တၢ်သံကွၢ်ဘၣ်ဃးဒီး ပှၤအိၣ်လၢ မူခိၣ်တဖၣ်အဂ့ၢ်

ပှၤအါဂၤတဲဝဲလၢ ဘၣ်ဃးဒီးမူခိၣ်အဂ့ၢ်န့ၣ် ပှၤတသ့ၣ်ညါဝဲနီတဂၤဘၣ်. မ့ၢ်လၢပှၤလၢ အထံၣ်ဘၣ်မူခိၣ်တၢ်အိၣ်သး ဒီးဟဲလီၤတဲပၠးပှၤ တအိၣ်နီတဂၤဘၣ်အဃိလီၤ. ပှၤလၢအိၣ်ဒီး တၢ်ထံၣ်ဒ်အံၤန့ၣ် ကမၣ်ဝဲန့ၣ်လီၤ. တချုးလၢယ့ၣ်ၡူးဟဲလီၤ လၢဟီၣ်ခိၣ်ဒံးဘၣ်န့ၣ် အဝဲအိၣ်ဝဲလၢမူခိၣ်န့ၣ်လီၤ. လၢတၢယၤဖှိၣ်အစိၤန့ၣ် ယ့ၣ်ၡူးစံးဘၣ် တၢ်ဘူၣ်တၢ်ဘါခိၣ်နၢ်တဖၣ်လၢ “အဂ့ၢ်ဒ်အံၤ, တမ့ၢ်ဘၣ်ယဟဲလီၤလၢမူခိၣ် ဒ်သိးယကမၤဖဲဒၣ်ယသးဘၣ်, မ့ၢ်ဖဲဒၣ်ပှၤလၢ အမၢလီၤယၤတဂၤအသးလီၤ.” တကးဒံးဘၣ် ယ့ၣ်ၡူးစံးဘၣ် အတၢ်မၢဖိတဖၣ်လၢ “တၢ်အိၣ်အလီၢ်လၢ ယပၢ်အဟံၣ်ပူၤန့ၣ်, အိၣ်အါပူၤလီၤ.”—ယိၤဟၣ် ၆:၃၈; ၁၄:၂.

ယ့ၣ်ၡူးအပၢ် မ့ၢ်ဝဲဒၣ် ကစၢ်ယွၤလၢအမံၤမ့ၢ် ယဟိဝၤလီၤ. ဒီးယဟိဝၤယွၤအ “ဟံၣ်” န့ၣ်အိၣ်လၢမူခိၣ်လီၤ. (စံးထီၣ်ပတြၢၤ ၈၃:၁၈) ပှၤလၢအကတဲပၠးပှၤ မူခိၣ်အဂ့ၢ် ကသ့ဂ့ၤဂ့ၤဒ်သိးဒီး ယဟိဝၤယွၤ ဒီးကစၢ်ခရံာ်န့ၣ် တအိၣ်နီတဂၤဘၣ်. အဝဲသ့ၣ် ပာ်ဖျါထီၣ်ဝဲမူခိၣ်အဂ့ၢ် ခီဖျိဒုးထံၣ်ဝဲ အခ့အပှၤသ့ၣ်တဖၣ်လၢ တၢ်ထံၣ်လၢညါခီန့ၣ်လီၤ.

လၢလံာ်စီဆှံအပူၤ ပှၤတနီၤလၢ အထံၣ်ဘၣ် တၢ်ထံၣ်လၢညါခီအဂ့ၢ်န့ၣ် တၢ်မၤလိလၢခံတခါ ကပာ်ဖျါထီၣ်ဝဲလီၤ. ဖဲပတဲသကိး တၢ်ဂ့ၢ်သ့ၣ်တဖၣ်အံၤအခါ နကဘၣ်သ့ၣ်ညါလၢ တၢ်လၢမူခိၣ်န့ၣ် တမ့ၢ်ဝဲ တၢ်လီၢ်လၢပထိးအီၤဒီး ပထံၣ်အီၤသ့န့ၣ်ဘၣ်. ကစၢ်ယွၤ မ့ၢ်တဲပၠးပှၤလၢ မူခိၣ်အဂ့ၢ်နီၢ်နီၢ်န့ၣ် တမ့ၢ်လၢပကနၢ်ပၢၢ်ဘၣ်အဃိ အဝဲသူဝဲ တၢ်လၢပထံၣ်ညီနုၢ်အီၤ ဒ်သိးကတဲနၢ်ပၢၢ်ပှၤ မူခိၣ်အဂ့ၢ်န့ၣ်လီၤ. တၢ်ထံၣ်လၢညါခီ သ့ၣ်တဖၣ်အံၤ ကမၤစၢၤပှၤ ဒ်သိးပကနၢ်ပၢၢ်ထီၣ် ပှၤလၢအအိၣ်လၢမူခိၣ်လၢ တၢ်လီၢ် “အိၣ်အါပူၤ” အဂ့ၢ်န့ၣ်လီၤ.