ဟီၣ်ခိၣ်တၢ်အိၣ်သး ဒံးနးထီၣ်အဃိ

၁ | ကွၢ်ကတီၤ နတၢ်အိၣ်ဆူၣ်အိၣ်ချ့

ဘၣ်မနုၤအဃိ အရ့ဒိၣ်လဲၣ်

တၢ်ကီတၢ်ခဲ ဒီးတၢ်နးတၢ်ဖှီၣ် မ့ၢ်ကဲထီၣ်သးန့ၣ် အမၤဘၣ်ဒိ ပတၢ်အိၣ်ဆူၣ်အိၣ်ချ့ သ့လၢကျဲအါဘိ.

ခီဖျိလၢ တၢ်ကီတၢ်ခဲ ကဲထီၣ်သး အါမံၤအဃိ ပှၤအါဂၤ ဘၣ်ကိၢ်ဘၣ်ဂီၤတၢ်. ဒီးပှၤတဂၤ မ့ၢ်သူၣ်ကိၢ်သးဂီၤတၢ် ဖးယံာ်န့ၣ် အတၢ်အိၣ်ဆူၣ်အိၣ်ချ့ ဘၣ်ဒိသ့.
ဖဲန့ဆၢၣ်တၢ်ဘၣ်ဒိဘၣ်ထံး ဒီးတၢ်ဆါသံသတြိာ် ကဲထီၣ်အခါ တဘျီတခီၣ် လၢတၢ်ဆါဟံၣ်န့ၣ် ကသံၣ်သရၣ် ကွၢ်ထွဲပှၤဆါ တဝးဘၣ် ဒီးတဘျီတခီၣ် ကသံၣ်ကသီ တယၢစ့ၢ်ကီးဘၣ်.
ပှၤအါဂၤ ထံၣ်ဘၣ် ကျိၣ်စ့တၢ်ကီတၢ်ခဲ. ဒီးအဝဲသ့ၣ် ကပှ့ၤအီၣ်ပှ့ၤအီ တၢ်လၢအလိၣ်ဘၣ်ဝဲ နီၢ်ကီၢ် ဒ်သိးဒီး တၢ်အီၣ်တၢ်အီ ဒီးကသံၣ်ကသီမး ပှ့ၤဝဲတန့ၢ်လၢၤဘၣ်.

တၢ်လၢ နကဘၣ်သ့ၣ်ညါ

နမ့ၢ်အိၣ်ဒီး တၢ်ဆူးတၢ်ဆါနးမး ဒီးနမ့ၢ်ဘၣ်ကိၢ်ဘၣ်ဂီၤတၢ်န့ၣ် နကဆၢတဲာ်ကမၣ်ဘၣ်တၢ် ဒီးနကမၤဘၣ် တၢ်လၢကမၤဘၣ်ဒိ နတၢ်အိၣ်ဆူၣ်အိၣ်ချ့. ဒီးလၢခံန့ၣ် နတၢ်ဆါ ကနးဒိၣ်ထီၣ်.
နမ့ၢ်တကူစါယါဘျါနသး တဘျီဃီဘၣ်န့ၣ် နတၢ်ဆါကနးထီၣ် ဒီးတၢ်လီၤဘၣ်ယိၣ် ကအိၣ်ထီၣ်လၢ နသးသမူအဂီၢ်.
တၢ်ကီတၢ်ခဲ မ့ၢ်ကဲထီၣ်သး အါမံၤသနာ်က့ နတၢ်အိၣ်ဆူၣ်အိၣ်ချ့ မ့ၢ်ဂ့ၤန့ၣ် နဆၢတဲာ်တၢ် လၢအဘၣ်ကသ့.
နစ့အိၣ်အါမ့ၢ်ဂ့ၤ တအိၣ်အါအါဘၣ်မ့ၢ်ဂ့ၤ နကွၢ်ကတီၤ နတၢ်အိၣ်ဆူၣ်အိၣ်ချ့သ့.

တၢ်လၢနမၤသ့

ပှၤလၢအအိၣ်ဒီး တၢ်ကူၣ်သ့န့ၣ် အဆိကမိၣ်ထံဆိ တၢ်ကီတၢ်ခဲလၢ ကကဲထီၣ်သး ဒီးအကဘၣ်ဟးဆှဲး တၢ်ကီတၢ်ခဲဒ်လဲၣ်န့ၣ် အဆိကမိၣ်ပာ်စၢၤဝဲ. ဘၣ်ဃးဒီး တၢ်အိၣ်ဆူၣ်အိၣ်ချ့စ့ၢ်ကီး ပကဘၣ်မၤဒ်န့ၣ်. ညီနုၢ် ပမ့ၢ်အိၣ်ကဆှဲကဆှီ, ပာ်ပဟံၣ် ဒီးတၢ်ဖိတၢ်လံၤ ကဆှဲကဆှီန့ၣ် ပတန့ၢ်ဘၣ်တၢ်ဆါ ညီညီဘၣ်. အဃိ ပမ့ၢ်ဒီသဒၢဆိပသးန့ၣ် ဂ့ၤဒိၣ်န့ၢ်ဒံး ပဘၣ်ကူစါယါဘျါသးဒံး.

အၤဒြ့ယဲၤa တဲဝဲလၢ “ပဂုာ်ကျဲးစၢး အိၣ်ကဆှဲကဆှီ ဒီးပာ်ပဟံၣ် ကဆှဲကဆှီအဃိ ပတလိၣ် လဲၤမၤကွၢ်သးလၢ တၢ်ဆါဟံၣ် အါအါဘၣ်. ဒီးပတၢ်လၢာ်ဘူၣ်လၢာ်စ့ၤ လၢကသံၣ်ကသီတပၤစ့ၢ်ကီး တလၢာ်အါအါဘၣ်.”

a ပှၤမံၤတနီၤန့ၣ် ပှၤဆီတလဲဝဲ.

နကဘၣ်မၤဒ်လဲၣ် တၢ်ဟ့ၣ်ကူၣ်လၢ အကဲဘျုး

ဟီၣ်ခိၣ်တၢ်အိၣ်သး မ့ၢ်နးထီၣ်သနာ်က့ ဒ်သိး နကွၢ်ကတီၤ နတၢ်အိၣ်ဆူၣ်အိၣ်ချ့ ကသ့အဂီၢ် မၤထွဲ တၢ်ဟ့ၣ်ကူၣ်တဖၣ်အံၤ

အိၣ်ကဆှဲကဆှီ ဒီးပာ်နဟံၣ်ကဆှဲကဆှီ

အိၣ်ကဆှဲကဆှီ ဒီးပာ်နဟံၣ် ကဆှဲကဆှီ

လံာ်စီဆှံတဲဝဲလၢ– “ပှၤကူၣ်တၢ်သ့ ထံၣ်ဝဲတၢ်လီၤဘၣ်ယိၣ်ဒီး ဟးဆှဲးဝဲ.” (ကတိၤဒိ ၂၂:၃) ဆိကမိၣ်ဆိပာ်စၢၤ တၢ်လၢအကမၤဘၣ်ဒိ နတၢ်အိၣ်ဆူၣ်အိၣ်ချ့ ဒီးဟးဆှဲးအီၤ.

တချုးလၢ နဖီၣ်တၢ်အီၣ်ဒံးဘၣ် ဒီးနလဲၤတၢ်ဟးလီၢ် ဝံၤအလီၢ်ခံ သ့နစုဒီးဆးပၠၣ်ထီဘိ.
မၤကဆှဲကဆှီ နဟံၣ်ထီဘိ ဒီးတၢ်ဖိတၢ်လံၤလၢ နသူအီၤ ခဲအံၤခဲအံၤန့ၣ် မၤကဆှီအီၤဒီး ကသံၣ်မၤသံတၢ်ဃၢ်.
မ့ၢ်သ့န့ၣ် အိၣ်ယံၤဒီး ပှၤလၢအအိၣ်ဒီး တၢ်ဆါလၢအဘၣ်ကူတၢ်သ့.

အီၣ်တၢ်အီၣ်လၢ အန့ၢ်ဂံၢ်န့ၢ်ဘါ

လံာ်စီဆှံတဲဝဲလၢ– “ပှၤလၢအသးဟ့လီၤ အနီၢ်ခိဒၣ်ဝဲန့ၣ် တအိၣ်နီတဂၤဘၣ်. လၢတၢ်န့ၣ်အလီၢ် အဒုးအီၣ်ဒုးအီ ဒီးပာ်လုၢ်ပာ်ပှ့ၤအီၤ.” (အ့းဖ့းစူး ၅:၂၉) ဒ်သိး ပကအိၣ်ဆူၣ်အိၣ်ချ့အဂီၢ် ပကဘၣ်အီၣ် တၢ်အီၣ်လၢ အန့ၢ်ဂံၢ်န့ၢ်ဘါ ဒီးပကဘၣ်ဟးဆှဲး တၢ်လၢအမၤဘၣ်ဒိ ပတၢ်အိၣ်ဆူၣ်အိၣ်ချ့ ဒ်သိးဒီး တၢ်မူၤတၢ်ဘှီး ဒီးတၢ်အီမိာ်.

အီထံအါအါ.
အီၣ်တၤသူတၤသၣ် ဒီးတၢ်ဒိးတၢ်လၣ် အကလုာ်ကလုာ်.
တဘၣ်အီၣ် တၢ်အီၣ်လၢအဟီ, အဆၢ ဒီးအသိ အါတလၢတဂ့ၤ.
တဘၣ်သူ ညါသူး, ကသံၣ်မူၤဘှီး ဒီးအီသံး အါတလၢတဂ့ၤ.

ခါလီး တဲဝဲလၢ “ဒ်သိး ယၤဒီးယမါ ကအိၣ်ဆူၣ်အိၣ်ချ့အဂီၢ် ပအီၣ်တၢ်အီၣ်လၢ အန့ၢ်ဂံၢ်န့ၢ်ဘါ. ပမ့ၢ်တမၤ ဒ်န့ၣ်ဘၣ်န့ၣ် ဖဲပအိၣ်တဆူၣ်ဘၣ်အခါ ပစ့ကလၢာ်လၢ ပတၢ်ကူစါယါဘျါသးအဂီၢ် ဒီဒူၣ်. အဃိ ပသူစ့လၢ ကပှ့ၤအီၣ် တၢ်အီၣ်လၢ အန့ၢ်ဂံၢ်န့ၢ်ဘါ.”

မၤနီၢ်ခိ တၢ်ဟူးတၢ်ဂဲၤ ဒီးမံဘျဲဘျဲ

မၤနီၢ်ခိတၢ်ဟူးတၢ်ဂဲၤ

လံာ်စီဆှံတဲဝဲလၢ– “တၢ်အိၣ်ဘှံးတစဲးန့ၣ် ဂ့ၤဒိၣ်န့ၢ်ဒံး ပှၤမၤတၢ်ဆူၣ်တလၢ ဒီးလူၤဖီၣ်ကလံၤ.” (စံၣ်တဲၤတဲလီၤတၢ် ၄:၆) ပကဘၣ် မၤတၢ်မၤ ဘၣ်ဆၣ် ပကဘၣ်အိၣ်ဘှံး ဒီးမံဘျဲဘျဲစ့ၢ်ကီး.

မၤနီၢ်ခိတၢ်ဟူးတၢ်ဂဲၤ ဒ်သိးဒီး တၢ်ဟးထီၣ်ဟးလီၤ. နသးမ့ၢ်ပှၢ်, နီၢ်ခိက့ၢ်ဂီၤ မ့ၢ်တလၢပှဲၤဘၣ် ဒီးနမ့ၢ်အိၣ်ဒီး တၢ်ဆါယံာ်ယံာ်ထၢထၢ သနာ်က့ နမ့ၢ်မၤ နီၢ်ခိတၢ်ဟူးတၢ်ဂဲၤန့ၣ် ကကဲဘျုးလၢ နတၢ်အိၣ်ဆူၣ်အိၣ်ချ့အဂီၢ်.
မံဘျဲဘျဲ

အိၣ်ဘှံး ဒီးမံဘျဲဘျဲ. နမံမ့ၢ်တဘျဲဘၣ်န့ၣ် နသးကဘၣ်တံာ်တာ်, နဆိကမိၣ်တၢ် ဒီးနသးစၢၢ်ဆၢတၢ် တန့ၢ်ဘၣ်. နမံမ့ၢ်တဘျဲဘၣ် ယံာ်ထီၣ်ယံာ်ထီၣ်န့ၣ် အကဲထီၣ် တၢ်ဆါလၢအနး တကလုာ်သ့.
ပာ်လီၤဃာ် တၢ်ဆၢကတီၢ်လၢ နကမံအခါဖဲလဲၣ် ဒီးနကဆၢထၢၣ် အခါဖဲလဲၣ် ဝံၤဘျီ ဂုာ်ကျဲးစၢး မၤထွဲအီၤဒ်န့ၣ် ကိးနံၤဒဲး.
ဖဲနက့ၤမံအခါ တဘၣ်ကွၢ် တၢ်ဂီၤမူ ဒီးကွၢ်လီတဲစိတဂ့ၤ.
တချုးလၢ နက့ၤမံဒံးဘၣ်န့ၣ် တဘၣ်အီၣ်တၢ် အါတလၢ, တဘၣ်အီသံး ဒီးအီတၢ်လၢ အပၣ်ဃုာ်ဒီး ခီဖံၣ်တဂ့ၤ.

ကၠၢစတံၤ တဲဝဲလၢ “ယမံမ့ၢ်ဘျဲန့ၣ် ကဲဘျုးလၢ ယတၢ်အိၣ်ဆူၣ်အိၣ်ချ့ အဂီၢ်ဒိၣ်မး. ယမံမ့ၢ်တဘျဲဘၣ်န့ၣ် ယခိၣ်သၣ်ဃံဆါ, ယသးဃၢ ဒီးယလိၤဆါ. ဘၣ်ဆၣ် ယမံမ့ၢ်ဘျဲန့ၣ် ယသူၣ်ဖှံသးညီ ဒီးတၢ်လၢ ယကဘၣ်မၤန့ၣ် ယမၤကဲ. တကးဒံးဘၣ် ယဂံၢ်ယဘါ မ့ၢ်ပှဲၤန့ၣ် ယတဆိးက့ ညီညီဘၣ်.”