သူလံာ်လၢအမ့ၢ် တၢ်သးခုကစီၣ်လၢ ယွၤအအိၣ် လၢနတၢ်သိၣ်လိအပူၤတက့ၢ်

၁. တၢ်ထုးထီၣ် လံာ်တၢ်သးခုကစီၣ်လၢ ယွၤအအိၣ်တဘ့ၣ်အံၤန့ၣ် အတၢ်တိာ်ပာ်အိၣ်ဒ်လဲၣ်.

^၁ ဒ်ပတဲသကိးတ့ၢ်လၢ လါယူၤလံ ဘီမုၢ်အတၢ်မၤ အပူၤအသိး, လံာ်လၢအမ့ၢ် တၢ်သးခုကစီၣ်လၢ ယွၤအအိၣ် န့ၣ် မ့ၢ်တၢ်ပီးတၢ်လီအရ့ဒိၣ်တခါလၢပသူအီၤလၢ ပတၢ်စံၣ်တဲၤတဲလီၤတၢ်မၤအပူၤန့ၣ်လီၤ. ပမုၢ်လၢ်လၢ ဟံၣ်ကစၢ်ကအိးထီၣ်ဖးဝဲ လံာ်စီဆှံအဆၢလၢ အနီၢ်ကစၢ်အလံာ်စီဆှံအဃိ လံာ်အံၤ တပာ်ဖျါထီၣ် တၢ်ကတိၤလၢလံာ်စီဆှံအဆၢတဖၣ်ဘၣ်. ပလံာ်လဲၢ်လၢ တၢ်မၤလိအဂီၢ်အါတက့ၢ် ဘၣ်တၢ်ကွဲးအီၤဒ်သိး ပှၤဖးလံာ်ဖိတဖၣ် နၢ်ပၢၢ်ဝဲလၢအနီၢ်ကစၢ်ဒၣ်ဝဲ ကသ့အဂီၢ်န့ၣ်လီၤ. မ့မ့ၢ် ဖဲပှၤထုးထီၣ်လံာ်တဘ့ၣ်အံၤ အဆၢကတီၢ်န့ၣ် အဝဲသ့ၣ်အတၢ်တိာ်ပာ်အိၣ်ဝဲလၢ ပကသူအီၤလၢ တၢ်မၤလိလံာ်စီဆှံအဂီၢ်လီၤ. လၢတၢ်န့ၣ်အဃိ ဖဲပဟ့ၣ်လီၤဟံၣ်ကစၢ်လံာ်အံၤအခါ ပကြၢးဂုာ်ကျဲးစၢးစးထီၣ်မၤလိလံာ်စီဆှံဒီးအီၤတဘျီဃီန့ၣ်လီၤ. ပမ့ၢ်မၤဒ်န့ၣ်န့ၣ် ဟံၣ်ကစၢ်ကထံၣ်ဝဲလၢ တၢ်သးခုကစီၣ်လၢလံာ်စီဆှံအပူၤန့ၣ် မ့ၢ်တၢ်လၢလီၤသူၣ်ပိၢ်သးဝးန့ၣ်လီၤ.—မး. ၁၃:၄၄.

၂. ဖဲပထံၣ်လိာ်သးဒီး ဟံၣ်ကစၢ်အဆိကတၢၢ်တဘျီန့ၣ် ပသူလံာ်လၢအမ့ၢ်တၢ်သးခုကစီၣ်လၢ ယွၤအအိၣ် ကသ့ဒ်လဲၣ်.

^၂ တၢ်ထံၣ်လိာ်သးဒီးဟံၣ်ကစၢ် အဆိကတၢၢ်တဘျီ– နတဲဒ်အံၤသ့ဝဲလီၤ “ယဟဲဟးအိၣ်သကိးနၤခီဖျိလၢ ပှၤအါဂၤ ဘၣ်ယိၣ်တၢ်လၢ တၢ်ကမၤအသး ခါဆူညါတဖၣ်အဃိလီၤ. မ့ၢ်နဆိကမိၣ်လၢ တၢ်အိၣ်သးလၢအအၢတဖၣ်အံၤ ဂ့ၤထီၣ်ကသ့ဒံးဧါ. [ခိးအတၢ်စံးဆၢတက့ၢ်.] လံာ်စီဆှံစ့ၢ်ကီး ပာ်ဖျါထီၣ်ဝဲ တၢ်သးခုကစီၣ်လၢ အဟ့ၣ်ပှၤတၢ်မုၢ်လၢ်ဒီး လံာ်အံၤကပာ်ဖျါထီၣ်ဝဲ တၢ်သံကွၢ်တနီၤလၢ လံာ်စီဆှံစံးဆၢဝဲန့ၣ်လီၤ.” ဟ့ၣ်လီၤဟံၣ်ကစၢ် လၢလံာ်အံၤ ဒီးမၢအဝဲဃုထၢတၢ်သံကွၢ်တဖျၢၣ်လၢ လံာ်အချၢဃံန့ၣ်တက့ၢ်. ဝံၤဒီးစးထီၣ်တၢ်မၤလိလံာ်စီဆှံဒီးအီၤတက့ၢ်. ကွၢ်သကိးဖဲတၢ်မၤလိလၢ ဟံၣ်ကစၢ်ဃုထၢဝဲ ဒီးမၤလိသကိးလံာ်အဆၢ အဆိကတၢၢ်တဆၢတက့ၢ်. ကျဲလၢအဂၤတဘိန့ၣ် ဃုထၢပာ်စၢၤတၢ်မၤလိတခါလၢ နအဲၣ်ဒိးမၤလိဒီးဟံၣ်ကစၢ်တက့ၢ်. ဖဲနထံၣ်လိာ်သးဒီးဟံၣ်ကစၢ်အဆၢကတီၢ် သံကွၢ်အီၤ တၢ်သံကွၢ်လၢ အလီၤသးအိၣ်လၢ အဘၣ်ထွဲလိာ်သးဒီးတၢ်မၤလိလၢ နဃုထၢပာ်စၢၤဝဲန့ၣ်တက့ၢ်. ဝံၤဒီးသူလံာ်တဘ့ၣ်အံၤ ဒ်သိးဟံၣ်ကစၢ်ကနၢ်ပၢၢ်ထီၣ် တၢ်စံးဆၢလၢ လံာ်စီဆှံပာ်ဖျါထီၣ်ဝဲတက့ၢ်. တၢ်မၤလိလၢ နဃုထၢပာ်စၢၤန့ၣ် မ့ၢ်ဘၣ်ထွဲလိာ်သးဒီး တၢ်ဂီၤမူတခါလၢ jw.org/ksw ဒီးနအိးထီၣ်ပၠးအီၤသ့လီၤ.

၃. ပသူလံာ်လၢအမ့ၢ် တၢ်သးခုကစီၣ်လၢ ယွၤအအိၣ် လၢပတၢ်သိၣ်လိပှၤဂၤလံာ်စီဆှံအပူၤကသ့ဒ်လဲၣ်န့ၣ် တဲနၢ်ပၢၢ်တက့ၢ်.

^၃ ပကဘၣ်သိၣ်လိပှၤဂၤလံာ်စီဆှံဒ်လဲၣ်– (၁) ဒ်သိးဟံၣ်ကစၢ်ကနၢ်ပၢၢ်တၢ်ဂ့ၢ်မိၢ်ပှၢ်အဂီၢ် ဖးထီၣ်တၢ်သံကွၢ်သူသူတဖၣ် လီၤတံၢ်လီၤဆဲးတက့ၢ်. (၂) ဝံၤဒီးဖးလံာ်အဆၢန့ၣ်တက့ၢ်. (၃) လံာ်စီဆှံအဆၢလၢ ကွဲးအသးလၢဖးတဖၣ်န့ၣ် ဖးအီၤတက့ၢ်. ဒီးသံကွၢ်ဟံၣ်ကစၢ် တၢ်သံကွၢ်တဖၣ် ဒ်သိးအဝဲကနၢ်ပၢၢ်ဝဲလံာ်စီဆှံ အတၢ်စံးဆၢလၢ ဘၣ်ဃးဒီးတၢ်သံကွၢ်သူသူအံၤန့ၣ်တက့ၢ်. (၄) လၢတၢ်သံကွၢ်တဖျၢၣ်အဖီလာ် လံာ်အဆၢမ့ၢ်အိၣ် အါန့ၢ်ဒံးတဆၢန့ၣ် ဖဲနဖးကဒီးလံာ်အဆၢလၢအသီတဆၢအခါ သူတၢ်ဟ့ၣ်ကူၣ်ဒ် နီၣ်ဂံၢ် ၂ ဒီး ၃ လၢထးပာ်ဖျါထီၣ်ဝဲအသိးတက့ၢ်. တၢ်ဂီၤမူလၢ အဘၣ်ထွဲလိာ်သးဒီးတၢ်သံကွၢ် မ့ၢ်အိၣ်တခါခါန့ၣ် အိးထီၣ်ပၠးအီၤတက့ၢ်. (၅) လၢခံကတၢၢ်, ဒ်သိးနကသ့ၣ်ညါလီၤတံၢ်လၢ ဟံၣ်ကစၢ်နၢ်ပၢၢ်ဝဲ တၢ်ဂ့ၢ်အံၤဂ့ၤဂ့ၤအဂီၢ်န့ၣ် မၢဟံၣ်ကစၢ်စံးဆၢ တၢ်သံကွၢ်သူသူန့ၣ်တက့ၢ်.

၄. ဒ်သိးပသူတၢ်ပီးတၢ်လီလၢ အလုၢ်ဒိၣ်ပှ့ၤဒိၣ်အံၤသ့သ့ဘၣ်ဘၣ် ကသ့အဂီၢ် တၢ်မနုၤကမၤစၢၤပှၤလဲၣ်.

^၄ တၢ်ပီးတၢ်လီလၢ အရ့ဒိၣ်အံၤန့ၣ် ဃုသ့ၣ်ညါအီၤလီၤတံၢ်လီၤဆဲးတက့ၢ်. သူအီၤထီဘိတက့ၢ်. ဒ်သိးနတၢ်မၤလိလံာ်စီဆှံ ကကဲဘျုးလၢ နပှၤမၤလိလံာ်စီဆှံဖိအဂီၢ် နကဘၣ်တဲပၠးလံာ်စီဆှံအဆၢဒ်လဲၣ် ဒီးနကသံကွၢ်တၢ်သံကွၢ်ဒ်လဲၣ်န့ၣ် ဆိကမိၣ်ပာ်စၢၤတက့ၢ်. (ကတိၤ. ၁၅:၂၈; မၤတၢ်.၁၇:၂, ၃) နသူလံာ်အံၤမ့ၢ်အါန့ၣ် နတၢ်လဲၤခီဖျိဒီး နတၢ်သ့တၢ်ဘၣ်ကအါထီၣ်ဝဲလီၤ. ဒီးဘၣ်သ့ၣ်သ့ၣ်လံာ်အံၤကကဲထီၣ်ဝဲ တၢ်တၢ်ပီးတၢ်လီလၢနသူအီၤအမုာ်ကတၢၢ် ဒ်သိးနကသိၣ်လိပှၤဂၤတၢ်မ့ၢ်တၢ်တီအဂီၢ်န့ၣ်လီၤ.