ပဒိးန့ၢ်ဘၣ်တၢ်သးခုလၢ ဆၢကတီၢ်ခဲအံၤသ့
မုၢ်ကအိၣ်ဝဲတနံၤန့ၣ် ပှၤတဂၤမးတဆူးတဆါ, တသးပှၢ်ထီၣ်ဒီးတသံလၢၤဘၣ်. နၤစ့ၢ်ကီး နဒိးန့ၢ်ဘၣ် တၢ်အိၣ်မူဒ်အံၤသ့ဝဲလီၤ. ဘၣ်ဆၣ် အခဲအံၤပှၤကိးဂၤဒဲးန့ၣ် အိၣ်ဝဲဒီးတၢ်ကီတၢ်ခဲတဖၣ်လီၤ. အဃိ ဒ်သိးနကဒိးန့ၢ်ဘၣ် တၢ်သးခုလၢအဂီၢ်န့ၣ် တၢ်မနုၤမၤစၢၤနၤကသ့လဲၣ်. လံာ်စီဆှံအတၢ်ဟံးစုနဲၣ်ကျဲန့ၣ် မၤစၢၤနၤဒ်သိး နကဒိးန့ၢ်ဘၣ်တၢ်သူၣ်မံသးမုာ်လၢ အခဲအံၤသ့ဝဲလီၤ. တၢ်ကီတၢ်ခဲတနီၤ လၢပထံၣ်ဘၣ်အီၤ ဒီးလံာ်စီဆှံမၤစၢၤပှၤသ့အဂ့ၢ်န့ၣ် ပကကွၢ်သကိးအီၤတက့ၢ်.
ဃုထံၣ်န့ၢ် တၢ်သူၣ်မံသးမုာ်
လံာ်စီဆှံ အတၢ်ဟ့ၣ်ကူၣ်လၢ “သုမၤတၢ်ဖံးတၢ်န့ၣ်, မ်အထူၣ်ဖျဲးဒီးတၢ်အဲၣ်ကျိၣ်ဧိၤစ့ဧိၤတက့ၢ်. ဖဲသုတၢ်အိၣ်တဖၣ်န့ၣ်, သူၣ်မံသးမံဒီးအီၤတက့ၢ်.”—ဧ့ၤဘြံၤ ၁၃:၅.
မုၢ်မဆါတနံၤအံၤ ပှၤဟီၣ်ခိၣ်ဖိတဖၣ်ကဆီၣ်သနံးပှၤလၢ ပကဘၣ်အိၣ်ဒီး တၢ်ပီးတၢ်လီအါမံၤန့ၣ်လီၤ. ဘၣ်ဆၣ် လံာ်စီဆှံတဲဝဲလၢ ပ “သးမံဒီး” တၢ်လၢ “အိၣ်” ဒီးပှၤတဖၣ်သ့ဝဲန့ၣ်လီၤ. ကဲထီၣ်အသးကသ့ဒ်လဲၣ်.
ဟးဆှဲး “တၢ်အဲၣ် ကျိၣ်ဧိၤစ့ဧိၤတက့ၢ်.” ခီဖျိလၢ “တၢ်အဲၣ်ကျိၣ်ဧိၤစ့ဧိၤ” အဃိ ပှၤဟီၣ်ခိၣ်ဖိတဖၣ် ကဟ့ၣ်လီၤအသးတုၤဒၣ်လဲာ် အတၢ်အိၣ်ဆူၣ်အိၣ်ချ့, အဟံၣ်ဖိဃီဖိ, အတၢ်ရ့တံၤရ့သကိး ဒီးအတၢ်သကဲာ်ပဝးတဖၣ် ဟးဂီၤဝဲတစုန့ၣ်လီၤ. (၁ တံၤမသ့း ၆:၁၀) အဝဲသ့ၣ်တဒိးန့ၢ်ဘၣ် အဘျုးအဖှိၣ်နီတမံၤဘၣ်. လၢခံကတၢၢ် ပှၤလၢအအဲၣ်တၢ်ထူးတၢ်တီၤတဂၤန့ၣ် “အသးတမံဘၣ်” လၢတၢ်ထူးတၢ်တီၤအဃိဘၣ်.—စံၣ်တဲၤတဲလီၤတၢ် ၅:၁၀.
ပှၤကညီန့ၣ် အလုၢ်အပှ့ၤဒိၣ် န့ၢ်ဒံးတၢ်ပီးတၢ်လီ. မ့ၢ်, တၢ်ထူးတၢ်တီၤဒီး တၢ်ပီးတၢ်လီတဖၣ်န့ၣ် ကဲဘျုးဝဲလၢကျဲအါဘိလီၤ. ဘၣ်ဆၣ် တၢ်သ့ၣ်တဖၣ်န့ၣ် အဲၣ်ဆၢက့ၤပှၤဒီး သ့ၣ်ညါဆၢက့ၤတၢ်ဘျုးတသ့ဘၣ် ထဲဒၣ်ပှၤကညီန့ၣ် အဲၣ်ဆၢက့ၤတၢ်သ့န့ၣ်လီၤ. အဃိပမ့ၢ်အိၣ်ဒီး ‘တံၤသကိးနီၢ်နီၢ်’ တဖၣ်န့ၣ် မၤစၢၤပှၤလၢ ပကအိၣ်ဒီးတၢ်သးမံ လၢပတၢ်အိၣ်မူပူၤန့ၣ်လီၤ.—ကတိၤဒိ ၁၇:၁၇.
ပမ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ် ပဒိးန့ၢ်ဘၣ်တၢ်သးခုလၢ ဆၢကတီၢ်ခဲအံၤသ့
ဖဲနဘၣ်ဆူးဘၣ်ဆါအခါ အိၣ်ဒီးတၢ်တူၢ်န့ၢ်ခီၣ်ကဲ
လံာ်စီဆှံ အတၢ်ဟ့ၣ်ကူၣ်လၢ “သးလၢအခုန့ၣ် မၤဂ့ၤပနီၢ်ခိလီၤ.”—ကတိၤဒိ ၁၇:၂၂.
“သးလၢအခုန့ၣ်” လီၤဂာ်ဒ်သိးကသံၣ်တခါ အဃိပမ့ၢ်အိၣ်ဒီးတၢ်သးခုန့ၣ် ကမၤစၢၤပှၤလၢ ပကအိၣ်ဒီးတၢ်တူၢ်န့ၢ်ခီၣ်ကဲဖဲ ပဘၣ်ဆူးဘၣ်ဆါအခါန့ၣ်လီၤ. ဖဲပဘၣ်ဆူးဘၣ်ဆါအခါ ပဒိးန့ၢ်တၢ်သးခုကသ့ဒ်လဲၣ်.
ပာ်ဖျါထီၣ် တၢ်စံးဘျုးစံးဖှိၣ်. ပမ့ၢ်ဆိကမိၣ်ထဲ ပတၢ်ကီတၢ်ခဲ “ကိးနံၤဒဲး” န့ၣ် ပတၢ်ထံၣ်လၢအဂ့ၤတဖၣ် တအိၣ်လၢၤဘၣ်. (ကတိၤဒိ ၁၅:၁၅) လံာ်စီဆှံတဲဝဲလၢ “ကဲထီၣ်ပှၤစံးထီၣ်ပတြၢၤတၢ်အဘျုးအဖှိၣ်တက့ၢ်.” (ကလီးစဲ ၃:၁၅) လၢတၢ်ဂ့ၢ်ဆံးဆံးဖိအပူၤတဖၣ်ဒၣ်လဲာ် ပပာ်ဖျါထီၣ်ပတၢ်စံးဘျုးစံးဖှိၣ်သ့ဝဲန့ၣ်လီၤ. အဒိ, ဖဲပထံၣ်ဘၣ်မုၢ်လီၤနုာ် အတၢ်ဃံတၢ်လၤ, ပှၤလၢပအဲၣ်ဘၣ်တဖၣ်အတၢ်နံၤကမှံ ဒီးကလံၤဖိဟဲအူဘၣ်ပှၤ ကဖီကဖီအခါ တၢ်သ့ၣ်တဖၣ်န့ၣ် မၤဂ့ၤထီၣ်ဝဲ ပတၢ်အိၣ်မူအံၤသ့ဝဲန့ၣ်လီၤ.
မၤန့ၢ်တၢ်လၢ ပှၤဂၤအဂီၢ်. ပတၢ်အိၣ်ဆူၣ်အိၣ်ချ့မ့ၢ်တဂ့ၤဒၣ်လဲာ် လံာ်စီဆှံပာ်ဖျါထီၣ်ဝဲလၢ “ဟ့ၣ်တၢ်န့ၣ် ဘၣ်တၢ်ဆိၣ်ဂ့ၤအါန့ၢ် ဒိးန့ၢ်တၢ်တက့ၢ်လီၤ.” (မၤတၢ် ၂၀:၃၅) ဖဲပှၤဂၤစံးဘျုးစံးဖှိၣ် ပတၢ်ထဲးဂံၢ်ထဲးဘါအခါ ပဒိးန့ၢ်ဘၣ်တၢ်သးမံ ဒီးပကသးပ့ၤနီၣ်ကွံာ် ပတၢ်ကီတၢ်ခဲတဖၣ်အံၤလီၤ. ဖဲပဂုာ်ကျဲးစၢးမၤစၢၤပှၤဂၤလၢ ကဒိးန့ၢ်ဘၣ်တၢ်အိၣ်မူ လၢအဂ့ၤကတၢၢ်အခါ ပဝဲဒၣ်စ့ၢ်ကီး ပတၢ်အိၣ်မူကဂ့ၤထီၣ်ဝဲလီၤ.
မၤဂၢၢ်ကျၢၤထီၣ် နတၢ်ဆီဟံၣ်ဆီဃီ
လံာ်စီဆှံ အတၢ်ဟ့ၣ်ကူၣ်လၢ “သုကသ့ဃုထၢ တၢ်အဂ့ၤကတၢၢ်.”—ဖံလံးပံၤ ၁:၁၀, ခ့ခါစှီၤကျိာ်.
ပှၤနီၢ်ဒီမါဝၤခံဂၤလၢ ဟ့ၣ်လိာ်အသးတၢ်ဆၢကတီၢ်တချုးအါအါဘၣ်န့ၣ် အဝဲသ့ၣ်တၢ်ရ့လိာ်သးဟးဂီၤဝဲသ့န့ၣ်လီၤ. အဃိ ပှၤနီၢ်ဒီမါဝၤခံဂၤလၢာ် ကဘၣ်ထံၣ်တၢ်ဆီဟံၣ်ဆီဃီဒ် တၢ်လၢအရ့ဒိၣ်ကတၢၢ်လၢ အဝဲသ့ၣ်အတၢ်အိၣ်မူပူၤန့ၣ်လီၤ.
မၤသကိးတၢ်ဒ်သိးသိး. လၢနကဆိကမိၣ် ထဲနနီၢ်ကစၢ်အဂီၢ်န့ၣ် ရဲၣ်ကျဲၤလီၤဆိလၢ သုကမၤသကိးတၢ်ဒ်သိးသိးအဂီၢ်တက့ၢ်. လံာ်စီဆှံတဲဝဲလၢ “ပှၤခံဂၤဂ့ၤန့ၢ်ပှၤတဂၤတက့ၢ်လီၤ.” (စံၣ်တဲၤတဲလီၤတၢ် ၄:၉) အဒိ, နဖီအီၣ်သကိးတၢ်, လဲၤပှ့ၤသကိးတၢ်, ဟးလိာ်ကွဲ ဒီးအိၣ်ဘှံးအိၣ်သါတပူၤဃီ သ့ဝဲန့ၣ်လီၤ.
ပာ်ဖျါထီၣ် နတၢ်အဲၣ်တၢ်ကွံ. လံာ်စီဆှံဟ့ၣ်ဂံၢ်ဟ့ၣ်ဘါ ပှၤနီၢ်ဒီမါဝၤတဖၣ်လၢ ကဘၣ်ပာ်ဖျါထီၣ် တၢ်အဲၣ်ဒီးတၢ်ပာ်ကဲလၢ တဂၤဒီးတဂၤအဖီခိၣ်န့ၣ်လီၤ. (အ့းဖ့းစူး ၅:၂၈, ၃၃) အဒိ, ပာ်ဖျါထီၣ်တၢ်နံၤကမှံ, တၢ်ကဟုကယာ်ဒီး ဟ့ၣ်လိာ်သးတၢ်ဟ့ၣ်တဖၣ်န့ၣ် မၤဂၢၢ်ကျၢၤထီၣ်ဝဲ တၢ်ဆီဟံၣ်ဆီဃီသ့ဝဲန့ၣ်လီၤ. ဒီးတၢ်မံဃုာ်အိၣ်ဃုာ်န့ၣ် ကဘၣ်မ့ၢ်ထဲ နီၢ်ဒီမါဝၤခံဂၤအဂီၢ်န့ၣ်လီၤ.—ဧ့ၤဘြံၤ ၁၃:၄.