်ပာ်ကဲအီၤလၢ အပူၤကွံာ်တဖၣ်န့ၣ် ခဲအံၤ ထံၣ်အီၤ ဒ်သိးဒီး တၢ်လီၤသးဘၣ်အၢ မ့ၢ်လၢ အဝဲသ့ၣ် ထံၣ်ဘၣ် အတၢ်အိၣ်ဘ့ၣ်ဆ့ အဃိလီၤ.+
အနီၢ်ကစၢ် ကအုကစွါဝဲ+ ဒီးဃၣ်ကွံာ်အသးလၢ တၢ်မဲာ်ဆှး အပူၤလီၤ.
ט
၉ အစကၢးန့ၣ် ဘၣ်အၢဘၣ်သီ
ဒီးအဝဲ တဆိကမိၣ်ဝဲလၢ ခါဆူညါန့ၣ် တၢ်ကမၤအသးဒီးအီၤဒ်လဲၣ် နီတစဲးဘၣ်.+
ဒီးအဝဲ လီၤပှီၢ်ကွံာ်ဝဲ လီၤပျံၤလီၤဖုး ဒီးပှၤမၤမုာ်ထီၣ်အီၤ တအိၣ် နီတဂၤဘၣ်.
အိ ယဟိဝၤယွၤဧၢ, မ့ၢ်လၢ ဒုၣ်ဒါတဖၣ်န့ၣ် ပာ်ထီၣ်ထီအသးအဃိ ကွၢ်လီၤ ယတၢ်နးတၢ်ဖှီၣ်တက့ၢ်.+
י
၁၀ ဒုၣ်ဒါတဖၣ် ဂုာ်န့ၢ်ဆူၣ် အတၢ်လုၢ်ဒိၣ်ပှ့ၤဒိၣ် ခဲလၢာ်လံ.+
နဟ့ၣ်လီၤတၢ်ကလုၢ်လၢ ပှၤကလုာ်တဖၣ် တဘၣ်အိၣ်လၢ နပှၤဂီၢ်မုၢ် အကျါဘၣ် ဘၣ်ဆၣ်
ဝ့ၢ်ယရူၤၡလ့ၣ် ထံၣ်ဘၣ်ဝဲလၢ ပှၤကလုာ်တဖၣ် ဟဲနုာ်လီၤလၢ တၢ်လုၢ်ဟံၣ်အပူၤလံ.+
כ
၁၁ အပှၤဂီၢ်မုၢ်ခဲလၢာ်န့ၣ် ကသါသဖှိလီၤ ဒီးဟးဃုအီၣ်ကိၣ်လီၤ.+
အဝဲသ့ၣ် ဘၣ်ဟ့ၣ်လီၤ အတၢ်လုၢ်ဒိၣ်ပှ့ၤဒိၣ်တဖၣ် ဒ်သိး ကန့ၢ်ဘၣ် တၢ်အီၣ်တမံၤမံၤ အဂီၢ်လီၤ. အဝဲသ့ၣ် ဘၣ်မၤဝဲဒ်န့ၣ် လၢကဆဲးအိၣ်မူဘၣ် အဂီၢ်လီၤ.
အိ ယဟိဝၤယွၤဧၢ, ယကဲထီၣ် ဒ်သိးဒီးပိာ်မုၣ် လၢအလုၢ်အပှ့ၤတအိၣ်ဘၣ်* အဃိ ကွၢ်လီၤယၤမီၤ.
ל
၁၂ ဖဲယဟိဝၤယွၤ သးထီၣ်တၢ် အမုၢ်နံၤန့ၣ် အဝဲဒုးတူၢ်ယၤ တၢ်သူၣ်အုး သးအုးလီၤ.
မ့ၢ်ပှၤတူၢ်ဘၣ်တၢ် နးထဲသိးဒီးယၤ အိၣ်တဂၤဂၤဧါ.
ပှၤလၢအလဲၤဘၣ်ကျဲ ခဲလၢာ်ဧၢ, ကွၢ်မီၤ
မ့ၢ်သုဆိကမိၣ်လၢ အမ့ၢ်တၢ်ဂ့ၢ် ဆံးဆံးဖိလီၤဧါ.+
מ
၁၃ ကစၢ်ယွၤဆှၢလီၤ မ့ၣ်အူလၢမူခိၣ် ဒ်သိး ကဟဲလီၤအီၣ် ယဃံကိးဘိဒဲး အဂီၢ်လီၤ.+
အဝဲဒိးလီၤ ပျံၤသကွီၤလၢ ယခီၣ်အဂီၢ် လၢယကဃၣ်ကဒါက့ၤ လၢယလီၢ်ခံအဂီၢ်လီၤ.
အဝဲဒုးကဲထီၣ်ယၤလၢ ပိာ်မုၣ်လၢ အအိၣ်သယုၢ်
ဒီးယအိၣ်တဆူၣ်ဘၣ် ဒီတနံၤလီၤ.
נ
၁၄ ယတၢ်ဒဲးဘးတဖၣ်န့ၣ် တၢ်စၢဃာ်အီၤလၢ ယကိာ်ဘိအလိၤ ဒ်သိးဒီး နီၣ်ယိးဘိ လၢကစၢ်ယွၤ စၢဃာ်ဝဲလၢ အနီၢ်ကစၢ် အစုလီၤ.
နီၣ်ယိးဘိအံၤ ဘၣ်တၢ်ပာ်ထီၣ်အီၤလၢ ယကိာ်ဘိအလိၤ ဒီးယဂံၢ် ယဘါ လၢာ်ဝဲလံ.
ဒီးယဟိဝၤယွၤ ဟ့ၣ်လီၤယၤလၢ ပှၤလၢ ယတြီဆၢအီၤ တန့ၢ်ဘၣ်တဖၣ် အစုပူၤလီၤ.+
ס
၁၅ ပှၤပိာ်ခွါလၢ အဂံၢ်ဆူၣ်ဘါဆူၣ် လၢအအိၣ်လၢ ယပူၤန့ၣ် ယဟိဝၤယွၤ ထုးထီၣ်ကွံာ် အဝဲသ့ၣ်လံ.+
အဝဲကိးဖှိၣ်ထီၣ် ပှၤဂီၢ်မုၢ်တဒူၣ် ဒ်သိး ကမၤသဘှံး ယပှၤပိာ်ခွါသးစၢ်တဖၣ်လီၤ.+
ယဟိဝၤယွၤ ယီၢ်တံၢ် ယူဒၤ အဖိမုၣ် မုၣ်ကနီၤစီဆှံ လၢပှၤယီၢ်စပံးထံကျိး အပူၤလံ.+
ע
၁၆ မ့ၢ်လၢ တၢ်ဂ့ၢ်တဖၣ်န့ၣ်အဃိ ယဟီၣ်+ ဒီးယမဲာ်ထံလီၤဝဲလီၤ.
ပှၤလၢအမၤမုာ်ထီၣ် ယသး ဒီးအမၤဖှံထီၣ်ယသးသ့န့ၣ် အိၣ်ယံၤဒီးယၤ ကိးဂၤဒဲးလီၤ.
မ့ၢ်လၢ ဒုၣ်ဒါတဖၣ် မၤနၢၤပှၤအဃိ ယဖိခွါတဖၣ် အတၢ်မုၢ်လၢ် တအိၣ်လၢၤဘၣ်.
פ
၁၇ စံယိၣ် ယူာ်ထီၣ်အစု+ ဒီးဃ့တၢ်မၤစၢၤ ဘၣ်ဆၣ် ပှၤလၢ အကမၤမုာ်ထီၣ်အသးန့ၣ် တအိၣ်နီတဂၤဘၣ်.
ယၤကိာ်အဒုၣ်အဒါလၢ အအိၣ်ဝးတရံးအီၤ ခဲလၢာ်န့ၣ် ယဟိဝၤယွၤ ဟ့ၣ်လီၤအဝဲသ့ၣ် တၢ်ကလုၢ် ဒ်သိး ကထီဒါ ယၤကိာ်အဂီၢ်လီၤ.+
ဝ့ၢ်ယရူၤၡလ့ၣ် ကဲထီၣ် တၢ်လီၤသးဘၣ်အၢလၢ အဝဲသ့ၣ် အဂီၢ်လီၤ.+
צ
၁၈ ယဟိဝၤယွၤန့ၣ် တီဝဲလိၤဝဲ,+ အဝဲစံၣ်ညီၣ်ယၤ မ့ၢ်လၢ ယထီဒါ အတၢ်မၤလိာ်တဖၣ် အဃိလီၤ.+
ပှၤဂီၢ်မုၢ်ခဲလၢာ်သ့ၣ်ဧၢ, ဒိကနၣ်လၢအံၤ ဒီးယတူၢ်ဘၣ်တၢ် နးထဲလဲၣ်န့ၣ် ကွၢ်သၢၤ.
ယပှၤမုၣ်ကနီၤဖိတဖၣ် ဒီးယပှၤ ဖိၣ်သၣ်ခွါတဖၣ်န့ၣ် ဘၣ်တၢ်က့ၤဖီၣ်အီၤလံ.+
ק
၁၉ ယကိးထီၣ် ယတၢ်အဲၣ်တီတဖၣ် ဘၣ်ဆၣ် အဝဲသ့ၣ် တတီဒီးယၤဘၣ်.+
ပှၤလုၢ်တၢ်ဒိၣ်တဖၣ် ဒီးပှၤသူၣ်က့သးပှၢ်တဖၣ်န့ၣ် သံဝဲလၢ ဝ့ၢ်ပူၤ
ဖဲအဝဲသ့ၣ် ဟးဃုအီၣ်တၢ်အီၣ် ဒ်သိးကဆဲးအိၣ်မူဘၣ်ဝဲ အခါလီၤ.+
ר
၂၀ အိ ယဟိဝၤယွၤဧၢ, ယတူၢ်ဘၣ် တၢ်သူၣ်ကိၢ်သးဂီၤ ဒိၣ်မးန့ၣ် ကွၢ်မီၤ.
ယဒွဲပူၤပြိးလံ.
ဒီးမ့ၢ်လၢ ယထီဒါတၢ် လၢာ်လၢာ်ဆ့ဆ့ အဃိ ယတူၢ်ဘၣ် တၢ်သူၣ်ကိၢ်သးဂီၤ ဒိၣ်မးလံ.+
လၢတၢ်ချၢန့ၣ် နးမၤသံ ယဖိတဖၣ်+ ဒီးလၢဟံၣ်ပူၤစ့ၢ်ကီး ပှၤသံဝဲလီၤ.
ש
၂၁ ပှၤဂီၢ်မုၢ်တဖၣ်နၢ်ဟူ ယသါသဖှိလီၤ ဒီးပှၤမၤမုာ်ထီၣ်ယၤ တအိၣ် နီတဂၤဘၣ်.
ယဒုၣ်ယဒါခဲလၢာ်န့ၣ် နၢ်ဟူဘၣ် ယတၢ်နးတၢ်ဖှီၣ်တဖၣ်လံ.
မ့ၢ်လၢ နဒုးထံၣ်ယၤ တၢ်သ့ၣ်တဖၣ်န့ၣ်အဃိ အဝဲသ့ၣ် သးခုဝဲလီၤ.+
မုၢ်နံၤလၢ နတဲတ့ၢ်ဝဲန့ၣ် နကဒုးဟဲအီၤဘူးထီၣ်လံ.+ ဖဲတၢ်တနံၤန့ၣ် အဝဲသ့ၣ် ကကဲထီၣ် ဒ်သိးဒီး ယၤလီၤ.+
ת
၂၂ မ်အဝဲသ့ၣ် အတၢ်အၢတၢ်သီ အိၣ်ဖျါထီၣ် လၢနမဲာ်ညါတက့ၢ်. မ်နမၤအဝဲသ့ၣ် နးနးကျံၤကျံၤ+
ဒ်နမၤယၤနးနးကျံၤကျံၤ လၢယတၢ်ဒဲးဘး ခဲလၢာ်အဃိတက့ၢ်.
ယကသါသဖှိလီၤ အဘျီအါမး ဒီးယသး အဂံၢ်ဘါစၢ်ဝဲလီၤ.
א
၂ လၢတၢ်သးဒိၣ်အပူၤ ယဟိဝၤယွၤ ကးဘၢ ဝ့ၢ်စံယိၣ်လၢ တၢ်အၢၣ်ခံးသူလီၤ.
အံၣ်စရ့လး အတၢ်ဃံတၢ်လၤ လၢအထီၣ်ဘး တုၤလၢမူခိၣ်န့ၣ် ကစၢ်ယွၤ ကွံာ်လီၤဝဲလၢ ဟီၣ်ခိၣ်လိၤလံ.+
ဖဲအတၢ်သးဒိၣ်အမုၢ်နံၤန့ၣ် အဝဲ တသ့ၣ်နီၣ်ထီၣ် အခီၣ်ယီၢ်လီၤ အလီၢ်လၢၤဘၣ်.+
ב
၂ ယဟိဝၤယွၤ မၤဟးဂီၤကွံာ် ယၤကိာ် အတၢ်အိၣ်တၢ်ဆိး အလီၢ်ခဲလၢာ် လၢတၢ်တသးကညီၤဘၣ် အပူၤလီၤ.
လၢတၢ်သးဒိၣ်အပူၤ အဝဲမၤလီၤပှီၢ်ကွံာ် ယူဒၤ အဖိမုၣ် အတၢ်အိၣ်သဒၢလီၢ်တဖၣ်လံ.+
ဒီးအဝဲပာ်လီၤကွံာ် ဘီမုၢ်+ ဒီးအပဒိၣ်တဖၣ်+ လၢဟီၣ်ခိၣ်လိၤ ဒီးမၤဟးဂီၤကွံာ် အလၤကပီၤလံ.
ג
၃ ဒီးလၢတၢ်သးထီၣ်အပူၤ အဝဲဒီၣ်တဲာ်ကွံာ် အံၣ်စရ့လး အတၢ်ဂံၢ်တၢ်ဘါ ခဲလၢာ်လီၤ.
ဖဲဒုၣ်ဒါတဖၣ် ဟဲဒုး အဝဲသ့ၣ်အခါ ကစၢ်ယွၤ တမၤစၢၤ အဝဲသ့ၣ် လၢၤဘၣ်.+
အဝဲသးဒိၣ်ထီၣ် စီၤယၤကိာ် အစၢၤအသွဲၣ်တဖၣ် ဒ်မ့ၣ်အူလၢအအီၣ်ကွံာ် ကယဲၢ်တၢ်အိၣ်လၢ အခိၣ်အဃၢၤ ဝးဝးအသိးလီၤ.+
ד
၄ အဝဲဖ့ၣ်ထီၣ်အချံၣ် ဒ်ဒုၣ်ဒါအသိး ဒီးယၤထီၣ်အစုထွဲ လၢကထီဒါတၢ် ဒ်ဒုၣ်ဒါအသိး အဂီၢ်လီၤ.+
အဝဲဆဲးမၤသံ ပှၤလၢ ပပာ်လုၢ်ပာ်ပှ့ၤအီၤတဖၣ်လီၤ.+
ဒီးအဝဲလူလီၤ အတၢ်သးထီၣ်လၢ စံယိၣ်အဖိမုၣ်+ အဒဲလိၤ ဒ်မ့ၣ်အူအသိးလီၤ.+
ה
၅ ယဟိဝၤယွၤ ကဲထီၣ်ဒ်သိးဒီး ဒုၣ်ဒါတဂၤ လၢပဂီၢ်လံ.+
အဝဲမၤဟးဂီၤကွံာ် အံၣ်စရ့လး
ဒီးမၤဟးဂီၤကွံာ် ဝ့ၢ်အတၢးထီ တဖၣ်လံ.
ဒီးအဝဲမၤဟးဂီၤကွံာ် ဝ့ၢ်အတၢ်အိၣ်သဒၢအလီၢ်ခဲလၢာ်လံ.
ဒီးအဝဲ မၤဟီၣ် ဒီးမၤသးအုး ယူဒၤ အဖိမုၣ် ဒိၣ်မးလီၤ.
ו
၆ ယဟိဝၤယွၤ မၤလီၤပှီၢ်ကွံာ်အဒဲ+ ဒ်ဒဲဖိလၢ တၤသၣ်အလီၢ်ပူၤအသိး,
အဝဲ မၤကတၢၢ်ကွံာ် အဘူၣ်ဧိၤပွဲဧိၤ+
ဒီးအဝဲမၤဝဲဒ်သိး ပှၤကသးပ့ၤနီၣ် ဘူၣ်ဧိၤပွဲဧိၤ ဒီးမုၢ်အိၣ်ဘှံးနံၤလၢ ဝ့ၢ်စံယိၣ်အပူၤလီၤ.
ဒီးအဝဲသးဒိၣ်ထီၣ်တၢ် ဒိၣ်မးအဃိ စီၤပၤမ့ၢ်ဂ့ၤ ပှၤလုၢ်တၢ်ဒိၣ်မ့ၢ်ဂ့ၤ အတပာ်ဝဲလၢ တၢ်နီတမံၤဘၣ်.+
ז
၇ ယဟိဝၤယွၤ ပာ်တ့ၢ်ကွံာ် အတၢ်လုၢ်လီၢ်
ဒီးအဝဲ လဲၤသဒၣ်ကွံာ် အတၢ်စီဆှံအလီၢ်လံ.+
ဒီးအဝဲဟ့ၣ်လီၤကွံာ် ဝ့ၢ်အတၢးလၢအကျၢၤတဖၣ် လၢအဒုၣ်အဒါ စုပူၤလံ.+
ဒုၣ်ဒါတဖၣ် ကိးပသူထီၣ်လၢ အကလုၢ်ဖးဒိၣ် လၢယဟိဝၤယွၤ အဟံၣ်ပူၤ+ ဒ်ပှၤမၤဘူၣ် အဆၢကတီၢ် အသိးလီၤ.
ח
၈ ယဟိဝၤယွၤ ဆၢတဲာ်လီၤအသးလၢ အကမၤဟးဂီၤကွံာ် စံယိၣ်အဖိမုၣ် အတၢ်ဒူၣ်လီၤ.+
ဒီးအဝဲထိၣ်ဝ့ၢ်ဒူၣ်လၢ တၢ်ထိၣ်ပျံၤလံ.+
အတထုးကွံာ် အစုလၢ ကမၤဟးဂီၤတၢ်ဘၣ်.
အမၤဟီၣ် တၢ်သူၣ်ထီၣ်လၢအကျၢၤ ဒီးတၢ်ဒူၣ်လံ.
တၢ်သ့ၣ်တဖၣ်န့ၣ် လီၤပှီၢ်ဝဲ တပူၤဃီလီၤ.
ט
၉ ဝ့ၢ်အတြဲၤတဖၣ် လီၤဘျၢလၢ ဟီၣ်ခိၣ်လာ်လီၤ.+
အဝဲမၤဟးဂီၤကွံာ် ဒီးမၤကၢ်ကွံာ် ဝ့ၢ်အနီၣ်ဘိတဖၣ်လီၤ.
အစီၤပၤ ဒီးအပဒိၣ်တဖၣ်န့ၣ် ဘၣ်အိၣ်လၢ ပှၤကလုာ်တဖၣ် အကျါလံ.+
ပှၤတမၤထွဲ တၢ်သိၣ်တၢ်သီ* နီတဂၤဘၣ်. ဒီးအဝံတဖၣ်န့ၣ် တထံၣ်ဘၣ် တၢ်ထံၣ်လၢညါခီလၢ အဟဲလၢ ယဟိဝၤယွၤ အအိၣ်ဘၣ်.+
י
၁၀ စံယိၣ်အဖိမုၣ် အပှၤသူၣ်က့သးပှၢ်တဖၣ် ဆ့ၣ်နီၤလၢ ဟီၣ်ခိၣ်လိၤ ဘှ့ၣ်ဘှ့ၣ်ဘှီၣ်ဘှီၣ်လီၤ.+
အဝဲသ့ၣ် ဖှံလီၤဝဲ ဟီၣ်ခိၣ်ကမူၣ်လၢ အခိၣ်လိၤ ဒီးကူသိးဝဲ ထၢၣ်တၢ်ကံးညာ်လီၤ.+
ဝ့ၢ်ယရူၤၡလ့ၣ် အပှၤမုၣ်ကနီၤတဖၣ် ဆုးလီၤအခိၣ်တုၤလၢ ဟီၣ်ခိၣ်လိၤလီၤ.
כ
၁၁ ယဟီၣ်အါတလၢ တုၤလၢ ယမဲာ်ချံဘှံး+
ဒီးယဒွဲပူၤပြိးလံ.
ယသးဘၣ်ဒိဒိၣ်မး* မ့ၢ်လၢ ယပှၤကလုာ် ဘၣ်တၢ်မၤဟးဂီၤအီၤအဃိ+
ဒီးမ့ၢ်လၢဖိသၣ် ဒီးဖိသၣ်အီနုၢ်တဖၣ်န့ၣ် လီၤဒိဝဲလၢ ဝ့ၢ်အတၢ်ဆါတၢ်ပှ့ၤအလီၢ်တဖၣ် အဃိလီၤ.+
ל
၁၂ အဝဲသ့ၣ် သံကွၢ်ဝံၤသံကွၢ်က့ၤ အမိၢ်တဖၣ်လၢ “တၢ်အီၣ်တၢ်အီ အိၣ်ဖဲလဲၣ်.”*+
ဒီးအဝဲသ့ၣ် အဂံၢ်လီၤစၢ် တုၤလၢ အသးပ့ၤနီၣ်ဘၣ်အသးလၢ ဝ့ၢ်အတၢ်ဆါတၢ်ပှ့ၤအလီၢ်တဖၣ် ဒ်ပှၤလၢ အဘၣ်ဒိဘၣ်ထံးအသိး
ဒီးအဝဲသ့ၣ် အဂံၢ်အဘါ လီၤစၢ်ဝဲလၢအမိၢ်အစုလိၤ ကယီကယီ တုၤလၢအသံလီၤ.
מ
၁၃ အိ ယရူၤၡလ့ၣ် အဖိမုၣ်ဧၢ, ယကဘၣ် ဟ့ၣ်နၤ တၢ်အဒိမနုၤလဲၣ်.
ယဘၣ်ဒိလီၤနၤဒီး တၢ်မနုၤလဲၣ်.
အိ စံယိၣ်အဖိမုၣ် မုၣ်ကနီၤစီဆှံဧၢ, ယကဘၣ်ထိၣ်သတြီၤနၤဒီး တၢ်မနုၤလဲၣ်.
နတၢ်လီၤပှီၢ်န့ၣ် ဒိၣ်ထဲသိးဒီး ပီၣ်လဲၣ်အဃိ+ မတဂၤ မၤဘျါနၤ ကန့ၢ်လဲၣ်.+
נ
၁၄ နဝံတဖၣ် ထံၣ်တၢ်ထံၣ်လၢညါခီ လၢအတတီတလိၤဘၣ် ဒီးအခီပညီ တအိၣ်ဘၣ်လီၤ.+
ခီဖျိအဝဲသ့ၣ် တပာ်ဖျါထီၣ်န့ၢ် နတၢ်ကမၣ်ဘၣ်အဃိ အဝဲသ့ၣ်တမၤပူၤဖျဲးနၤ ဒ်သိး ပှၤသုတက့ၤဖီၣ်နၤတဂ့ၤ အဂီၢ်ဘၣ်.+
အဝဲသ့ၣ် ဆဲးတဲဘၣ်နၤ တၢ်ထံၣ်လၢညါခီလၢ အတတီတလိၤ လၢအဆှၢကမၣ်တၢ်တဖၣ်လီၤ.+
ס
၁၅ ပှၤလၢ အလဲၤဘၣ်ကျဲတဖၣ်န့ၣ် ဒဲဆဲးအဲးအစု လၢနဃိလီၤ.+
ဒီးအဝဲသ့ၣ် ကွ့ကလံၤလၢ တၢ်ကမၢကမၣ်အပူၤ+ ဒီးဂံၤဂုၤအခိၣ်လၢ ယရူၤၡလ့ၣ်အဖိမုၣ်အဃိ ဒီးတဲဝဲလၢ
“အဝဲအံၤ မ့ၢ်ဝ့ၢ်လၢ ပှၤတဲဝဲလၢ ‘အပှဲၤဒီး တၢ်ဃံတၢ်လၤ ဒီးအမၤသးခု ပှၤဟီၣ်ခိၣ်ဖိခဲလၢာ်အသး’ တမ့ၢ်ဧီၤ.”+
פ
၁၆ နဒုၣ်ဒါခဲလၢာ် တဲဆဲးအဲးနၤ
ဒီးအဝဲသ့ၣ် ကွ့ကလံၤ ဒီးအ့ၣ်တဃံးအမဲ ဒီးတဲဝဲလၢ “ပယူၢ်လီၤကွံာ် အီၤလံ.+
ပအိၣ်ခိး မုၢ်နံၤအဝဲအံၤ+ ဒီးမုၢ်နံၤအံၤ ဟဲတုၤလံ ဒီးပထံၣ်ဘၣ်အီၤလံ.”+
ע
၁၇ ယဟိဝၤယွၤ မၤဝဲဒ် အဆၢတဲာ်ဝဲအသိး+
ဒီးတၢ်လၢအတဲတ့ၢ်+ ဒီးမၤလိာ်ဝဲလၢ အပူၤကွံာ် ဖးယံာ်န့ၣ် အဝဲမၤလၢပှဲၤဝဲလီၤ.+
အဝဲမၤလီၤပှီၢ်တၢ် လၢတၢ်တသးကညီၤဘၣ် အပူၤလီၤ.+
ဒီးအဝဲပျဲဝဲလၢ ဒုၣ်ဒါ ကသးခု လၢနဃိ ဒီးအမၤဆူၣ်ထီၣ် နဒုၣ်ဒါတဖၣ် အဂံၢ်ဘါလီၤ.
צ
၁၈ စံယိၣ် အဝ့ၢ်ဒူၣ်ဧၢ, ပှၤဂီၢ်မုၢ်တဖၣ် ကိးပသူထီၣ်လၢ ယဟိဝၤယွၤ အအိၣ် လၢာ်သူၣ်လၢာ်သးလီၤ.
မ်မဲာ်ထံတဖၣ် ယွၤလီၤဝဲ ဒ်ထံကျိအသိး လၢမုၢ်ဆါ ဒီးလၢမုၢ်နၤတက့ၢ်.
တဘၣ်ပတုာ်တဂ့ၤ. ဒီးတဘၣ် ဟ့ၣ်ဒုးအိၣ်ဘှံး နမဲာ်ချံတဂ့ၤ.
ק
၁၉ ဂဲၤဆၢထၢၣ် ဟီၣ်ကိးပသူ ဒီတနၤသၢၤ.
လၢတၢ်မဲာ်ထံမဲာ်နိအပူၤ တဲဘၣ် ယဟိဝၤယွၤ တၢ်အိၣ်လၢ နသးပူၤခဲလၢာ်တက့ၢ်.
ခီဖျိလၢ တၢ်သၣ်ဝံၤလီၤဒိ အိၣ်အဃိ နဖိတဖၣ် အိၣ်လၢကျဲအနၢၣ် ကိးသနၢၣ်ဒဲး ဒီးလီၤဒိဝဲလီၤ.
ယူာ်ထီၣ်နစု ဒီးဃ့ထုကဖၣ်န့ၢ်တၢ်လၢ အဝဲသ့ၣ် အသးသမူ ကပူၤဖျဲးအဂီၢ်တက့ၢ်.+
ר
၂၀ အိ ယဟိဝၤယွၤဧၢ, ကွၢ်လီၤ ပှၤလၢ နမၤအီၤ နးနးကျံၤကျံၤတဂၤမီၤ.
မ့ၢ်ပှၤပိာ်မုၣ်တဖၣ်န့ၣ် ကြၢးအီၣ်က့ၤ အချံအသၣ် လၢအမ့ၢ် အဖိလၢ အအိၣ်ဖျဲၣ်ထီၣ်ဝဲတဖၣ် ဒ်အံၤလီၤဧါ.+
ဒီးပှၤလုၢ်တၢ်ဒိၣ်တဖၣ် ဒီးဝံတဖၣ်န့ၣ် မ့ၢ်ပှၤကြၢး မၤသံအဝဲသ့ၣ်လၢ ယဟိဝၤယွၤ အတၢ်လုၢ်ဟံၣ်ပူၤဧါ.+
ש
၂၁ ပှၤပိာ်ခွါသးပှၢ်သးစၢ်တဖၣ်န့ၣ် သံလၢကျဲပူၤ လၢဟီၣ်ခိၣ်လိၤလံ.+
ယပှၤမုၣ်ကနီၤဖိၣ်သၣ်ခွါတဖၣ်န့ၣ် လီၤဃံၢ်သံလၢ နးအဃိလံ.+
နမၤသံ အဝဲသ့ၣ် ဖဲနသးထီၣ်တၢ်အနံၤ ဒီးနမၤသံ အဝဲသ့ၣ် လၢတၢ်တသးကညီၤဘၣ်အပူၤလီၤ.+
ת
၂၂ နကိးဖှိၣ်ထီၣ် တၢ်လီၤပျံၤလီၤဖုး လၢတၢ်လီၢ် ကိးကပၤဒဲး ဒ်နကိးဖှိၣ်ထီၣ်ပှၤလၢ ဘူၣ်ဘၣ်အခါ အသိးလီၤ.+
ဖဲယဟိဝၤယွၤ သးထီၣ်တၢ် အမုၢ်နံၤန့ၣ် ပှၤသးသမူ တပူၤဖျဲး နီတဂၤဘၣ်.+
ပှၤလၢ ယအိၣ်ဖျဲၣ်ထီၣ်အီၤတဖၣ် ဒီးလုၢ်ဒိၣ်ထီၣ်အီၤတဖၣ်န့ၣ် ယဒုၣ်ယဒါတဖၣ် မၤသံကွံာ်အီၤလံ.+
א
၃ ယမ့ၢ်ပှၤတဂၤလၢ အထံၣ်ဘၣ် တၢ်နးတၢ်ဖှီၣ် မ့ၢ်လၢ ကစၢ်ယွၤ စံၣ်ညီၣ်ပှၤလၢ အတၢ်သးဒိၣ်အပူၤအဃိလီၤ.
၂ အဝဲ နီဟးထီၣ်ကွံာ်ယၤ ဒီးဒုးဟးယၤလၢ တၢ်ခံးကျါ ဒီးတဒုးဟးယၤလၢ တၢ်ကပီၤကျါဘၣ်.+
၃ တကးဒံးဘၣ် အစုထီဒါယၤ ဒီတနံၤလီၤ.+
ב
၄ အဝဲ မၤဟးဂီၤကွံာ် ယဖံးယညၣ်
ဒီးမၤကၢ်ကွံာ် ယဃံတဖၣ်လီၤ.
၅ အဝဲ ကဝီၤဃာ်ယၤ ဒီးပာ်လီၤ တၢ်မုၢ်တၢ်ဘိလၢ အအိၣ်ဒီး အစုၣ်အပျၢ်+ ဒီးတၢ်ကီတၢ်ခဲ လၢယကပၤဝးဝးလီၤ.
၆ အဝဲမၢဆူၣ်ယၤလၢ ယကအိၣ်လၢ တၢ်လီၢ်လၢ အပှဲၤဒီး တၢ်ခံး ဒ်ပှၤလၢအသံလၢ အပူၤကွံာ် ဖးယံာ်တဖၣ် အသိးလီၤ.
ג
၇ အဝဲတြီဃာ်ယကျဲ လၢတၢ်ဒူၣ်အဃိ ယဟးထီၣ်လၢ တၢ်ချၢ တန့ၢ်ဘၣ်.
ဒီးအဝဲ စၢဃာ်ယၤလၢ တိၢ်ဘီအကွီၤလၢ အဃၢတဖၣ်လီၤ.+
၈ ဖဲယကိးပသူထီၣ် ဒီးဃ့တၢ်မၤစၢၤ သပှၢ်ကတၢၢ်အခါ အဝဲတဒိကနၣ် ယတၢ်ထုကဖၣ်ဘၣ်.+
၉ အဝဲတြီဃာ်ယကျဲလၢ လၢၢ်လၢ အဘၣ်တၢ်စိးပျၤအီၤတဖၣ်
ဒီးမၤက့ၣ်ကူထီၣ် ယကျဲတဖၣ်လီၤ.+
ד
၁၀ အဝဲအိၣ်ခူသူၣ် ဒီးကစီၤယၤ* ဒ်တၤသူ ဒီးခ့ယုၢ်အသိးလီၤ.+
၁၁ အဝဲ ဆီၣ်ဖျိးယၤလၢ ကျဲကပၤ ဒီးဖှီကွံာ်ယၤ တက့တက့လီၤ.
ဒီးအဝဲ ပာ်တ့ၢ်ကွံာ်ယၤလီၤ.+
၁၂ အဝဲဖ့ၣ်ထီၣ်အချံၣ် ဒီးပညိၣ်ထီၣ်အပျၢ်လၢ ယအိၣ်လီၤ.
ה
၁၃ အဝဲ ဆဲးဖျိ ယကလ့ၢ်လၢ အပျၢ်တဖၣ် လၢအအိၣ်လၢ အပျၢ်ပီၤပူၤလီၤ.
၁၄ ပှၤခဲလၢာ် နံၤဘၣ်ယၤ ဒီးအဝဲသ့ၣ် သးဝံၣ်ဆဲးအဲးယၤ ဒီတနံၤလီၤ.
၁၅ အဝဲ ဆဲးဒုးအီၣ်ယၤတၢ်လၢအခၣ် ဒီးဆဲးဒုးအီယၤ တၢ်မုၢ်တၢ်ဘိအထံ လၢအခၣ်လီၤ.+
ו
၁၆ အဝဲဆီၣ်လီၤယၤလၢ ဖၣ်ဆါကမူၣ်အကျါ+
ဒီးအဝဲ မၤကၢ် ယမဲတဖၣ်လၢ လၢၢ်ဖိပြံတဖၣ်လီၤ.
၁၇ နထုးထီၣ်ကွံာ် တၢ်မုာ်တၢ်ခုၣ် လၢယအိၣ် ဒီးယသးပ့ၤနီၣ်ကွံာ် တၢ်လၢအဂ့ၤလီၤ.
၁၈ အဃိ ယတဲလၢ “ယလၤကပီၤ ဟးဂီၤလၢာ်လံ ဒီးယတမုၢ်လၢ်တၢ်လၢ ယဟိဝၤယွၤအအိၣ် နီတမံၤလၢၤဘၣ်.”
ז
၁၉ သ့ၣ်နီၣ်ထီၣ်လၢ ယတူၢ်ဘၣ် တၢ်နးတၢ်ဖှီၣ် ဒီးယဟံၣ်တအိၣ်ဘၣ်.+ ဒီးယအီၣ်ဘၣ် တၢ်မုၢ်တၢ်ဘိလၢအခၣ် ဒီးတၢ်စုၣ်တၢ်ပျၢ်လၢအခၣ်န့ၣ် သ့ၣ်နီၣ်ထီၣ်တက့ၢ်.+
၂၀ နကသ့ၣ်နီၣ်ထီၣ် ဒီးနကသကူးလီၤ နသး ဒီးမၤစၢၤယၤ သပှၢ်ကတၢၢ်လီၤ.+
၂၁ ယသ့ၣ်နီၣ်ထီၣ်က့ၤ တၢ်ဂ့ၢ်အဝဲအံၤ အဃိ ယကအိၣ်ခိးလၢ တၢ်သးစူၤ အပူၤလီၤ.+
ח
၂၂ မ့ၢ်လၢ ယဟိဝၤယွၤ အတၢ်အဲၣ်လၢအတီ အဃိ ပကျဲ တကတၢၢ် ကွံာ်ဘၣ်.+
ဒီးအတၢ်သးကညီၤန့ၣ် တလၢာ် နီတဘျီဘၣ်.+
၂၃ ဒီးနပာ်ဖျါထီၣ် နတၢ်သးကညီၤလၢအသီ ကိးဂီၤဒဲး+ ဒီးနတၢ်သးတီန့ၣ် အိၣ်ဝဲ အါမးလီၤ.+
၂၄ ယတဲလၢ “ယဟိဝၤယွၤမ့ၢ် ယတၢ်န့ၢ်သါ+ အဃိ ယကအိၣ်ခိးအီၤလၢ တၢ်သးစူၤ အပူၤလီၤ.”+
ט
၂၅ ယဟိဝၤယွၤ ပာ်ဖျါထီၣ် တၢ်သူၣ်ဂ့ၤသးဝါလၢ ပှၤလၢအမုၢ်လၢ်တၢ်လၢအီၤ+ ဒီးပှၤလၢအဆဲးဃုအီၤ အဖီခိၣ်လီၤ.+
၂၆ ပှၤမ့ၢ်အိၣ်ခိး ယဟိဝၤယွၤ အတၢ်အုၣ်က့ၤခီၣ်က့ၤလၢ+ တၢ်ဘှ့ၣ်တၢ်ဘှီၣ်အပူၤန့ၣ်* ဂ့ၤဝဲလီၤ.+
၂၇ ပှၤတဂၤ မ့ၢ်ယိးနီၣ်ယိးဘိဖဲ အသးစၢ်အခါန့ၣ် ဂ့ၤဝဲလီၤ.+
י
၂၈ ကစၢ်ယွၤ မ့ၢ်ပာ်ထီၣ် တၢ်ဝံတၢ်ယိးလၢအလိၤန့ၣ် မ်အဆ့ၣ်နီၤအိၣ်ထဲတဂၤ ဒီးအိၣ်ဘှ့ၣ်ကလာ်တက့ၢ်.+
၂၉ မ်အကျးလီၤအမဲာ်လၢ ဟီၣ်ခိၣ်ကမူၣ်အကျါတက့ၢ်.+ ဘၣ်သ့ၣ်သ့ၣ် တၢ်မုၢ်လၢ်လၢအဂီၢ် ကအိၣ်ဒံးလီၤ.+
၃၀ မ်အဒိးလီၤအဘိးပၤလၢ ပှၤလၢအဒဲအီၤ အအိၣ်တက့ၢ်. ဒီးမ်အတူၢ်လိာ် တၢ်ဒုၣ်ဒွဲၣ် လၢလၢပှဲၤပှဲၤတက့ၢ်.
כ
၃၁ ယဟိဝၤယွၤန့ၣ် တပာ်တ့ၢ်ကွံာ်ပှၤ လီၤထူလီၤယိာ်ဘၣ်.+
၃၂ အဝဲဒုးတူၢ်ပှၤ တၢ်သူၣ်အုးသးအုး ဘၣ်ဆၣ် ဒ်အတၢ်အဲၣ်လၢအတီ အိၣ်ဝဲအါအါဂီၢ်ဂီၢ်အသိး အဝဲကပာ်ဖျါထီၣ် တၢ်သးကညီၤလီၤ.+
၃၃ အတအဲၣ်ဒိး မၤနးမၤဖှီၣ် မ့တမ့ၢ် မၤသးအုး ပှၤဟီၣ်ခိၣ်ဖိဘၣ်.+
ל
၃၄ တၢ်ယီၢ်သဘှံး ပှၤဃိာ်ဖိလၢ ဟီၣ်ခိၣ်ချၢမ့ၢ်ဂ့ၤ,+
၃၅ တၢ်တစံၣ်ညီၣ်န့ၢ် ပှၤတၢ်တီတီ လိၤလိၤ လၢတၢ်ထီကတၢၢ်တဂၤ အမဲာ်ညါမ့ၢ်ဂ့ၤ,+
၃၆ ဒီးတၢ်လံၣ်အီၣ်လီအီၣ် ပှၤဂၤလၢ တၢ်မူးတၢ်ရၢ် တကပၤမ့ၢ်ဂ့ၤ
ယဟိဝၤယွၤ တတူၢ်လိာ်ဝဲဘၣ်.
מ
၃၇ ယဟိဝၤယွၤ မ့ၢ်တမၤလိာ်ဝဲလၢ တၢ်ကဟဲကဲထီၣ်အသးဘၣ်န့ၣ် မတဂၤ တဲတၢ်ဒီး ဒုးကဲထီၣ်တၢ်ကသ့လဲၣ်.
၃၈ တၢ်အၢဒီးတၢ်ဂ့ၤ တဟဲထီၣ်လၢ
တၢ်ထီကတၢၢ်တဂၤ အထးခိၣ် တပူၤဃီဘၣ်.
၃၉ ပှၤတဂၤ* ကဒူးကဒ့ၣ်တၢ် ခီဖျိ တၢ်လၢအတူၢ်ဘၣ်ဝဲလၢ အတၢ်ဒဲးဘး အဃိန့ၣ် ကကြၢးဧါ.+
נ
၄၀ မ်ပဆိကမိၣ်ထံလီၤက့ၤ ပတၢ်အိၣ်မူ+ ဒီးဟဲက့ၤကဒါက့ၤလၢ ယဟိဝၤယွၤ အအိၣ်သၢၤ.+
၄၁ မ်ပဃ့ကညး ကစၢ်ယွၤလၢမူခိၣ် လၢတၢ်သူၣ်ဘျၢသးဘျၢ အပူၤ ဒီးယူာ်ထီၣ်ပစု ဒီးတဲလၢ+
၄၂ “ပမၤကမၣ်ဘၣ်တၢ် ဒီးပထီဒါတၢ်+ ဒီးနတပျၢ် ပတၢ်ကမၣ်ဘၣ်.+
ס
၄၃ နသးဒိၣ်ထီၣ်တၢ် ဒီးနတဒိကနၣ် ပတၢ်ထုကဖၣ်ဘၣ်.+
နလူၤဖီၣ်ပှၤ ဒီးနမၤသံပှၤလၢ တၢ်တသးကညီၤဘၣ် အပူၤလီၤ.+
၄၄ နပာ်သဒၢဃာ်နသးလၢ တၢ်အၢၣ် ဒ်သိး ပတၢ်ထုကဖၣ် သုတတုၤလၢ နအိၣ်တဂ့ၤအဂီၢ်လီၤ.+
၄၅ နဒုးကဲထီၣ်ပှၤလၢ တၢ်ဘၣ်အၢဘၣ်သီ ဒီးတၢ်ကမှံၤလၢ ပှၤကျါလီၤ.”
פ
၄၆ ပဒုၣ်ပဒါခဲလၢာ် အိးထီၣ်အထးခိၣ် ဒ်သိးကထီဒါပှၤအဂီၢ်လီၤ.+
၄၇ ထီဘိန့ၣ် ပဘၣ်ပျံၤတၢ်ဖုးတၢ် ဒီးဘၣ်ဘျးဒီး+ ပျံၤသကွီၤ ဒီးပဘၣ်အိၣ်သယုၢ် ဒီးတုၤလၢတၢ်ဟးဂီၤလီၤ.+
၄၈ ယမဲာ်ထံယွၤလီၤဒ် ထံကျိဖိတဖၣ်အသိး ခီဖျိလၢ ယပှၤကလုာ် ဘၣ်တၢ်မၤဟးဂီၤအီၤ အဃိလီၤ.+
ע
၄၉ ယမဲာ်ထံယွၤလီၤရုၢ်ရုၢ် ဒီးတကတၢၢ် နီတဘျီဘၣ်,+
၅၀ တုၤလီၤလၢ ယဟိဝၤယွၤ ကွၢ်လီၤဝဲလၢမူခိၣ် ဒီးထံၣ်ဝဲတစုလီၤ.+
၅၁ ယသးဘၣ်ဖှီၣ် ခီဖျိ ယထံၣ်ဘၣ် တၢ်လၢ အဟဲကဲထီၣ်သးဒီး ပှၤပိာ်မုၣ်တဖၣ်လၢ ယဝ့ၢ်ပူၤ အဃိလီၤ.+
צ
၅၂ တၢ်ဂ့ၢ်တအိၣ် နီတမံၤဘၣ် သနာ်က့ ယဒုၣ်ယဒါတဖၣ် လူၤခးယၤ ဒ်ထိၣ်တဘ့ၣ်အသိးလီၤ.
၅၃ အဝဲသ့ၣ် မၤသံယၤလၢ တၢ်ပူၤ ဒီးကွံာ်ယၤလၢ လၢၢ်လီၤ.
၅၄ ထံလုၢ်ဘၢကွံာ်ယၤ ဒီးယတဲလၢ “ယကျဲကတၢၢ်လံ.”
ק
၅၅ အိ ယဟိဝၤယွၤဧၢ, လၢတၢ်ပူၤယိာ်န့ၣ် ယကိးထီၣ်နမံၤလီၤ.+
၅၆ ဒိကနၣ် ယကလုၢ်မီၤ. တဘၣ်ပံးဃာ် နနၢ် ဒ်သိးနသုတနၢ်ဟူ ယဃ့တၢ်မၤစၢၤ လၢယကပူၤဖျဲး အဂီၢ်န့ၣ်တဂ့ၤ.
၅၇ ဖဲယကိးထီၣ်နၤအနံၤ နသုးဘူးနသးလၢ ယအိၣ်လီၤ. ဒီးနတဲလၢ “ပျံၤတၢ်တဂ့ၤ.”
ר
၅၈ အိ ယဟိဝၤယွၤဧၢ, နဒီသဒၢယၤလၢ တၢ်မူးတၢ်ရၢ်တကပၤ ဒီးနပှ့ၤက့ၤ ယသးသမူလီၤ.+
၅၉ အိ ယဟိဝၤယွၤဧၢ, တၢ်လၢ ပှၤမၤကမၣ်ယၤန့ၣ် နထံၣ်လံ. အဃိ ဝံသးစူၤ စံၣ်ညီၣ်န့ၢ်ယၤတၢ် တီတီ လိၤလိၤတက့ၢ်.+
၆၀ အဝဲသ့ၣ် မၤကၣ်ယၤ ဒီးကူၣ်ထီၣ်တၢ်လၢ ကထီဒါယၤ အဂီၢ်န့ၣ် နထံၣ်လံ.
ש
၆၁ အိ ယဟိဝၤယွၤဧၢ, နနၢ်ဟူဘၣ် အဝဲသ့ၣ် တဲဆဲးအဲးယၤ ဒီးကူၣ်ထီၣ်တၢ်လၢ ကထီဒါယၤအဂီၢ်လံ.+
၆၂ နနၢ်ဟူဘၣ် ပှၤလၢ အထီဒါယၤတဖၣ် တဲယဂ့ၢ် ဒီးတဲကသွံတၢ်လၢ ကကူၣ်ထီၣ်ထီဒါယၤအဂီၢ် ဒီတနံၤကျၢၤ.
၆၃ ကွၢ်အဝဲသ့ၣ်တက့ၢ်. ဖဲအဝဲသ့ၣ် ဆၢထၢၣ်အခါမ့ၢ်ဂ့ၤ ဆ့ၣ်နီၤအခါ မ့ၢ်ဂ့ၤ အဝဲသ့ၣ် သးဝံၣ်ဆဲးအဲးယၤ လၢအတၢ်သးဝံၣ်တဖၣ်လီၤ.
ת
၆၄ အိ ယဟိဝၤယွၤဧၢ, နကဟ့ၣ်ကၣ် အဝဲသ့ၣ် ဒ်တၢ်လၢ အဝဲသ့ၣ်မၤဝဲတဖၣ် အသိးလီၤ.
၆၅ နဆိၣ်အၢအဝဲသ့ၣ် ဒ်သိးအဝဲသ့ၣ် ကကဲထီၣ် ပှၤလၢအခိၣ်ကိၤ အဂီၢ်လီၤ.
၆၆ ယဟိဝၤယွၤဧၢ, နကလူၤဖီၣ် အဝဲသ့ၣ်လၢ တၢ်သးဒိၣ်အပူၤ ဒီးနကမၤဟးဂီၤကွံာ် အဝဲသ့ၣ်လၢ ဟီၣ်ခိၣ်ချၢလီၤ.
א
၄ ထူစီလၢ အကပီၤတဖၣ်န့ၣ် အလွဲၢ် လီၤကဒုလံ.+
ဒီးလၢၢ်စီဆှံတဖၣ်+ အိၣ်ပြံပြါလၢ ကျဲကိးဘိဒဲး အသနၢၣ်လံ.+
ב
၂ စံယိၣ်အဖိခွါလၢ အလုၢ်ဒိၣ်ပှ့ၤဒိၣ်တဖၣ်န့ၣ် လၢညါ အလုၢ်ဒိၣ်ပှ့ၤဒိၣ် ထဲသိးဒီးထူစီ
ဒီးမ့မ့ၢ် ခဲအံၤန့ၣ် အဝဲသ့ၣ် ဘၣ်တၢ်ပာ်အီၤ ဒ်သိးဒီး သပၢၤဟီၣ်ခိၣ်တဖၣ်
လၢပှၤတ့သပၢၤဖိ တ့ဝဲန့ၣ်လီၤ.
ג
၃ ထွံၣ်မံၤဒၣ်လဲာ်န့ၣ် ဒုးအီအဖိနုၢ်
ဘၣ်ဆၣ် မ့မ့ၢ် ယပှၤဂီၢ်မုၢ် အဖိမုၣ်တဖၣ်န့ၣ် အတၢ်သးကညီၤတအိၣ်ဘၣ်+ ဒ်သိးဒီး ထိၣ်ကီၤလၤအူးလၢ ပှၢ်မုၢ်ကနၢပူၤလီၤ.+
ד
၄ ဖိသၣ်အီနုၢ်န့ၣ် အဲၣ်ဒိးအီထံအဃိ အပျ့ၤဘုးတာ်ဒီး အကိာ်ပူၤ ကဒီခိၣ်လီၤ.
ဒီးဖိသၣ်တဖၣ်န့ၣ် ဃ့အီၣ်ကိၣ်+ ဘၣ်ဆၣ် ပှၤတဟ့ၣ် အဝဲသ့ၣ် နီတဂၤဘၣ်.+
ה
၅ ပှၤလၢအအီၣ်ညီနုၢ် တၢ်အီၣ်လၢ အဝံၣ်အဘဲန့ၣ် လီၤဒိဒီး မံနီၤဝဲလၢ ကျဲပူၤလီၤ.+
ပှၤလၢအညီနုၢ်ကူကၤ တၢ်ကူတၢ်ကၤလၢအပှ့ၤဒိၣ်န့ၣ်*+ ဘၣ်မံနီၤဝဲလၢ ဖၣ်ဆါပူၣ်အလိၤလီၤ.
ו
၆ တၢ်စံၣ်ညီၣ်လၢ ယပှၤကလုာ် တူၢ်ဘၣ်ဝဲန့ၣ် ဒိၣ်န့ၢ်ဒံး တၢ်စံၣ်ညီၣ်လၢ ဝ့ၢ်စဒိၣ်+ တူၢ်ဘၣ်ဝဲလၢ အတၢ်ဒဲးဘး အဃိလီၤ.
ဝ့ၢ်စဒိၣ်န့ၣ် ဘၣ်တၢ်မၤဟးဂီၤအီၤ လၢတစိၢ်ဖိအတီၢ်ပူၤ ဒီးပှၤမၤစၢၤအီၤ တအိၣ် နီတဂၤဘၣ်.+
ז
၇ လၢညါ စံယိၣ် အပှၤနစၤရံဖိန့ၣ်+ ကဆှီန့ၢ်ဒံး မူခိၣ်ဖီ ဒီးဝါန့ၢ်ဒံး တၢ်နုၢ်ထံလီၤ.
အဝဲသ့ၣ်န့ၣ် အညၣ်ဂီၤဒိၣ်န့ၢ်ဒံး လၢၢ်ဖီလၢ အဂီၤဆှုၣ်ကလာ်တဖၣ် ဒီးအဝဲသ့ၣ်လီၤဂာ်ဒီး တၢ်မျၢ်နံၤလါအဲး လၢပှၤထူးကပီၤအီၤလီၤ.
ח
၈ ခဲအံၤ အဝဲသ့ၣ် ဖျါသူန့ၢ်ဒံး တၢ်ခံးသူ
ဒီးလၢကျဲန့ၣ် ပှၤကွၢ်နီၣ်အဝဲသ့ၣ် တဘၣ်လၢၤဘၣ်.
အဝဲသ့ၣ် အိၣ်တ့ၢ်ထဲ အဃံဒီးအဖံးဘ့ၣ်+ ဒီးလီၤဂာ်ဒ်သိးဒီး သ့ၣ်ဃ့လီၤ.
ט
၉ ပှၤလၢအဘၣ်တၢ်မၤသံအီၤ လၢနးန့ၣ် ကိညၢ်န့ၢ်ဒံး ပှၤလၢအဘၣ်သံလၢ တၢ်သၣ်ဝံၤလီၤဒိအဃိလီၤ.+
ခီဖျိ တၢ်အီၣ်တအိၣ်ဘၣ် အဃိ အဝဲသ့ၣ်အဂံၢ်လၢာ်ဘါလၢာ် လီၤဂာ်ဒ်သိးဒီး ပှၤလၢအဘၣ် တၢ်ဆဲးဖျိအီၤလၢနးလီၤ.
י
၁၀ ပိာ်မုၣ်လၢ အသးကညီၤတၢ် သ့တဖၣ်ဒၣ်လဲာ် ချီထီၣ် အဖိတဖၣ်လၢ အနီၢ်ကစၢ် အစုလီၤ.+
ဖဲပှၤပိာ်မုၣ်တဖၣ်လၢ ယပှၤဂီၢ်မုၢ်အကျါ ဘၣ်နးဘၣ်ဖှီၣ်အခါ ဖိဒံဖိသၣ်တဖၣ် ကဲထီၣ် အဝဲသ့ၣ် အတၢ်အီၣ်လီၤ.+
כ
၁၁ ယဟိဝၤယွၤ ပာ်ဖျါထီၣ် အတၢ်သးဒိၣ်,
ဒီးလူလီၤ အတၢ်သးထီၣ်လၢ အကဲၤထီၣ် ဒ်မ့ၣ်အူ အသိးလီၤ.+
အဝဲမၤကဲၤထီၣ် မ့ၣ်အူလၢ စံယိၣ် အပူၤ ဒီးမ့ၣ်အူအီၣ်ကွံာ် စံယိၣ် အခီၣ်ထံးလီၤ.+
ל
၁၂ ဟီၣ်ခိၣ် အစီၤပၤတဖၣ် ဒီးကယဲၢ်ပှၤလၢ အအိၣ်လၢ ဟီၣ်ခိၣ်ချၢန့ၣ် တနာ်ဝဲလၢ
ဒုၣ်ဒါတဖၣ် ကဟဲနုာ်လီၤလၢ ဝ့ၢ်ယရူၤၡလ့ၣ် အတြဲၤတဖၣ် အပူၤဘၣ်.+
מ
၁၃ တၢ်ကဲထီၣ်အသးဒ်န့ၣ် ခီဖျိလၢ အဝံတဖၣ် အတၢ်ဒဲးဘး ဒီးအပှၤလုၢ်တၢ်ဒိၣ်တဖၣ် အတၢ်ကမၣ် အဃိလီၤ.+
အဝဲသ့ၣ်လူလီၤ ပှၤတီပှၤလိၤတဖၣ် အသွံၣ်လၢ ဝ့ၢ်ပူၤလီၤ.+
נ
၁၄ အဝဲသ့ၣ် ဟးဝ့ၤဝီၤလၢ ကျဲပူၤ ဒ်ပှၤမဲာ်ဘျီၣ်အသိးလီၤ.+
အဝဲသ့ၣ် ဘၣ်အၢဒီးတၢ်သွံၣ်+
အဃိ ပှၤထိးဘူး အဝဲသ့ၣ် အတၢ်ကူတၢ်ကၤ တန့ၢ်နီတဂၤဘၣ်.
ס
၁၅ ပှၤတဲ အဝဲသ့ၣ်လၢ “လဲၤမ့ၢ်ယံၤ, ပှၤတကဆှီဘၣ်သ့ၣ်ဧၢ. ဟးထီၣ်, ဟးထီၣ်မ့ၢ်ယံၤ, ထိးဘူးပှၤတဂ့ၤ.”
အဝဲသ့ၣ်န့ၣ် အဟံၣ်တအိၣ်ဘၣ် ဒီးဘၣ်ဟးဝ့ၤဝီၤဝဲလီၤ.
ဒီးပှၤကလုာ်တဖၣ် တဲဝဲလၢ “အဝဲသ့ၣ် အိၣ်ဒီးပှၤဖဲအံၤ တသ့ဘၣ်.+
פ
၁၆ ယဟိဝၤယွၤ မၤလီၤပြံလီၤပြါ အဝဲသ့ၣ် လၢအနီၢ်ကစၢ်+
ဒီးအဝဲ တဘၣ်သူၣ်ဘၣ်သး အဝဲသ့ၣ်လၢၤဘၣ်.
ပှၤတပာ်ကဲ ပှၤလုၢ်တၢ်ဒိၣ်တဖၣ်+ ဒီးပှၤတဘၣ်သူၣ်ဘၣ်သး ပှၤသူၣ်က့သးပှၢ်တဖၣ်ဘၣ်.”+
ע
၁၇ ပဃုတၢ်မၤစၢၤ ကလီကလီ အဃိ ပမဲာ်ချံဘှံးတုၤခဲအံၤလီၤ.+
ပအိၣ်ခိးကွၢ်လၢ် ပှၤကလုာ်တကလုာ် လၢအမၤပူၤဖျဲးပှၤ တသ့ဘၣ် အတၢ်မၤစၢၤလီၤ.+
צ
၁၈ အဝဲသ့ၣ် လူၤဖီၣ်ပှၤ တုၤဒၣ်လဲာ်+ ပဟးလၢကျဲပူၤမး တဘူၣ်ဘၣ်.
ပကျဲကကတၢၢ် ဘူးထီၣ်လံ. တၢ်အကတၢၢ်လၢ ပဂီၢ်န့ၣ် ဟဲလံအဃိ ပမုၢ်နံၤမုၢ်သီတဖၣ် ပှဲၤထီၣ်လံ.
ק
၁၉ ပှၤလၢ အလူၤဖီၣ်ပှၤတဖၣ်န့ၣ် ချ့န့ၢ်ဒံး လံာ်ကြီကြာ် လၢမူခိၣ်လီၤ.+
အဝဲသ့ၣ် လူၤဖီၣ်ပှၤလၢ ကစၢၢ်ကလိကျါ ဒီးအိၣ်ခိးခူသူၣ်ပှၤလၢ ပှၢ်မုၢ်ကနၢပူၤလီၤ.
ר
၂၀ ပှၤလၢ ယဟိဝၤယွၤဒိးဖှူအီၤတဂၤ လၢအမ့ၢ် ပနါဒ့ အတၢ်ကသါန့ၣ်+ ဘၣ်တၢ်ဖီၣ်န့ၢ်အီၤ လၢအဝဲသ့ၣ် အတၢ်ပူၤဖးဒိၣ်အပူၤလံ.+
ဘၣ်ဃးဒီး ပှၤတဂၤန့ၣ် ပတဲလၢ “ပကအိၣ်လၢ အကဒုဖီလာ် လၢပှၤကလုာ်တဖၣ် အကျါလီၤ.”
ש
၂၁ ပှၤအဒိၣ်ဖိလၢ+ အအိၣ်လၢ ဧူစး အတၢ်လီၢ်တၢ်ကျဲအပူၤသ့ၣ်ဧၢ, သးခု ဒီးသူၣ်ဖှံသးညီဟီ.
ဘၣ်ဆၣ် တၢ်ကဟ့ၣ်လီၤစ့ၢ်ကီးနၤ တၢ်နးတၢ်ဖှီၣ်အခွး+ ဒီးနကမူၤ ဒီးနတၢ်အိၣ်ဘ့ၣ်ဆ့ ကဖျါထီၣ်လီၤ.+
ת
၂၂ ဝ့ၢ်စံယိၣ်ဧၢ, တၢ်စံၣ်ညီၣ်လၢ နတၢ်ကမၣ်အဃိန့ၣ် ဝံၤလံ.
အဝဲ တက့ၤဖီၣ်ကဒီးနၤလၢၤဘၣ်.+
ပှၤအဒိၣ်ဖိဧၢ, ကစၢ်ယွၤ ကသမံသမိး နတၢ်ကမၣ်
ဒီးကပာ်ဖျါထီၣ် နတၢ်ဒဲးဘး တဖၣ်လီၤ.+
၅ အိ ယဟိဝၤယွၤဧၢ, တဘၣ်သးပ့ၤနီၣ် တၢ်လၢပတူၢ်ဘၣ်အီၤတဖၣ်တဂ့ၤ.
ကွၢ်လီၤ တၢ်မဲာ်ဆှးလၢ ပတူၢ်ဘၣ်တဖၣ်တက့ၢ်.+
၂ ပတၢ်န့ၢ်သါန့ၣ် ကဲထီၣ်ပှၤလၢ ပတသ့ၣ်ညါအီၤဘၣ်တဖၣ်အတၢ် ဒီးပဟံၣ်တဖၣ်န့ၣ် ကဲထီၣ် ပှၤထံဂၤကီၢ်ဂၤဖိတဖၣ် အတၢ်လီၤ.+
၃ ပကဲထီၣ် ဖိၣ်ဃဲလၢ အပၢ်တအိၣ်ဘၣ် ဒီးပမိၢ်န့ၣ် ကဲထီၣ် မုၣ်ကမဲလီၤ.+
၄ ထံလၢအကဲပတၢ်န့ၣ် ပဘၣ်ပှ့ၤအီအီၤ+ ဒီးသ့ၣ်မုၣ်လၢအကဲပတၢ်န့ၣ် ပဘၣ်ပှ့ၤအီၤလီၤ.
၅ ပှၤလၢ အလူၤပှၤ တဖၣ်န့ၣ် လူၤပှၤဘူးကချုး ဒီးဖီၣ်ပှၤဘူးကန့ၢ်လံ.
ပလီၤဘှံးလီၤတီၤ ဘၣ်ဆၣ် ပတအိၣ်ဘှံးအိၣ်သါဘၣ်ဘၣ်.+
၆ ပသန့ၤပသးလၢ ကီၢ်အဲၤကူပတူး+ ဒီးကီၢ်အၤၡူၢ်အအိၣ်+ ဒ်သိး ပကအီၣ်ဘၣ်တၢ်အဂီၢ်လီၤ.
၇ ပမိၢ်ပၢ်ဖံဖု လၢပျၢၤ လၢအမၤဘၣ် တၢ်ဒဲးဘးတဖၣ် တအိၣ်လၢၤဘၣ်. ဘၣ်ဆၣ် ပကဘၣ်တူၢ်တၢ်လၢ အဝဲသ့ၣ် အတၢ်ကမၣ်အဃိလီၤ.
၈ ခဲအံၤ တၢ်အခ့အပှၤတဖၣ် ပၢပှၤလံ. ဒီးပှၤလၢ အကမၤပူၤဖျဲးပှၤလၢ အဝဲသ့ၣ် အစုပူၤ တအိၣ်နီတဂၤဘၣ်.
၉ လၢပှၢ်မုၢ်ကနၢအပူၤန့ၣ် ပှၤလၢအစိာ် တၢ်စုကဝဲၤတဖၣ် အိၣ်ဝဲအဃိ တၢ်ဘၣ်ယိၣ်အိၣ်လၢ ပသးသမူအဂီၢ် သနာ်က့ ပဘၣ်ဟးဃုအီၣ် တၢ်အီၣ်လီၤ.+
၁၀ မ့ၢ်လၢ ပလီၤဘဲဒိၣ်မးအဃိ ပလိၤကိၢ်ထီၣ် ဒီးပဘ့ၣ် ကိၢ်ထီၣ်ဒ် ဖၣ်ကပူၤအသိးလီၤ.+
၁၁ ပှၤမုၣ်ပှၢ်တဖၣ် လၢဝ့ၢ်စံယိၣ် ဒီးပှၤမုၣ်ကနီၤတဖၣ် လၢအအိၣ်လၢ ယူဒၤအဝ့ၢ်တဖၣ်န့ၣ် ဘၣ်တၢ်မၤမဲာ်ဆှးအီၤလီၤ.*+
၁၂ ပဒိၣ်ဖးဒိၣ်တဖၣ်န့ၣ် ပှၤစၢအစုဒီး+ ဘျးလီၤကစဲၤအီၤလီၤ. ဒီးပှၤသူၣ်က့သးပှၢ်တဖၣ် ဒၣ်လဲာ် ပှၤတပာ်ကဲအီၤ နီတစဲးဘၣ်.+
၁၃ ပှၤဖိၣ်သၣ်ခွါတဖၣ် ဘၣ်ယိးဝဲ ဆၢၣ်ဂူာ်လၢၢ် ဒီးပှၤဖိသၣ်ပိာ်ခွါတဖၣ် လီၤဃံၢ်လၢ သ့ၣ်မုၣ်လၢ အယိးဝဲ အဖီလာ်လီၤ.
၁၄ လၢဝ့ၢ်အတြဲၤန့ၣ် ပှၤသူၣ်က့သးပှၢ်တဖၣ် တအိၣ်လၢၤဘၣ်.+ ဒီးပှၤဖိၣ်သၣ်ခွါတဖၣ် တဒ့တၢ်အူတၢ် လၢၤဘၣ်.+
၁၅ ပတၢ်သးခု လီၤမၢ်ကွံာ်ပျီ. ဒီးပတၢ်ဂဲၤကလံၣ်တဖၣ်န့ၣ် ကဲထီၣ်က့ၤလၢ တၢ်ဟီၣ်တၢ်ယၢၤလီၤ.+
၁၆ ခိၣ်သလုးလၢ ပခိၣ်လိၤန့ၣ် လီၤတဲာ်ကွံာ်လံ. မ့ၢ်လၢ ပမၤတၢ်ဒဲးဘးအဃိ ပဘၣ်ကီဘၣ်ခဲလီၤ.
၁၇ လၢတၢ်န့ၣ်အဃိ ပသးဘၣ်ဒိ,+
လၢတၢ်န့ၣ်တဖၣ်အဃိ ပမဲာ်ချံ ကဒုထီၣ်ဝဲ,+
၁၈ ဒီးကစၢၢ်စံယိၣ် ဘၣ်အိၣ်သယုၢ်အဃိ+ ထွံၣ်မံၤတဖၣ် ဟးဝ့ၤဝီၤဝဲလၢ အလိၤလီၤ.
၁၉ အိ ယဟိဝၤယွၤဧၢ, နဆ့ၣ်နီၤလၢ လီၢ်ပစိာ်အလိၤ လီၤထူလီၤယိာ်လီၤ.
ဒီးနလီၢ်ပစိာ်န့ၣ် အိၣ်ဝဲ တစိၤဘၣ်တစိၤလီၤ.+
၂၀ ဘၣ်မနုၤအဃိ နသးပ့ၤနီၣ်ပှၤ လီၤထူလီၤယိာ် ဒီးပာ်တ့ၢ်ကွံာ်ပှၤ ဖးယံာ်ဖးစၢၤလဲၣ်.+
၂၁ အိ ယဟိဝၤယွၤဧၢ, ဒုးဟဲက့ၤပှၤ လၢနအိၣ် ဒီးလၢတၢ်သူၣ်အိၣ်သးအိၣ် အပူၤန့ၣ် ပကဟဲက့ၤ လၢနအိၣ်လီၤ.+
မ်တၢ်ခဲလၢာ် က့ၤကဲထီၣ်က့ၤ ဒ်လၢ အပူၤကွံာ်အသိးတက့ၢ်.+
၂၂ ဘၣ်ဆၣ် နပာ်တ့ၢ်ကွံာ်ပှၤ သပှၢ်တၢၢ်လံ.
နသးဒိၣ်ထီၣ်ပှၤဒိၣ်မး တုၤခဲအံၤလီၤ.+
အဆၢဒိၣ် ၁-၄ မ့ၢ်ဝဲထါဟီၣ်တဖၣ် ဒီးဘၣ်တၢ်ကွဲးအီၤ ဒ်ဧ့ၤဘြံၤအလံာ်မိၢ်ပှၢ်အဖျၢၣ် အိၣ်ရဲၣ်လီၤအသးအသိး.
တၢ်အဒိတခါလၢ အအဲၣ်ဒိးတဲဝဲ ဝ့ၢ်ယရူၤၡလ့ၣ်.
မ့ၢ်စ့ၢ်ကီး “တၢ်ဟံးစုနဲၣ်ကျဲ.”
အခီပညီလိၤလိၤ “ယသူၣ် ဘၣ်တၢ်လူလီၤအီၤလၢ ဟီၣ်ခိၣ်လိၤ.”
အခီပညီလိၤလိၤ “ဘုဒီးစပံးထံ အိၣ်ဖဲလဲၣ်.”
မ့ၢ်စ့ၢ်ကီး “ဒီးစီၤယၤ.”
မ့ၢ်စ့ၢ်ကီး “အိၣ်ခိးလၢ တၢ်သးစူၤအပူၤ.”
အခီပညီလိၤလိၤ “ပှၤလၢအမူဝဲတဂၤ.”
အခီပညီလိၤလိၤ “တၢ်ဂီၤဆှုၣ်ကလာ်.”
မ့ၢ်စ့ၢ်ကီး “ဘၣ်တၢ်ဖီၣ်ဆူၣ်အီၤ.”