တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ် လၢကမၤလၢထီၣ်ပှဲၤထီၣ်တၢ်တိာ်ပာ်

၁. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် အတၢ်တိာ်ပာ်မ့ၢ်မနုၤလဲၣ်.

^၁ ဘၣ်တဘျီ ယ့ၣ်ၡူးအိၣ်ဖှိၣ်ရိဖှိၣ်ဒီး အပျဲၢ်အဘီၣ်အဂၤ ၇၀ ဖဲတချုးအဝဲသ့ၣ်လဲၤစံၣ်တဲၤတဲလီၤတၢ်အခါန့ၣ်လီၤ. (လူၤကၣ် ၁၀:၁-၁၁) ကစၢ်ဟ့ၣ်ဂံၢ်ဟ့ၣ်ဘါအပျဲၢ်အဘီၣ်တဖၣ်အံၤခီဖျိ ­ဒုးသ့ၣ်နီၣ်ထီၣ်က့ၤအဝဲသ့ၣ်လၢ ယဟိဝၤယွၤ “ကူးတၢ်အလီၢ်အကစၢ်” ကနဲၣ်လိအဝဲသ့ၣ် ဒီးတမ့ၢ်လၢအဝဲသ့ၣ်ကလဲၤထဲတဂၤဧိၤန့ၣ်ဘၣ်. ကစၢ်ဟ့ၣ်စ့ၢ်ကီး တၢ်နဲၣ်လိလၢတၢ်စံၣ်တဲၤတဲလီၤတၢ်မၤအဂီၢ် ဒီးရဲၣ်လီၤကျဲၤလီၤဝဲလၢကလဲၤဝဲ “ခံဂၤတပူၤခံဂၤပူၤ” လီၤ. မုၢ်မဆါတနံၤညါအံၤစ့ၢ်ကီး တၢ်အိၣ်ဖှိၣ်ရိဖှိၣ်လၢပမၤအီၤဖဲ တချုးပလဲၤစံၣ်တဲၤတဲလီၤတၢ်အခါန့ၣ် အတၢ်တိာ်ပာ်မ့ၢ်ဒ်သိး ကဟ့ၣ်ဂံၢ်ဟ့ၣ်ဘါပှၤ, ကနဲၣ်လိပှၤ ဒီးကရဲၣ်လီၤကျဲၤလီၤပှၤလၢ တၢ်စံၣ်တဲၤတဲလီၤတၢ်မၤအဂီၢ်လီၤ.

၂. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကြၢးယံာ်ဝဲထဲလဲၣ်.

^၂ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ပၣ်ဃုာ်ဒီးတၢ်ရဲၣ်လီၤကျဲၤလီၤကရူၢ်, တၢ်ဟ့ၣ်လီၤတၢ်စံၣ်တဲၤတဲလီၤဟီၣ်ကဝီၤတဖၣ် ဒီးတၢ်ဃ့ထုကဖၣ်အဃိ ယံာ်ဝဲ ၁၀ တုၤလၢ ၁၅ မံးနံးန့ၣ်လီၤ. ခဲအံၤတၢ်ရဲၣ်တၢ်ကျဲၤအံၤ ဘၣ်တၢ်ဆီတလဲအီၤလံန့ၣ်လီၤ. စးထီၣ်လၢလါအ့ဖြ့ၣ်န့ၣ် တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤ ကယံာ်ဝဲ ၅ တုၤလၢ ၇ မံးနံးန့ၣ်လီၤ. ဘၣ်ဆၣ် တၢ်အိၣ်ဖှိၣ်ရိဖှိၣ်အံၤ ပမ့ၢ်မၤအီၤလၢ တၢ်အိၣ်ဖှိၣ်ရိဖှိၣ်အဂၤဝံၤအလီၢ်ခံန့ၣ် ကြၢးလၢပှၤမၤစှၤလီၤတၢ်ဆၢကတီၢ်န့ၣ်လီၤ. မ့ၢ်လၢဒီပုၢ်ဝဲၢ်တဖၣ်နၢ်ဟူတ့ၢ်လံလံာ်စီဆှံတၢ်ကစီၣ်အဃိလီၤ. ခီဖျိပှၤမၤစှၤလီၤတၢ်ဆၢကတီၢ်လၢ တၢ်အိၣ်ဖှိၣ်ရိဖှိၣ်အံၤအဃိ ပသူတၢ်ဆၢကတီၢ်န့ၢ်အါထီၣ်လၢ တၢ်စံၣ်တဲၤတဲလီၤတၢ်အဂီၢ်န့ၣ်လီၤ. တကးဒံးဘၣ် ပှၤလဲၤလၢညါတဖၣ် မ့တမ့ၢ် ပှၤစံၣ်တဲၤတဲလီၤတၢ်ဖိတဖၣ် မ့ၢ်စးထီၣ်စံၣ်တဲၤတဲလီၤတၢ်လၢ တချုးတၢ်အိၣ်ဖှိၣ်ရိဖှိၣ်အံၤန့ၣ် ကဘၣ်ပာ်ပတုာ်ဝဲထဲတစိၢ်ဖိ လၢကပၣ်ဃုာ်ဝဲလၢတၢ်အိၣ်ဖှိၣ်အံၤအဂီၢ်န့ၣ်လီၤ. မ့ၢ်ဝံၤဒီး ဆဲးလဲၤစံၣ်တဲၤတဲလီၤတၢ်သ့ဝဲလီၤ.

၃. ဒ်သိးတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤ ကကဲထီၣ်­တၢ်မၤစၢၤလၢ ပှၤစံၣ်တဲၤတဲလီၤတၢ်ဖိတဖၣ်အဂီၢ် ပှၤရဲၣ်လီၤကျဲၤလီၤအီၤသ့ဒ်လဲၣ်.

^၃ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကြၢးလၢပှၤရဲၣ်လီၤကျဲၤလီၤပာ်အီၤ လီၤတံၢ်လီၤဆဲး ဒ်သိးကကဲထီၣ်တၢ်မၤစၢၤလၢ ပှၤစံၣ်တဲၤတဲလီၤတၢ်ဖိတဖၣ်အဂီၢ်န့ၣ်လီၤ. တၢ်အိၣ်ဖှိၣ်အါဖုန့ၣ် ထံၣ်ဘၣ်ဝဲလၢဒီပုၢ်ဝဲၢ်သ့ၣ်တဖၣ် မ့ၢ်တမၤဝဲတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤလၢ တၢ်လီၢ်တတီၤဃီအပူၤဘၣ်န့ၣ် အဘျုးအိၣ်ဝဲလီၤ. အဝဲသ့ၣ်နီၤဖးဝဲကရူၢ် ဒီးမၤဝဲတၢ်အိၣ်ဖှိၣ်ရိဖှိၣ်အံၤလၢ အကရူၢ်ဒၣ်ဝဲန့ၣ်လီၤ. လၢတၢ်န့ၣ်အဃိ ကညီဝဲလၢပှၤစံၣ်တဲၤတဲလီၤတၢ်ဖိတဖၣ် ကလဲၤဝဲလၢတၢ်အိၣ်ဖှိၣ်ရိဖှိၣ်အံၤအဂီၢ် ဒီးကလဲၤဝဲလၢ တၢ်စံၣ်တဲၤတဲလီၤတၢ်ဟီၣ်ကဝီၤအဂီၢ်လီၤ. ဒီးကညီစ့ၢ်ကီးလၢ ကရူၢ်အပှၤကွၢ်တၢ် ကရဲၣ်လီၤကျဲၤလီၤဝဲ ပှၤစံၣ်တဲၤတဲလီၤတၢ်ဖိတဖၣ်ဒီး ကွၢ်ထွဲအဝဲသ့ၣ် ဘူးဘူးတံၢ်တံၢ်ကသ့အဂီၢ်န့ၣ်လီၤ. တၢ်အိၣ်ဖှိၣ်သးပှၢ်ကရူၢ်န့ၣ် ကွၢ်ဝဲလီၢ်ကဝီၤတၢ်အိၣ်အသးဝံၤဒီး ကဆၢတဲာ်ဝဲတၢ်လၢအဂ့ၤကတၢၢ်န့ၣ်လီၤ. တချုးတၢ်ထုကဖၣ် ကျၢၢ်တံၢ်န့ၣ် ကြၢးဒုးသ့ၣ်ညါ ပှၤခဲလၢာ်လၢ ကဘၣ်လဲၤဝဲတၢ်လီၢ်ဖဲလဲၣ် ဒီးကဘၣ်လဲၤဒီးမတၤလဲၣ်န့ၣ်လီၤ.

၄. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ဘၣ်မနုၤအဃိ ပကြၢးထံၣ်အီၤလၢအရ့ဒိၣ်ထဲသိးဒီး တၢ်အိၣ်ဖှိၣ်ရိဖှိၣ်အဂၤတဖၣ်န့ၣ်လဲၣ်.

^၄ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် အရ့ဒိၣ်ထဲသိးဒီး တၢ်အိၣ်ဖှိၣ်ရိဖှိၣ် အဂၤတဖၣ်န့ၣ်လီၤ- တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ပှၤမၤအီၤလၢပှၤလၢကလဲၤစံၣ်တဲၤတဲလီၤတၢ်တဖၣ်အဂီၢ်အဃိ တမ့ၢ်လၢတၢ်အိၣ်ဖှိၣ်ဖိတဖၣ်ကလဲၤထီၣ်ဝဲကိးဂၤဒဲးဘၣ်. ဘၣ်ဆၣ်တၢ်အိၣ်ဖှိၣ်ရိဖှိၣ်အံၤ ပကြၢးထံၣ်အီၤလၢအရ့ဒိၣ်ထဲသိးဒီး တၢ်အိၣ်ဖှိၣ်ရိဖှိၣ်အဂၤတဖၣ်န့ၣ်လီၤ. ဒ်ပတၢ်အိၣ်ဖှိၣ်ရိဖှိၣ်အဂၤတဖၣ်အသိး တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် မ့ၢ်ယဟိဝၤယွၤ ကတဲာ်ကတီၤဝဲအဃိ မၤစၢၤပှၤလၢပကသဆၣ်ထီၣ်လိာ်ပခံ ဆူတၢ်အဲၣ်တၢ်ကွံဒီး တၢ်မၤဂ့ၤတၢ်အဂီၢ်န့ၣ်လီၤ. (ဧ့ၤဘြံၤ ၁၀:၂၄, ၂၅) လၢတၢ်န့ၣ်အဃိ ပှၤလၢအဖီၣ်မူဒါတဂၤ မ့ၢ်အိၣ်ကတဲာ်ကတီၤပာ်အသးဂ့ၤဂ့ၤန့ၣ် အတၢ်ကတိၤသကိးတၢ်အံၤ ကကဲထီၣ်တၢ်မၤလၤကပီၤယဟိဝၤယွၤ ဒီးကကဲဘျုးလၢ ပှၤလၢအဟဲထီၣ်တၢ်အိၣ်ဖှိၣ်ရိဖှိၣ်အံၤအဂီၢ်န့ၣ်လီၤ. မ့ၢ်သ့န့ၣ် ပှၤလၢကလဲၤစံၣ်တဲၤတဲလီၤတၢ်တဖၣ် ကြၢးဟဲထီၣ်ဝဲတၢ်အိၣ်ဖှိၣ်ရိဖှိၣ်အံၤန့ၣ်လီၤ.

၅. (က) ပှၤလၢအကွၢ်ထွဲတၢ်စံၣ်တဲၤတဲလီၤတၢ်မၤတဖၣ် ဖဲအရဲၣ်လီၤကျဲၤလီၤတၢ်လၢ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကဘၣ်မၤဝဲဒ်လဲၣ်. (ခ) ဒီပုၢ်ဝဲၢ်မုၣ်တဂၤမ့ၢ်ကဘၣ်ဖီၣ်မူဒါ ဖဲတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကြၢးမၤဝဲဒ်လဲၣ်.

^၅ ပှၤလၢကဖီၣ်မူဒါတဂၤ ကဘၣ်ကတဲာ်ကတီၤဝဲဒ်လဲၣ်- ပှၤတဂၤဂၤက ကတဲာ်ကတီၤဆိပာ်အသးဂ့ၤဂ့ၤဒီး ကပာ်ဖျါထီၣ်အတၢ်ဂ့ၢ်လၢ တၢ်အိၣ်ဖှိၣ်ရိဖှိၣ်အဂီၢ်န့ၣ် ကဘၣ်ဒိးန့ၢ်ဆိပာ်မူဒါန့ၣ်လီၤ. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ဒ်န့ၣ်အသိးစ့ၢ်ကီးလီၤ. ဖဲပှၤမၤတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်လၢအကရူၢ်ဒၣ်ဝဲအခါ ကရူၢ်အပှၤကွၢ်တၢ် မ့တမ့ၢ် ပှၤလၢအမၤစၢၤအီၤတဂၤ ဖီၣ်ဝဲမူဒါလၢအကရူၢ်ဒၣ်ဝဲသ့န့ၣ်လီၤ. ဘၣ်ဆၣ်ဖဲတၢ်အိၣ်ဖှိၣ်ဒီတဖု မ့ၢ်အိၣ်ဖှိၣ်ရိဖှိၣ်တပူၤဃီန့ၣ် ပှၤကွၢ်ထွဲတၢ်စံၣ်တဲၤတဲလီၤတၢ်မၤတဂၤ ကဃုထၢထီၣ်ဝဲ ပှၤတဂၤဂၤလၢ ကဖီၣ်မူဒါန့ၣ်လီၤ. ပှၤလၢအကွၢ်ထွဲတၢ်စံၣ်တဲၤတဲလီၤတၢ်မၤ တနီၤန့ၣ်ကဟ့ၣ်လီၤဝဲ တၢ်ဖီၣ်မူဒါစရီအံၤဆူ ပှၤလၢကဘၣ်ဖီၣ်မူဒါကိးဂၤဒဲး ဒီးကကျးလီၤဝဲစရီအံၤလၢ တၢ်ဒုးသ့ၣ်ညါတၢ်အလၢၢ်သ့ၣ်ဘၣ် (ကြော်ငြာသင်ပုန်း) အလိၤန့ၣ်လီၤ. တၢ်အိၣ်ဖှိၣ်ရိဖှိၣ်အံၤ ကကဲဘျုးကဲဖှိၣ်ထဲလဲၣ်န့ၣ် ဒိးသန့ၤထီၣ်အသးလၢ ပှၤလၢကဖီၣ်မူဒါတဂၤအံၤ အတၢ်သ့တၢ်ဘၣ်လၢ တၢ်သိၣ်လိတၢ်ဒီး အတၢ်ရဲၣ်လီၤကျဲၤလီၤတၢ်အဖီခိၣ်န့ၣ်လီၤ. လၢတၢ်န့ၣ်အဃိ ပှၤကွၢ်ထွဲတၢ်စံၣ်တဲၤတဲလီၤတၢ်မၤတဂၤန့ၣ် တချုးလၢဟ့ၣ်လီၤမူဒါအခါ ကြၢးဆိကမိၣ်တၢ်ထံထံဆးဆးန့ၣ်လီၤ. လၢမုၢ်နံၤအဂၤတနီၤန့ၣ် တၢ်အိၣ်ဖှိၣ်သးပှၢ်, တၢ်အိၣ်ဖှိၣ်အပှၤမၤစၢၤတၢ် မ့တမ့ၢ် ဒီပုၢ်ဝဲၢ်ခွါတဖၣ်လၢ အဘျၢထံဝံၤဒီးတုၤထီၣ်ထီၣ်ဘး မ့ၢ်တအိၣ်န့ၣ် ပှၤကွၢ်ထွဲတၢ်စံၣ်တဲၤတဲလီၤတၢ်မၤတဂၤ ဟ့ၣ်လီၤမူဒါလၢဒီပုၢ်ဝဲၢ်မုၣ် လၢအဘျၢထံဝံၤဒီးတုၤထီၣ်ထီၣ်ဘးတဂၤ လၢကဖီၣ်ဝဲမူဒါအံၤသ့န့ၣ်လီၤ.—ကွၢ်တၢ်ကွဲးဖုၣ်လၢ လံာ်ကဘျံးပၤ ၆ “ဖဲဒီပုၢ်ဝဲၢ်မုၣ်တဂၤ ကဘၣ်ဖီၣ်ဝဲမူဒါအခါ” န့ၣ်တက့ၢ်.

၆. ပှၤလၢကဖီၣ်မူဒါလၢ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ဘၣ်မနုၤအဃိအရ့ဒိၣ်လၢ ကဘၣ်ကတဲာ်ကတီၤအသးဂ့ၤဂ့ၤန့ၣ်လဲၣ်.

^၆ ဖဲပဒိးန့ၢ်ဘၣ်မူဒါလၢ တၢ်စံၣ်တဲၤတဲလီၤတၢ်ကၠိ မ့တမ့ၢ် တၢ်သိၣ်လိလၢတၢ်စံၣ်တဲၤတဲလီၤတၢ်အဂီၢ်အခါ ပပာ်အီၤဒ်တၢ်လၢအရ့ဒိၣ်ဒီး ပကတဲာ်ကတီၤအီၤဂ့ၤဂ့ၤလီၤ. တမ့ၢ်လၢပကအိၣ်ခိးတုၤလၢ ပလဲၤတၢ်အိၣ်ဖှိၣ်အဆၢကတီၢ်မး ပဆိကမိၣ်ထီၣ်တၢ်ဂ့ၢ်လၢပကတဲအီၤန့ၣ်ဘၣ်. ဒ်န့ၣ်အသိးဖဲနဒိးန့ၢ်ဘၣ်မူဒါလၢနကဘၣ်ဖီၣ် တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ပကြၢးပာ်အီၤဒ်တၢ်လၢအရ့ဒိၣ်လီၤ. ခဲအံၤ ပှၤမၤစှၤလီၤတၢ်ဆၢကတီၢ်လၢ တၢ်အိၣ်ဖှိၣ်ရိဖှိၣ်အံၤအဂီၢ်အဃိ ဒ်သိးတၢ်အိၣ်ဖှိၣ်ရိဖှိၣ်အံၤ အဘျုးကအိၣ်ဒီး ကဝံၤဝဲဘၣ်ဆၢဘၣ်ကတီၢ်အဂီၢ် ပကဘၣ်ကတဲာ်ကတီၤပာ်စၢၤဂ့ၤဂ့ၤလီၤ. နကတဲာ်ကတီၤဂ့ၤဂ့ၤကသ့အဂီၢ် နကဘၣ်ဟံးန့ၢ်ဆိပာ် တၢ်စံၣ်တဲၤတဲလီၤတၢ်ဟီၣ်ကဝီၤလံာ်က့န့ၣ်လီၤ.

၇. တၢ်ဂ့ၢ်တနီၤလၢ ပှၤဖီၣ်မူဒါတဖၣ် တဲသကိးဝဲသ့န့ၣ် မ့ၢ်မနုၤလဲၣ်.

^၇ ကဘၣ်တဲသကိးတၢ်ဂ့ၢ်မနုၤလဲၣ်- တၢ်လီၢ်တတီၤဒီးတတီၤအတၢ်အိၣ်သး တဒ်သိးလိာ်အသးအဃိ ကုၢ်လၢအကလုၢ်တီ ဒီးအကူၣ်တၢ်သ့န့ၣ် တကတဲာ်ကတီၤဝဲ တၢ်ဂ့ၢ်လၢတၢ်ကတဲသကိးအီၤဖဲ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အဂီၢ်န့ၣ်ဘၣ်. ဘၣ်ဆၣ်လၢတၢ်လွံၢ်နၢၣ်အပူၤ “ဖဲတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ် နကတဲသကိးတၢ်ဂ့ၢ်မနုၤလဲၣ်” န့ၣ်ပာ်ဖျါထီၣ်ဝဲတၢ်ဂ့ၢ်တနီၤလၢ နတဲသကိးအီၤသ့န့ၣ်လီၤ. ညီနုၢ်တၢ်အိၣ်ဖှိၣ်ရိဖှိၣ်အံၤ ဘၣ်တၢ်မၤအီၤဒ်တၢ်ကတိၤသကိးတၢ်အသိးလီၤ. တဘျီတခီၣ်န့ၣ် ကပၣ်ဃုာ်ဒီး တၢ်ဒုးနဲၣ်တၢ်အဒိလၢ တၢ်ကတဲာ်ကတီၤပာ်အီၤဂ့ၤဂ့ၤ မ့တမ့ၢ် ကဒုးနဲၣ်ဝဲတၢ်ဂီၤမူလၢ jw.org/ksw အပူၤန့ၣ်လီၤ. ပှၤလၢကဖီၣ်မူဒါတဂၤ ဖဲကတဲာ်ကတီၤအသးအဆၢကတီၢ်န့ၣ် ကြၢးဆိကမိၣ်ဝဲ တၢ်ဂ့ၢ်လၢကကဲထီၣ်တၢ်ဟ့ၣ်ဂံၢ်ဟ့ၣ်ဘါလီၤ. ဒီးတၢ်ဂ့ၢ်လၢကမၤစၢၤပှၤလၢကလဲၤစံၣ်တဲၤတဲလီၤတၢ်တဖၣ်ဒ်သိး ကကတဲာ်ကတီၤအသးလၢ ကဘၣ်တဲဝဲတၢ်ဂ့ၢ်ဖဲ မုၢ်နံၤအဝဲန့ၣ်အဂီၢ်လီၤ.

၈. လၢမုၢ်ဃုနံၤဒီးအိၣ်ဘှံးနံၤ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကြၢးလၢပတဲသကိး တၢ်ဂ့ၢ်မနုၤလဲၣ်.

^၈ အဒိ, ပှၤစံၣ်တဲၤတဲလီၤတၢ်ဖိလၢအ လဲၤစံၣ်တဲၤတဲလီၤတၢ်လၢမုၢ်ဃုနံၤန့ၣ် အါတက့ၢ် နီၤလီၤဝဲ (ကင်းမျှော်စင်၊ နိုးလော့!) မဲးကစံန့ၣ်လီၤ. မ့ၢ်လၢအဝဲသ့ၣ်အါဂၤ တလဲၤစံၣ်တဲၤတဲလီၤတၢ်လၢ မုၢ်တနံၤတုၤလၢ မုၢ်ယဲၢ်နံၤအဃိ တၢ်အဒိလၢတၢ်နီၤလီၤလံာ်လဲၢ်အဂီၢ် လၢအဝဲသ့ၣ်မၤဝဲဖဲ ဟံၣ်ဖိဃီဖိတၢ်မၤလိလံာ်စီဆှံအဆၢကတီၢ်န့ၣ် တိၢ်နီၣ်ဝဲတဘၣ်အါအါလၢၤဘၣ်. လၢတၢ်န့ၣ်အဃိ ပှၤလၢအဖီၣ်မူဒါတဂၤ မ့ၢ်တဲသကိးဝဲ တၢ်အဒိလၢတၢ်နီၤလီၤလံာ်လဲၢ်အဂီၢ် လၢအအိၣ်လၢ ဘီမုၢ်အတၢ်မၤလံာ်ဖိ အလီၢ်ခံန့ၣ်အဘျုးကအိၣ်ဝဲန့ၣ်လီၤ. မ့တမ့ၢ်ဖဲနမၤတၢ်အဒိလၢတၢ်နီၤလီၤ မဲးကစံအခါနတဲဃုာ်ဒီး လီၢ်ကဝီၤတၢ်ကစီၣ်, တၢ်မၤအသး ဒီးနံၤသဘျ့မူးပွဲအဂ့ၢ်သ့န့ၣ်လီၤ. ­မ့တမ့ၢ် ဟံၣ်ကစၢ်မ့ၢ်တူၢ်လိာ်ဝဲ မဲးကစံန့ၣ် ဒ်သိးကက့ၤကဒါက့ၤ လၢခံတဘျီကသ့အဂီၢ် ကဘၣ်တဲဝဲ တၢ်မနုၤလဲၣ်န့ၣ် နတဲသကိးအီၤသ့န့ၣ်လီၤ. ပှၤလၢအဟဲထီၣ် တၢ်အိၣ်ဖှိၣ်ရိဖှိၣ်အံၤအကျါတနီၤ နီၤလီၤတ့ၢ်ဝဲမဲးကစံလၢ ကဘၣ်တၢ်နီၤလီၤအီၤတဖၣ်မ့ၢ်ဝံၤန့ၣ် သံကွၢ်အဝဲသ့ၣ်လၢ ကတဲဖျါထီၣ်ဝဲအတၢ်ဟ့ၣ်ကူၣ်ဟ့ၣ်ဖး မ့တမ့ၢ် အတၢ်လဲၤခီဖျိလၢကကဲထီၣ် တၢ်ဂံၢ်တၢ်ဘါအဂီၢ်န့ၣ်တက့ၢ်. မုၢ်အိၣ်ဘှံးနံၤစ့ၢ်ကီး ပှၤလၢကဖီၣ်မူဒါတဂၤန့ၣ် ဃုထၢဝဲလံာ်လဲၢ်တဘ့ၣ်ဘ့ၣ်လၢ ­တၢ်ကနီၤလီၤအီၤလၢ တလါအံၤအတီၢ်ပူၤဒီး မၤဝဲဒ်တၢ်ဂ့ၢ်လၢထးတဖၣ်အသိးသ့ဝဲန့ၣ်လီၤ. တၢ်မၤလိအလံာ်တဖၣ်လၢအမ့ၢ် တၢ်သးခုကစီၣ်လၢယွၤအအိၣ် ဒီး စူၢ်ယွၤအကလုၢ် ဘရိၣ်ခၠၣ်ဒီး လံာ်စီဆှံသိၣ်လိတၢ် န့ၣ်ပှၤနီၤလီၤအီၤသ့ကိးနံၤဒဲးအဃိ ပှၤကဘၣ်နီၤလီၤအီၤဒ်လဲၣ်န့ၣ် ပှၤလၢအဖီၣ်မူဒါတဂၤ တဲသကိးဝဲတၢ်ဂ့ၢ်အံၤသ့စ့ၢ်ကီးလီၤ.

၉. ခဲၣ်ဖ့လီဆီအဆၢကတီၢ် ဖဲမုၢ်ဃုနံၤဒီးအိၣ်ဘှံးနံၤန့ၣ် ပှၤတဲသကိးတၢ်ဂ့ၢ်မနုၤသ့လဲၣ်.

^၉ ခဲၣ်ဖ့လီၤဆီအဆၢကတီၢ် ပှၤမ့ၢ်ဟးစံၣ်တဲၤတဲလီၤတၢ်လၢ မုၢ်ဃုနံၤဒီးအိၣ်ဘှံးနံၤန့ၣ် ပှၤလၢအဖီၣ်မူဒါတဂၤကပာ်ဖျါထီၣ်ဝဲဒၣ် ပှၤကနီၤလီၤ မဲးကစံအသီ ဃုာ်ဒီးလံာ်ကွဲမုာ် မ့တမ့ၢ်လံာ်ဖိတဖၣ်အံၤဒ်လဲၣ်န့ၣ်လီၤ. ဒီးတဲပၠးပှၤလၢ ဟံၣ်ကစၢ်မ့ၢ်ပာ်ဖျါထီၣ် တၢ်သးအိၣ်န့ၣ် ပကဘၣ်မၤဝဲဒ်လဲၣ်န့ၣ်လီၤ. မ့တမ့ၢ် မၢဒီပုၢ်ဝဲၢ်တဖၣ် တဲဖျါထီၣ်အတၢ်လဲၤခီဖျိ လၢအပာ်ဖျါထီၣ်ဝဲ ခဲၣ်ဖ့တဖၣ်အံၤအရ့ဒိၣ်ထဲလဲၣ်အဂ့ၢ် သ့စ့ၢ်ကီးန့ၣ်လီၤ.

၁၀, ၁၁. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤ ကကဲဘျုးအဂီၢ် ဘၣ်မနုၤအဃိအရ့ဒိၣ်လၢ ပှၤစံၣ်တဲၤတဲလီၤတၢ်ဖိတဖၣ် ကတဲာ်ကတီၤဆိပာ်စၢၤန့ၣ်လဲၣ်.

^၁၀ ပှၤစံၣ်တဲၤတဲလီၤတၢ်ဖိတဖၣ် ဘၣ်ကတဲာ်ကတီၤဝဲဒ်လဲၣ်– ဒ်သိးတၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤ ကကဲဘျုးကဲဖှိၣ်အဂီၢ် ပှၤစံၣ်တဲၤတဲလီၤတၢ်ဖိတဖၣ် ကဘၣ်အိၣ်ကတဲာ်ကတီၤအသးစ့ၢ်ကီးလီၤ. ကတဲာ်ကတီၤအီၤလၢ ဟံၣ်ဖိဃီဖိတၢ်မၤလိလံာ်စီဆှံအဆၢကတီၢ်သ့ဝဲလီၤ. တၢ်ဂ့ၢ်လၢပကတဲာ်ကတီၤဆိပာ်အီၤန့ၣ် ပတဲပၠး ပှၤစံၣ်တဲၤတဲလီၤတၢ်ဖိအဂၤသ့ဝဲလီၤ. ပမ့ၢ်ဟံးန့ၢ်ဆိပာ်မဲးကစံဒီး လံာ်လဲၢ်တဖၣ်လၢ တချုးပလဲၤထီၣ်တၢ်အိၣ်ဖှိၣ်ရိဖှိၣ်အံၤန့ၣ် မ့ၢ်ဒၣ်ပအိၣ်ကတဲာ်ကတီၤပသးဂ့ၤဂ့ၤလီၤ. ပမ့ၢ်မၤဒ်န့ၣ်ဒီး တၢ်အိၣ်ဖှိရိဖှိၣ်မ့ၢ်ဝံၤန့ၣ် ပလဲၤဆူတၢ်စံၣ်တဲၤတဲလီၤတၢ် ဟီၣ်ကဝီၤပူၤတဘျီဃီသ့ဝဲလီၤ.

^၁၁ တချုးတၢ်အိၣ်ဖှိၣ်ရိဖှိၣ်အံၤ စးထီၣ်အဆၢကတီၢ်န့ၣ် အရ့ဒိၣ်လၢပကဘၣ်လဲၤတုၤဆိတစဲးန့ၣ်လီၤ. နီၢ်နီၢ် ပဂုာ်ကျဲးစၢးလဲၤတုၤဆိလၢ တၢ်အိၣ်ဖှိၣ်ရိဖှိၣ်ခဲလၢာ်အဂီၢ်လီၤ. ဘၣ်ဆၣ် ပမ့ၢ်လဲၤတုၤစဲၤခံလၢ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်န့ၣ် ကကဲထီၣ်တၢ်မၤတံာ်တာ်လၢ ပှၤဂၤအဂီၢ်လီၤ. ဘၣ်မနုၤအဃိလဲၣ်. မ့ၢ်လၢဒီပုၢ်ဝဲၢ်ခွါလၢအဖီၣ်မူဒါတဂၤ တချုးနီၤဖးဝဲကရူၢ်အခါန့ၣ် ဘၣ်ဆိကမိၣ်ဆိပာ်စၢၤဝဲတၢ်ဂ့ၢ်အါမးအဃိလီၤ. ပှၤစံၣ်တဲၤတဲလီၤတၢ်ဖိမ့ၢ်ဟဲဒၣ်စှၤဂၤန့ၣ် ဘၣ်သ့ၣ်သ့ၣ်ကမၢဝဲအဝဲသ့ၣ်ခဲလၢာ် လဲၤလၢတၢ်စံၣ်တဲၤတဲလီၤတၢ်ဟီၣ်ကဝီၤ လၢပှၤမၤဝံၤတ့ၢ်အီၤတနီၤန့ၣ်လီၤ. တနီၤနီၤန့ၣ် ဘၣ်ဟဲဝဲလၢအခီၣ်ဒီး မ့ၢ်ကဘၣ်လဲၤဝဲလၢတၢ်စံၣ်တဲၤတဲလီၤတၢ်ဟီၣ်ကဝီၤလၢအယံၤန့ၣ် ပှၤဖီၣ်မူဒါတဂၤကဒုးလဲၤအီၤဒီး ပှၤလၢအအိၣ်ဒီး လ့ၣ်ယီၢ်, ဆဲၣ်ကဲၣ် မ့တမ့ၢ်ကါန့ၣ်လီၤ. တၢ်စံၣ်တဲၤတဲလီၤတၢ်ဟီၣ်ကဝီၤ လၢတၢ်မၤဆူၣ်မၤစိးညီနုၢ်ကဲထီၣ်အသးန့ၣ် အဝဲကမၢဒီပုၢ်ဝဲၢ်မုၣ်တဖၣ်လဲၤဒီးဒီပုၢ်ဝဲၢ်ခွါတဖၣ် မ့တမ့ၢ်ကမၢဒီပုၢ်ဝဲခွါတဖၣ်လဲၤလၢ တၢ်လီၢ်တဘူးတယံၤဒီးဒီပုၢ်ဝဲၢ်မုၣ်တဖၣ် လၢကကွၢ်ထွဲဝဲအဂီၢ်န့ၣ်လီၤ. ပှၤဖီၣ်မူဒါမၢဝဲပှၤစံၣ်တဲၤတဲလီၤတၢ်ဖိလၢ နီၢ်ခိဂံၢ်စၢ်ဘါစၢ်တဖၣ် လဲၤဝဲဆူ တၢ်လီၢ်လၢအပၢၤ ဒီးဟံၣ်လၢပှၤထီၣ်ဘၣ်အီၤညီတဖၣ်န့ၣ်သ့ဝဲလီၤ. အဝဲကမၢဝဲပှၤစံၣ်တဲၤတဲလီၤတၢ်ဖိလၢ အတုၤထီၣ်ထီၣ်ဘးတဖၣ်လဲၤဃုာ်ဒီး ပှၤအသီတဖၣ်န့ၣ်လီၤ. ဘၣ်ဆၣ် ပမ့ၢ်လဲၤတုၤစဲၤခံဒီး ဘၣ်သ့ၣ်သ့ၣ်ပှၤကဘၣ်ဆီတလဲက့ၤ တၢ်ရဲၣ်တၢ်ကျဲၤသ့ၣ်တဖၣ်လီၤ. လၢတၢ်ဂ့ၢ်တမံၤမံၤအဃိ တဘျီတခီၣ်ပစဲၤခံသ့န့ၣ်လီၤ. ဘၣ်ဆၣ် ပမ့ၢ်စဲၤခံတလီၢ်လီၢ်န့ၣ် ကြၢးပသံကွၢ်လီၤက့ၤပသးဒ်အံၤ– မ့ၢ်ယတပာ်လုၢ်ပာ်ပှ့ၤ တၢ်အိၣ်ဖှိၣ်ရိဖှိၣ်အံၤအဃိဧါ. မ့တမ့ၢ် ယတအိၣ်ကတဲာ်ကတီၤပာ်ယသး အဃိဧါ.

၁၂. နမ့ၢ်ဃုထၢပှၤလၢ ကလဲၤစံၣ်တဲၤတဲလီၤတၢ်ဃုာ်ဒီးနၤန့ၣ် နကြၢးဆိကမိၣ်တၢ်ဂ့ၢ်မနုၤတဖၣ်လဲၣ်.

^၁၂ တချုးတၢ်အိၣ်ဖှိၣ်ရိဖှိၣ်အံၤစးထီၣ်န့ၣ် ပှၤစံၣ်တဲၤတဲလီၤတၢ်ဖိတဖၣ် ဃုထၢဆိပာ်စၢၤဝဲပှၤလၢကလဲၤဃုာ်ဒီးအီၤသ့န့ၣ်လီၤ. မ့တမ့ၢ် ပှၤဖီၣ်မူဒါတဂၤဃုထၢန့ၢ်အီၤသ့လီၤ. နမ့ၢ်ညီနုၢ်ဃုထၢပာ်စၢၤပှၤလၢကဟးဒီးနၤန့ၣ် န “အိးလဲၢ်ထီၣ်” နသး ဒီးဃုထၢပှၤစံၣ်တဲၤတဲလီၤတၢ်ဖိအဂၤလၢ ကလဲၤဃုာ်ဒီးနၤကသ့စ့ၢ်ကီးဧါ. (၂ ကရံၣ်. ၆:၁၁-၁၃) ဒ်သိးပှၤစံၣ်တဲၤတဲလီၤတၢ်ဖိအသီတဂၤ အတၢ်သ့တၢ်ဘၣ် လၢတၢ်သိၣ်လိတၢ်တကပၤ ကအါထီၣ်အဂီၢ် နမၤစၢၤအီၤကသ့ဧါ. (၁ ကရံၣ်. ၁၀:၂၄; ၁ တံၤ. ၄:၁၃, ၁၅) ဖဲပှၤဟ့ၣ်နၤတၢ်နဲၣ်လိလၢ နကဘၣ်စးထီၣ်စံၣ်တဲၤတဲလီၤတၢ် လၢတၢ်လီၢ်ဖဲလဲၣ် ဒီးတၢ်ဟ့ၣ်ကူၣ်အဂၤတဖၣ်အခါ ဒိကနၣ်အီၤလီၤတံၢ်လီၤဆဲးတက့ၢ်. တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်မ့ၢ်ဝံၤန့ၣ် တဘၣ်ဆီတလဲတၢ်ရဲၣ်တၢ်ကျဲၤလၢၤတဂ့ၤ. လဲၤလၢတၢ်စံၣ်တဲၤတဲလီၤတၢ်ဟီၣ်ကဝီၤ တဘျီဃီတက့ၢ်.

၁၃. ပဝဲတဂၤစုာ်စုာ်ပမ့ၢ်မၤလၢပှဲၤပမူဒါလၢ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အဂီၢ်န့ၣ် ပကဒိးန့ၢ်ဘၣ်တၢ်အဘျုးမနုၤလဲၣ်.

^၁၃ ယ့ၣ်ၡူးအပျဲၢ်အဘီၣ် ၇ဝ လၢကစၢ်ရဲၣ်လီၤကျဲၤလီၤဝဲလီၤတံၢ်လီၤဆဲး ဒီးမၢလီၤဝဲတဖၣ်န့ၣ် စံၣ်တဲၤတဲလီၤတၢ်ဝံၤအလီၢ်ခံ “ဟဲက့ၤကဒါက့ၤ အိၣ်ဒီးတၢ်သူၣ်ခုသးခု” လီၤ. (လူၤကၣ် ၁၀:၁၇) ယ့ၣ်ၡူးအိၣ်ဖှိၣ်ရိဖှိၣ်ဒီး အပျဲၢ်အဘီၣ်တဖၣ်ဖဲ တချုးလၢအဝဲသ့ၣ်လဲၤစံၣ်တဲၤတဲလီၤတၢ်အခါန့ၣ် မၤစၢၤအဝဲသ့ၣ်လၢ အတၢ်စံၣ်တဲၤတဲလီၤတၢ်မၤ ကကဲထီၣ်လိၣ်ထီၣ်အဂီၢ်လီၤ. ဒ်န့ၣ်အသိး မုၢ်မဆါတနံၤအံၤစ့ၢ်ကီး ပဒိးန့ၢ်ဘၣ်တၢ်အဘျုးသ့အါမးလၢ တၢ်အိၣ်ဖှိၣ်ရိဖှိၣ်လၢ တချုးပလဲၤစံၣ်တဲၤတဲလီၤတၢ်အံၤန့ၣ်လီၤ. ပဝဲကိးဂၤဒဲး ပမ့ၢ်မၤလၢပှဲၤပမူဒါဒီး တၢ်အိၣ်ဖှိၣ်ရိဖှိၣ်အံၤ ကကဲထီၣ်တၢ်ဟ့ၣ်ဂံၢ်ဟ့ၣ်ဘါ, တၢ်နဲၣ်လိ ဒီးကရဲၣ်လီၤကျဲၤလီၤပှၤလၢ ပကမၤကဲထီၣ်လိၣ်ထီၣ်ပမူဒါလၢအမ့ၢ် “တၢ်အုၣ်အသးလၢ ပှၤကလုာ်ခဲလၢာ်အဂီၢ်”န့ၣ်လီၤ.—မး. ၂၄:၁၄.