တၢ်မၤလိ ၇၂
ယ့ၣ်ၡူးဒိၣ်ထီၣ်သီ
စီၤယိၤသး ဒီးနီၢ်မၤရံအိၣ်ဝဲလၢ ဝ့ၢ်နစၤရ့းအပူၤ. အဝဲသ့ၣ်အိၣ်ဒီးယ့ၣ်ၡူး ဒီးအဖိမုၣ်ဖိခွါလၢ အဂၤတဖၣ်. စီၤယိၤသး လုၢ်အီၣ်လုၢ်အီ အဟံၣ်ဖိဃီဖိ ခီဖျိ အမၤဝဲပှၤစုသ့ဖိ အတၢ်မၤ. ဒီးစီၤယိၤသး သိၣ်လိအဖိတဖၣ် ဘၣ်ဃးဒီး ယဟိဝၤယွၤ ဒီးအတၢ်သိၣ်တၢ်သီအဂ့ၢ်. ညီနုၢ်န့ၣ် စီၤယိၤသး အဟံၣ်ဖိဃီဖိ တဒူၣ်အံၤ လဲၤဝဲလၢဘူၣ်ဘျီၣ် ဒ်သိး ကဘူၣ်ထီၣ်ဘါထီၣ်တၢ်အဂီၢ်. တကးဒံးဘၣ် ကိးနံၣ်ဒဲးန့ၣ် အဝဲသ့ၣ် လဲၤဝဲလၢ ဝ့ၢ်ယရူၤၡလ့ၣ်ဒ်သိး ကမၤဝဲ ဘူၣ်လဲၤကပာ်အဂီၢ်.
ဖဲယ့ၣ်ၡူးအိၣ် ၁၂ နံၣ်အခါ စီၤယိၤသးလဲၤကိးဝဲ အဟံၣ်ဖိဃီဖိ လၢဝ့ၢ်ယရူၤၡလ့ၣ် ဒ်အလဲၤညီနုၢ်ဝဲအသိး. ဝ့ၢ်အံၤပှဲၤဝဲဒီး ပှၤဂီၢ်မုၢ်တဖၣ်လၢ အဟဲမၤဘူၣ်လဲၤကပာ်. ဖဲအဝဲသ့ၣ် မၤဝဲဘူၣ်အံၤ ဝံၤအလီၢ်ခံ စီၤယိၤသးဒီးနီၢ်မၤရံ က့ၤကဒါလၢအဟံၣ် တပူၤဃီဒီးပှၤအဂၤတဖၣ်. ဖဲအဝဲသ့ၣ် က့ၤလၢကျဲအခါ အဝဲသ့ၣ် ဆိကမိၣ်ဝဲလၢ အဖိခွါယ့ၣ်ၡူးပၣ်ဃုာ်လၢပှၤကျါ. ဘၣ်ဆၣ် ဖဲစီၤယိၤသးဒီးနီၢ်မၤရံ ဃုကွၢ်ဝဲ ယ့ၣ်ၡူးလၢ အဘူးအတံၢ် အကျါအခါ အဝဲသ့ၣ်တထံၣ် ယ့ၣ်ၡူးဘၣ်.
စီၤယိၤသးဒီးနီၢ်မၤရံ လဲၤကဒါလၢ ဝ့ၢ်ယရူၤၡလ့ၣ် ဒီးအဝဲသ့ၣ်ဃုဝဲ ယ့ၣ်ၡူးလၢ သၢနံၤအတီၢ်ပူၤ. လၢခံ စီၤယိၤသးဒီးနီၢ်မၤရံ လဲၤဃုဝဲ ယ့ၣ်ၡူးလၢ တၢ်လုၢ်ဟံၣ်ပူၤ. အဝဲသ့ၣ်ထံၣ်ဝဲ ယ့ၣ်ၡူးဆ့ၣ်နီၤလၢ သရၣ်တဖၣ် အခၢၣ်သး ဒီးဒိကနၣ်အဝဲသ့ၣ် ဒီးသံကွၢ်အဝဲသ့ၣ် တၢ်သံကွၢ်လၢ အဂ့ၤဒီဒူၣ်. ဖဲသရၣ်တဖၣ် သံကွၢ်ဝဲ တၢ်သံကွၢ်တဖၣ်အခါ မ့ၢ်လၢ ယ့ၣ်ၡူးစံးဆၢက့ၤ အဝဲသ့ၣ် သ့ဂ့ၤဂ့ၤအဃိ အဝဲသ့ၣ် ကမၢကမၣ်ဝဲဒိၣ်မး. ဒီးအဝဲသ့ၣ် သ့ၣ်ညါဝဲလၢ ယ့ၣ်ၡူးနၢ်ပၢၢ်ဝဲ ယဟိဝၤယွၤ အတၢ်သိၣ်တၢ်သီဂ့ၤဂ့ၤ.
စီၤယိၤသးဒီးနီၢ်မၤရံ သူၣ်ကိၢ်သးဂီၤတၢ်လၢ ယ့ၣ်ၡူးအဂီၢ်ဒိၣ်မး. နီၢ်မၤရံတဲဝဲလၢ ‘ဖိခွါဧၢ, ပလူၤဃုနၤလၢ တၢ်လီၢ်ဝးဝးညါ. ဘၣ်မနုၤအဃိ နမၤဒ်အံၤလဲၣ်.’ ယ့ၣ်ၡူး တဲက့ၤအီၤလၢ ‘ယဘၣ်အိၣ်လၢ ယပၢ်အဟံၣ်ပူၤန့ၣ် သုတသ့ၣ်ညါဧီၤ.’
ယ့ၣ်ၡူးက့ၤလၢ ဝ့ၢ်နစၤရ့း ဃုာ်ဒီးအမိၢ်အပၢ်. ဒီးစီၤယိၤသး သိၣ်လိ ယ့ၣ်ၡူးလၢ ပှၤစုသ့ဖိအတၢ်မၤ. နဆိကမိၣ် ယ့ၣ်ၡူးန့ၣ် အကဲပှၤသးစၢ် ဒ်လဲၣ်တဂၤလဲၣ်. ဖဲယ့ၣ်ၡူးဒိၣ်ထီၣ်ဝဲအခါ အတၢ်ကူၣ်သ့စ့ၢ်ကီး အါထီၣ်ဝဲ. ဒီးကစၢ်ယွၤ ဒီးပှၤကညီ ဘၣ်သူၣ်ဘၣ်သးအီၤ.
“အိ ယကစၢ်ယွၤဧၢ, ယမၤနတၢ်ဘၣ်သးန့ၣ် မၤသးခုယသးဒိၣ်မး. ဒီးနတၢ်သိၣ်တၢ်သီန့ၣ် အိၣ်လၢယသးကံၢ်ပူၤလီၤ.”—စံးထီၣ်ပတြၢၤ ၄၀:၈