တၢ်မၤလိ ၇၅
မုၣ်ကီၤလံၢ် လ့ပစီ ယ့ၣ်ၡူး
ဖဲယ့ၣ်ၡူးဘျၢထံ ဝံၤအလီၢ်ခံ ယွၤအသးစီဆှံ ဆှၢထီၣ်အီၤလၢ ပှၢ်မုၢ်ကနၢအပူၤ. ယ့ၣ်ၡူး တအီၣ်ဘၣ်တၢ်အိၣ်ဝဲ အသီ ၄၀ လံအဃိ အဝဲအဲၣ်ဒိး အီၣ်တၢ်ဒိၣ်မး. မုၣ်ကီၤလံၢ် ဟဲလ့ပစီ ယ့ၣ်ၡူး ဒီးတဲဝဲလၢ “နမ့မ့ၢ် ကစၢ်ယွၤအဖိခွါန့ၣ် မၢလၢၢ်တဖၣ်အံၤ ကဲထီၣ်ကိၣ်သၢၤ.” ဘၣ်ဆၣ် ယ့ၣ်ၡူးသူဝဲ လံာ်စီဆှံအဆၢဒီးတဲက့ၤအီၤလၢ ‘တၢ်ကွဲးအသးအိၣ်ဝဲလၢ ပှၤဟီၣ်ခိၣ်ဖိ တမူထဲလၢ ကိၣ်အဃိဘၣ်. ဒ်သိး ပှၤကမူဝဲအဂီၢ် ပှၤကဘၣ်ဒိကနၣ် ယဟိဝၤယွၤ အတၢ်ကတိၤကိးထံၣ်ဒဲး.’
မုၣ်ကီၤလံၢ် လ့ပစီကဒီး ယ့ၣ်ၡူး ဒီးတဲဝဲလၢ ‘နမ့မ့ၢ် ကစၢ်ယွၤအဖိခွါ နီၢ်ကီၢ်န့ၣ် ဖုလီၤလၢ တၢ်လုၢ်ဟံၣ်အဖီခိၣ်သၢၤ. တၢ်ကွဲးအသးအိၣ်ဝဲလၢ ကစၢ်ယွၤကဆှၢလီၤ အမူခိၣ်ကလူးတဖၣ်လၢ ကဟဲမၤစၢၤနၤအဂီၢ်.’ ဘၣ်ဆၣ် ယ့ၣ်ၡူးသူဝဲ လံာ်စီဆှံအဆၢ ဒီးတဲဝဲလၢ ‘တၢ်ကွဲးအသးအိၣ်ဝဲလၢ နတဘၣ်မၤကွၢ် ယဟိဝၤယွၤတဂ့ၤ.’
တဘျီအံၤ မုၣ်ကီၤလံၢ်ဒုးနဲၣ် ယ့ၣ်ၡူးလၢ ဘီမုၢ်ခဲလၢာ်လၢ အအိၣ်လၢဟီၣ်ခိၣ်ချၢ, တၢ်ထူးတၢ်တီၤ ဒီးဘီမုၢ်တဖၣ် အလၤကပီၤခဲလၢာ် ဒီးတဲဝဲလၢ ‘နမ့ၢ်ဘါထီၣ်ယၤ ထဲတဘျီန့ၣ် ယကဟ့ၣ်လီၤနၤဘီမုၢ် ဒီးဘီမုၢ်တဖၣ် အလၤကပီၤခဲလၢာ်.’ ဘၣ်ဆၣ် ယ့ၣ်ၡူးတဲဆၢက့ၤဝဲလၢ ‘မုၣ်ကီၤလံၢ်ဧၢ, ဟးထီၣ်ကွံာ်.တၢ်ကွဲးအသးအိၣ်ဝဲလၢ နကဘၣ်ဘူၣ်ထီၣ်ဘါထီၣ်ထဲ ယဟိဝၤယွၤတဂၤဧိၤ.’
ဝံၤဒီး မုၣ်ကီၤလံၢ် ဟးထီၣ်ကွံာ်ဝဲ. ဒီးမူခိၣ်ကလူးတဖၣ် ဟဲလီၤ ဒီးဒုးအီၣ်ယ့ၣ်ၡူးလၢ တၢ်အီၣ်တၢ်အီ. ဖဲန့ၣ်ဝံၤအလီၢ်ခံ ယ့ၣ်ၡူးစံၣ်တဲၤတဲလီၤ ဘီမုၢ်တၢ်သးခုကစီၣ် လၢအမ့ၢ် တၢ်မၤလၢ ယဟိဝၤယွၤမၢအမၤဝဲ. တၢ်ဂ့ၢ်လၢ ယ့ၣ်ၡူးစံၣ်တဲၤတဲလီၤဝဲန့ၣ် ပှၤဂီၢ်မုၢ်ဒိကနၣ်ဝဲ မုာ်ဒိၣ်မး ဒီးအဝဲသ့ၣ်ဟးပိာ်ဝဲ ယ့ၣ်ၡူးအခံလၢ တၢ်လီၢ်ကိးတီၤဒဲး.
“အဝဲမ့ၢ် [တၢ်ဝံတၢ်နါ] တဂၤအဃိ အဝဲတဲလံၣ်တဲလီတၢ်လီၤ. အဝဲ မ့ၢ်ပှၤလံၣ်တၢ်လီတၢ်တဂၤ ဒီးတၢ်လံၣ်တၢ်လီအပၢ်လီၤ.”—ယိၤဟၣ် ၈:၄၄