မိၤၡ့တီၢ်လၢၢ်

အနံၣ် ၁၀, အနံၣ် ၂၀, အနံၣ် ၃၀, ၃၉ နံၣ်, တနံၣ်ဝံၤတနံၣ်လဲၤပူၤကွံာ်တ့ၢ်ဝဲလံ. ပှၤအံၣ်စရ့လးဖိတဖၣ် အိၣ်ဒၣ်လၢပှၢ်ပူၤဒံးလီၤ. ဘၣ်ဆၣ်သနာ်က့ ဒီဆၢကတီၢ်ညါအံၤ ယဟိဝၤကွၢ်ထွဲအပှၤဂီၢ်မုၢ်အခံန့ၣ်လီၤ. လုၢ်အီၣ်လုၢ်အီအဝဲသ့ၣ်လၢ ကိၣ်မၤနၤန့ၣ်လီၤ. လၢမုၢ်ဆါခီန့ၣ်နဲၣ်အီၤကျဲလၢ တၢ်အၢၣ်အထူၣ်, ဒီးလၢမုၢ်နၤတခီ လၢမ့ၣ်အူထူၣ်န့ၣ်လီၤ. နံၣ်တဖၣ်အံၤဒီကတီၢ်ညါန့ၣ် အတၢ်ကူတၢ်ကၤတဖၣ် တယာ်ဘၣ်. အခီၤတဖၣ်စ့ၢ်ကီး တကဲထီၣ်အပူၤလီၢ်ဘၣ်.

အခဲအံၤ ဟးထီၣ်ဝဲသ့ၣ်လၢအဲၤကူပတူးန့ၣ် အိၣ်တုၤလံအနံၣ် ၄၀, လါအဆိကတၢၢ်တလါန့ၣ်လံလီၤ. ပှၤအံၣ်စရ့လးဖိတဖၣ် သူၣ်လီၤကဒီးအဒဲဖဲကၤဒ့ၣ်န့ၣ်လီၤ. လၢအပူၤတ့ၢ်အနံၣ် ၄၀ ဃၣ်ဃၣ်န့ၣ် တၢ်လီၢ်လၢတၢ်ဒုးလဲၤ ပှၤကွၢ်ခူသူၣ်တၢ်ဖိ ၁၂ ဂၤအလီၢ်န့ၣ် ဖဲအံၤလီၤ. မိၤၡ့အဝဲၢ်မုၣ်မံးရယၣ်န့ၣ်သံတ့ၢ်ဝဲဒၣ်ဖဲ ကၤဒ့ၣ်န့ၣ်လီၤ. ဒ်လၢညါတဘျီအသိးန့ၣ် ခဲအံၤစ့ၢ်ကီးကဲထီၣ် တၢ်ကီတၢ်ခဲန့ၣ်လီၤ.

ပှၤတဖၣ် မၤထံတန့ၢ်ဘၣ်အဃိ လဲၤကဒူးကဒ့ၣ်တၢ်လၢမိၤၡ့အအိၣ် ဒ်အံၤလီၤ. ‘ပမ့ၢ်သံတ့ၢ်ဆိဆိတခီကဂ့ၤဝဲလီၤ. ဘၣ်မနုၤအဃိ နထုးထီၣ်ပှၤလၢကီၢ် အဲၤကူပတူးအပူၤဝံၤ ဟဲကိးပှၤဆူ တၢ်ကီတၢ်ခဲအပူၤ လၢတၢ်မုၢ်တၢ်ဘိမဲထီၣ်တသ့ဘၣ်အပူၤန့ၣ်လဲၣ်. ဖဲအံၤန့ၣ် ဘုတအိၣ်ဘၣ်, ချၢၣ်ဒၢသၣ်တအိၣ်ဘၣ်. စပံးသၣ်ဒီး သလဲသၣ်စ့ၢ်ကီး တအိၣ်ဘၣ်. ထံအီဒၣ်လဲာ်တအိၣ်ဝဲဘၣ်.’

မိၤၡ့ဒီးအၤဟရိၣ်န့ၣ် လဲၤဆူဒဲစီဆှံဒီး ဃ့ဘါထုကဖၣ်တၢ်အခါ ယဟိဝၤစံးမိၤၡ့, ‘ဒုးစူးရိအိၣ်ဖှိၣ်ပှၤတဖၣ်တက့ၢ်. လၢအဝဲသ့ၣ်ခဲလၢာ်အမဲာ်ညါ ကတိၤတၢ်ဒီးလၢၢ်န့ၣ်တက့ၢ်. ထံကဟဲထီၣ် လၢလၢပှဲၤပှဲၤလၢ ပှၤကညီဒီး ဆၣ်ဖိကီၢ်ဖိတဖၣ်အဂီၢ်န့ၣ်လီၤ.’

တုၤနုၤတစု မိၤၡ့စူးရိအိၣ်ဖှိၣ် ပှၤတဖၣ်ဝံၤဒီး စံးဝဲဒ်အံၤလီၤ. ‘ပှၤလၢတၢ်နာ်တအိၣ်ဒီး ယွၤအဖီခိၣ်တဖၣ်ဧၢ, ဒိကနၣ်တက့ၢ်. အၤဟရိၣ်ဒီးယၤန့ၣ် ပကဘၣ်မၤဟးထီၣ်ထံလၢသုဂီၢ် လၢလၢၢ်အံၤအပူၤဧါ.’ ဝံၤဒီး တီၢ်ဝဲဒၣ်လၢၢ်လၢနီၣ်ထိးဘိန့ၣ် ခံဘီလီၤ. ထဲန့ၣ်ဒီး ထံဟးထီၣ်လၢလၢၢ်ပူၤဒ် ထံဖိကျိဟဲယွၤလီၤဝဲအသိး န့ၣ်လီၤ. ပှၤကညီဒီးဆၣ်ဖိကီၢ်ဖိတဖၣ်ကအီအဂီၢ် မၤန့ၢ်ထံအလၢအပှဲၤန့ၣ်လီၤ.

ဘၣ်ဆၣ် ယဟိဝၤန့ၣ်သးထီၣ် မိၤၡ့ဒီးအၤဟရိၣ်န့ၣ်လီၤ. ဘၣ်မနုၤအဃိလဲၣ် နသ့ၣ်ညါဧါ. မ့ၢ်လၢ မိၡ့ဒီးအၤဟရိၣ်စံးဝဲဒၣ် သါဝဲသ့ၣ် ကမၤဟးထီၣ်ထံလၢလၢၢ်ပူၤ အဃိန့ၣ်လီၤ. နီၢ်နီၢ်တခီ ယဟိဝၤဒုးဟးထီၣ်န့ၢ်အီၤလီၤ. မ့ၢ်လၢမိၤၡ့ဒီးအၤဟရိၣ် တကတိၤတၢ်တီတီလိၤလိၤ ဘၣ်ဃးတၢ်ဂ့ၢ်အံၤအဃိ ယွၤစံးဘၣ်အဝဲသ့ၣ်လၢ ကသိၣ်ဃီၣ်အီၤန့ၣ်လီၤ. ယွၤစံးဝဲဒၣ်လၢ, ‘သုတဘၣ်ကဲခိၣ်ကဲနၢ်ဒီး ဆှၢနုာ်ယပှၤဂီၢ်မုၣ်ဆူ ကီၢ်ကနၤဧၣ်အပူၤဘၣ်.’

တယံာ်ဘၣ်ဒီး ပှၤအံၣ်စရ့လးဖိတဖၣ် ဟးထီၣ်ဝဲဒၣ်လၢ တၢ်လီၢ်ကၤဒ့ၣ်န့ၣ်လီၤ. တယံာ်ဘၣ်ဒီး ဟဲတုၤဝဲဆူကစၢၢ်ဃိရ့းန့ၣ်လီၤ. အၤဟရိၣ်သံဝဲဒၣ်လၢ ကစၢၢ်ဃိရ့းအဒီခိၣ်န့ၣ်လီၤ. ဖဲအသံဝဲအခါ အသးအိၣ်လံ ၁၂၃ နံၣ်န့ၣ်လီၤ. ပှၤအံၣ်စရ့လးဖိတဖၣ် သးအုးဝဲဒိၣ်မးအဃိ အဝဲသ့ၣ်ခဲလၢာ် ဟီၣ်လၢအၤဟရိၣ်အဂီၢ် အသီ ၃၀ န့ၣ်လီၤ. အၤဟရိၣ်အဖိခွါ အလၤဧစၢ် ကဲထီၣ်ပှၤအံၣ်စရ့လးဖိ အပှၤလုၢ်တၢ်အခိၣ်အဒိၣ် လၢခံတဂၤန့ၣ်လီၤ.