တၢ်မၤလိ ၉၃
ယ့ၣ်ၡူးက့ၤထီၣ်ဆူမူခိၣ်
ယ့ၣ်ၡူး ထံၣ်လိာ်သးဒီး အပျဲၢ်အဘီၣ်တဖၣ် လၢကီၢ်ကၤလံၤလါ. ယ့ၣ်ၡူး ဟ့ၣ်လီၤအဝဲသ့ၣ် တၢ်မၤလိာ်အရ့ဒိၣ်တခါလၢ ‘လဲၤဒုးကဲထီၣ် ပှၤကိးကလုာ်ဒဲး လၢယပျဲၢ်ယဘီၣ်တက့ၢ်. သိၣ်လိအဝဲသ့ၣ် ကယဲၢ်တၢ်လၢ ယသိၣ်လိသု ဒီးဘျၢအဝဲသ့ၣ်လၢထံတက့ၢ်.’ ဝံၤဒီး ယ့ၣ်ၡူး အၢၣ်လီၤအဝဲသ့ၣ်လၢ ‘သ့ၣ်နီၣ်ထီၣ်က့ၤလၢ ယကအိၣ်ဒီးသုထီဘိ.’
ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ လၢအသီ ၄၀ အတီၢ်ပူၤန့ၣ် အဝဲလီၣ်ဖျါထီၣ်အသးလၢ အပျဲၢ်အဘီၣ် လၢအကယၤတဖၣ် အမဲာ်ညါ လၢကၤလံၤလါ ဒီးဝ့ၢ်ယရူၤၡလ့ၣ်. ယ့ၣ်ၡူး သိၣ်လိအဝဲသ့ၣ်လၢ တၢ်မၤလိအရ့ဒိၣ်တဖၣ် ဒီးမၤဝဲတၢ်လီၤလးအါမံၤ. ဝံၤဒီး ယ့ၣ်ၡူး ထံၣ်လိာ်အသးဒီး အတၢ်မၢဖိတဖၣ် အလီၢ်ခံကတၢၢ်တဘျီ လၢကစၢၢ်သ့ၣ်စၤယံးအလိၤ. ယ့ၣ်ၡူးတဲဘၣ် အဝဲသ့ၣ်လၢ ‘ဟးထီၣ်လၢ ဝ့ၢ်ယရူၤၡလ့ၣ်အပူၤတဂ့ၤ. အိၣ်ခိးတၢ်လၢ ပၢ်အၢၣ်လီၤဝဲလၢ အကဟ့ၣ်လီၤသုတက့ၢ်.’
ယ့ၣ်ၡူး အဲၣ်ဒိးတဲဝဲ အခီပညီဒ်လဲၣ်န့ၣ် အတၢ်မၢဖိတဖၣ် တနၢ်ပၢၢ်ဝဲဘၣ်. အဝဲသ့ၣ် သံကွၢ်အီၤလၢ ‘ခဲအံၤ နကကဲထီၣ်က့ၤ အံၣ်စရ့လးအစီၤပၤဧါ.’ ယ့ၣ်ၡူးတဲဝဲလၢ ‘ယဟိဝၤယွၤ ကဒုးကဲထီၣ်ယၤလၢ စီၤပၤန့ၣ် တၢ်ဆၢကတီၢ် တဘၣ်ဒံးဘၣ်. တယံာ်လၢၤဘၣ်န့ၣ် သုကဒိးန့ၢ်ဘၣ်သးစီဆှံ ဒီးသုကကဲထီၣ် ယပှၤအုၣ်အသးတဖၣ်. အဃိ လဲၤစံၣ်တဲၤတဲလီၤတၢ်လၢ ဝ့ၢ်ယရူၤၡလ့ၣ်, ကီၢ်ယူဒၤ, ၡၤမရံ ဒီးလၢဟီၣ်ခိၣ်ဒီဘ့ၣ်ဟီ.’
ဝံၤဒီး ယ့ၣ်ၡူး က့ၤထီၣ်ဆူမူခိၣ် ဒီးတၢ်အၢၣ်မၤဘၢအီၤ. အဃိ ယ့ၣ်ၡူး အတၢ်မၢဖိတဖၣ် ကွၢ်ထီၣ်ဆူမူခိၣ် ဘၣ်ဆၣ် တထံၣ် ယ့ၣ်ၡူးလၢၤဘၣ်.
ယ့ၣ်ၡူး အပျဲၢ်အဘီၣ်တဖၣ် ဟးထီၣ်ကွံာ်ဝဲလၢ ကစၢၢ်သ့ၣ်စၤယံးအလိၤ ဒီးလဲၤဝဲဆူ ဝ့ၢ်ယရူၤၡလ့ၣ်. ညီနုၢ်န့ၣ် အဝဲသ့ၣ် ဟဲပာ်ဖှိၣ်လိာ်သးလၢ ဒၢးတဖျၢၣ်လၢဟံၣ်ဖီခိၣ် ဒီးဃ့ဘါထုကဖၣ်တၢ်တပူၤဃီ. ဖဲန့ၣ်အဝဲသ့ၣ် အိၣ်ခိးဝဲဒ်သိး ယ့ၣ်ၡူး ကဟ့ၣ်လီၤအဝဲသ့ၣ် တၢ်ဟံးစုနဲၣ်ကျဲလၢ ခါဆူညါအဂီၢ်.
“ဘီမုၢ်တၢ်သးခုကစီၣ်န့ၣ် ကဘၣ် တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်ညါ ဒ်သိး ကကဲထီၣ် တၢ်အုၣ်အသးလၢ ပှၤကလုာ်ခဲလၢာ် အဂီၢ်လီၤ. ဝံၤဒီး တၢ်အကတၢၢ်န့ၣ် ကတုၤဝဲလီၤ.”—မးသဲ ၂၄:၁၄