ပတူၢ်ဘၣ်တၢ်ကီတၢ်ခဲတဖၣ်အံၤန့ၣ် မ့ၢ်လၢကစၢ်ယွၤ စံၣ်ညီၣ်ပှၤအဃိဧါ

လူၤစံယၤ အခီၣ်စ့ၣ်တကပၤ တဂ့ၤလၢၤဘၣ်. ဖဲအနီၢ်ဆံးခါန့ၣ်​ အဝဲဒိးန့ၢ်ဘၣ်​ ထူၣ်ပျၢ်သံတၢ်ဆါလီၤ. ဖဲလူၤစံယၤအိၣ်​ ၁၆ နံၣ်အခါ အတၢ်မၤခိၣ်တဂၤတဲအီၤလၢ “ခီဖျိလၢ နနၢ်က့ၣ်ဒီးနတဒိကနၣ်​ နမိအကလုၢ်အဃိ ကစၢ်ယွၤစံၣ်ညီၣ်နၤလၢ ထူၣ်ပျၢ်သံတၢ်ဆါလီၤ.” တၢ်မၤခိၣ်​ အတၢ်ကတိၤတဖၣ်အံၤ မၤဘၣ်ဒိအသးဒိၣ်မးအဃိ ပူၤကွံာ်အါနံၣ်လံဘၣ်ဆၣ်​ အဝဲသးပ့ၤနီၣ်ဝဲတန့ၢ်ဘၣ်.

ဖဲဒဲမရဲး(စ်) သ့ၣ်ညါလၢအအိၣ်ဒီး ခိၣ်နူာ်ခဲစၢၣ်အခါ အပါတဲအီၤလၢ “တၢ်ဆါအီၣ်နၤဒ်အံၤန့ၣ်​ နမၤကြီတၢ်မနုၤလဲၣ်. နမၤဘၣ်တၢ်ကမၣ်ဖးဒိၣ်​ တမံၤမံၤအဃိ ကစၢ်ယွၤစံၣ်ညီၣ်နၤဧါသၢၣ်.” အပါအတၢ်ကတိၤန့ၣ်​ မၤဘၣ်ဒိအသးဆါမးလီၤ.

ပှၤနာ်ဝဲလၢ ကစၢ်ယွၤစံၣ်ညီၣ်​ ပှၤဟီၣ်ခိၣ်ဖိလၢ တၢ်ဆူးတၢ်ဆါန့ၣ်​ အိၣ်လံအနံၣ်ဖးယံာ်လံ. လံာ်လၢအမ့ၢ် Manners and Customs of Bible Lands (လုၢ်လၢ်လၢအဘၣ်ထွဲလိာ်သးဒီး တၢ်လီၢ်လၢအိၣ်လၢ လံာ်စီဆှံအပူၤ) တဲဝဲလၢ “ပှၤအါဂၤလၢယ့ၣ်ၡူးအစိၤန့ၣ်​ နာ်ဝဲလၢ ပှၤဟီၣ်ခိၣ်ဖိတဖၣ်​ တူၢ်ဘၣ်တၢ်ဆူးတၢ်ဆါခီဖျိလၢ အဝဲသ့ၣ်မၤဘၣ်တၢ်ဒဲးဘး တမံၤမံၤအဃိလီၤ.” ဒီးတၢ်ဆါအဝဲန့ၣ်​ မ့ၢ်ဝဲတၢ်စံၣ်ညီၣ်တမံၤလၢ အဝဲသ့ၣ်တၢ်ဒဲးဘးအဃိလီၤ. လံာ်အဂၤတဘ့ၣ်တဲဝဲ လၢညါန့ၣ်​ “ပှၤတနီၤနာ်ဝဲ ကစၢ်ယွၤဒုးအိၣ်ထီၣ်​ တၢ်ဆါအကလုာ်ကလုာ် ဒ်သိးကစံၣ်ညီၣ်​ ပှၤဟီၣ်ခိၣ်ဖိလၢ အဝဲသ့ၣ်အတၢ်ဒဲးဘးအဃိလီၤ.” မ့မ့ၢ်ဒ်န့ၣ်န့ၣ်လၢ ၁၄ ယာ်ဖှိၣ်အဆၢကတီၢ် ပှၤအကကွဲၢ်တဖၣ်လၢ ကီၢ်ယူရပၤအပူၤ ဘၣ်သံလၢတၢ်ဆူးတၢ်ဆါအဃိန့ၣ်​ မ့ၢ်ပတဲလၢကစၢ်ယွၤ စံၣ်ညီၣ်ပှၤအၢပှၤသီသ့ဧါ. မ့တမ့ၢ် ဒ်ဆူၣ်ချ့ပှၤဃုသ့ၣ်ညါတၢ်တဖၣ်​ တဲဝဲအသိး တၢ်ဆူးတၢ်ဆါတကလုာ်အံၤ ကဲထီၣ်သးခီဖျိလၢ ဘဲးထံရံယါအဃၢ်တဖၣ်အဃိဧါ. ပှၤတနီၤဆိကမိၣ်ဝဲလၢ မ့ၢ်ကစၢ်ယွၤဒုးကဲထီၣ်​ တၢ်ဆူးတၢ်ဆါ ဒ်သိးကမၤနးမၤဖှီၣ်​ ပှၤဟီၣ်ခိၣ်ဖိအနီၢ်ကီၢ်ဧါ.a

ဆိကမိၣ်ကွၢ်. ကစၢ်ယွၤမ့ၢ်စံၣ်ညီၣ်​ ပှၤဟီၣ်ခိၣ်ဖိလၢ တၢ်ဆူးတၢ်ဆါ ဒီးတၢ်မၤနးမၤဖှီၣ်န့ၣ်​ ဘၣ်မနုၤအဃိလၢ အဖိခွါယ့ၣ်ၡူးခရံာ်မၤဘျါက့ၤ ပှၤဆူးပှၤဆါတဖၣ်လဲၣ်. ယ့ၣ်ၡူးမၤဝဲဒ်န့ၣ်န့ၣ်​ မ့ၢ်အဝဲထီဒါကစၢ်ယွၤ အတၢ်စံၣ်ညီၣ်ဒီး အတၢ်တီတၢ်လိၤဧါ. (မးသဲ ၄:၂၃, ၂၄) ယ့ၣ်ၡူးခရံာ်န့ၣ်​ တထီဒါဝဲအပၢ် အတၢ်ဆၢတဲာ်နီတဘျီဘၣ်. လၢတၢ်န့ၣ်အလီၢ် အဝဲတဲဝဲလၢ “တၢ်လၢအဘၣ်​ အသးတဖၣ်န့ၣ်, ယမၤတထံၣ်ဃီလီၤ. . . . ဒ်ပၢ်မၤလိာ်ယၤအသိးန့ၣ်, ယမၤယဲဒ်န့ၣ်အသိးလီၤ.”—ယိၤဟၣ်​ ၈:၂၉; ၁၄:၃၁.

လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလၢ ယဟိဝၤယွၤန့ၣ်​ ‘တီဝဲလိၤဝဲ’ ဒီးတမၤတၢ်တတီတ လိၤ နီတဘျီဘၣ်. (၅ မိၤၡ့ ၃၂:၄) အဒိ ဆိကမိၣ်ကွၢ် မ့ၢ်ကစၢ်ယွၤ ကမၤလီၤတဲာ်ကဘီယူၤတဘ့ၣ်​ ဒီးမၤသံပှၤအကယၤတဖၣ်​ ခီဖျိလၢ အဝဲအဲၣ်ဒိးစံၣ်ညီၣ်ပှၤတဂၤလၢ ကဘီယူၤပူၤအဃိဧါ. တမ့ၢ်လၢကစၢ်ယွၤ ကမၤဝဲနီတဘျီဘၣ်. စီၤအၤဘြၤဟၣ်လၢအမ့ၢ် ကစၢ်ယွၤအခ့အပှၤလၢ အတီအလိၤတဂၤ တဲဝဲလၢ ကစၢ်ယွၤန့ၣ်​ တီဝဲလိၤဝဲအဃိ တမ့ၢ်လၢအက “မၤဟးဂီၤ ပှၤတီပှၤလိၤစ့ၢ်ကီးဒီး ပှၤတတီတလိၤ” နီတဘျီဘၣ်. အဝဲတဲစ့ၢ်ကီးလၢ ကစၢ်ယွၤမၤ “တၢ်န့ၣ်တသ့ဘၣ်.” (၁ မိၤၡ့ ၁၈:၂၃, ၂၅, ခ့ခါစှီၤကျိာ်) လံာ်စီဆှံတဲစ့ၢ်ကီးဝဲလၢ “ယွၤတမၤဘၣ်​ တၢ်တတီတလိၤဘၣ်” ဒီးအဝဲတမၤ “တၢ်အၢတၢ်သီ” ဘၣ်.—ယိၤဘး ၃၄:၁၀-၁၂.

ဘၣ်ဃးဒီး တၢ်ကီတၢ်ခဲလၢ ပထံၣ်ဘၣ်တဖၣ်န့ၣ်​ လံာ်စီဆှံသိၣ်လိပှၤဒ်လဲၣ်

တၢ်ကီတၢ်ခဲလၢ ပတူၢ်ဘၣ်အီၤတဖၣ်န့ၣ်​ ပတဲလၢကစၢ်ယွၤစံၣ်ညီၣ်ပှၤ ခီဖျိလၢ ပမၤတၢ်ဒဲးဘးတမံၤမံၤအဃိ တသ့ဘၣ်. အဒိ ဖဲယ့ၣ်ၡူး ဒီးအပျဲၢ်အဘီၣ်တဖၣ်​ ထံၣ်ဘၣ်ဝဲပိာ်ခွါလၢ အမဲာ်ချံတထံၣ်တၢ်လၢ အအိၣ်ဖျဲၣ်ထီၣ်လံၤလံၤအခါ ယ့ၣ်ၡူးပာ်ဖျါထီၣ်န့ၢ်ပှၤ တၢ်ဂ့ၢ်တခါအံၤ လီၤတံၢ်လီၤဆဲးလီၤ. “အပျဲၢ်အဘီၣ်သံကွၢ်အီၤ ဒီးစံးဝဲဒၣ်, ရၤဘံဧၢ, မ့ၢ်မတၤမၤတၢ်ဒဲးဘးလၢ ပှၤတဂၤအံၤကအိၣ်ဖျဲၣ်​ အမဲာ်ဘျီၣ်လဲၣ်. မ့ၢ်ပှၤတဂၤအံၤ, မ့ၢ်အမိၢ်အပၢ်လဲၣ်. ဒီးယ့ၣ်ၡူးစံးဆၢဝဲဒၣ်, အဝဲဒၣ်မ့ၢ်ဂ့ၤ, အမိၢ်အပၢ်မ့ၢ်ဂ့ၤ, တမၤဘၣ်တၢ်ဒဲးဘးဘၣ်. မ့ၢ်ဒ်သိးယွၤအတၢ်မၤကအိၣ်ဖျါ လၢအလိၤလီၤ.”—ယိၤဟၣ်​ ၉:၁-၃.

ခီဖျိလၢ ပှၤနာ်ကမၣ်ပာ်စၢၤဝဲဒ်န့ၣ်အဃိ ဖဲယ့ၣ်ၡူးတဲဝဲဒ်န့ၣ်အခါ အပျဲၢ်အဘီၣ်တဖၣ်​ ကမၢကမၣ်ဝဲလီၤ. ယ့ၣ်ၡူးမၤဘျါက့ၤပိာ်ခွါလၢ အမဲာ်ချံတထံၣ်​ တၢ်တဂၤအံၤ တကးဒံးဘၣ်​ ခီဖျိလၢ အဝဲမၤဝဲဒ်န့ၣ်အဃိ မ့ၢ်ဒၣ်အဝဲပာ်ဖျါထီၣ်လၢ တၢ်ကီတၢ်ခဲလၢ ပတူၢ်ဘၣ်တဖၣ်န့ၣ်​ တမ့ၢ်လၢကစၢ်ယွၤ စံၣ်ညီၣ်ပှၤအဃိဘၣ်. (ယိၤဟၣ်​ ၉:၆, ၇) မုၢ်မဆါတနံၤအံၤစ့ၢ်ကီး ပမ့ၢ်သ့ၣ်ညါလၢ ကစၢ်ယွၤတဒုးအိၣ်ထီၣ်​ ပတၢ်ဆူးတၢ်ဆါတဖၣ်ဘၣ်န့ၣ်​ ပကဒိးန့ၢ်ဘၣ်​ တၢ်သူၣ်မံသးမုာ်လီၤ.

လံာ်စီဆှံအဆၢလၢ အဟ့ၣ်ဂံၢ်ဟ့ၣ်ဘါပှၤ

• “ယွၤတဘၣ်ဘၣ်​ တၢ်လ့ပစီလၢ တၢ်အၢတၢ်သီဘၣ်, ဒီးအကစၢ်ဒၣ်ဝဲ တလ့ပစီဘၣ်ပှၤနီတဂၤဘၣ်.” (ယၤကိာ် ၁:၁၃) ပှၤဟီၣ်ခိၣ်ဖိတဖၣ်တူၢ်ဘၣ်​ “တၢ်အၢတၢ်သီ” လၢအပၣ်ဃုာ်ဒီး တၢ်ဆူးတၢ်ဆါ, တၢ်နးတၢ်ဖှီၣ်​ ဒီးတၢ်သံတၢ်ပှၢ်န့ၣ်​ အိၣ်အနံၣ်လၢ အကထိတဖၣ်လံ. ဘၣ်ဆၣ်​ တယံာ်တမီၢ်န့ၣ်​ တၢ်အၢတၢ်သီတဖၣ်အံၤ ကလီၤမၢ်ကွံာ်ဝဲခဲလၢာ်လီၤ.

• “မၤဘျါက့ၤ ကယဲၢ်ပှၤလၢ အမၤတကဲဘၣ်တဖၣ်န့ၣ်ခဲလၢာ်လီၤ.” (မးသဲ ၈:၁၆) ယ့ၣ်ၡူးမၤဘျါက့ၤ ပှၤဆူးပှၤဆါလၢ အဟဲလၢအအိၣ်ကိးဂၤဒဲးအဃိ အဝဲပာ်ဖျါထီၣ်ဝဲလၢ ကစၢ်ယွၤအဘီအမုၢ်န့ၣ်​ ကမၤဘျါကွံာ်ဝဲ ပှၤဆူးပှၤဆါလၢဟီၣ်ခိၣ်ဒီဘ့ၣ်လီၤ.

• “ဒီးယွၤကထွါကွံာ်အမဲာ်ထံ ခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢ အခီၣ်ထံးတဖၣ်ပူၤကွံာ်လံ.”—လီၣ်ဖျါ ၂၁:၃-၅.

ပကြၢးပာ်ဒ့ၣ်ပာ်ကမၣ် မတၤတဂၤလဲၣ်

ဘၣ်မနုၤအဃိ ပှၤဟီၣ်ခိၣ်​ ဖိသ့ၣ်တဖၣ်​ ထံၣ်ဘၣ်တၢ်ကီတၢ်ခဲ ဒီးတၢ်နးတၢ်ဖှီၣ်​ အါထဲအံၤညါလဲၣ်. ပှၤဟီၣ်ခိၣ်ဖိ ဆိကမိၣ်ဝဲတၢ်သံကွၢ်တဖျၢၣ်အံၤ အိၣ်လံအနံၣ်အါမးလံ. ပပာ်ဒ့ၣ်ပာ်ကမၣ်​ ကစၢ်ယွၤမ့ၢ်တသ့ဘၣ်န့ၣ်​ ပကြၢးပာ်ဒ့ၣ်ပာ်ကမၣ်​ မတၤတဂၤလဲၣ်. တၢ်မၤလိလၢခံတခါန့ၣ်​ ကပာ်ဖျါထီၣ်န့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢလီၤ.