တၢ်မၤလိ ၇၆
ယ့ၣ်ၡူးမၤကဆှီထီၣ် တၢ်လုၢ်ဟံၣ်
ဖဲ ခ.န. ၃၀ တၢ်ကိၢ်ထီၣ်သီ အဆၢကတီၢ်န့ၣ် ယ့ၣ်ၡူးလဲၤဝဲလၢ ဝ့ၢ်ယရူၤၡလ့ၣ်. ပှၤဂီၢ်မုၢ်တဖၣ် ဟဲဝဲလၢဝ့ၢ်အံၤ ဒ်သိးကမၤဝဲ ဘူၣ်လဲၤကပာ်အဂီၢ်. ဖဲပှၤမၤမူးပွဲအံၤအခါ အဝဲသ့ၣ်ဟဲလုၢ်ထီၣ်ဝဲ ဆၣ်ဖိကီၢ်ဖိလၢ တၢ်လုၢ်ဟံၣ်. ပှၤတနီၤဟဲစိာ်ဝဲ ဆၣ်ဖိကီၢ်ဖိ ဒီးအဂၤတနီၤန့ၣ် ပှ့ၤဝဲဆၣ်ဖိကီၢ်ဖိလၢ ဝ့ၢ်ယရူၤၡလ့ၣ်.
ဖဲယ့ၣ်ၡူးလဲၤနုာ်လီၤလၢ တၢ်လုၢ်ဟံၣ်ပူၤအခါ အဝဲထံၣ်ဝဲပှၤဆါ ဆၣ်ဖိကီၢ်ဖိတဖၣ်ဖဲန့ၣ်. အဝဲသ့ၣ်ဆါတၢ်ပှ့ၤတၢ်လၢ ယဟိဝၤယွၤ အတၢ်လုၢ်ဟံၣ်အပူၤ. ယ့ၣ်ၡူးမၤဝဲဒ်လဲၣ်. ယ့ၣ်ၡူးတ့ထီၣ် နီၣ်ဖျ့လၢပျံၤတဖၣ် ဒီးအနီဟးထီၣ်ကွံာ် သိဒီးကျီၢ်လၢ တၢ်လုၢ်ဟံၣ်ပူၤ. အဝဲမၤတကျၢၢ်ကွံာ် စီၢ်နီၤခိၣ်တဖၣ် ဒီးလူလီၤဝဲ ပှၤခီလဲစ့ဖိတဖၣ်အစ့လၢ ဟီၣ်ခိၣ်လိၤ. ယ့ၣ်ၡူးတဲဘၣ် ပှၤဆါထိၣ်လွံၢ်တဖၣ်လၢ ‘ထုးထီၣ်ကွံာ် တၢ်သ့ၣ်တဖၣ်အံၤခဲလၢာ်, ယပၢ်အဟံၣ်န့ၣ် တဘၣ်ဒုးကဲထီၣ်အီၤလၢ တၢ်ဆါတၢ်ပှ့ၤ အလီၢ်လၢၤတဂ့ၤ.’
ဘၣ်ဃးဒီးတၢ်လၢ ယ့ၣ်ၡူးမၤဝဲလၢ တၢ်လုၢ်ဟံၣ်ပူၤန့ၣ် ပှၤဂီၢ်မုၢ်တဖၣ် ကမၢကမၣ်ဝဲ. ယ့ၣ်ၡူးအပျဲၢ်အဘီၣ်တဖၣ် သ့ၣ်နီၣ်ထီၣ်က့ၤ ဝံအတၢ်ကတိၤလၢ အတဲ ဘၣ်ဃးဒီး မ့းၡံအၤလၢ ‘ယတၢ်သးဆူၣ်လၢ ယဟိဝၤယွၤဟံၣ်အဂီၢ်န့ၣ် အိၣ်ပှဲၤလၢယပူၤ.’
လၢခံ ဖဲ ခ.န. ၃၃ န့ၣ် ယ့ၣ်ၡူးမၤကဆှီထီၣ်က့ၤ တၢ်လုၢ်ဟံၣ် လၢခံတဘျီ. ပှၤလၢအတပာ်ကဲ အပါအဟံၣ်ဘၣ်န့ၣ် ယ့ၣ်ၡူးနီဟးထီၣ်ကွံာ် အဝဲသ့ၣ်.
“သုကဲကစၢ်ယွၤအကုၢ် ဒီးတၢ်ထူးတၢ်တီၤအကုၢ် တကတီၢ်ဃီတသ့ဘၣ်.”—လူၤကၣ် ၁၆:၁၃