မ့ၢ်နအဲၣ်ဒိး ထိၣ်သတြီၤကွၢ် နတၢ်စူၢ်တၢ်နာ်ဒီး လံာ်စီဆှံဧါ

မ့ၢ်နဆိကမိၣ်လီၤနသးလၢ နမ့ၢ်ခရံာ်ဖိတဂၤဧါ. ပှၤလၢအကိးလီၤအသးလၢ ခရံာ်ဖိန့ၣ် အိၣ်ဝဲ အကကွဲၢ်ခံကထိဘျဲၣ်လီၤ. မုၢ်မဆါတနံၤအံၤ ခရံာ်ဖိတၢ်ဘူၣ်တၢ်ဘါအဖု အိၣ်လၢအကထိတဖၣ်လီၤ. အဝဲသ့ၣ်တဖၣ် အတၢ်စူၢ်တၢ်နာ် ဒီးအတၢ်ထံၣ်တဖၣ် လီၤဆီလိာ်အသးန့ၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် နတၢ်စူၢ်တၢ်နာ်စ့ၢ်ကီး ကလီၤဆီဒီးခရံာ်ဖိလၢ အဂၤတဖၣ်န့ၣ်လီၤ. နမ့ၢ်နာ်တၢ်တမံၤဂ့ၤ တမံၤဂ့ၤ တၢ်အံၤမ့ၢ်တၢ်လၢ အရ့ဒိၣ်စ့ၢ်ကီးဧါ. အရ့ဒိၣ်ဝဲလီၤ. နမ့ၢ်အဲၣ်ဒိးအိၣ်မူ ဒ်ခရံာ်ဖိနီၢ်နီၢ်အသိးန့ၣ် နတၢ်စူၢ်တၢ်နာ် ကဘၣ်လီၤပလိာ်ဒီး လံာ်စီဆှံလီၤ.

ခရံာ်အပျဲၢ်အဘီၣ် လၢညါတဖၣ်န့ၣ် ဘၣ်တၢ်သ့ၣ်ညါအီၤလၢ “ပှၤခရံာ်ဖိ” လီၤ. (မၤတၢ် ၁၁:၂၆) ဖဲန့ၣ်အဆၢကတီၢ် ခရံာ်ဖိအိၣ်ဒၣ်ထဲတဖုဧိၤအဃိ ပှၤနီၤဖးအဝဲသ့ၣ်ကဘၣ်အဂီၢ် တလိၣ်လၢကဘၣ်အိၣ်ဒီးအမံၤအဂၤဘၣ်. ဒီးအဝဲသ့ၣ် လူၤပိာ်ထွဲဝဲ ယ့ၣ်ၡူးအတၢ်သိၣ်လိသီလိ ဒီးအတၢ်ဟံးစုနဲၣ်ကျဲတဖၣ်န့ၣ်လီၤ. မ့မ့ၢ်နသရိာ်မီၣ်. မ့ၢ်နနာ်လၢ အဝဲသ့ၣ်သိၣ်လိတၢ် ဒ်ယ့ၣ်ၡူးသိၣ်လိဝဲအသိးဧါ. မ့ၢ်နနာ်လၢ အဝဲသ့ၣ်အတၢ်စူၢ်တၢ်နာ်န့ၣ်အိၣ်ဝဲဒ် ခရံာ်ဖိလၢညါအသိးဧါ. နသ့ၣ်ညါလီၤတံၢ်ကသ့ဒ်လဲၣ်. နသ့ၣ်ညါလီၤတံၢ်သ့ ခီဖျိနထိၣ်သတြီၤအီၤဒီး လံာ်စီဆှံန့ၣ်လီၤ.

သမံသမိးကွၢ်တၢ်ဂ့ၢ်အံၤတက့ၢ်– ယ့ၣ်ၡူးခရံာ် ပာ်ဒိၣ်ဝဲ ယွၤအကလုၢ်ကထါလီၤ. လၢတၢ်န့ၣ်အဃိ ယ့ၣ်ၡူးတအဲၣ်ဒိးဝဲလၢ ပှၤကမၤကျဲၣ်ကျီယွၤအကလုၢ်ကထါခီဖျိ ပှၤပာ်ဒိၣ်ပှၤဟီၣ်ခိၣ်ဖိ အလုၢ်အလၢ် ဒိၣ်န့ၢ်ဒံးလံာ်စီဆှံဘၣ်. (မၢ်ကူး ၇:၉-၁၃) ပနာ်သ့သပှၢ်ကတၢၢ်လၢ ယ့ၣ်ၡူးအပျဲၢ်အဘီၣ်လၢ အမ့ၢ်အတီတဖၣ် အတၢ်နာ်န့ၣ်ကဒိးသန့ၤထီၣ်အသးလၢ လံာ်စီဆှံန့ၣ်လီၤ. လၢတၢ်န့ၣ်အဃိ ခရံာ်ဖိတဂၤ စုာ်စုာ်ကြၢးသံကွၢ်လီၤအသးလၢ ‘တၢ်လၢပှၤသိၣ်လိဝဲလၢ ယသရိာ်ပူၤတဖၣ်န့ၣ် မ့ၢ်အလီၤပလိာ်အသးဒီး လံာ်စီဆှံစ့ၢ်ကီးဧါ.’ ဒ်သိးနကသ့ၣ်ညါအတၢ်စံးဆၢအံၤအဂီၢ် တၢ်ဂ့ၢ်လၢနနၢ်ဟူဘၣ်လၢနသရိာ်အပူၤန့ၣ် ထိၣ်သတြီၤကွၢ်အီၤဒီးလံာ်စီဆှံတက့ၢ်.

ယ့ၣ်ၡူးစံးဝဲလၢ ပကဘၣ်ဘူၣ်ထီၣ်ဘါထီၣ် ယဟိဝၤယွၤလၢတၢ်မ့ၢ်တၢ်တီအပူၤလီၤ. ဒီးတၢ်မ့ၢ်တၢ်တီန့ၣ် ပထံၣ်န့ၢ်အီၤလၢ လံာ်စီဆှံအပူၤလီၤ. (ယိၤဟၣ် ၄:၂၄; ၁၇:၁၇) တၢ်မၢဖိစီၤပီလူးစံးဝဲလၢ ပတၢ်အုၣ်က့ၤခီၣ်က့ၤန့ၣ် ဒိးသန့ၤထီၣ်အသးလၢ “တၢ်သ့ၣ်ညါ” လီၤ. (၁ တံၤမသ့း ၂:၄) လၢတၢ်န့ၣ်အဃိ ပတၢ်နာ်န့ၣ် ကဘၣ်လီၤပလိာ်အသး ဒီးလံာ်စီဆှံအတၢ်မ့ၢ်တၢ်တီလီၤ. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်မူအထူအယိာ်လီၤ.

ထိၣ်သတြီၤကွၢ် နတၢ်နာ်ဒီး လံာ်စီဆှံတက့ၢ်

ပကွဲမုာ်ဘၣ်နၤလၢ နကသမံသမိးကွၢ် တၢ်သံကွၢ်ဃုဖျၢၣ် ဒီးအတၢ်စံးဆၢအံၤန့ၣ်လီၤ. ဒီးတၢ်သံကွၢ်တဖၣ်အံၤအတၢ်စံးဆၢန့ၣ် အိၣ်ဝဲလၢလံာ်စီဆှံအပူၤလီၤ. ဖးကွၢ်လံာ်စီဆှံအဆၢတဖၣ်အံၤ ဒီး ဆိကမိၣ်ထံအတၢ်စံးဆၢတက့ၢ်. ဒီးသံကွၢ်လီၤနသးလၢ ‘မ့ၢ်ယသရိာ်န့ၣ် သိၣ်လိတၢ်ဒ် လံာ်စီဆှံတဲဝဲအသိးစ့ၢ်ကီးဧါ.’

တၢ်သံကွၢ်ဒ်အံၤတဖၣ် ကမၤစၢၤနၤ ဒ်သိးနကထိၣ်သတြီၤကွၢ် နတၢ်စူၢ်တၢ်နာ်ဒီးလံာ်စီဆှံလီၤ. တၢ်သိၣ်လိအဂၤလၢ နနၢ်ဟူဘၣ်လၢ နသရိာ်အပူၤဒီး တၢ်လၢလံာ်စီဆှံတဲဝဲန့ၣ် မ့ၢ်နအဲၣ်ဒိး ထိၣ်သတြီၤကွၢ်ဧါ. ယဟိဝၤပှၤအုၣ်အသးတဖၣ် သးအိၣ်မၤစၢၤနၤလၢ နကသမံသမိးကွၢ်လံာ်စီဆှံတၢ်မ့ၢ်တၢ်တီန့ၣ်လီၤ. မ့ၢ်နအဲၣ်ဒိးသ့ၣ်ညါအါထီၣ်ဧါ. နမ့ၢ်အဲၣ်ဒိးသ့ၣ်ညါအါထီၣ်န့ၣ် မၤလိလံာ်စီဆှံဒီး ယဟိဝၤပှၤအုၣ်အသးတဂၤဂၤ မ့တမ့ၢ် နလဲၤနုာ်လီၤကွၢ်လၢ ပပှာ်ယဲၤသန့ jw.org/ksw အပူၤသ့လီၤ.

၁ တၢ်သံကွၢ်– ယွၤမ့ၢ်မတၤတဂၤလဲၣ်.

တၢ်စံးဆၢ– ယဟိဝၤန့ၣ် မ့ၢ်ယ့ၣ်ၡူးအပၢ်, ယွၤလၢမူဝဲလီၤထူလီၤယိာ်, သ့တၢ်လၢာ်ကစၢ်လၢ အတ့လီၤတၢ်ခဲလၢာ်လီၤ.

လံာ်စီဆှံစံးဝဲလၢ–

“ပဘါထုကဖၣ်တၢ်လၢ သုဂီၢ်တဘိယူၢ်ဃီဒီး, ပစံးထီၣ်ပတြၢၤယွၤပကစၢ် ယ့ၣ်ၡူးခရံာ်အပၢ်အဘျုးအဖှိၣ်လီၤ.”—ကလီးစဲ ၁:၃.

“ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်”လီၤ.—လီၣ်ဖျါ ၄:၁၁.

ကွၢ်စ့ၢ်ကီးလၢ ရိမ့ၤ ၁၀:၁၃; ၁ တံၤမသ့း ၁:၁၇ တက့ၢ်.

၂ တၢ်သံကွၢ်– ယ့ၣ်ၡူးခရံာ် မ့ၢ်မတၤတဂၤလဲၣ်.

တၢ်စံးဆၢ– ယ့ၣ်ၡူးခရံာ်မ့ၢ်ကစၢ်ယွၤ အဖိဝဲၢ်ကိလီၤ. ကစၢ်ယွၤတ့လီၤအီၤအဃိ အဝဲအိၣ်ဒီးအခီၣ်ထံးခီၣ်ဘိန့ၣ်လီၤ. ယ့ၣ်ၡူးဒိးပၢအသးလၢ အပၢ်အဖီလာ် ဒီးမၤတၢ်ဘၣ်အပၢ်အသးလီၤ.

လံာ်စီဆှံစံးဝဲလၢ–

“အဂ့ၢ်ဒ်အံၤ ယပၢ်ဒိၣ်န့ၢ်ယၤတက့ၢ်လီၤ.”—ယိၤဟၣ် ၁၄:၂၈.

“[ယ့ၣ်ၡူး]န့ၣ်မ့ၢ်ယွၤ, လၢပှၤထံၣ်အီၤတသ့ဘၣ်တဂၤ အက့ၢ်အဂီၤ, တၢ်ဘၣ်တ့ခဲလၢာ်အပှၤဝဲၢ်ကိလီၤ.”—ကလီးစဲ ၁:၁၅.

ကွၢ်စ့ၢ်ကီး မးသဲ ၂၆:၃၉; ၁ ကရံၣ်သူး ၁၅:၂၈.

၃ တၢ်သံကွၢ်– သးစီဆှံန့ၣ် မ့ၢ်မတၤလဲၣ်.

တၢ်စံးဆၢ– သးစီဆှံန့ၣ် မ့ၢ်တၢ်စိကမီၤလၢ ယွၤသူဝဲ ဒ်သိးအကမၤလၢပှဲၤထီၣ် အတၢ်ဘၣ်သးန့ၣ်လီၤ. သးစီဆှံန့ၣ် တမ့ၢ်ပှၤတဂၤဘၣ်. ပှၤကညီတဖၣ် လၢထီၣ်ပှဲၤထီၣ်ဒီးသးစီဆှံဒီး သးစီဆှံဟ့ၣ်စိဟ့ၣ်ကမီၤအီၤသ့ဝဲလီၤ.

လံာ်စီဆှံစံးဝဲလၢ–

• “နီၢ်အ့းလံၤစါဘ့းနၢ်ဟူ နီၢ်မၤရံအတၢ်ကတိၤဒိၣ်န့ၣ်ဒီး, တၢ်မၤအသးလၢ အဖိဂဲၤဝဲလၢအဟၢဖၢပူၤလီၤ. နီၢ်အ့းလံၤစါဘ့း လၢထီၣ်ပှဲၤထီၣ်ဝဲဒီး သးစီဆှံ” လီၤ.—လူၤကၣ် ၁:၄၁, ၄၂.

• “ဖဲသးစီဆှံဟဲလီၤ လၢသုလိၤဝံၤဒီး, သုကဒိးန့ၢ်တၢ်အစိအကမီၤ” လီၤ.—မၤတၢ် ၁:၈.

• ကွၢ်စ့ၢ်ကီး ၁ မိၤၡ့ ၁:၂; မၤတၢ်၂:၁-၄; ၁၀:၃၈.

၄ တၢ်သံကွၢ်– ယွၤအဘီအမုၢ်န့ၣ် မ့ၢ်မနုၤလဲၣ်.

တၢ်စံးဆၢ– ယွၤအဘီအမုၢ်န့ၣ် မ့ၢ်တၢ်ပၢတၢ်ပြးလၢမူခိၣ်န့ၣ်လီၤ. ယ့ၣ်ၡူးန့ၣ် မ့ၢ်ယွၤအဘီအမုၢ်အစီၤပၤလီၤ. တယံာ်လၢၤဘၣ် ယွၤအဘီအမုၢ် ကမၤလၢပှဲၤထီၣ် ယွၤအတၢ်ဘၣ်သးလၢ ဟီၣ်ခိၣ်ဒီဘ့ၣ်န့ၣ်လီၤ.

လံာ်စီဆှံစံးဝဲလၢ–

• “ဒီးကလူးလၢအပှဲၤထီၣ်နွံဂၤတဂၤန့ၣ် အူထီၣ်ကွဲၤ, ဒီးတၢ်ကလုၢ်သီၣ်ဖးဒိၣ်တဖၣ် အိၣ်ဝဲလၢမူခိၣ်, ဒီးစံးဝဲဒၣ်, ဟီၣ်ခိၣ်အဘီအမုၢ် ကဲထီၣ်လၢ ပကစၢ်အတၢ်, ဒီးအခရံာ်အတၢ် ဒီးကပၢဝဲလီၤထူလီၤယိာ်လီၤ.”—လီၣ်ဖျါ ၁၁:၁၅.

ကွၢ်စ့ၢ်ကီး ဒၤနံးယ့လး ၂:၄၄; မးသဲ ၆:၉, ၁၀.

၅ တၢ်သံကွၢ်– ပှၤအဂ့ၤခဲလၢာ် ကလဲၤထီၣ်မူခိၣ်ဧါ.

တၢ်စံးဆၢ– တလဲၤထီၣ်ကိးဂၤဒဲးဘၣ်. ပှၤကလဲၤထီၣ်ဘၣ်ဆူ မူခိၣ်ထဲဒၣ် ပှၤတီပှၤလိၤစှၤကိာ်ဂၤန့ၣ်လီၤ. ပှၤတဖၣ်န့ၣ် ဘၣ်တၢ်ကိးအဝဲသ့ၣ်လၢ “သိလၢအစှၤတဖု” န့ၣ်လီၤ. အဝဲသ့ၣ် ကပၢဃုာ်တၢ်ဒီးယ့ၣ်ၡူးန့ၣ်လီၤ.

လံာ်စီဆှံစံးဝဲလၢ–

“သိလၢအစှၤတဖုဧၢ, ပျံၤတၢ်တဂ့ၤ, အဂ့ၢ်ဒ်အံၤ, ဘၣ်သုပၢ်အသးလၢ အကဟ့ၣ်သုလၢ ဘီဧိၤမုၢ်ဧိၤန့ၣ်လီၤ.”—လူၤကၣ် ၁၂:၃၂.

“ကကဲထီၣ် ပှၤလုၢ်တၢ်အခိၣ် ဘၣ်ဃးဒီယွၤ, ဒီးခရံာ်, ဒီးကပၢဘၣ်တၢ်ဒီးအီၤ”လီၤ. —လီၣ်ဖျါ ၂၀.၆.

ကွၢ်စ့ၢ်ကီး လီၣ်ဖျါ ၁၄:၁, ၃.

၆ တၢ်သံကွၢ်– ယွၤအတၢ်တိာ်ပာ်လၢ ဟီၣ်ခိၣ်ဒီးပှၤဟီၣ်ခိၣ်ဖိအဂီၢ်န့ၣ် မ့ၢ်မနုၤလဲၣ်.

တၢ်စံးဆၢ– လၢယွၤအဘီအမုၢ် အတၢ်ပၢတၢ်ပြးအဖီလာ်န့ၣ် ဟီၣ်ခိၣ်ဒီတဘ့ၣ် ကကဲထီၣ် ပၤရဒံစူး ဒီးပှၤလၢအတီအလိၤသ့ၣ်တဖၣ် ကအိၣ်ဒီးတၢ်အိၣ်ဆူၣ်အိၣ်ချ့လၢအဂ့ၤ ဒီးကအိၣ်ဒီးတၢ်ဃူတၢ်ဖိး ဒီးတၢ်မူအထူအယိာ်လီၤ.

လံာ်စီဆှံစံးဝဲလၢ–

“မ့မ့ၢ်ပှၤလၢအသးစူၤ ကန့ၢ်ဘၣ်သါထံဧိၤကီၢ်ဧိၤ, ဒီးကမုာ်လၤတၢ်လၢ တၢ်ဃူတၢ်ဖိးအါအါကလဲာ်အပူၤလီၤ.”—စံးထီၣ်ပတြၢၤ ၃၇:၁၀, ၁၁.

“ဒီးယွၤကထွါကွံာ် အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢ အခီၣ်ထံးတဖၣ်ပူၤကွံာ်လံ.”—လီၣ်ဖျါ ၂၁:၃, ၄.

ကွၢ်စ့ၢ်ကီး စံးထီၣ်ပတြၢၤ ၃၇:၂၉, ၂ ပ့းတရူး ၃:၁၃.