၃ တၢ်ဟံးစုနဲၣ်ကျဲလၢ နတူၢ်တၢ်ကီတၢ်ခဲ ကကဲအဂီၢ်

တၢ်ကီတၢ်ခဲတနီၤန့ၣ် ပဟးဆှဲးအီၤတသ့ဘၣ် ဒီးပဘှီဘၣ်ထီၣ်က့ၤအီၤ တန့ၢ်စ့ၢ်ကီးဘၣ်. အဒိ ပမ့ၢ်အိၣ်ဒီးတၢ်ဆါယံာ်ယံာ်ထၢထၢ မ့တမ့ၢ် ဖဲပှၤလၢပအဲၣ်ဘၣ်တဂၤ သံသဒၣ်ပှၤအခါ ပကဘၣ်ဂုာ်ကျဲးစၢးလဲၤခီဖျိအီၤ တုၤအန့ၢ်န့ၣ်လီၤ. မ့ၢ်လံာ်စီဆှံမၤစၢၤပှၤကသ့ဧါ.

တၢ်ဆါယံာ်ယံာ်ထၢထၢ

ရိၣ်(စ်) တဲဝဲလၢ– “ယအိၣ်ဒီးတၢ်ဆါလီၤဆီတခါအဃိ ယတူၢ်ဘၣ်တၢ်အ့ၣ်စိၢ်အ့ၣ်ထုး ထီဘိလီၤ. အဃိ တၢ်လၢယအဲၣ်ဒိးမၤန့ၣ် ယမၤအီၤတန့ၢ်အါအါလၢၤဘၣ်.” အဒိ ခီဖျိလၢ အတၢ်ဆူးတၢ်ဆါတခါအံၤအဃိ ရိၣ်(စ်) ဖးလံာ်တန့ၢ်အါအါဘၣ်. ဘၣ်ဆၣ် အဝဲတတူၢ်ၡူအသးဘၣ်, အဝဲဒိးန့ၢ်ဘၣ်ဝဲတၢ်ဂံၢ်တၢ်ဘါ ခီဖျိ ယ့ၣ်ၡူးအတၢ်ကတိၤ ဖဲ မးသဲ ၁၉:၂၆ လၢအတဲဝဲလၢ– “မ့မ့ၢ်ယွၤန့ၣ် သ့တၢ်လၢာ်လီၤ.” လၢတၢ်န့ၣ်အဃိ ရိၣ်(စ်) ဃုဝဲကျဲလၢအဂၤ ဒ်သိးမၤလိဝဲလံာ်စီဆှံကန့ၢ်အဂီၢ်. အဝဲစးထီၣ် ဒိကနၣ်လံာ်စီဆှံ ဒီးလံာ်လဲၢ်တဖၣ်ခီဖျိ တၢ်ကလုၢ်လီၤ.a ရိၣ်(စ်) တဲဝဲလၢ “ခီဖျိ ပှၤသွီနုာ် တၢ်ကလုၢ်ဒ်အံၤအဃိ ကဲထီၣ်တၢ်မၤစၢၤလၢ ယကပၢၤဃာ်ယတၢ်ရ့လိာ်သးဒီး ယဟိဝၤယွၤအဂီၢ်န့ၣ်လီၤ.”

ဖဲ ရိၣ်(စ်) တူၢ်ဘၣ်ဝဲတၢ်သးတမုာ် ဘၣ်ဃးဒီးတၢ်လၢ အဝဲမၤဝဲတန့ၢ်လၢၤဘၣ်တဖၣ်အခါန့ၣ် ၂ ကရံၣ်သူး ၈:၁၂ မၤမုာ်ထီၣ်က့ၤအသးလီၤ. လံာ်စီဆှံတဆၢအံၤတဲဝဲလၢ– “အဂ့ၢ်ဒ်အံၤ, သးမ့ၢ်အိၣ်ဒီး, တၢ်တူၢ်လိာ်ဝဲဒ်ပှၤအတၢ်အိၣ်ဝဲအသိး, ဒ်အတၢ်တအိၣ်ဘၣ်အသိး, တမ့ၢ်ဘၣ်.” ခီဖျိလံာ်စီဆှံတဆၢအံၤအဃိ, ရိၣ်(စ်) နၢ်ပၢၢ်ထီၣ်ဝဲလၢ အဝဲမ့ၢ်ဂုာ်ကျဲးစၢးမၤဝဲ ဖဲအမၤဝဲသ့န့ၣ် ကစၢ်ယွၤကသးခုလီၤ.

တၢ်သူၣ်အုးသးအုး

ဒဲ(လ်)ဖံ လၢပတဲတ့ၢ်အဂ့ၢ်လၢအခီၣ်ထံးန့ၣ် တဲဝဲလၢ– “ယဖိမုၣ်သံဖဲအသးအိၣ် ၁၈ နံၣ်အခါန့ၣ် လီၤ. ယတူၢ်ဘၣ်လၢ ယတၢ်အိၣ်မူဆီတလဲခဲလၢာ်ခဲဆ့. ယသးဘၣ်ဒိတုၤဒၣ်လဲာ် ယတူၢ်ဘၣ်လၢယအိၣ်မူဆူညါ တကဲလၢၤဘၣ်.” ဘၣ်ဆၣ် အဝဲဒိးန့ၢ်ဘၣ်ဝဲတၢ်ဂံၢ်တၢ်ဘါ ခီဖျိ စံးထီၣ်ပတြၢၤ ၉၄:၁၉ (ခ့ခါစှီၤကျိာ်) လၢအတဲဝဲလၢ– “ဖဲယဘၣ်ယိၣ်ဘၣ်ဘီတၢ်ဒီး ယသူၣ်ကိၢ်သးဂီၤအခါန့ၣ်, နမၤမုာ်ယၤဒီး မၤသးခုယၤလီၤ.” အဝဲတဲကဒီးဝဲလၢ “ယဃ့ထုကဖၣ်လၢ ယဟိဝၤယွၤကဟ့ၣ်လီၤယၤ တၢ်ဖံးတၢ်မၤလၢယကဘၣ်မၤအီၤလၢ တနံၤဘၣ်တနံၤ ဒ်သိးယတၢ်တူၢ်ဘၣ်တဖၣ်ကကိညၢ်လီၤအဂီၢ် န့ၣ်လီၤ.”

တကးဒံးဘၣ် ဒဲ(လ်)ဖံ ဂုာ်ကျဲးစၢးဟ့ၣ်လီၤအသးလၢ မုာ်သးမၤကလီတၢ်မၤထီဘိန့ၣ်လီၤ. လၢခံ အဝဲထိၣ်သတြီၤလီၤအသးဒီး စၢၢ်ဘိအလွဲၢ်တဖၣ်န့ၣ်လီၤ. စၢၢ်ဘိအလွဲၢ်တဖၣ် မ့ၢ်ကၢ်သနာ်က့ ပှၤသူအီၤဒ်သိး ကစွဲတၢ်အလွဲၢ်သ့ဒံးဝဲလီၤ. ဒ်န့ၣ်အသိး အမ့ၢ်တူၢ်ဘၣ်လၢ အသူၣ်ကၢ်သးလီၤသနာ်က့ အမၤစၢၤပှၤဂၤသ့ဒံးဝဲလီၤ. အဝဲတဲဝဲလၢ– “ယနၢ်ပၢၢ်ထီၣ်တၢ်ဂ့ၢ်တခါလၢ ယမ့ၢ်သူလံာ်စီဆှံအဆၢတဖၣ် ဒ်သိးကမၤမုာ်ထီၣ်က့ၤ ယပှၤမၤလိလံာ်စီဆှံဖိတဖၣ်အသးန့ၣ်, မ့ၢ်စ့ၢ်ကီးကျဲတဘိလၢ ယဟိဝၤယွၤမၤမုာ်ထီၣ်က့ၤယသးလီၤ.” ဒီးအဝဲကွဲးနီၣ်ဃာ်ဝဲ ပှၤလၢအလဲၤခီဖျိဘၣ် တၢ်သူၣ်တမုာ်သးတမုာ်တဖၣ်အမံၤ လၢအအိၣ်လၢ လံာ်စီဆှံပူၤန့ၣ်လီၤ. အဝဲတဲဝဲလၢ “ပှၤသ့ၣ်တဖၣ်အံၤ ကိးဂၤဒဲးန့ၣ် ဃ့ထုကဖၣ်တၢ်ဆူၣ်ဆူၣ်လီၤ.” အဝဲတဲစ့ၢ်ကီးဝဲလၢ “ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ် ပဘၣ်ဖးလံာ်စီဆှံထီဘိန့ၣ်လီၤ.”

ခီဖျိလၢ ဒဲ(လ်)ဖံ ဃုသ့ၣ်ညါလံာ်စီဆှံအဃိ အဝဲနၢ်ပၢၢ်ထီၣ်စ့ၢ်ကီးလၢ ပတဘၣ်ဆိကမိၣ်တၢ်ဘၣ်ဃးဒီး တၢ်လၢအပူၤကွံာ်ထီဘိဘၣ်, ပကဘၣ်သးစၢၢ်ဆၢ ပတၢ်အိၣ်မူလၢခါသူညါအဂီၢ်လီၤ. မၤတၢ် ၂၄:၁၅ တဲဝဲလၢ– “ပှၤသံအတီမ့ၢ်ဂ့ၤ, တတီဘၣ်မ့ၢ်ဂ့ၤ, ကဂဲၤဆၢထၢၣ်က့ၤလီၤ.” လံာ်စီဆှံတဆၢအံၤ မၤမုာ်ထီၣ်က့ၤ ဒဲ(လ်)ဖံ အသးလီၤ. ဒဲ(လ်)ဖံ တဲဝဲလၢ– ‘ယနာ်သပှၢ်ကတၢၢ်လၢ တၢ်ဆၢကတီၢ်မ့ၢ်ဘၣ်န့ၣ် ယဟိဝၤယွၤ ကမၤသမူထီၣ်က့ၤ ယဖိမုၣ်နီၢ်ကီၢ်လီၤ. ခဲအံၤဒၣ်လဲာ် ယထံၣ်တမှံလၢ ယအိၣ်ဘၣ်ဒီး ယဖိမုၣ်လၢဟီၣ်ခိၣ်သီအပူၤလံ.’

a နဒိကနၣ်တၢ်ကလုၢ်လၢ jw.org သ့ဝဲဒီဒူၣ်လီၤ.

ပမ့ၢ်ထံၣ်ဘၣ် တၢ်ကီတၢ်ခဲဒိၣ်ဒိၣ်မုၢ်မုၢ်သနာ်က့ လံာ်စီဆှံ မၤမုာ်ထီၣ်က့ၤပသးသ့ဝဲ

ကစၢ်ယွၤမၤစၢၤပှၤ လၢကျဲဒ်လဲၣ်

လံာ်စီဆှံပာ်ဖျါန့ၢ်ပှၤ လီၤတံၢ်လီၤဆဲးလၢ– “ကယဲၢ်ပှၤလၢ အကိးထီၣ်ယွၤ, ကယဲၢ်ပှၤလၢအကိးထီၣ်ဝဲလၢ တၢ်မ့ၢ်တၢ်တီခဲလၢာ်န့ၣ် ယွၤအိၣ်ဘူးဒီးအီၤလီၤ. ကမၤဝဲဖဲဒၣ်ပှၤလၢ အပျံၤအီၤတဖၣ်အသး, ဒီးကဒိကနၣ်အတၢ်ဃ့ကညး, ဒီးကအုၣ်က့ၤခီၣ်က့ၤအီၤလီၤ.” (စံးထီၣ်ပတြၢၤ ၁၄၅:၁၈, ၁၉) လံာ်စီဆှံတဆၢအံၤ ကဲထီၣ်တၢ်သူၣ်မံသးမုာ် လၢပဂီၢ်န့ၣ်လီၤ. ဘၣ်ဆၣ် ပမ့ၢ်ဃ့တၢ်မၤစၢၤလၢ ကစၢ်ယွၤအအိၣ်န့ၣ် အဝဲကစံးဆၢ ပတၢ်ထုကဖၣ်လၢကျဲဒ်လဲၣ်.

ခီဖျိဟ့ၣ်လီၤပှၤ တၢ်ဂံၢ်တၢ်ဘါ–

ဖဲပထံၣ်ဘၣ် တၢ်ကီတၢ်ခဲတဖၣ်အခါ ပကလီၤဘှံးလီၤတီၤ, ပနီၢ်ခိ ဒီးပနီၢ်သးအဂံၢ်ဘါလီၤစၢ်သ့ဝဲလီၤ. (ကတိၤဒိ ၂၄:၁၀) ဘၣ်ဆၣ် လံာ်စီဆှံတဲဝဲလၢ “ပှၤလၢအလီၤဘှါန့ၣ် ယွၤဟ့ၣ်ဝဲလၢအဂံၢ်အဘါလီၤ. ဒီးပှၤလၢအဂံၢ်အဘါတအိၣ်ဘၣ်န့ၣ် ဒုးဆူၣ်ထီၣ်ဝဲ အဂံၢ်အဘါလီၤ.” (ယၡါယၤ ၄၀:၂၉) တၢ်မၢဖိပီလူး ထံၣ်ဘၣ်တၢ်မၤကွၢ်တဖၣ် ဘၣ်ဆၣ်အဝဲတဲဝဲလၢ– “ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ် ယဂံၢ်ယဘါတဂၤအပူၤလီၤ.” (ဖံလံးပံၤ ၄:၁၃) စီၤပီလူးဒိးန့ၢ်ဘၣ်ဝဲ တၢ်ဂံၢ်တၢ်ဘါ ခီဖျိ ကစၢ်ယွၤအသးစီဆှံန့ၣ်လီၤ. ဒ်န့ၣ်အသိး နဃ့ကစၢ်ယွၤအသးစီဆှံသ့စ့ၢ်ကီးလီၤ.—လူၤကၣ် ၁၁:၁၃.

ခီဖျိဟ့ၣ်လီၤပှၤ တၢ်ကူၣ်သ့–

နမ့ၢ်တနၢ်ပၢၢ် လံာ်စီဆှံအတၢ်ဟံးစုနဲၣ်ကျဲတနီၤန့ၣ် နကမၤဒ်လဲၣ်. စီၤယၤကိာ်ကွဲးဝဲလၢ– “ဒီးသုဝဲသ့ၣ်တဂၤဂၤန့ၣ်, န့ၢ်တၢ်ကူၣ်သ့ကူၣ်ဘၣ်အလီၢ်မ့ၢ်အိၣ်ဒီး, မ်အဃ့လၢယွၤ, လၢအဟ့ၣ်တၢ်ညီလၢပှၤခဲလၢာ်ဒီး တဒုၣ်ဒွဲၣ်ဘၣ်တၢ်ဘၣ်န့ၣ်တက့ၢ်, ဒီးကဟ့ၣ်အီၤလီၤ.” (ယၤကိာ် ၁:၅) ဒီးနမၤထွဲ ဒ်နတၢ်ဃ့ထုကဖၣ်အသိးကသ့အဂီၢ် နကဘၣ်ဖးလံာ်စီဆှံဒီး အိၣ်မူမၤထွဲအီၤန့ၣ်လီၤ. (ယၤကိာ် ၁:၂၃-၂၅) နမ့ၢ်မၤဒ်န့ၣ်န့ၣ် နကထံၣ်ဘၣ်လၢ လံာ်စီဆှံအတၢ်ဟံးစုနဲၣ်ကျဲတဖၣ်န့ၣ် ပှဲၤဒီးတၢ်ကူၣ်သ့န့ၣ်လီၤ.

ခီဖျိအမၤမုာ်ထီၣ်က့ၤပသး–

ဖဲနတူၢ်ဘၣ်တၢ်သူၣ်ကိၢ်သးဂီၤဖးဒိၣ်အခါဒၣ်လဲာ် ယဟိဝၤယွၤမၤမုာ်ထီၣ်က့ၤနသးသ့ဝဲလီၤ. ကစၢ်ယွၤအကလုၢ်ကထါ တဲဝဲလၢ– “သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိး လၢအဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသးဒီး သုဆိကမိၣ်တၢ်လၢယ့ၣ်ၡူးခရံာ်အပူၤလီၤ.” (ဖံလံးပံၤ ၄:၆, ၇) အဃိ ဒ်သိးနကဒိးန့ၢ်ဘၣ် တၢ်သူၣ်မံသးမုာ်အဂီၢ် ဃ့တၢ်မၤစၢၤလၢ ယဟိဝၤယွၤအအိၣ်တက့ၢ်.

ဘၣ်ဆၣ် မ့ၢ်ဖျါလၢနတၢ်ကီတၢ်ခဲတဖၣ် တလီၤစှၤတဘျီဃီသနာ်က့ တဘၣ်ဆိကမိၣ်လၢ ကစၢ်ယွၤတသးအိၣ်နၤဘၣ်န့ၣ်တဂ့ၤ. လၢတၢ်န့ၣ်အလီၢ် ကစၢ်ယွၤကဟ့ၣ်နၤ တၢ်သးဒူ ဒီးတၢ်ဂံၢ်တၢ်ဘါ ဒ်သိးနလဲၤခီဖျိနတၢ်ကီတၢ်ခဲတဖၣ် ကန့ၢ်အဂီၢ်န့ၣ်လီၤ. (၁ ကရံၣ်သူး ၁၀:၁၃) တကးဒံးဘၣ် လံာ်စီဆှံပာ်ဖျါန့ၢ်ပှၤလၢ မုၢ်ကအိၣ်ဝဲတနံၤလၢ ကစၢ်ယွၤကမၤလီၤမၢ်ကွံာ်ဝဲ တၢ်ကီတၢ်ခဲ လီၤထူလီၤယိာ်လီၤ.