စီၤပ့းတရူးသမၢယ့ၣ်ၡူး

ဖဲယ့ၣ်ၡူးအိၣ်ဒီး အတၢ်မၢဖိတဖၣ်လၢ ဒၢးတဖျၢၣ်​ လၢဟံၣ်ဖီခိၣ်အခါ ယ့ၣ်ၡူးတဲဘၣ်​ အဝဲသ့ၣ်လၢ ‘တနၤအံၤ သုကပာ်တ့ၢ်ယၤကိးဂၤဒဲးလီၤ.’ စီၤပ့းတရူး တဲဆၢအီၤလၢ ‘ပှၤကိးဂၤဒဲး မ့ၢ်ပာ်တ့ၢ်နၤ သနာ်က့ ယတပာ်တ့ၢ်နၤဘၣ်.’ ဘၣ်ဆၣ်​ ယ့ၣ်ၡူးတဲဘၣ်​ စီၤပ့းတရူးလၢ ‘တချုးလၢ ဆီဖါအိၣ်အိဒံးဘၣ်န့ၣ်​ နကတဲလၢ နတသ့ၣ်ညါယၤဘၣ်​ သၢဘျီလီၤ.’

ဖဲပှၤသုးဖိတဖၣ်​ လဲၤဆှၢယ့ၣ်ၡူးလၢ စီၤကၤယါဖၤ အဟံၣ်အခါ ယ့ၣ်ၡူး အတၢ်မၢဖိအါတက့ၢ်န့ၣ်​ ဃ့ၢ်ပူၤဖျဲးအသး. ဘၣ်ဆၣ်​ ယ့ၣ်ၡူးအတၢ်မၢဖိခံဂၤ လဲၤပိာ်ဝဲ ပှၤဂီၢ်မုၢ်အခံ. တဂၤန့ၣ်​ မ့ၢ်ဝဲ စီၤပ့းတရူး. စီၤပ့းတရူး လဲၤဝဲလၢ စီၤကၤယါဖၤ အဟံၣ်ကရၢၢ်ပူၤ ဒီးဆူးဝဲမ့ၣ်အူ. မ့ၣ်အူကပီၤအဃိ ပိာ်မုၣ်တဂၤထံၣ်ဝဲ စီၤပ့းတရူး အမဲာ်သၣ်​ ဒီးတဲအီၤလၢ ‘ယသ့ၣ်ညါနၤ. နကဲပှၤလၢ အပိာ်ယ့ၣ်ၡူးအခံ.’

စီၤပ့းတရူး တဲဝဲလၢ ‘တမ့ၢ်ယၤဘၣ်. နတဲတၢ်မနုၤလဲၣ်န့ၣ်​ ယတသ့ၣ်ညါဘၣ်.’ ဒီးစီၤပ့းတရူး လဲၤဝဲလၢ ကျဲနုာ်လီၤတခီ. တယံာ်ဘၣ်န့ၣ်​ ပိာ်မုၣ်အဂၤတဂၤ ထံၣ်အီၤ ဒီးတဲဘၣ်ပှၤဂီၢ်မုၢ်လၢ ‘ပိာ်ခွါတဂၤအံၤ အကဲပှၤလၢ အပိာ်ယ့ၣ်ၡူးအခံ.’ ဘၣ်ဆၣ်​ စီၤပ့းတရူး တဲဝဲလၢ ‘ယတသ့ၣ်ညါယ့ၣ်ၡူးဘၣ်.’ ဝံၤဒီး ပိာ်ခွါတဂၤ တဲဝဲလၢ ‘နဘၣ်ဃးဒီးအဝဲသ့ၣ်လီၤ. နကလုၢ်လီၤဂာ် ပှၤကၤလံၤလါဖိယ့ၣ်ၡူးလီၤ.’ စီၤပ့းတရူး တဲဝဲလၢ ‘ယတသ့ၣ်ညါအီၤဘၣ်.’

ဖဲန့ၣ်အဆၢကတီၢ် ဆီဖါအိၣ်အိထီၣ်ဝဲလီၤ. စီၤပ့းတရူးထံၣ်ဝဲ ယ့ၣ်ၡူးဃၣ်ဃီၤအသး ဒီးကွၢ်အီၤ. စီၤပ့းတရူး သ့ၣ်နီၣ်ထီၣ်က့ၤ ယ့ၣ်ၡူးအတၢ်ကတိၤ ဒီးဟးထီၣ်ဝဲ လၢတၢ်ချၢ ဒီးအဟီၣ်ဝဲ.

ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် ဟ့ၣ်ကူၣ်ဝဲလၢ ပှၤကဆှၢထီၣ်​ ယ့ၣ်ၡူးလၢ စီၤကၤယါဖၤအဟံၣ်. အဝဲသ့ၣ်​ ကမၤသံယ့ၣ်ၡူးန့ၣ်​ ဆၢတဲာ်ပာ်ဝဲဝံၤလံ. ခဲအံၤ အဝဲသ့ၣ်​ ဃုတၢ်ဂ့ၢ်လၢ ကမၤသံယ့ၣ်ၡူးအဂီၢ်. ဘၣ်ဆၣ်​ အဝဲသ့ၣ်ဃုဝဲ ယ့ၣ်ၡူး အတၢ်ကမၣ်​ တဘၣ်နီတမံၤဘၣ်. လၢခံန့ၣ်​ စီၤကၤယါဖၤ သံကွၢ်ဝဲ ယ့ၣ်ၡူးလိၤလိၤလၢ ‘နကဲကစၢ်ယွၤအဖိခွါဧါ.’ ဒီးယ့ၣ်ၡူး တဲဆၢက့ၤဝဲလၢ ‘ယမ့ၢ်ယွၤအဖိခွါလီၤ.’ စီၤကၤယါဖၤ တဲဝဲလၢ ‘ပတလိၣ်ဘၣ်​ တၢ်အုၣ်အသး လၢအဂၤလၢၤဘၣ်. အဝဲတဲကမၣ်ယွၤလံ.’ စံၣ်ညီၣ်ကွီၢ်တဖၣ်​ တဲဝဲလၢ ‘ပှၤတဂၤအံၤကြၢးသံဝဲလီၤ.’ အဝဲသ့ၣ်​ ဒဲယ့ၣ်ၡူးအမဲာ်, ထူးပှဲာ်ဒိးအီၤ, ကးဘၢအမဲာ် ဒီးထိအီၤ. အဝဲသ့ၣ်​ တဲဝဲလၢ ‘မ့ၢ်မတၤတဂၤ ထိနၤလဲၣ်, နမ့မ့ၢ်ဝံတဂၤန့ၣ်​ တဲဘၣ်ပှၤသၢၤ.’

ဖဲမုၢ်ဝါထီၣ်အခါ အဝဲသ့ၣ်​ လဲၤကိးယ့ၣ်ၡူးဆူ ပှၤယူဒၤဖိအပှၤစံၣ်ညီၣ်ကွီၢ် လၢအဒိၣ်ကတၢၢ်အဒၢးပူၤ. ဒီးအဝဲသ့ၣ်​ သံကွၢ်ကဒီး ယ့ၣ်ၡူးလၢ ‘နကဲကစၢ်ယွၤ အဖိခွါဧါ.’ ယ့ၣ်ၡူး တဲဆၢဝဲလၢ ‘သုတဲလၢ ယမ့ၢ်ယွၤအဖိခွါလီၤ.’ ဝံၤဒီး အဝဲသ့ၣ်တဲဝဲလၢ ယ့ၣ်ၡူးမ့ၢ်ပှၤလၢ ကတဲကမၣ်ယွၤ. အဃိ အဝဲသ့ၣ်ဆှၢထီၣ်​ ယ့ၣ်ၡူးလၢ ရိမ့ၤအပဒိၣ်ဖးဒိၣ်​ ပီၣ်တံၤပံၤလးအနီပူၤ. လၢခံတၢ်ကမၤအသးဒီး ယ့ၣ်ၡူးဒ်လဲၣ်, ပကကွၢ်သကိးလၢ တၢ်မၤလိလၢခံတခါ.