တၢ်မၤလိ ၂၄
အဝဲသ့ၣ်တတီဒီး အတၢ်အၢၣ်လီၤဘၣ်
ယဟိဝၤယွၤ တဲဘၣ်စီၤမိၤၡ့လၢ ‘ဟဲထီၣ်လၢ ကစၢၢ်ခိၣ်. ယကကွဲးလီၤ ယတၢ်သိၣ်တၢ်သီလၢ လၢၢ်ဘ့ၣ်ဘၣ်တဖၣ်အလိၤ ဒီးယကဟ့ၣ်လီၤနၤ.’ စီၤမိၤၡ့ လဲၤထီၣ်ဆူ ကစၢၢ်ခိၣ် ဒီးအိၣ်ဝဲဖဲန့ၣ် အနံၤလွံၢ်ဆံ ဒီးအနၤလွံၢ်ဆံ. ဖဲစီၤမိၤၡ့အိၣ်ဝဲဖဲန့ၣ် အဆၢကတီၢ် ယဟိဝၤယွၤကွဲးလီၤဝဲ တၢ်မၤလိာ်အဘီတဆံလၢ လၢၢ်ဘ့ၣ်ဘၣ်ခံဘ့ၣ်အလိၤ ဒီးဟ့ၣ်လီၤဝဲစီၤမိၤၡ့.
လၢခံန့ၣ် ပှၤအံၣ်စရ့လးဖိတဖၣ် ဆိကမိၣ်ထီၣ်ဝဲလၢ စီၤမိၤၡ့ ပာ်တ့ၢ်ကွံာ်အဝဲသ့ၣ်လံ. အဃိ အဝဲသ့ၣ် တဲဘၣ်စီၤအၤဟရိၣ်လၢ ‘ပလိၣ်ဘၣ်ပှၤလၢ ကကဲထီၣ်ပခိၣ်ပနၢ်တဂၤ အဃိ တ့ထီၣ်န့ၢ်ပှၤ ယွၤတဂၤမီၤ.’ စီၤအၤဟရိၣ် တဲဘၣ်အဝဲသ့ၣ်လၢ ‘ဟဲစိာ်သုထူဆူ ယအိၣ်.’ ဝံၤဒီး စီၤအၤဟရိၣ် တ့ထီၣ်ဝဲ ကျီၢ်ဖိတဒုလၢထူ. ဒီးပှၤဂီၢ်မုၢ်တဖၣ်အံၤ တဲဝဲလၢ ‘ကျီၢ်ထူဖိတဒုအံၤ မ့ၢ်ပယွၤလၢ အထုးထီၣ်ပှၤလၢ ကီၢ်အဲၤကူပတူးအပူၤ.’ အဃိ အဝဲသ့ၣ် ဘူၣ်ထီၣ်ဘါထီၣ်ဝဲ ကျီၢ်ထူဖိတဒုအံၤဒီး မၤဝဲဘူၣ်ဧိၤပွဲဧိၤ. ပှၤအံၣ်စရ့လးဖိတဖၣ် မၤဝဲဒ်အံၤန့ၣ်မ့ၢ်ဒၣ် အဝဲသ့ၣ်မၤကမၣ် ယဟိဝၤယွၤ. လၢတၢ်ဂ့ၢ်မနုၤအဃိလဲၣ်. မ့ၢ်လၢအဝဲသ့ၣ် အၢၣ်လီၤအီလီၤတ့ၢ်ဝဲလၢ ကဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤ. ဘၣ်ဆၣ် ခဲအံၤန့ၣ် အဝဲသ့ၣ် တတီဒီး အတၢ်အၢၣ်လီၤအီလီၤလၢၤဘၣ်.
ယဟိဝၤယွၤ ထံၣ်ဝဲတၢ်လၢ ပှၤအံၣ်စရ့လးဖိတဖၣ်မၤဝဲ. ဒီးကစၢ်ယွၤ တဲဘၣ်စီၤမိၤၡ့လၢ ‘က့ၤလီၤဆူ ပှၤအံၣ်စရ့လးဖိတဖၣ်အအိၣ်. ခဲအံၤ အဝဲသ့ၣ်တဒိကနၣ် ယကလုၢ်လၢၤဘၣ် ဒီးဘူၣ်ထီၣ်ဘါထီၣ်ဝဲ ယွၤလၢအကမၣ်လံ.’ စီၤမိၤၡ့ ကရီက့ၤလီၤကဒါက့ၤလၢ ကစၢၢ်အခီၣ်ထံး ဒီးစိာ်ဃုာ်ဝဲဒီး လၢၢ်ဘ့ၣ်ဘၣ်ခံဘ့ၣ်.
ဖဲစီၤမိၤၡ့ ဟဲက့ၤလီၤဘူးထီၣ်ဒီး ပှၤအံၣ်စရ့လးဖိ အိၣ်တၢ်လီၢ်အခါ အဝဲနၢ်ဟူဘၣ်ဝဲ ပှၤဂီၢ်မုၢ်တဖၣ် သးဝံၣ်တၢ်. ဝံၤဒီး စီၤမိၤၡ့ ထံၣ်ဘၣ်ဝဲလၢ အဝဲသ့ၣ်ဂဲၤကလံၣ် ဒီးဘါထီၣ်ဝဲကျီၢ်ထူဖိ. ဖဲန့ၣ်အခါ စီၤမိၤၡ့ သးပှံၢ်ထီၣ်တၢ်ဒိၣ်မး အဃိ အဝဲတၢၤလီၤဝဲ လၢၢ်ဘ့ၣ်ဘၣ်ခံဘ့ၣ်န့ၣ် လၢဟီၣ်ခိၣ်လိၤ. ဒီးလၢၢ်ဘ့ၣ်ဘၣ်န့ၣ် သ့ၣ်ဖးဝဲ. တဘျီဃီန့ၣ် စီၤမိၤၡ့ မၤဟးဂီၤကွံာ်ဝဲ ကျီၢ်ထူဖိတဒု. ဒီးစီၤမိၤၡ့ သံကွၢ်စီၤအၤဟရိၣ်လၢ ‘ဒ်သိးနကမၤ တၢ်အၢတၢ်သီ ထဲအံၤညါန့ၣ် ပှၤဂီၢ်မုၢ်တဖၣ် တဲဘၣ်နၤ ဒ်လဲၣ်.’ ဒီးစီၤအၤဟရိၣ် တဲဘၣ်စီၤမိၤၡ့လၢ ‘တဘၣ်သးဒိၣ်ထီၣ်တၢ်တဂ့ၤ. ပှၤဂီၢ်မုၢ်တဖၣ်အံၤ အတၢ်ပာ်သူၣ်ပာ်သး အိၣ်ဒ်လဲၣ်န့ၣ် နသ့ၣ်ညါဂ့ၤဂ့ၤ. အဝဲသ့ၣ်လီကီဝဲယွၤတဂၤအဃိ ယတ့ၢ်လီၤထူလၢ မ့ၣ်အူပူၤ ဒီးကျီၢ်ဖိတဒု ဟဲထီၣ်ဝဲ.’ ဘၣ်ဆၣ် စီၤအၤဟရိၣ် တကြၢးမၤဝဲဒ်အံၤဘၣ်. စီၤမိၤၡ့ လဲၤထီၣ်ကဒါက့ၤဆူ ကစၢၢ်ခိၣ် ဒီးဃ့ကညးဝဲ ဒ်သိး ယဟိဝၤယွၤ ကပျၢ်ကွံာ် ပှၤဂီၢ်မုၢ်တဖၣ်အံၤ အတၢ်ဒဲးဘးအဂီၢ်.
ယဟိဝၤယွၤ ပျၢ်ကွံာ်ပှၤလၢ အသးအိၣ်ဒိကနၣ် အကလုၢ်တဖၣ် အတၢ်ကမၣ်. လၢတၢ်န့ၣ်အဃိ ပှၤဂီၢ်မုၢ်တဖၣ်အံၤ ကဘၣ်ဒိကနၣ် စီၤမိၤၡ့ အကလုၢ်န့ၣ် မ့ၢ်တၢ်လၢအရ့ဒိၣ်လၢ အဝဲသ့ၣ်အဂီၢ်.
“ဖဲနမၤ တၢ်အၢၣ်လီၤဒီး ကစၢ်ယွၤ တဘျီဂ့ၤ တဘျီဂ့ၤအခါ တဘၣ် မၤယံာ်မၤနီၢ်နသးလၢ နကမၤလၢပှဲၤအီၤ တဂ့ၤ. ကစၢ်ယွၤ တဘၣ်သူၣ်ဘၣ်သးဝဲ ပှၤဟးဂီၤဖိဘၣ်. တၢ်လၢနအၢၣ်လီၤန့ၣ် မၤလၢပှဲၤအီၤတက့ၢ်.”—စံၣ်တဲၤတဲလီၤတၢ် ၅:၄