အၤဟရိၣ်အနီၣ်ထိးဘိဖီထီၣ် အဂ့ၢ်

ကွၢ်နီၣ်ထိးဘိ မ့တမ့ၢ် နီၣ်တီၢ်အံၤတဘီ. လၢနီၣ်ထိးဘိအလိၤန့ၣ် ၡၤကးသၣ်မံဘီ ဒီးအဖီတဖၣ် ဖီထီၣ်သၣ်ထီၣ်ဝဲမးလဲၣ်. တၢ်န့ၣ်မ့ၢ်အၤဟရိၣ်အနီၣ်တီၢ်န့ၣ်လီၤ. ဖီတဖၣ်, တၤသၣ်လၢအမံတဖၣ်အံၤ ဟဲဖီထီၣ်သၣ်ထီၣ်လၢ အၤဟရိၣ်အနီၣ်ထိးဘိလိၤ လၢမုၣ်တနၤဃီအကတီၢ်ပူၤန့ၣ်လီၤ. ဘၣ်မနုၤအဃိလဲၣ်န့ၣ် ပကွၢ်သကိးတက့ၢ်.

ပှၤအံၣ်စရ့လးဖိတဖၣ် ဘၣ်ဟးဝ့ၤဝီၤဝဲလၢပှၢ်လၢ်ကျါန့ၣ် ယံာ်တ့ၢ်တစဲးလံ. ပှၤတနီၤနီၤဆိကမိၣ်ဝဲဒၣ်လၢ မိၤၡ့တကြၢးကဲခိၣ်ကဲနၢ်, ဒီးအၤဟရိၣ်စ့ၢ်ကီး တကြၢးကဲပှၤလုၢ်တၢ်အခိၣ်ကျၢၢ်ဘၣ်လီၤ. ပှၤလၢဆိကမိၣ်တၢ်ဒ်အံၤတဂၤန့ၣ် မ့ၢ်ကိၤရးလီၤ. ဒၤသၣ်, အဘံရၣ်ဒီး ပှၤကဲခိၣ်တဖၣ်အကျါ ပှၤ ၂၅၀ န့ၣ်စ့ၢ်ကီး ဆိကမိၣ်ဝဲသ့ၣ်ဒ်န့ၣ်လီၤ. ပှၤတဖၣ်အံၤ ဟဲဆူမိၤၡ့အအိၣ်ခဲလၢာ်ဝံၤ တဲဝဲသ့ၣ်လၢ ‘ဘၣ်မနုၤအဃိလၢ သုအဲၣ်ဒိးဒိၣ်စိလၢပဖီခိၣ်န့ၣ်လဲၣ်.’ န့ၣ်လီၤ.

မိၤၡ့တဲဘၣ်ကိၤရးဒီး ပှၤပိာ်အခံတဖၣ်န့ၣ်လၢ ‘ခဲမုၢ်ဆ့ၣ်ဂီၤခီန့ၣ် ပာ်တၢ်နၢမူဆှိကဲၤလၢ သပၢၤမ့ၣ်အူပူၤဒီး ဟဲစိာ်တက့ၢ်. ဟဲဆူယဟိဝၤအဒဲစီဆှံန့ၣ်တက့ၢ်. မ့ၢ်ယဟိဝၤဃုထၢမတၤလဲၣ်န့ၣ် ပကွၢ်သကိးတက့ၢ်’ န့ၣ်လီၤ.

လၢခံတနံၤန့ၣ် ကိၤရးဒီးပှၤပိာ်အခံ ၂၅၀ န့ၣ် ဟဲဝဲသ့ၣ်ဆူ ဒဲစီဆှံန့ၣ်လီၤ. ပှၤလၢအဆီၣ်ထွဲအဝဲသ့ၣ်အခံ တဘျူးဂၤစ့ၢ်ကီး ဟဲပိာ်အဝဲသ့ၣ်အခံန့ၣ်လီၤ. ယဟိဝၤအသးထီၣ်ဒိၣ်မးန့ၣ်လီၤသၢၣ်. မိၤၡ့စံးဝဲဒၣ်လၢ ‘အိၣ်ယံၤယံၤဒီး ပှၤအၢပှၤသီတဖၣ်အံၤအဒဲတက့ၢ်. သုတထိးဘၣ် ပှၤတဖၣ်အံၤ အတၢ်ဖိတၢ်လံၤနီတခါ လၢသုစုန့ၣ်တဂ့ၤ’ န့ၣ်လီၤ. ဒီးပှၤတဖၣ်ဒိကနၣ်ဝဲသ့ၣ်လီၤ. အိၣ်ယံၤဝဲသ့ၣ်ဒီး ကိၤရး, ဒၤသၣ်, ဒီးအဘံရၣ် အဒဲတဖၣ်န့ၣ်လီၤ.

ဝံၤဒီး မိၤၡ့စံးဝဲဒၣ် ‘ယဟိဝၤဃုထၢမတၤလဲၣ်န့ၣ် သုကသ့ၣ်ညါလၢ တၢ်ဂ့ၢ်အံၤအဃိလီၤ. ဟီၣ်ခိၣ်န့ၣ် ကသ့ၣ်ဖးဒီး ကယူၢ်သံကွံာ် ပှၤအၢပှၤသီတဖၣ်အံၤန့ၣ်လီၤ.’

မိၡ့ကတိၤဝဲဒၣ်ဝံၤဒီး ဟီၣ်ခိၣ်ဟဲသ့ၣ်ဖးထီၣ်ဝဲဒၣ်လီၤ. ဒီးယူၢ်လီၤဝဲဒၣ် ကိၤရးအဒဲဒီး အတၢ်ဖိတၢ်လံၤတဖၣ်, ဒၤသၣ်, အဘံရၣ် ဒီးအပှၤတဖၣ်န့ၣ်လီၤ. ဝံၤဒီး ဟီၣ်ခိၣ်ကျၢၢ်တံာ်က့ၤအသးန့ၣ်လီၤ. ဖဲပှၤတဖၣ်နၢ်ဟူ ပှၤလၢဟီၣ်ခိၣ်ယူၢ်လီၤအီၤသ့ၣ်တဖၣ်ကိးဝဲအခါ ကိးပသူထီၣ်ဝဲသ့ၣ်ဒီးစံး, ‘ဃ့ၢ်သကိးတက့ၢ်! ဘၣ်တဘၣ် ဟီၣ်ခိၣ်ကယူၢ်လီၤဃုာ်ပှၤသ့ၣ်သ့ၣ်လီၤ’

ကိၤရးဒီးပှၤပိာ်အခံ ၂၅၀ တခီန့ၣ် အိၣ်ဒံးဒၣ်ဖဲဒဲစီဆှံ အကပၤန့ၣ်လီၤ. လၢတၢ်န့ၣ်အဃိ ယဟိဝၤဒုးဟဲလီၤမ့ၣ်အူဒီး အီၣ်ကွံာ်အဝဲသ့ၣ်ခဲလၢာ်, သံတုၤအလၢာ်လီၤ. ဝံၤအလီၢ်ခံ ယဟိဝၤစံးဘၣ် အၤဟရိၣ်အဖိခွါ အလၤဧစၢ်လၢ အကဟံးန့ၣ် ပှၤလၢအသံတဖၣ်အသပၢၤမ့ၣ်အူတဖၣ်ဝံၤ မၤကဲထီၣ်သးတူးအဘ့ၣ်ဘၣ် လၢကကျၢၢ်ဘၢတၢ်လုၢ်လီၢ်န့ၣ်လီၤ. တၢ်လုၢ်ဟံၣ်အတၢ်ကျၢၢ်ဘၢအံၤ မ့ၢ်တၢ်ဟ့ၣ်ပလီၢ်သးလၢ ပှၤအံၣ်စရ့လးဖိတဖၣ်လၢ မ့တမ့ၢ်ဘၣ် အၤဟရိၣ်, ဒီးအဖိတဖၣ်သၢပျၢၤ ပှၤတဘၣ်မၤ ပှၤလုၢ်တၢ်အဒိၣ်လၢယဟိဝၤအဂီၢ် နီတဂၤဘၣ်န့ၣ်လီၤ.

ဘၣ်ဆၣ်သနာ်က့ ယဟိဝၤအဲၣ်ဒိး တၢ်ဖျါဆှံလၢ ပှၤလၢအဝဲဃုထၢထီၣ် ဒ်ပှၤလုၢ်တၢ်အခိၣ်လၢအဂီၢ်န့ၣ် မ့ၢ်ဒၣ် အၤဟရိၣ် ဒီးအဖိခွါတဖၣ်လီၤ န့ၣ်လီၤ. လၢတၢ်န့ၣ်အဃိ စံးဘၣ်ဝဲမိၤၡ့, ‘မၢပှၤအံၣ်စရ့လးဖိ အဒူၣ်အခိၣ်တဂၤစုာ်စုာ် ဟဲစိာ်အနီၣ်ထိးဘိ တဘိစုာ်စုာ်န့ၣ်တက့ၢ်. လၢလ့ၤဝံအဒူၣ်အဂီၢ် မၢအၤဟရိၣ်ဟဲစိာ် အနီၣ်ထိးဘိန့ၣ်လီၤ. ဝံၤဒီး နီၣ်ထိးဘိတဖၣ်အံၤ တခါစုာ်စုာ်န့ၣ် ပာ်အီၤလၢ ဒဲစီဆှံအပူၤ, လၢတလါစီဆှံအမဲာ်ညါန့ၣ်တက့ၢ်. ပှၤလၢယဃုထၢအီၤလၢ ပှၤလုၢ်တၢ်အခိၣ်န့ၣ် အနီၣ်ထိးဘိ ကဖီထီၣ်ဝဲဒၣ်အဖီတဖၣ်လီၤ.

လၢခံတဂီၤန့ၣ်, ကွၢ်တဘီ, မိၤၡ့ထံၣ် အၤဟရိၣ်အနီၣ်ထိးဘိ ဖီထီၣ်ဒ်အံၤ ဒီးသၣ်ထီၣ်ဝဲၡၤကးသၣ်မံဘီတဖၣ်လီၤ. ဘၣ်မနုၤအဃိ ယဟိဝၤဒုးဖီထီၣ် အၤဟရိၣ်အနီၣ်ထိးဘိဒ်အံၤလဲၣ်န့ၣ် သုသ့ၣ်ညါလံဧါ.