စီၤယိၤသး မၤကွၢ်အဝဲၢ်တဖၣ် အဂ့ၢ်

ယိၤသးအဲၣ်ဒိးသ့ၣ်ညါဝဲလၢ အဝဲၢ်သ့ၣ်တဖၣ် မ့ၢ်အအၢဝဲသီဝဲဒ် လၢညါအသိးန့ၣ်ဒံးဧါလီၤ. လၢတၢ်န့ၣ်အဃိ စံးဝဲ, ‘သုမ့ၢ်ပှၤကွၢ်ခူသူၣ်တၢ်တဖၣ်လီၤ. သုဟဲကွၢ်ခူသူၣ် ပထံပကီၢ်အတၢ်ဂံၢ်စၢ်ဘါစၢ် န့ၣ်လီၤ.’

အဝဲသ့ၣ်တဲဆၢဝဲလၢ ‘ပတမ့ၢ်ပှၤကွၢ်ခူသူၣ်တၢ်တဖၣ်ဘၣ်. ပမ့ၢ်ပှၤအတီအလိၤတဖၣ်လီၤ. ပမ့ၢ်ဒီပုၢ်ဝဲၢ်သ့ၣ်တဖၣ်လီၤ. အိၣ် ၁၂ ဂၤလီၤ. တဂၤတအိၣ်လၢၤဘၣ်. မ့မ့ၢ်အသဒါတဂၤ အိၣ်တ့ၢ်ဝဲဒၣ်ဒီးပပၢ်န့ၣ်လီၤ.’

ယိၤသးတခီ ပာ်မၤအသးဒ်သိး အတနာ်အဝဲသ့ၣ်အတၢ်ကတိၤန့ၣ်လီၤ. တ့ၢ်လီၤဝဲအဝဲၢ်တဂၤ လၢအမံၤမ့ၢ်စူၤမ့းအိၣ် ဆူဃိာ်ပူၤဝံၤ မၢပှၤလၢအအိၣ်တ့ၢ်တဖၣ် ဟံးန့ၢ်တၢ်အီၣ်တၢ်အီဒီး ဒုးက့ၤအီၤဆူဟံၣ်န့ၣ်လီၤ. ဘၣ်ဆၣ် တဲလီၤအဝဲသ့ၣ်လၢ ‘သုမ့ၢ်ဟဲန့ၣ် သုဘၣ်ဟဲကိးဃုာ် သုပုၢ်သဒါဒီးသုန့ၣ်လီၤ.’

အဝဲသ့ၣ်တဖၣ် ဖဲအဟဲက့ၤတုၤလၢကီၢ်ကနၤဧၣ်န့ၣ် စံးဘၣ်တဲဘၣ် အပၢ်ယၤကိာ် တၢ်ဂ့ၢ်တၢ်ကျိၤ လၢာ်လၢာ်ဆ့ဆ့န့ၣ်လီၤ. ယၤကိာ်အသးအုးဝဲဒိၣ်မးန့ၣ်လီၤ. ဟီၣ်ဝဲဒီးစံးဝဲ ‘ယိၤသးတအိၣ်လၢၤဘၣ်, ခဲအံၤတဘျီ စူၤမ့းအိၣ်တအိၣ်လၢၤဘၣ်. ယတပျဲ သုကလဲၤကိးယဖိခွါသဒါ ဘံၣ်ယၤမံၣ်န့ၣ်ဘၣ်.’ ဘၣ်ဆၣ်ဒီး ဖဲအဝဲသ့ၣ်အတၢ်အီၣ်ကလၢာ်ဘူးထီၣ်အခါ ဘၣ်ပျၢ်လီၤအဖိခွါဘံၣ်ယၤမံၣ် လၢကလဲၤပိာ်ဝဲ ဒ်သိးကမၤန့ၢ်တၢ်အီၣ်လီၤသၢၣ်.

ယိၤသးထံၣ်ဘၣ်ဝဲလၢ အဝဲၢ်တဖၣ်ဟဲက့ၤဝဲန့ၣ်လီၤ. ထံၣ်ဘၣ်အပုၢ်ဖိဘံၣ်ယၤမံၣ်အဃိ အသးခုဝဲဒိၣ်မးန့ၣ်လီၤ. အဝဲသ့ၣ်တသ့ၣ်ညါနီတဂၤလၢ ပှၤလၢအကါဒိၣ်ဖးဒိၣ်တဂၤအံၤ မ့ၢ်ဝဲယိၤသးန့ၣ်ဘၣ်. ခဲအံၤ ယိၤသးမၤကွၢ်ကဒီးအဝဲၢ်တဖၣ် လၢတၢ်အဂၤတမံၤန့ၣ်လီၤ.

မၢဝဲအကုၢ်တဖၣ် မၤပှဲၤအဝဲၢ်တဖၣ်အထၢၣ်လၢ တၢ်အီၣ်တၢ်အီလီၤ. သနာ်က့ မၢအတ့ၢ်နုာ်ခူသူၣ် အလီခီစ့လီၤဆီ လၢဘံၣ်ယၤမံၣ်အထၢၣ်ပူၤ ဒ်သိးအဝဲၢ်တဖၣ်သုတသ့ၣ်ညါဝဲလီၤ. ဖဲအဝဲသ့ၣ်ဟးထီၣ် တၢ်ဒ့ၣ်စၢၤယံၤဝဲတစဲးလံအခါ ယိၤသးမၢလီၤအကုၢ်တဖၣ်လဲၤပိာ် အဝဲသ့ၣ်အခံန့ၣ်လီၤ. ဖဲအဝဲသ့ၣ်ချုးန့ၢ်အီၤအခါ ကုၢ်တဖၣ်စံးဝဲဒၣ်လၢ ‘ဘၣ်မနုၤအဃိသုဟဲက့ၤဟုၣ် ပကစၢ်အလီခီစ့န့ၣ်လဲၣ်’ န့ၣ်လီၤ.

ဒီပုၢ်ဝဲၢ်သ့ၣ်တဖၣ်စံးဝဲဒၣ်, ‘ပတဟုၣ်အဝဲဒၣ်အလီခီမးလဲၣ်. လၢပကျါ ပှၤတဂၤဂၤလၢ တၢ်ထံၣ်န့ၢ်အီၤဒီးလီခီန့ၣ် မၤသံပှၤဝဲန့ၢ်တက့ၢ်.’

ဒ်န့ၢ်ဒီး ယိၤသးအကုၢ်တဖၣ် ဃုကွၢ်ဝဲဒၣ်အထၢၣ်ခဲလၢာ် တုၤအသကုၤန့ၣ်လီၤ. ဒ်ပထံၣ်ဘၣ်လၢတၢ်ဂီၤပူၤအံၤအသိး တၢ်ထံၣ်န့ၢ်လီခီလၢ ဘံၣ်ယၤမံၣ်အထၢၣ်ပူၤန့ၣ်လီၤ. ကုၢ်တဖၣ်စံးဝဲ, ‘ပှၤအိၣ်တ့ၢ်တဖၣ်က့ၤဝဲသ့လီၤ. ဘံၣ်ယၤမံၣ်တခီ ကဘၣ်ဟဲက့ၤပိာ်ဒီးပှၤလီၤ.’ ဒီပုၢ်ဝဲၢ်အဂၤ ၁၀ အံၤ ကမၤဝဲသ့ၣ်ဒ်လဲၣ်.

အဝဲၢ်ခဲလၢာ် လဲၤပိာ်ဝဲသ့ၣ်ဒီးဘံၣ်ယၤမံၣ် ဆူယိၤသးအဟံၣ်န့ၣ်လီၤ. ယိၤသးစံးဘၣ်အဝဲၢ်တဖၣ်, ‘သုခဲလၢာ်သုက့ၤဆူဟံၣ်သ့လီၤ. မ့မ့ၢ်ဘံၣ်ယၤမံၣ်တခီ ကဘၣ်ကဲကုၢ်လၢယဟံၣ်လီၤ.’

တုၤထဲန့ၣ်ဒီး, ယူဒၤစံးဝဲ, ‘ဖိသၣ်အံၤ မ့ၢ်တက့ၤဃုာ်ဒီး ပဝဲဆူဟံၣ်သၢပျၢၤ ယပါပၢ်ကသံဝဲလီၤ. နကုၢ်နပှၤပပါပၢ်အံၤ အဲၣ်အီၤဒိၣ်မးလီၤ. လၢတၢ်န့ၣ်အဃိ, ပာ်ယၤနကုၢ်လၢနဟံၣ် ဒ်ကုၢ်အသိးတက့ၢ်. ဖိသၣ်တခီ ဒုးက့ၤအီၤဆူဟံၣ်တက့ၢ်. ယဃ့သးကညီၤနၤလီၤ.’

ယိၤသးသ့ၣ်ညါဝဲလၢ အဝဲၢ်တဖၣ်အတၢ်ပာ်သး ဆီတလဲအသးလံန့ၣ်လီၤ. တအၢတသီဒ် လၢညါလၢၤဘၣ်န့ၣ်လီၤ. ခဲအံၤပကကွၢ်သကိး ယိၤသးကမၤမနုၤလဲၣ်န့ၣ်တက့ၢ်.