ယဟိဝၤပှၤအုၣ်အသးတဖၣ်န့ၣ် မ့ၢ်ပှၤဒ်လဲၣ် တကလုာ်လဲၣ်

ပမ့ၢ်ဒၣ် တၢ်ကရၢကရိတခါလၢ အိၣ်ရၤလီၤအသးလၢ ဟီၣ်ခိၣ်ဒီဘ့ၣ်ညါ ဘၣ်ဆၣ် ပတဘၣ်ထွဲဒီး တၢ်ဘူၣ်တၢ်ဘါ အဂၤတဖၣ်ဘၣ်. ပဝဲၤလီၢ်ခိၣ်သ့ၣ် အိၣ်ဝဲလၢ အမဲရကၤ ကီၢ်စၢဖှိၣ်အပူၤ ဘၣ်ဆၣ် ပဝဲယဟိဝၤပှၤအုၣ်အသးတဖၣ် အါဒၣ်တက့ၢ်န့ၣ် ပအိၣ်လၢ ထံကီၢ်အဂၤတဖၣ်လီၤ. ပနီၣ်ဂံၢ်အိၣ်ဝဲ ဃိးကကွဲၢ်ဘျဲၣ်ဒီး ပသိၣ်လိပှၤဂၤ လံာ်စီဆှံ လၢထံကီၢ်အဘ့ၣ် ၂၃၀ ဘျဲၣ်န့ၣ်လီၤ. ပမၤဒ်အံၤ ခီဖျိလၢပမၤထွဲ ယ့ၣ်ၡူးအတၢ်ကတိၤ လၢအမ့ၢ်– “ဘီမုၢ်အတၢ်သးခု အကစီၣ်အံၤ, ကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်ဒီဘ့ၣ်ညါ, လၢတၢ်အုၣ်အသး လၢပှၤကလုာ်ခဲလၢာ်အဂီၢ်လီၤ.”—မးသဲ ၂၄:၁၄.

ပအိၣ်တၢ်လီၢ် ဖဲလဲၣ်ဂ့ၤ ဖဲလဲၣ်ဂ့ၤ ပသးအိၣ်ဒိကနၣ် ပဒိၣ်အတၢ်သိၣ်တၢ်သီလီၤ. ဘၣ်ဆၣ် ဘၣ်ဃးဒီး ထံဂ့ၢ်ကီၢ်ဂ့ၢ်န့ၣ် ပတမၤဘၣ်ထွဲ ပသးဘၣ်. ပဒိကနၣ် ယ့ၣ်ၡူး အတၢ်ဟံးစုနဲၣ်ကျဲလၢ ခရံာ်ဖိတဖၣ်အဂီၢ် ဖဲအဝဲစံးဝဲလၢပ “တဘၣ်ဃးဘၣ်ဒီး ဟီၣ်ခိၣ်” ဘၣ်. လၢတၢ်န့ၣ်အဃိ ပဝဲသ့ၣ်တဖၣ် ပတပၣ်ဃုာ်လၢ တၢ်ဖံးတၢ်မၤလၢ ဘၣ်ဃးဒီး ထံဂ့ၢ်ကီၢ်ဂ့ၢ် ဒီးပတဆီၣ်ထွဲ တၢ်ဒုးတၢ်ယၤန့ၣ်ဘၣ်. (ယိၤဟၣ် ၁၅:၁၉; ၁၇:၁၆) ဖဲဟီၣ်ခိၣ်ဒီဘ့ၣ်တၢ်ဒုး ခံဘျီတဘျီ ကဲထီၣ်အသးအခါ ယဟိဝၤပှၤအုၣ်အသးသ့ၣ်တဖၣ်န့ၣ် ခီဖျိလၢအဝဲသ့ၣ် တညိကွံာ် အတၢ်စူၢ်တၢ်နာ် ဒီးတပၣ်ဃုာ်လၢ ထံဂ့ၢ်ကီၢ်ဂ့ၢ်အဃိ အဝဲသ့ၣ် ဘၣ်ကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ်လီၤ. အဒိ ယဟိဝၤပှၤအုၣ်အသးတနီၤနီၤန့ၣ် ဘၣ်အိၣ်လၢ ဃိာ်ပူၤ, ဘၣ်တၢ်မၤနးမၤဖှီၣ်အဝဲသ့ၣ် တုၤဒၣ်လဲာ် ဘၣ်တၢ်မၤသံအီၤန့ၣ်လီၤ. ကီၢ်ကၠၢမနံၣ် အဘံၡၢၣ်တဂၤ တဲဝဲဒ်အံၤ– “ထဲအဝဲသ့ၣ်တဒူၣ် စံးလီၤအသးသ့လၢ အမ့ၢ်ပှၤလၢ အမၤပိာ်ထွဲ အသးလၢ အသ့ၣ်ညါဒၣ်တၢ်ဒီး တဒိကနၣ်ဝဲ နၤစံၣ်အပဒိၣ်တဖု (Third Reich) အကလုၢ်ဘၣ်.”

ဘၣ်ဆၣ်သနာ်က့ ပဝဲဒၣ်သ့ၣ်တဖၣ် ပတအိၣ်ထဲဒၣ် ပကျိာ်ပကျာ်ဘၣ်. ယ့ၣ်ၡူး ဃ့ဘါထုကဖၣ်ဆူ ယဟိဝၤယွၤအအိၣ် ဘၣ်ဃးဒီး အပျဲၢ်အဘီၣ်တဖၣ်အဂ့ၢ် ဒ်အံၤလီၤ– “ဒ်သိး နကဟံးထီၣ်ကွံာ်အီၤ လၢဟီၣ်ခိၣ်န့ၣ်, ယတဃ့ဘၣ်.” (ယိၤဟၣ် ၁၇:၁၅) လၢတၢ်န့ၣ်အဃိ နကထံၣ်ဘၣ်လၢ ပဝဲသ့ၣ်တဖၣ် ပလဲၤဖံးတၢ်မၤတၢ်, လဲၤပှ့ၤတၢ်ဒီး လဲၤထီၣ်ကၠိလၢ ပှၤတဝၢအကျါန့ၣ်လီၤ.