မ့ၢ်ယ့ၣ်ၡူးဟဲတူၢ်သံအသး နီၢ်ကီၢ်ဧါ

တၢ်ဂ့ၢ်တၢ်ကျိၤတဖၣ်အံၤ ပသ့ၣ်ညါဘၣ်အီၤခီဖျိလၢ လံာ်တၢ်သးခုကစီၣ်လွံၢ်ဘ့ၣ်လၢ လံာ်စီဆှံလၢကြံးကျိာ်တကတြူၢ်ပာ်ဖျါထီၣ်ဝဲန့ၣ်လီၤ. လံာ်အံၤဘၣ်တၢ်ကိးစ့ၢ်ကီးအီၤလၢ လံာ်စီဆှံအသီတကတြူၢ်လီၤ. မ့ၢ်တၢ်မၤအသးတဖၣ်အံၤ ဟဲကဲထီၣ်အသးအနီၢ်ကီၢ်ဧါ. တၢ်သံကွၢ်အံၤ မ့ၢ်အကြၢးဝဲဘၣ်ဝဲဒီး အရ့ဒိၣ်ဝဲလီၤ. တၢ်မၤအသးတဖၣ်အံၤ မ့ၢ်တဟဲကဲထီၣ်အသးနီၢ်ကီၢ်န့ၣ် ခရံာ်ဖိအတၢ်စူၢ်တၢ်နာ်အံၤ ကမ့ၢ်ဝဲတၢ်ကလီကလီဒီး တၢ်မုၢ်လၢ်လၢ ပကအိၣ်မူဘၣ်လၢ ပၤရဒံစူးအပူၤအံၤန့ၣ် ကမ့ၢ်ဝဲထဲတၢ်မံမီၢ်လီၤ. (၁ ကရံၣ်သူး ၁၅:၁၄) ဘၣ်ဆၣ် တၢ်မၤအသးတဖၣ်အံၤ မ့ၢ်ဟဲကဲထီၣ်အသးအနီၢ်ကီၢ်န့ၣ် ခါဆူညါပှၤဟီၣ်ခိၣ်ဖိသ့ၣ်တဖၣ် ကဒိးန့ၢ်ဘၣ်ဝဲတၢ်ဆိၣ်ဂ့ၤလီၤ. ဒီးနၤစ့ၢ်ကီးနဒိးန့ၢ်ဘၣ် တၢ်ဆိၣ်ဂ့ၤတဖၣ်အံၤသ့ဝဲလီၤ. လၢတၢ်န့ၣ်အဃိ တၢ်မၤအသးတဖၣ်လၢ လံာ်တၢ်သးခုကစီၣ်လွံၢ်ဘ့ၣ်အံၤအပူၤန့ၣ် မ့ၢ်တၢ်အနီၢ်ကီၢ်ဧါ မ့တမ့ၢ် မ့ၢ်တၢ်တဲမုာ်နၢ်တခါလီၤဧါ ဃုသ့ၣ်ညါအီၤတက့ၢ်.

တၢ်အုၣ်အသးအိၣ်ဝဲလီၤ

လံာ်တၢ်သးခုကစီၣ်အတၢ်ကွဲးအံၤ ဘၣ်တၢ်ကွဲးအီၤလီၤတံၢ်လီၤဆဲး ဒီးတၢ်ဂ့ၢ်တၢ်ကျိၤသ့ၣ်တဖၣ်အံၤ မ့ၢ်ဝဲတီဝဲလီၤ. တမ့ၢ်တၢ်တဲမုာ်နၢ်ဘၣ်. အဒိ တၢ်လီၢ်အမံၤအသၣ်လၢ ဘၣ်တၢ်ကွဲးဖျါထီၣ်အီၤလၢ လံာ်တၢ်သးခုကစီၣ်အပူၤန့ၣ် အိၣ်ဒံးဝဲပၢၢ် တုၤလီၤလၢမုၢ်မဆါတနံၤအံၤန့ၣ်လီၤ. ဒီးပှၤလၢ လံာ်လွံၢ်ဘ့ၣ်အံၤ ပာ်ဖျါထီၣ်ဝဲအဂ့ၢ်န့ၣ် ပှၤလၢအဃုသ့ၣ်ညါ တၢ်စံၣ်စိၤတဲစိၤ ပာ်ဂၢၢ်ပာ်ကျၢၤဝဲလၢ အဝဲသ့ၣ်အိၣ်မူတ့ၢ်အနီၢ်ကီၢ်လီၤ.—လူၤကၣ် ၃:၁, ၂, ၂၃.

ပှၤကွဲးလံာ်ဖိလၢ တၢယၤဖှိၣ်ဒီးခံယၤဖှိၣ်အစိၤတဖၣ်န့ၣ် ကွဲးဝဲယ့ၣ်ၡူးအဂ့ၢ်လၢ အဝဲသ့ၣ်အတၢ်ကွဲးအပူၤလီၤ.a ပှၤလၢအကွဲးလံာ်တၢ်သးခုကစီၣ်တဖၣ်န့ၣ် ပာ်ဖျါထီၣ်ဝဲ ယ့ၣ်ၡူးဘၣ်တၢ်မၤသံအီၤဒ်လဲၣ်အဂ့ၢ်န့ၣ် လီၤပလိာ်လိာ်အသးဒီး ပှၤရိမ့ၤဖိအလုၢ်အလၢ်ဖဲ အဝဲသ့ၣ်စံၣ်ညီၣ်သံပှၤဂၤ လၢစိၤအဝဲန့ၣ်လီၤ. တၢ်ဂ့ၢ်တၢ်ကျိၤလၢ အဘၣ်တၢ်ကွဲးနီၣ်ဃာ်အီၤတဖၣ်န့ၣ် ဘၣ်တၢ်ကွဲးအီၤတီတီလိၤလိၤလီၤ. တကးဒံးဘၣ် ယ့ၣ်ၡူးအပျဲၢ်အဘီၣ်တဖၣ် အတၢ်လီၤတူာ်လီၤကာ်န့ၣ် ဘၣ်တၢ်ပာ်ဖျါထီၣ်အီၤစ့ၢ်ကီးလီၤ. (မးသဲ ၂၆:၅၆; လူၤကၣ် ၂၂:၂၄-၂၆; ယိၤဟၣ် ၁၈:၁၀, ၁၁) ခီဖျိလၢ တၢ်အုၣ်အသးတဖၣ်အံၤအဃိ ပနာ်သ့သပှၢ်ကတၢၢ်လၢ ပှၤလၢအကွဲးလံာ်တၢ်သးခုကစီၣ်တဖၣ်န့ၣ် ကွဲးဖျါထီၣ်ဝဲယ့ၣ်ၡူးအဂ့ၢ်တီတီလိၤလိၤ ဒီးလီၤတံၢ်လီၤဆဲးလီၤ.

မ့မ့ၢ်ယ့ၣ်ၡူးအတၢ်ဂဲၤဆၢထၢၣ်သမူထီၣ်က့ၤတခီမီၣ်

ပှၤအါတက့ၢ်န့ၣ် နာ်ဝဲလၢ ယ့ၣ်ၡူးဟဲအိၣ်မူလၢဟီၣ်ခိၣ်ချၢ ဒီးသံဝဲလီၤ. ဘၣ်ဆၣ် ပှၤတနီၤနီၤန့ၣ် သးဒ့ဒီဝဲဘၣ်ဃးဒီး ယ့ၣ်ၡူးအတၢ်ဂဲၤဆၢထၢၣ်သမူထီၣ်က့ၤလီၤ. ဖဲယ့ၣ်ၡူးအတၢ်မၢဖိတဖၣ် နၢ်ဟူဝဲလၢ ယ့ၣ်ၡူးဂဲၤဆၢထၢၣ်သမူထီၣ်က့ၤအခါန့ၣ် အဆိကတၢၢ် အဝဲသ့ၣ်စ့ၢ်ကီးတနာ်ဝဲဘၣ်. (လူၤကၣ် ၂၄:၁၁) ဘၣ်ဆၣ်ဒီး ဖဲယ့ၣ်ၡူးအတၢ်မၢဖိဒီး အပျဲၢ်အဘီၣ်အဂၤတဖၣ် ထံၣ်ဘၣ်က့ၤအီၤအခါ အဝဲသ့ၣ်အတၢ်သးဒ့ဒီလီၤမၢ်ကွံာ်ဝဲလီၤ. တကးဒံးဘၣ် ဘၣ်တဘျီန့ၣ် ယ့ၣ်ၡူးလီၣ်ဖျါထီၣ်စ့ၢ်ကီးအသးလၢ ပှၤ ၅၀၀ ဘျဲၣ်အမဲာ်ညါလီၤ.—၁ ကရံၣ်သူး ၁၅:၆.

ယ့ၣ်ၡူးအပျဲၢ်အဘီၣ်တဖၣ် စံၣ်တဲၤတဲလီၤ ယ့ၣ်ၡူးအတၢ်ဂဲၤဆၢထၢၣ် သမူထီၣ်က့ၤအဂ့ၢ် ဆူပှၤဂၤအအိၣ် ဒီးပှၤလၢအမၤသံ ယ့ၣ်ၡူးအအိၣ်စ့ၢ်ကီးလီၤ. လၢအဝဲသ့ၣ်အဂီၢ် တၢ်ဘၣ်ယိၣ်အိၣ်ဝဲအါမး သနာ်က့ အဝဲသ့ၣ်တဲဝဲလၢ တၢ်သူၣ်ဒူသးဒူအပူၤလီၤ. (မၤတၢ် ၄:၁-၃, ၁၀, ၁၉, ၂၀; ၅:၂၇-၃၂) ယ့ၣ်ၡူးအပျဲၢ်အဘီၣ်တဖၣ် မ့ၢ်တနာ်ဝဲလၢ ယ့ၣ်ၡူးဂဲၤဆၢထၢၣ်သမူထီၣ်က့ၤဝဲ အနီၢ်ကီၢ်ဘၣ်န့ၣ် မ့ၢ်အဝဲသ့ၣ်တဲဝဲလၢ တၢ်သူၣ်ဒူသးဒူအပူၤ ကဘူၣ်စ့ၢ်ကီးဧါ. ယ့ၣ်ၡူးအတၢ်ဂဲၤဆၢထၢၣ် သမူထီၣ်က့ၤန့ၣ် ကဲဘျုးကဲဖှိၣ်လၢ ခရံာ်ဖိလၢညါတဖၣ် ဒီးခရံာ်ဖိလၢပစိၤခဲအံၤစ့ၢ်ကီးလီၤ.

လံာ်တၢ်သးခုကစီၣ်တဖၣ် ပာ်ဖျါထီၣ်ဝဲ ယ့ၣ်ၡူးအတၢ်သံဒီး အတၢ်ဂဲၤဆၢထၢၣ်သမူထီၣ်က့ၤန့ၣ် မ့ၢ်တၢ်မ့ၢ်တၢ်တီလီၤ. တကးဒံးဘၣ် တၢ်ဂ့ၢ်အံၤလီၤပလိာ်အသး ဒီးတၢ်စံၣ်စိၤတဲစိၤ လၢအလီၤတံၢ်လီၤဆဲးတဖၣ်န့ၣ်လီၤ. နမ့ၢ်ဖးလံာ်တၢ်သးခုကစီၣ်တဖၣ်အံၤ လီၤတံၢ်လီၤဆဲးန့ၣ် နကနာ်သပှၢ်ကတၢၢ်လၢ တၢ်မၤအသးတဖၣ်အံၤ ကဲထီၣ်တ့ၢ်အသးနီၢ်နီၢ်လီၤ. ဒီးဖဲနနၢ်ပၢၢ်ထီၣ်လၢ ဘၣ်မနုၤအဃိ တၢ်အံၤဟဲကဲထီၣ်အသးလဲၣ်န့ၣ် နတၢ်နာ်ကဂၢၢ်ကျၢၤဒိၣ်ထီၣ်ဝဲလီၤ. တၢ်မၤလိလၢခံတခါန့ၣ် ကတဲနၢ်ပၢၢ်အါထီၣ်ပှၤ တၢ်ဂ့ၢ်အံၤန့ၣ်လီၤ.