ကဲထီၣ်ပှၤမၤသကိးတၢ် လၢအကဲဘျုးတက့ၢ်

၁. ဖဲပလဲၤစံၣ်တဲၤတဲလီၤတၢ်ဒီး ပှၤစံၣ်တဲၤတဲလီၤတၢ်ဖိအဂၤအခါ ပကွၢ်လိမၤဒိး စီၤပီလူးကသ့ဒ်လဲၣ်.

^၁ ဖဲတၢ်မၢဖိစီၤပီလူး မၤသကိးတၢ်ဒီး ပှၤစူၢ်တၢ်နာ်တၢ်ကဒဲကဒဲအဆၢကတီၢ်န့ၣ် အဝဲထံၣ်ဝဲဒ်တၢ်ခွဲးတၢ်ယာ်လၢ ကဟ့ၣ်ဂံၢ်ဟ့ၣ်ဘါလိာ်သး “ယၢ်ခီယၢ်ခီ” လီၤ. (ရိ. ၁:၁၂) ဖဲနလဲၤစံၣ်တဲၤတဲလီၤတၢ်ဒီး ပှၤစံၣ်တဲၤတဲလီၤတၢ်ဖိအဂၤအခါ မ့ၢ်နဟံးန့ၢ်တၢ်ခွဲးတၢ်ယာ်လၢ နကဟ့ၣ်ဂံၢ်ဟ့ၣ်ဘါအီၤ ဒီးမၤစၢၤအီၤဧါ. တဘၣ်အိၣ်ဘှ့ၣ်တဂ့ၤ. ဒ်သိးနကကဲထီၣ် ပှၤစံၣ်တဲၤတဲလီၤတၢ်ဖိလၢအဂ့ၤအဂီၢ် တၢ်မနုၤမၤစၢၤနၤလဲၣ်န့ၣ် တဲနၢ်ပၢၢ်အီၤနတၢ်လဲၤခီဖျိတက့ၢ်.

၂. ဒ်သိးပှၤလၢအလဲၤတၢ်ဒီးနၤတဂၤ ကအိၣ်ဒီးတၢ်နာ်န့ၢ်လီၤအသးလၢ တၢ်စံၣ်တဲၤတဲလီၤတၢ်မၤအပူၤအဂီၢ် နမၤစၢၤအီၤကသ့ဒ်လဲၣ်. ဘၣ်မနုၤအဃိအရ့ဒိၣ်လဲၣ်.

^၂ မၤအါထီၣ် အတၢ်နာ်န့ၢ်လီၤသးတက့ၢ်– ပှၤစံၣ်တဲၤတဲလီၤတၢ်ဖိတနီၤ တအိၣ်ဒီးအတၢ်နာ်န့ၢ်လီၤအသးန့ၣ် အိၣ်ဖျါလၢအမဲာ်သၣ် ဒီးအကလုၢ်လီၤ. ဒ်သိးအဝဲသ့ၣ် အတၢ်နာ်န့ၢ်လီၤသးကအါထီၣ်အဂီၢ် ပမၤစၢၤအီၤသ့ ခီဖျိလၢပစံးပတြၢၤအီၤလၢ တၢ်သူၣ်ဘျၢသးဘျၢအပူၤလီၤ. ဒ်သိးပကမၤအါထီၣ်အဝဲသ့ၣ်အတၢ်နာ်န့ၢ်လီၤသးအဂီၢ်န့ၣ် ကျဲအဂၤအိၣ်ဒံးဧါ. ဒီပုၢ်ဝဲၢ်လၢအမ့ၢ် ပှၤလဲၤတရံးအံးက့ၤကွၢ်က့ၤတၢ်တဂၤ ဖဲအလဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်အဂၤအခါ အဝဲတဲပၠးဝဲအတၢ်လဲၤခီဖျိလီၤ. အဒိ ဒ်သိးအဝဲကမၤနၢၤကွံာ် အတၢ်ပျံၤတၢ်ဖုးအဂီၢ် ဘၣ်ဃ့ဘါထုကဖၣ်ဝဲထဲလဲၣ်အဂ့ၢ်န့ၣ်လီၤ. ဒီပုၢ်ဝဲၢ်လၢအဂၤတဂၤစ့ၢ်ကီး စံးဝဲလၢ ဒ်သိးအဝဲကအိၣ်ဒီး တၢ်နာ်န့ၢ်လီၤသးအဂီၢ် မၤဝဲဒ်အံၤ– “ယဘၣ်အိၣ်ဒီးတၢ်နံၤကမှံလီၤ. ဘၣ်ဆၣ် ဒ်သိးယနံၤကမှံထီၣ်ကသ့အဂီၢ် တဘျီတခီၣ် ယဘၣ်ဃ့ထုကဖၣ်လီၤ.” ဒ်သိးနကအိၣ်ဒီးတၢ်နာ်န့ၢ်လီၤသး လၢတၢ်စံၣ်တဲၤတဲလီၤတၢ်မၤအပူၤအဂီၢ် တၢ်မနုၤမၤစၢၤနၤလဲၣ်န့ၣ် တဲနၢ်ပၢၢ်ပှၤလၢ အလဲၤဒီးနၤတက့ၢ်.

၃. ဒ်သိးပှၤလၢအလဲၤဒီးနၤတဂၤ အတၢ်သ့တၢ်ဘၣ် ကအါထီၣ်လၢတၢ်စံၣ်တဲၤတဲလီၤတၢ်မၤအဂီၢ် နမၤစၢၤအီၤကသ့ဒ်လဲၣ်.

^၃ နစံၣ်တဲၤတဲလီၤတၢ် ဒ်လဲၣ်န့ၣ်တဲနၢ်ပၢၢ်ပှၤဂၤတက့ၢ်– မ့ၢ်နအိၣ်ဒီး တၢ်ကတိၤယိယိဖိ မ့တမ့ၢ် တၢ်သံကွၢ်တခါလၢ နကစးထီၣ်ကတိၤတၢ်ဒီး ပှၤဂၤအဂီၢ်ဧါ. ဘၣ်သ့ၣ်သ့ၣ်ကမ့ၢ် ဘၣ်ဃးဒီးတၢ်ဂ့ၢ်တမံၤမံၤလၢ အကဲထီၣ်အသးလၢ နဟီၣ်ကဝီၤပူၤန့ၣ်လီၤ. ဖဲနသူတၢ်အဒိလၢတၢ်နီၤလီၤ မဲးကစံအဆၢကတီၢ် မ့ၢ်နတဲအီၤလၢနနီၢ်ကစၢ်အတၢ်ကတိၤအဃိ နဒိးန့ၢ်ဘၣ်တၢ်လဲၤခီဖျိလၢအဂ့ၤအိၣ်ဧါ. မ့ၢ်အိၣ်န့ၣ် တဲနၢ်ပၢၢ် ပှၤလၢအလဲၤဒီးနၤတက့ၢ်. (ကတိၤ. ၂၇:၁၇) ဖဲနက့ၤအိၣ်သကိးဟံၣ်ကစၢ်အခါ နကတဲတၢ်ဂ့ၢ်မနုၤလဲၣ် ဒီးနကမၤအီၤဒ်လဲၣ်န့ၣ် တဲဘၣ်ပှၤလၢအလဲၤဒီးနၤတက့ၢ်. နမၤတၢ်မၤလိလံာ်စီဆှံမ့ၢ်ဝံၤအလီၢ်ခံန့ၣ် ဘၣ်မနုၤအဃိ နဃုထၢတၢ်ဂ့ၢ်လၢ သန့ၤထီၣ်အသးလၢ နပှၤမၤလိလံာ်စီဆှံအတၢ်လိၣ်ဘၣ်, လံာ်စီဆှံအဆၢ မ့တမ့ၢ် နသူတၢ်သိၣ်လိနဲၣ်လိအကျဲအံၤလဲၣ်န့ၣ် တဲဘၣ်အီၤတက့ၢ်.

၄. ဘၣ်မနုၤအဃိ ပကြၢးသးအိၣ်မၤစၢၤ ပှၤစူၢ်တၢ်နာ်တၢ်ကဒဲကဒဲန့ၣ်လဲၣ်.

^၄ ပှၤလၢအစိာ်တၢ်သးခုကစီၣ်လၢတၢယၤဖှိၣ်န့ၣ် တသးအိၣ်ဝဲထဲဒၣ်လၢ ကမၤစၢၤပှၤလၢ တစူၢ်တၢ်နာ်တၢ်တဖၣ်ဘၣ်. အဝဲသ့ၣ်ပာ်လုၢ်ပာ်ပှ့ၤဝဲ တၢ်ဟ့ၣ်ဂံၢ်ဟ့ၣ်ဘါလိာ်သး ဒီးတၢ်ဟ့ၣ်ဆူၣ်ထီၣ်လိာ်သး တဂၤဒီးတဂၤလီၤ. (မၤတၢ်. ၁၁:၂၃; ၁၅:၃၂) တၢ်မၢဖိစီၤပီလူး သိၣ်လိနဲၣ်လိဝဲ စီၤတံၤမသ့း ဒီးဟ့ၣ်ဂံၢ်ဟ့ၣ်ဘါအီၤလၢ ကနီၤလီၤက့ၤဝဲ တၢ်လၢအမၤလိဘၣ်ဝဲတဖၣ်န့ၣ်လီၤ. (၂ တံၤ. ၂:၂) ဖဲပဟ့ၣ်ဂံၢ်ဟ့ၣ်ဘါလိာ်သးလၢ တၢ်စံၣ်တဲၤတဲလီၤတၢ်မၤပူၤအခါ တမ့ၢ်ထဲပမၤသးခုအဝဲသ့ၣ် ဒီးမၤအါထီၣ်အဝဲသ့ၣ်အတၢ်သ့တၢ်ဘၣ်ဘၣ်, မ့ၢ်ပမၤသးခု ပပၢ်အိၣ်လၢမူခိၣ်စ့ၢ်ကီးလီၤ.—ဧ့ၤ. ၁၃:၁၅, ၁၆.