မ့ၢ်နကတဲာ်ကတီၤဆိပာ်နသးလၢ တၢ်သ့ၣ်နီၣ်ထီၣ်အမူးအဂီၢ်ဧါ

ဖဲ ခ.န ၃၃ လါနံစၣ် ၁၃ သီ တချုးလၢယ့ၣ်ၡူးဘၣ်တၢ်မၤသံအီၤအခါ ကစၢ်သ့ၣ်ညါဝဲလၢ အတၢ်ဆၢကတီၢ်အိၣ်တ့ၢ်ဒၣ်ထဲတဟါလၢအကရ့လိာ်သးဒီးအတံၤသကိးဘူးဘူးတံၢ်တံၢ်တဖၣ်န့ၣ်လီၤ. ယ့ၣ်ၡူးမၤဝဲဘူၣ်လဲၤကပာ်ဒီးအပျဲၢ်အဘီၣ်တဖၣ် လၢခံကတၢၢ်တဘျီ ဝံၤအလီၢ်ခံ ဒုးအိၣ်ထီၣ်ဝဲမူးပွဲလၢအသီတခါလၢအမ့ၢ်ကစၢ်အတၢ်အီၣ်လၢဟါအီၣ်လီၤ. မူးပွဲအံၤမ့ၢ်တၢ်လၢအရ့ဒိၣ်အဃိ အဝဲသ့ၣ်ကဘၣ်ကတဲာ်ကတီၤဆိပာ်ဝဲ လီၤတံၢ်လီၤဆဲးလီၤ. လၢတၢ်န့ၣ်အဃိ ယ့ၣ်ၡူးမၢလီၤဝဲစီၤပ့းတရူးဒီး စီၤယိၤဟၣ်လၢ ကလဲၤကတဲာ်ကတီၤဝဲ တၢ်လၢအလိၣ်ဘၣ်တဖၣ်န့ၣ်လီၤ. (လူၤ. ၂၂:၇-၁၃) စးထီၣ်ဖဲန့ၣ်လံၤလံၤ တချုးလၢခရံာ်ဖိတဖၣ်မၤဝဲတၢ်သ့ၣ်နီၣ်ထီၣ်အမူးအံၤအခါ ကဘၣ်ကတဲာ်ကတီၤဆိပာ်ဝဲလီၤ. (လူၤ. ၂၂:၁၉) မ့မ့ၢ်ဒ်န့ၣ်ဒီး တချုးလၢလါအ့ဖြ့ၣ် ၃ သီ တၢ်သ့ၣ်နီၣ်ထီၣ်အမူးန့ၣ် ပကြၢးကတဲာ်ကတီၤဆိပာ်တၢ်မနုၤလဲၣ်.

တၢ်လၢတၢ်အိၣ်ဖှိၣ်သးပှၢ်တဖၣ် ကဘၣ်ကတဲာ် ကတီၤဝဲ-

ကတဲာ်ကတီၤဆိပာ်ဘီမုၢ်ဘျီၣ်ဒိၣ် မ့တမ့ၢ်တၢ်သူၣ်ထီၣ်အဂၤတဖျၢၣ်ဖျၢၣ်လၢအကြၢးဝဲဘၣ်ဝဲ လၢပှၤကသူအီၤအဂီၢ်န့ၣ်တက့ၢ်. တၢ်လီၢ်အဝဲန့ၣ်ကြၢးအိၣ်ဒီးလီၢ်ဆ့ၣ်နီၤအလၢအပှဲၤ, တၢ်ကပီၤ ဒီးကလံၤလၢအဂ့ၤန့ၣ်လီၤ. ဒီးကတဲာ်ကတီၤဆိပာ်လၢ ပှၤကမၤကဆှဲကဆှီတၢ်လီၢ်အံၤ လီၤတံၢ်လီၤဆဲးအဂီၢ်တက့ၢ်.
ဃုထၢထီၣ်ဒီပုၢ်ဝဲၢ်ခွါလၢ အတုၤထီၣ်ထီၣ်ဘးတဂၤလၢ ကစံၣ်တဲၤတဲလီၤတၢ်အဂီၢ်, ပှၤပၢၤလီၢ်ဆ့ၣ်နီၤတဂၤ ဒီးဒီပုၢ်ဝဲၢ်ခွါတဖၣ်လၢကဃ့ဘါထုကဖၣ်လၢ တၢ်နီၤလီၤကိၣ်ဒီးစပံးထံအဂီၢ်န့ၣ်တက့ၢ်.
တၢ်သူၣ်ထီၣ်တဖျၢၣ်အပူၤ ပှၤမ့ၢ်အိၣ်ဖှိၣ်ရိဖှိၣ်အါန့ၢ်တဘျီန့ၣ် ကဘၣ်ရဲၣ်လီၤကျဲၤလီၤပာ်ဝဲလၢ ပှၤကအိၣ်ဖှိၣ်ရိဖှိၣ်လၢအဆၢကတီၢ်ဖဲလဲၣ်, ပှၤကဟဲနုာ်ဟးထီၣ်ဒ်လဲၣ်, ဒီးပှၤကပာ်သိလ့ၣ်လၢ တၢ်လီၢ်ဖဲလဲၣ်န့ၣ်လီၤ.
ဃုထၢထီၣ်ဒီးရဲၣ်လီၤကျဲၤလီၤ ပှၤလၢကတူၢ်လိာ်ပှၤတမှံၤဒီး ပှၤလၢကနီၤလီၤဝဲကိၣ်ဒီးစပံးထံန့ၣ်တက့ၢ်.
ကတဲာ်ကတီၤဆိပာ်လီခီ, စပံးထံအခွး, စီၢ်နီၤခိၣ်လၢအကြၢးဝဲဘၣ်ဝဲ ဒီးစီၢ်နီၤခိၣ်အဒါလၢ ပှၤကသူအီၤလၢတၢ်သ့ၣ်နီၣ်ထီၣ်အမူးအဂီၢ်တက့ၢ်.

တၢ်လၢပှၤစံၣ်တဲၤတဲလီၤတၢ်ဖိတဖၣ် ကဘၣ်ကတဲာ် ကတီၤဝဲ-

ကတဲာ်ကတီၤဆိပာ်နသး ဒ်သိးနကပၣ်ဃုာ်လၢ တၢ်နီၤလီၤတၢ်သ့ၣ်နီၣ်ထီၣ်အမူးအလံာ်ကွဲမုာ်ခဲၣ်ဖ့အပူၤ လၢလၢပှဲၤပှဲၤကသ့အဂီၢ်န့ၣ်တက့ၢ်.
ကွဲးနီၣ်ပာ်စၢၤပှၤလၢ မၤလိလံာ်စီဆှံဒီးနၤအမံၤ, နဘူးနတံၢ်, နတံၤသကိးလၢကၠိ, နတံၤသကိးလၢတၢ်မၤလီၢ် ဒီးပှၤအဂၤတဖၣ်လၢနသ့ၣ်ညါအီၤ ဒ်သိးနကကွဲမုာ်အဝဲသ့ၣ်န့ၣ်တက့ၢ်.
လံာ်စီဆှံအဆၢလၢတၢ်သ့ၣ်နီၣ်ထီၣ်အမူးအဂီၢ်န့ၣ် ဖးအီၤဒီးဆိကမိၣ်ထံအီၤ လီၤတံၢ်လီၤဆဲးတက့ၢ်.
ဖဲတၢ်သ့ၣ်နီၣ်ထီၣ်အမူးအနံၤန့ၣ် ဟဲဆိဆိလၢနကတူၢ်လိာ်ပှၤတမှံၤအဂီၢ်တက့ၢ်.