ယ့ၣ်ၡူးစံၣ်တဲၤတဲလီၤ ဘီမုၢ်တၢ်ကစီၣ်

ယ့ၣ်ၡူးဘျၢထံဝံၤ တယံာ်တမီၢ်န့ၣ်​ အစးထီၣ်​ စံၣ်တဲၤတဲလီၤဝဲလၢ “မူခိၣ်အဘီအမုၢ် ဟဲဘူးထီၣ်လံ.” ဖဲယ့ၣ်ၡူးလဲၤလၢ ကီၢ်ကၤလံၤလါ ဒီးကီၢ်ယူဒၤအခါ အပျဲၢ်အဘီၣ်တဖၣ်​ လဲၤပိာ်အခံ. ဖဲယ့ၣ်ၡူးက့ၤတုၤလၢ အအိၣ်တၢ်လီၢ်လၢ ဝ့ၢ်နစၤရ့းအခါ အလဲၤလၢ ဘူၣ်ဘျီၣ်ပူၤ, အိးထီၣ်​ ဝံယၡါယၤအလံာ် ဒီးဖးထီၣ်ဝဲလၢ အကလုၢ်ဖးဒိၣ်လၢ ‘ဒ်သိးယစံၣ်တဲၤတဲလီၤ တၢ်သးခုကစီၣ်ကသ့အဂီၢ် ယဟိဝၤယွၤ ဟ့ၣ်လီၤယၤ သးစီဆှံ.’ ယ့ၣ်ၡူးအဲၣ်ဒိးတဲဝဲ အခီပညီဒ်လဲၣ်. ပှၤအါဂၤအဲၣ်ဒိးထံၣ်​ ယ့ၣ်ၡူး မၤတၢ်လီၤလး သနာ်က့ တၢ်ဂ့ၢ်အရ့ဒိၣ်ကတၢၢ်လၢ ယ့ၣ်ၡူး ဒိးန့ၢ်ဘၣ်သးစီဆှံန့ၣ်​ မ့ၢ်ဝဲဒ်သိး အကစံၣ်တဲၤတဲလီၤ တၢ်သးခုကစီၣ်အဂီၢ်. ဝံၤဒီး ယ့ၣ်ၡူးတဲဘၣ်​ ပှၤလၢအဒိကနၣ်တၢ်တဖၣ်လၢ ‘တနံၤအံၤ ဝံအတၢ်ကတိၤအံၤ ဟဲလၢပှဲၤထီၣ်ဝဲလံ.’

လၢခံန့ၣ်​ ယ့ၣ်ၡူးလဲၤဝဲလၢ ပီၣ်လဲၣ်ကၤလံၤလါ. ဖဲန့ၣ်​ ယ့ၣ်ၡူးထံၣ်လိာ်သးဒီး ပိာ်ခွါလွံၢ်ဂၤ လၢအမ့ၢ် ပှၤမၤညၣ်ဖိ. ယ့ၣ်ၡူးတဲဘၣ်​ အဝဲသ့ၣ်လၢ ‘ဟဲပိာ်ယခံ, ဒီးယကမၢ သုဃုပှၤကညီ ဒ်သုဃုန့ၢ်ညၣ်အသိး.’ ပိာ်ခွါလွံၢ်ဂၤန့ၣ်​ မ့ၢ်ဝဲစီၤပ့းတရူး, စီၤအၣ်ဒရ့း, စီၤယၤကိာ် ဒီးစီၤယိၤဟၣ်. အဝဲသ့ၣ်ပာ်တ့ၢ်ကွံာ် အတၢ်ဖံးတၢ်မၤ တဘျီဃီ ဒီးပိာ်ထီၣ်ယ့ၣ်ၡူးအခံ. အဝဲသ့ၣ်​ စံၣ်တဲၤတဲလီၤတၢ် ဘၣ်ဃးဒီး ယဟိဝၤယွၤ အဘီမုၢ်အဂ့ၢ်လၢကီၢ်ကၤလံၤလါ ဒီတဘ့ၣ်ညါ. အဝဲသ့ၣ်​ လဲၤစံၣ်တဲၤတဲလီၤတၢ်လၢ ဘူၣ်ဘျီၣ်ပူၤ, လၢပှၤဆါတၢ်ပှ့ၤတၢ်အလီၢ် ဒီးလၢကျဲပူၤ. ဖဲအဝဲသ့ၣ်လဲၤတၢ်လီၢ် တပူၤဂ့ၤတပူၤဂ့ၤန့ၣ်​ ပှၤဂီၢ်မုၢ်တဖၣ်​ ပိာ်ထီၣ်အဝဲသ့ၣ်အခံ. ယ့ၣ်ၡူးအတၢ်ကစီၣ်န့ၣ်​ ရၤလီၤအသးလၢ တၢ်လီၢ်ကိးတီၤဒဲး တုၤလၢကီၢ်စူၤရံ.

လၢခံန့ၣ်​ ယ့ၣ်ၡူးဟ့ၣ်လီၤဝဲ တၢ်စိကမီၤလၢ အပျဲၢ်အဘီၣ်တနီၤအအိၣ်​ ဒ်သိးအဝဲသ့ၣ်မၤဘျါပှၤဂၤ အတၢ်ဆါ ဒီးဟီထီၣ်ကွံာ် တၢ်နါကသ့အဂီၢ်. ဖဲယ့ၣ်ၡူးစံၣ်တဲၤတဲလီၤတၢ်လၢ ဝ့ၢ်တဝ့ၢ်ဘၣ်တဝ့ၢ် ဒီးလၢသဝီတဖျၢၣ်ဘၣ်တဖျၢၣ်အခါ ပှၤအဂၤတဖၣ်​ လဲၤတၢ်ဒီးအီၤ. ပှၤပိာ်မုၣ်​ ဒ်သိးဒီး နီၢ်မၤရံမၤကဒၤလ့ၣ်, နီၢ်ယိၤအၣ်နၣ်, နီၢ်စူၤစၣ်နၤ ဒီးပိာ်မုၣ်လၢ အသးတီအဂၤတဖၣ်န့ၣ်​ ကွၢ်ထွဲဝဲ ယ့ၣ်ၡူး ဒီးအပျဲၢ်အဘီၣ်တဖၣ်.

ဖဲယ့ၣ်ၡူးသိၣ်လိ အပျဲၢ်အဘီၣ်တဖၣ်​ ဝံၤအလီၢ်ခံ အဆှၢလီၤအဝဲသ့ၣ်လၢ ကလဲၤစံၣ်တဲၤတဲလီၤတၢ်. ဖဲအဝဲသ့ၣ်​ လဲၤစံၣ်တဲၤတဲလီၤတၢ်လၢ ကီၢ်ကၤလံၤလါအခါ ပှၤအါဂၤကဲထီၣ်​ ယ့ၣ်ၡူးအပျဲၢ်အဘီၣ်​ ဒီးဒိးဘျၢထံ. ပှၤအါဂၤ အဲၣ်ဒိးကဲထီၣ်ဝဲ ယ့ၣ်ၡူးအပျဲၢ်အဘီၣ်အဃိ ယ့ၣ်ၡူးထိၣ်သတြီၤအဝဲသ့ၣ်ဒ် ဘုလၢအဘီထီၣ်​ လၢပှၤကဘၣ်ကူးအီၤအဂီၢ်. ယ့ၣ်ၡူးတဲဝဲလၢ ‘ဃ့ဘါထုကဖၣ်လၢ ယဟိဝၤယွၤအအိၣ်ဒ်သိး အကဆှၢလီၤအါထီၣ်​ ပှၤကူးဘုဖိအဂီၢ်.’ လၢခံ ယ့ၣ်ၡူးဃုထၢအါထီၣ်ဝဲ အပျဲၢ်အဘီၣ်အဂၤ ၇၀ ဒီးဆှၢလီၤအဝဲသ့ၣ်​ ခံဂၤတပူၤ ခံဂၤတပူၤ လၢကစံၣ်တဲၤတဲလီၤတၢ်လၢ ကီၢ်ယူဒၤဒီဘ့ၣ်ညါ. အဝဲသ့ၣ်သိၣ်လိပှၤအကလုာ်ကလုာ် ဘၣ်ဃးဒီး ဘီမုၢ်အဂ့ၢ်. ဖဲယ့ၣ်ၡူးအပျဲၢ်အဘီၣ်တဖၣ်​ ဟဲက့ၤအခါ လၢတၢ်သးဆူၣ်အပူၤ အဝဲသ့ၣ်တဲဘၣ်​ ယ့ၣ်ၡူး လၢတၢ်မၤအသးတဖၣ်. ပထံၣ်ဘၣ်လၢ မုၣ်ကီၤလံၢ် မၤပတုာ်ဝဲ တၢ်စံၣ်တဲၤတဲလီၤ အတၢ်မၤတန့ၢ်ဘၣ်.

တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ်​ အသိၣ်လိနဲၣ်လိ အပျဲၢ်အဘီၣ်တဖၣ်​ လီၤတံၢ်လီၤဆဲး ဒ်သိး အဝဲသ့ၣ်​ ကဆဲးမၤ တၢ်မၤလၢ အရ့ဒိၣ်အံၤ. ယ့ၣ်ၡူး တဲဘၣ်အဝဲသ့ၣ်လၢ ‘လဲၤလၢဟီၣ်ခိၣ်ဒီဘ့ၣ်​ ဒီးစံၣ်တဲၤတဲလီၤတၢ်. သိၣ်လိပှၤဂၤ ဘၣ်ဃးဒီး ကစၢ်ယွၤအကလုၢ်ကထါ ဒီးဒိးဘျၢအဝဲသ့ၣ်လၢထံ.’