ပိာ်မုၣ်တဂၤ လဲၤဒၢၣ်ထံလၢ ထံကမျၢ

ဖဲပှၤမၤ ဘူၣ်လဲၤကပာ် ဝံၤအလီၢ်ခံ ယ့ၣ်ၡူး ဒီးအပျဲၢ်အဘီၣ်တဖၣ်​ က့ၤဝဲလၢ ကီၢ်ကၤလံၤလါ ဒီးဘၣ်ခီဂာ်ဝဲ ဝ့ၢ်ၡၤမရံ. ယ့ၣ်ၡူး ဒီးအပျဲၢ်အဘီၣ်တဖၣ်​ အိၣ်ပတုာ်ဝဲလၢ စီၤယၤကိာ် အထံကမျၢလၢ အအိၣ်ဘူးဒီး ဝ့ၢ်စံဃၢ်. ဖဲယ့ၣ်ၡူးအိၣ်ဘှံးဝဲ ဖဲန့ၣ်အခါ အပျဲၢ်အဘီၣ်တဖၣ်​ လဲၤပှ့ၤဝဲတၢ်အီၣ်တၢ်အီ လၢဝ့ၢ်ပူၤ.

ပိာ်မုၣ်တဂၤ ဟဲဒၢၣ်ထံလၢ ထံကမျၢ ဒီးဖဲန့ၣ်အခါ ယ့ၣ်ၡူးတဲအီၤလၢ “ဟ့ၣ်အီယၤထံမီၤ.” အတဲဘၣ်​ ယ့ၣ်ၡူးလၢ ‘ဘၣ်မနုၤအဃိ နတဲတၢ်ဒီးယၤလဲၣ်. ယမ့ၢ်ပှၤၡၤမရံမုၣ်. ပှၤယူဒၤဖိန့ၣ်​ တတဲတၢ်ဒီး ပှၤၡၤမရံဖိဘၣ်.’ ယ့ၣ်ၡူး တဲက့ၤအီၤလၢ ‘နမ့ၢ်သ့ၣ်ညါယၤန့ၣ်​ နကဃ့အီယၤလၢထံ ဒီးယကဟ့ၣ်အီၤနၤ ထံမူ.’ ပိာ်မုၣ်တဂၤအံၤ သံကွၢ်အီၤလၢ ‘နအဲၣ်ဒိးတဲ အခီပညီဒ်လဲၣ်. နထံစဲၤလၢ နကဒၢၣ်ထံအဂီၢ်မး တအိၣ်ဘၣ်.’ ယ့ၣ်ၡူးတဲဝဲလၢ ‘ပှၤလၢအအီထံလၢ ယဟ့ၣ်အီအီၤန့ၣ်​ တအဲၣ်ဒိး အီကဒီးထံ နီတဘျီလၢၤဘၣ်.’ ပိာ်မုၣ်တဲက့ၤအီၤလၢ ‘ကစၢ်ဧၢ, ဟ့ၣ်ယၤလၢ ထံအဝဲန့ၣ်မီၤ.’

ဝံၤဒီး ယ့ၣ်ၡူးတဲဘၣ်အီၤလၢ ‘ဟဲကိးနဝၤဖဲအံၤ.’ ပိာ်မုၣ်တဲဘၣ်အီၤလၢ “ယဝၤတအိၣ်ဘၣ်.” ယ့ၣ်ၡူးတဲဝဲလၢ ‘နတဲတၢ်န့ၣ်​ ဘၣ်တီတီလီၤ. နဝၤအိၣ်ယဲၢ်ဆီလံ. ဒီးပိာ်ခွါလၢ နအိၣ်ဒီးအီၤခဲအံၤန့ၣ်​ တမ့ၢ်နဝၤဘၣ်.’ ပိာ်မုၣ်တဲဆၢက့ၤဝဲလၢ ‘နၤန့ၣ်​ နကဘၣ်မ့ၢ် ဝံတဂၤ. ယပှၤကလုာ်တဖၣ်နာ်ဝဲလၢ ပဘူၣ်ထီၣ်ဘါထီၣ်တၢ်လၢ ကစၢၢ်တဖျၢၣ်အံၤ အလိၤသ့. ဘၣ်ဆၣ်​ ပှၤယူဒၤဖိတဲဝဲလၢ ပကဘၣ်​ ဘူၣ်ထီၣ်ဘါထီၣ်တၢ် ထဲလၢဝ့ၢ်ယရူၤၡလ့ၣ်အပူၤ. ယသ့ၣ်ညါလၢ ဖဲမ့းၡံအၤ ဟဲဝဲအခါ အဝဲကသိၣ်လိပှၤလၢ ပကဘၣ်ဘူၣ်ထီၣ်ဘါထီၣ်​ ကစၢ်ယွၤဒ်လဲၣ်အဂ့ၢ်.’ ဝံၤဒီး ယ့ၣ်ၡူးတဲဘၣ်ပိာ်မုၣ်အံၤ တၢ်ဂ့ၢ်တခါလၢ အတတဲဘၣ်​ ပှၤနီတဂၤဒံးဘၣ်. အဝဲတဲဝဲလၢ ‘ယမ့ၢ်မ့းၡံအၤ.’

ပိာ်မုၣ်တဂၤအံၤ က့ၤကဒါက့ၤလၢ ဝ့ၢ်ပူၤလၢအချ့ ဒီးတဲဘၣ်​ ပှၤၡၤမရံဖိတဖၣ်လၢ ‘ယဆိကမိၣ်​ ယထံၣ်န့ၢ်မ့းၡံအၤလံ. အသ့ၣ်ညါယဂ့ၢ် ခဲလၢာ်ခဲဆ့. ဟဲပိာ်ယခံမီၤ, ပကလဲၤလၢအအိၣ်.’ အဝဲသ့ၣ်​ လဲၤပိာ်အခံလၢထံကမျၢ ဒီးဒိကနၣ်ဝဲ ယ့ၣ်ၡူးသိၣ်လိတၢ်.

ပှၤၡၤမရံဖိတဖၣ်​ မၢယ့ၣ်ၡူးအိၣ်တ့ၢ်လၢ အဝဲသ့ၣ်အဝ့ၢ်ပူၤ. ယ့ၣ်ၡူးသိၣ်လိတၢ်ဖဲန့ၣ်ခံသီ ဒီးပှၤအါဂၤစူၢ်က့ၤနာ်က့ၤအီၤ. အဝဲသ့ၣ်တဲဘၣ်​ ပှၤၡၤမရံမုၣ်လၢ ‘ပနၢ်ဟူပိာ်ခွါတဂၤအံၤ အတၢ်သိၣ်လိ ဝံၤဒီး ပသ့ၣ်ညါလၢ အဝဲမ့ၢ်ပှၤတဂၤလၢ အဟဲအုၣ်က့ၤခီၣ်က့ၤ ဟီၣ်ခိၣ်နီၢ်ကီၢ်.’