ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအ့ဖြ့ၣ် ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၃၁
“စီၤယၤကိာ် ဒီးစီၤလၤဘၣ် မၤတၢ်အၢၣ်လီၤအီလီၤတခါလၢ ဘၣ်ဃးဒီးတၢ်ဃူတၢ်ဖိး”
(၁ မိၤၡ့ ၃၁:၄၄-၄၆) ဒီးခဲကနံၣ်အံၤဟဲမီၣ်, မ်ပမၤတၢ်အၢၣ်လီၤအီလီၤ, ယၤဒီးနၤ, ဒီးမ်အကဲထီၣ်တၢ်အုၣ်အသးလၢ ယၤဒီးနၤအဘၢၣ်စၢၤန့ၣ်တက့ၢ်. ၄၅ ဒီးစီၤယၤကိာ်ဟံးန့ၢ်လၢၢ်တဖျၢၣ်, ဒီးပာ်ထီၣ်အီၤလၢ ထူၣ်တထူၣ်လီၤ. ၄၆ ဒီးစီၤယၤကိာ်စံးဘၣ် အဒီပုၢ်ဝဲၢ်တဖၣ်, ထၢထီၣ်န့ၢ်လၢၢ်တဖျၢၣ်န့ၣ်တက့ၢ်. ဒီးအဝဲသ့ၣ်ဟံးန့ၢ်လၢၢ်တဖၣ်, ဒီးပူဖှိၣ်ထီၣ်တပူ, ဒီးအီၣ်တၢ်ဖဲန့ၣ်လၢတၢ်တပူအဖီခိၣ်လီၤ.
it-1 ၈၈၃ ¶၁
ကံးလဧး
စီၤယၤကိာ်ဒီး စီၤလၤဘၣ် မၤဃူမၤဖိးလိာ်အသးဝံၤ မၤဝဲတၢ်အၢၣ်လီၤအီလီၤတခါလီၤ. စီၤယၤကိာ် ပာ်လီၤဝဲ လၢၢ်ထူၣ်တထူၣ် ဒီးတဲဘၣ်အ “ဒီပုၢ်ဝဲၢ်တဖၣ်” လၢကမၤထီၣ်လၢၢ်တပူၣ်, ဘၣ်သ့ၣ်သ့ၣ် ကလီၤဂာ်ဒ်စီၢ်နီၤခိၣ်အသိးဒီး အီၣ်သကိးတၢ်လၢအဖီခိၣ်လီၤ. စီၤလၤဘၣ် ကိးဝဲတၢ်လီၢ်န့ၣ် အမံၤလၢ အရမ့း (စံရံယါ) အကျိာ် “ယကၢ်စၤဒူသၤ” လီၤ. ဘၣ်ဆၣ် စီၤယၤကိာ် ကိးဝဲလၢ ဧ့ၤဘြံၤကျိာ်လၢ “ကံးလဧး” လီၤ. စီၤလၤဘၣ်စံးဝဲလၢ “တၢ်ပူ [Heb., gal] အံၤမ့ၢ်တၢ်အုၣ်အသး [Heb., ʽedh] လၢယၤဒီးနၤအဘၢၣ်စၢၤ လၢမုၢ်မဆါတနံၤအံၤလီၤ.” (၁ မိၤ. ၃၁:၄၄-၄၈) လၢၢ်အပူၣ် (ဒီးလၢၢ်ထူၣ်) မ့ၢ်တၢ်အုၣ်အသးလၢ ပှၤလၢလဲၤထီၣ်က့ၤလီၤတဖၣ်အဂီၢ်လီၤ. ဒ်အဆၢဖိ ၄၉ တဲဝဲအသိး “မံးစပၤ” န့ၣ်မ့ၢ်ဝဲတၢ်အုၣ်အသးလၢ စီၤလၤဘၣ် ဒီးစီၤယၤကိာ် အတၢ်အၢၣ်လီၤလၢ ကပၢၤဃာ်တၢ်ဃူတၢ်ဖိးလၢ အဝဲသ့ၣ်အစၢၤအသွဲၣ်လၢခံတဖၣ် အဘၢၣ်စၢၤန့ၣ်လီၤ. (၁ မိၤ. ၃၁:၅၀-၅၃) လၢခံတၢ်မၤအသးတဖၣ်န့ၣ် လၢၢ်တဖၣ် ဘၣ်တၢ်သူအီၤ ဒ်တၢ်အုၣ်အသးလၢအအိၣ်ဘှီၣ် ဒ်အဝဲသ့ၣ် မၤဝဲအသိးလီၤ.—ၡူ. ၄:၄-၇; ၂၄:၂၅-၂၇.
(၁ မိၤၡ့ ၃၁:၄၇-၅၀) ဒီးစီၤလၤဘၣ်ယုၢ်အမံၤလၢယကၢ်စၤဒူသၤလီၤ. မ့မ့ၢ်စီၤယၤကိာ်ယုၢ်အမံၤလၢကံးလဧးလီၤ. ၄၈ ဒီးစီၤလၤဘၣ်စံးဝဲဒၣ်, တၢ်လၢတၢ်ပူအံၤမ့ၢ်တၢ်အုၣ်အသးလၢ ယၤဒီးနၤအဘၢၣ်စၢၤ လၢမုၢ်မဆါတနံၤအံၤလီၤ. မၤသးဒ်န့ၣ်ဒီးပှၤကိးအမံၤ လၢကံးလဧးဒီးမံးစပၤလီၤ. ၄၉ အဂ့ၢ်ဒ်အံၤ, စံးဝဲဒၣ်, တုၤပအိၣ်သဒၢလိာ်ပသးဒီး မ်ယွၤကွၢ်တၢ်လၢယၤဒီးနၤအဘၢၣ်စၢၤန့ၣ်တက့ၢ်. ၅၀ နမ့ၢ်မၤနးမၤဖှီၣ်ယဖိမုၣ်တဖၣ်, ဒီးနမ့ၢ်ဟံးန့ၢ်နမါလၢ ယဖိမုၣ်အဖီခိၣ်ဒီး, ပှၤကညီတအိၣ်ဘၣ်ဒီး ပှၤနီတဂၤဘၣ်. ကွၢ်, ယွၤမ့ၢ်တၢ်အုၣ်အသးအိၣ်လၢ ယၤဒီးနၤအဘၢၣ်စၢၤန့ၣ်လီၤ.
it-2 ၁၁၇၂
မံးစပၤ (တၢးထီခိးတၢ်)
စီၤယၤကိာ် မၤထီၣ်ဝဲလၢၢ်ပူၣ်ဒီး ကိးဝဲလၢ “ကံးလဧး” (အခီပညီမ့ၢ် တၢ်အုၣ်အသးအပူၣ်) ဒီး “မံးစပၤ” လီၤ. တၢ်န့ၣ်အလီၢ်ခံ စီၤလၤဘၣ် စံးဝဲလၢ– “တုၤပအိၣ်သဒၢလိာ်ပသးဒီး မ်ယွၤကွၢ်တၢ်လၢ ယၤဒီးနၤအဘၢၣ်စၢၤန့ၣ်တက့ၢ်.” (၁ မိၤ. ၃၁:၄၅-၄၉) လၢၢ်အပူၣ်အံၤ မ့ၢ်တၢ်အုၣ်အသးလၢ ယဟိဝၤယွၤ ကွၢ်ဝဲစီၤယၤကိာ်ဒီး စီၤလၤဘၣ်ကတီဒီးအတၢ်အၢၣ်လီၤလၢ အမၤဃူမၤဖိးတၢ်န့ၣ်ဧါ, တတီဧါန့ၣ်လီၤ.
(၁ မိၤၡ့ ၃၁:၅၁-၅၃) ဒီးစီၤလၤဘၣ်စံးဘၣ်စီၤယၤကိာ်, ကွၢ်ကွၢ်, တၢ်ပူတဖျၢၣ်အံၤ, ဒီးကွၢ်ကွၢ်, တၢ်ထူၣ်တထူၣ်အံၤလၢယပာ်ထီၣ်လၢယၤဒီးနၤ အဘၢၣ်စၢၤန့ၣ်, ၅၂ မ်တၢ်ပူတဖျၢၣ်အံၤ ကဲထီၣ်တၢ်အုၣ်အသး, ဒီးမ်တၢ်ထူၣ်တထူၣ်အံၤ ကဲထီၣ်တၢ်အုၣ်အသးလၢ ယတခီဂာ်တၢ်ပူတဖျၢၣ်အံၤ ဆူနအိၣ်, ဒီးနတခီဂာ်တၢ်ပူတဖျၢၣ်အံၤဒီး တၢ်ထူၣ်တထူၣ်အံၤဆူယအိၣ်လၢ တၢ်အၢတၢ်နးအဂီၢ်ဘၣ်န့ၣ်တက့ၢ်. ၅၃ ဒီးမ်စီၤအၤဘြၤဟၣ်အကစၢ်, ဒီးစီၤနၤဃိၢ်အကစၢ်, အဝဲသ့ၣ်အပၢ်အကစၢ်န့ၣ် စံၣ်ညီၣ်တၢ်လၢ ပဘၢၣ်စၢၤတက့ၢ်. ဒီးစီၤယၤကိာ်ဆိၣ်လီၤအသးလၢ အပၢ်စီၤအံၤစဲးအတၢ်ပျံၤအမဲာ်ညါန့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၁:၁၉) ဒီးစီၤလၤဘၣ် လဲၤတံာ်သိအဆူၣ်, ဒီးနီၢ်ရၤဃ့လး ဟုၣ်န့ၢ်တ့ၢ်အပၢ် အတၢ်ဂီၤတရၤဖးလီၤ.
it-2 ၁၀၈၇-၁၀၈၈
တရၤဖး
ပှၤဃုသ့ၣ်ညါ တၢ်ဖိတၢ်လံၤလၢပျၢၤတဖၣ် ဃုသ့ၣ်ညါတၢ်ဖဲ မဲးစိၣ်ဖိၤတ့မံယၤ ဒီးတၢ်လီၢ်လၢအဘူးဒီးအီၤတဖၣ်အခါ သ့ၣ်ညါဘၣ်ဝဲလၢ ပှၤလၢအိၣ်ဒီးတၢ်ဂီၤတရၤဖးန့ၣ် ဖျါလၢအမ့ၢ်ပှၤလၢ အကြၢးဒိးန့ၢ်ဘၣ် အဟံၣ်ဖိဃီဖိအတၢ်န့ၢ်သါလီၤ. လၢၢ်ဘ့ၣ်ဘၣ်လၢ ဘၣ်တၢ်ထံၣ်န့ၢ်အီၤလၢ နူစံၤ တၢ်လီၢ်န့ၣ် ပာ်ဖျါဝဲလၢ မာ်တဂၤမ့ၢ်အိၣ်ဒီး ဟံၣ်ဖိဃီဖိအယွၤအဂီၤန့ၣ် လၢတၢ်အိၣ်သးတနီၤအပူၤ အဝဲအိၣ်ဒီး တၢ်ခွဲးတၢ်ယာ်လၢ ကလဲၤထီၣ်ရူ ဒီးဃ့န့ၢ်ဝဲ အမံၤပှၢ် အဟီၣ်ခိၣ်လီၢ်သ့လီၤ. (Ancient Near Eastern Texts, edited by J. Pritchard, 1974, pp. 219, 220, and ftn 51) ကမ့ၢ်လၢ နီၢ်ရၤဃ့လး သ့ၣ်ညါပာ်ဝဲတၢ်ဂ့ၢ်အံၤအဃိ ဘၣ်သ့ၣ်သ့ၣ် အဝဲကဆိကမိၣ်ထီၣ်ဘၣ်ဝဲလၢ အပၢ်မၤအဝၤစီၤယၤကိာ် တတီတလိၤအဃိ အဝဲကြၢးဒိးန့ၢ်ဝဲ တၢ်ဂီၤတရၤဖးအံၤလီၤ. (ထိၣ်သတြီၤဒီး ၁ မိၤ. ၃၁:၁၄-၁၆.) တရၤဖးန့ၣ် မ့ၢ်တၢ်အရ့ဒိၣ်လၢ အဘၣ်ထွဲဒီးတၢ်န့ၢ်သါအဃိ စီၤလၤဘၣ် အသးဆူၣ်လၢ ကဃုထံၣ်န့ၢ်က့ၤအီၤ တုၤဒၣ်လဲာ် ကိးထီၣ်အဒီပုၢ်ဝဲၢ်တဖၣ်ဒီး လူၤဝဲစီၤယၤကိာ်လၢ တၢ်ဒ့ၣ်စၢၤယံၤဝဲနွံသီကျဲန့ၣ်လီၤ. (၁ မိၤ. ၃၁:၁၉-၃၀) ဘၣ်ဆၣ် တၢ်လၢနီၢ်ရၤဃ့လး မၤဝဲန့ၣ် စီၤယၤကိာ် တသ့ၣ်ညါဝဲနီတစဲးဘၣ်. (၁ မိၤ. ၃၁:၃၂) ဒီးတၢ်အုၣ်အသး တအိၣ်လၢ စီၤယၤကိာ်အဲၣ်ဒိးသူဝဲ တရၤဖး ဒ်သိးကဒိးန့ၢ် တၢ်န့ၢ်သါလၢ စီၤလၤဘၣ် အဖိခွါတဖၣ်အအိၣ်ဘၣ်. စီၤယၤကိာ် တမၤဘၣ်ဃးအသးဒီး တၢ်ဂီၤတၢ်ဖှီၣ်ဘၣ်. လၢခံကတၢၢ် ဖဲစီၤယၤကိာ် ဟံးန့ၢ်ဝဲပှၤတခီဘီမုၢ်ဖိ အတၢ်ဂီၤတၢ်ဖှီၣ် လၢအိၣ်လၢအဟံၣ်ပူၤ ဒီးဘျၢလီၤကွံာ်ဝဲလၢ သ့ၣ်ဖးဒိၣ်တထူၣ်အခီၣ်ထံး လၢအဘူးဒီးဝ့ၢ်ၡက့ၣ်အခါ ကပၣ်ဃုာ်ဒီး တၢ်ဂီၤတရၤဖးလီၤ.—၁ မိၤ. ၃၅:၁-၄
(၁ မိၤၡ့ ၃၁:၄၁, ၄၂) ဒ်န့ၣ်အသိး ယအိၣ်လၢနဟံၣ်ပူၤအနံၣ်ခံဆံလီၤ. ယမၤနတၢ်တဆံလွံၢ်နံၣ် လၢနဖိမုၣ်ခံဂၤအဂီၢ်, ဒီးဃုနံၣ်လၢနသိဒီးမဲာ်တဲးလဲးအဂီၢ်, ဒီးနလဲက့ၤယဘူးယလဲ ဆံဆဲၣ်ဘျီလီၤ. ၄၂ ယပၢ်အကစၢ်, စီၤအၤဘြၤဟၣ်အကစၢ်, ဒီးစီၤအံၤစဲးအတၢ်ပျံၤန့ၣ် မ့ၢ်တအိၣ်ဘၣ်ဒီးယၤဘၣ်ဒီး, မ့ၢ်မးခဲကနံၣ်အံၤ နကဒုးက့ၤကလီယၤလီၤ. ယွၤကွၢ်ယတၢ်နးတၢ်ဖှီၣ်, ဒီးယမၤတၢ်လၢယစု, ဒီးသိၣ်ဃီၣ်နၤလၢ မကိာ်တနၤအံၤလီၤ.
(၁ ပ့းတရူး ၂:၁၈) တၢ်အခ့အပှၤသ့ၣ်ဧၢ, ပာ်သုသးလၢသုကစၢ် အဖီလာ်လၢ ကယဲၢ်တၢ်သးပျံၤန့ၣ်တက့ၢ်. ထဲပှၤအဂ့ၤ, ဒီးပှၤအခုၣ်အမုာ်ဧိၤတမ့ၢ်ဘၣ်. မ့ၢ်လၢပှၤအကီစ့ၢ်ကီးတက့ၢ်.
တၢး၁၃ ၃/၁၅ ၂၁ ¶၈
ယဟိဝၤမ့ၢ် ပတၢ်အိၣ်ဆိးလီၢ်
၈ ဖဲစီၤယၤကိာ် လဲၤတုၤလၢ ဟၤရၣ်အခါ အဖါတံၢ် စီၤလၤဘၣ် တူၢ်လိာ်မုာ်အီၤဂ့ၤဂ့ၤ ဒီးလၢခံ အတၢ်ဟ့ၣ်ဒုးအဲၣ်အီၤလၢ အဖိမုၣ် နီၢ်လ့ၤအၤဒီး နီၢ်ရၤဃ့လးန့ၣ်လီၤ. စီၤလၤဘၣ် မၤစီၤယၤကိာ် တတီတလိၤဒီး လဲက့ၤဝဲအဘူးအလဲ အဘျီတဆံညါလီၤ. (၁ မိၤ. ၃၁:၄၁, ၄၂) ဘၣ်ဆၣ် စီၤယၤကိာ် အိၣ်ဒီးတၢ်တူၢ်န့ၢ်ခီၣ်ကဲ ဒီးနာ်ဝဲလၢ ယဟိဝၤယွၤ ကဆဲးအံးထွဲကွၢ်ထွဲအီၤလီၤ. ယဟိဝၤယွၤ ကွၢ်ထွဲအီၤစ့ၢ်ကီးလီၤ. ဖဲကစၢ်ယွၤတဲအီၤလၢ ကက့ၤကဒါက့ၤဆူ ကီၢ်ကနၤဧၣ်အခါ အဝဲအိၣ်ဒီး “သိဒီးမဲာ်တဲးလဲးအါဖု, ဒီးကုၢ်ပိာ်မုၣ်, ဒီးကုၢ်ပိာ်ခွါ, ဒီးကီၤလၤအူး, ဒီးကသ့ၣ်ယီၤသ့ၣ်တဖၣ်လီၤ.” (၁ မိၤ. ၃၀:၄၃) လၢတၢ်စံးဘျုးစံးဖှိၣ်ဒိၣ်ဒိၣ်ကလဲာ်အပူၤ စီၤယၤကိာ် ဃ့ဘါထုကဖၣ်ဝဲလၢ– “ယဆံးန့ၢ်ကယဲၢ်နဘျုးနဖှိၣ်, ဒီးနတၢ်မ့ၢ်တၢ်တီလၢ နမၤနခ့နပှၤတမံၤလၢ်လၢ် န့ၣ်တက့ၢ်လီၤ. အဂ့ၢ်ဒ်အံၤ, ယခီဂာ်ထံယၢ်ဒ့ၣ်အံၤ အိၣ်ဒီးယနီၣ်ထိးဘိ, ဒီးခဲကနံၣ်အံၤယမ့ၢ်တၢ်ခံဖုလီၤ.”—၁ မိၤ. ၃၂:၁၀.
တၢ်ဖးလံာ်စီဆှံ
(၁ မိၤၡ့ ၃၁:၁-၁၈) ဒီးနၢ်ဟူဝဲလၢ စီၤလၤဘၣ်အဖိခွါတဖၣ် အတၢ်ကတိၤလၢအစံးဝဲ, စီၤယၤကိာ်ဟံးန့ၢ်ကွံာ် ကယဲၢ်တၢ်လၢအအိၣ်ဒီးပပၢ်, ဒီးမ့ၢ်တၢ်လၢအအိၣ်တ့ၢ်ဒီး ပပၢ်သတးဒီး, န့ၢ်ဘၣ်တၢ်လၤကပီၤအံၤ ခဲလၢာ်လီၤ. ၂ ဒီးစီၤယၤကိာ် ကွၢ်စီၤလၤဘၣ်အမဲာ်, ဒီးထံၣ်ဝဲလၢ အတဘၣ်အမဲာ်ဒ်လၢ မဟါမဟိအသိးန့ၣ်ဘၣ်လီၤ. ၃ ဒီးယွၤစံးဘၣ် စီၤယၤကိာ်, က့ၤကဒါက့ၤဆူ နပၢ်တဖၣ်အကီၢ်, ဒီးဆူနဘူးနတံၢ် အအိၣ်န့ၣ်တက့ၢ်. ဒီးယကအိၣ်ဒီးနၤလီၤ. ၄ ဒီးစီၤယၤကိာ် မၢပှၤလဲၤကိးန့ၢ်နီၢ်ရၤဃ့လး, ဒီးနီၢ်လ့ၤအၤဆူပျီပူၤ, ဆူအသိဒီးမဲာ်တဲးလဲးအအိၣ်, ၅ ဒီးစံးဘၣ်အီၤ, ယကွၢ်သုပၢ်အမဲာ်လၢ အတဘၣ်ယၤဒ်လၢ မဟါမဟိအသိးန့ၣ်ဘၣ်. ဘၣ်ဆၣ်ဒီး ယပၢ်အကစၢ်န့ၣ် အိၣ်တ့ၢ်ဒီးယၤလီၤ. ၆ ဒီးသုသ့ၣ်ညါလၢ ယမၤသုပၢ်အတၢ်လၢ ယဂံၢ်ယဘါခဲလၢာ်လီၤ. ၇ ဒီးသုပၢ်လီန့ၢ်ယၤ, ဒီးလဲက့ၤလံယဘူးယလဲ ဆံဆဲၣ်ဘျီလံ. ဘၣ်ဆၣ်ဒီး ယွၤတဟ့ၣ်အမၤအၢဘၣ်ယၤ နီတမံၤဘၣ်. ၈ အဝဲဒၣ်မ့ၢ်စံးဒ်အံၤ, တၢ်ကံၣ်စံၣ်ဘှဲကကဲထီၣ် နဘူးနလဲန့ၣ်ဒီး, သိဒီးမဲာ်တဲးလဲးတဖၣ် ဆံးစၢ်တၢ်ကံၣ်စံၣ်ဘှဲဒီဖုညါလီၤ. မ့ၢ်စံးဒ်အံၤ, တၢ်ကံၣ်တပလူာ်တပလူာ် ကကဲထီၣ်နဘူးနလဲန့ၣ်ဒီး, သိဒီးမဲာ်တဲးလဲးတဖၣ် ဆံးစၢ်တၢ်ကံၣ် တပလူာ်တပလူာ်ဒီဖုညါလီၤ. ၉ ဒီးယွၤထုးထီၣ်ကွံာ် သုပၢ်အဆၣ်ဖိကီၢ်ဖိအဒၢ, ဒီးဟ့ၣ်လၢယၤလီၤ. ၁၀ ဒီးတၢ်ဆၢကတီၢ်လၢ သိဒီးမဲာ်တဲးလဲးတဖၣ်ဒၢထီၣ်ဒီး, တၢ်မၤအသးလၢယကျ့ထီၣ်ယမဲာ်, ဒီးယထံၣ်တၢ်လၢယတၢ်မံမီၢ်အပူၤ, ဒီးကွၢ်ကွၢ်, မဲာ်တဲးလဲးဖါတဖၣ်လၢအစံၣ်ထီၣ်လၢ မဲာ်တဲးလဲးတဖၣ်အလိၤန့ၣ်, မ့ၢ်အကံၣ် တပလူာ်တပလူာ်, ကံၣ်စံၣ်ဘှဲ, ဒီးကံၣ်စံၣ်ပိၣ်လီၤ. ၁၁ ဒီးယွၤအကလူး စံးဘၣ်ယၤလၢတၢ်မံမီၢ်အပူၤ, ဒီးစံးဝဲဒၣ်, စီၤယၤကိာ်ဧၢ, ဒီးယစံး, ကွၢ်ကွၢ်, ယၤလီၤ. ၁၂ ဒီးအဝဲဒၣ်စံး, ကျ့ထီၣ်နမဲာ်, ဒီးကွၢ်, ကယဲၢ်မဲာ်တဲးလဲးဖါလၢအစံၣ်ထီၣ်လၢ မဲာ်တဲးလဲးတဖၣ်အလိၤန့ၣ် မ့ၢ်အကံၣ်တပလူာ်တပလူာ်, ကံၣ်စံၣ်ဘှဲ, ကံၣ်စံၣ်ပိၣ်ခဲလၢာ်လီၤ. အဂ့ၢ်ဒ်အံၤ, တၢ်လၢစီၤလၤဘၣ်မၤနၤန့ၣ် ယထံၣ်ခဲလၢာ်လံ. ၁၃ ယမ့ၢ်ဘ့ၤသ့လးအကစၢ်, ဖဲနဖှူတၢ်အထူၣ်တထူၣ်, ဖဲနဆိၣ်တၢ်ဆိၣ်ဒီးယၤလီၤ. ခဲကနံၣ်အံၤ, ဂဲၤဆၢထၢၣ်, ဟးထီၣ်ကွံာ်လၢကီၢ်ပူၤအံၤ, ဒီးက့ၤကဒါက့ၤဆူ နဘူးနတံၢ်အကီၢ်တက့ၢ်. ၁၄ ဒီးနီၢ်ရၤဃ့လး, ဒီးနီၢ်လ့ၤအၤစံးဆၢတၢ်, ဒီးစံးက့ၤအီၤ, တၢ်လၢပဂီၢ်, ဒီးတၢ်လၢပကန့ၢ်သါန့ၣ်အိၣ်ဒံး လၢပပၢ်အဟံၣ်ပူၤစ့ၢ်ကီးဧါ. ၁၅ အဝဲဒၣ်ပာ်ပှၤဒ် ပှၤတခီဘီမုၢ်ဖိအသိးန့ၣ် တမ့ၢ်ဘၣ်ဧါ. အဂ့ၢ်ဒ်အံၤ, ဆါကွံာ်ပှၤ, ဒီးအီၣ်ကွံာ်စ့ၢ်ကီး ပစ့လၢာ်စီဖ့ကလ့ၤလီၤ. ၁၆ အဂ့ၢ်ဒ်အံၤ, ကယဲၢ်တၢ်အစုလီၢ်အခီၣ်ခိၣ်လၢ ယွၤထုးထီၣ်ကွံာ်လၢပပၢ်န့ၣ်မ့ၢ်ပတၢ်, ဒီးပဖိပလံၤအတၢ်လီၤ. ဒီးခဲကနံၣ်အံၤ, ကယဲၢ်တၢ်လၢ ယွၤစံးဘၣ်နၤခဲလၢာ်န့ၣ်မၤတက့ၢ်. ၁၇ ဒီးစီၤယၤကိာ်ဂဲၤဆၢထၢၣ်, ဒီးပာ်အဖိခွါ, ဒီးအမါသ့ၣ်တဖၣ်လၢ ကီၤလၤအူးအခိၣ်, ၁၈ ဒီးဆှၢထီၣ်ကွံာ် အဆၣ်ဖိကီၢ်ဖိအဒၢခဲလၢာ်, ဒီးကယဲၢ်အတၢ်ဖိတၢ်လံၤ လၢအန့ၢ်ဘၣ်, ဆၣ်ဖိကီၢ်ဖိအဒၢလၢအန့ၢ်တ့ၢ်, လၢအန့ၢ်ဘၣ်ဝဲလၢ ပၤဒနါရၣ်အပူၤ, ဒ်သိးအကလဲၤဆူ အပၢ်စီၤအံၤစဲးအအိၣ် လၢကီၢ်ကနၤဧၣ်အပူၤလီၤ.
လါအ့ဖြ့ၣ် ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၃၂–၃၃
“နကနိဒ်သိး နကဒိးန့ၢ်တၢ်ဆိၣ်ဂ့ၤအဂီၢ်ဧါ”
(၁ မိၤၡ့ ၃၂:၂၄) ဒီးစီၤယၤကိာ် အိၣ်လီၤတဲာ်တဂၤဃီ, ဒီးပှၤကညီတဂၤကနိဒီးအီၤ တုၤမုၢ်ဆ့ၣ်ဝါထီၣ်လီၤ.
တၢး၀၃ ၈/၁၅ ၂၅ ¶၃
မ့ၢ်နဃု ယဟိဝၤယွၤလၢ တၢ်သူၣ်ဆူၣ်သးဆူၣ်အပူၤဧါ
လၢလံာ်စီဆှံ အပူၤ ပှၤအဒိအတဲာ်လၢ အဂုာ်ကျဲးစၢးဃု ယဟိဝၤယွၤန့ၣ် အိၣ်အါမးလီၤ. လၢအဝဲသ့ၣ်တဖၣ်အကျါ ပၣ်ဃုာ်ဒီး စီၤယၤကိာ်လၢ အဂုာ်ကျဲးစၢးကနိဒီး ယွၤအမူခိၣ်ကလူး တုၤလီၤလၢမုၢ်ဆ့ၣ်ဝါတစုလီၤ. မ့ၢ်လၢအဝဲ “ပြၢလိာ်သး” ဒီးကစၢ်ယွၤ မ့တမ့ၢ် “မၤသပှၢ်ပှၢ်,” “ကျဲးစၢးလၢာ်သး [အနီၢ်ကစၢ်],” “တဟ့ၣ်ၡူအသးဘၣ်” အဃိ ဘၣ်တၢ်ကိးအီၤလၢ အံၣ်စရ့လး (ပှၤလၢအပြၢလိာ်သးဒီးယွၤ) လီၤ. ခီဖျိလၢအဝဲတဟ့ၣ်ၡူအသးဘၣ်အဃိ မူခိၣ်ကလူး ဆိၣ်ဂ့ၤအီၤလီၤ.—၁ မိၤၡ့ ၃၂:၂၄-၃၀.
(၁ မိၤၡ့ ၃၂:၂၅, ၂၆) ဒီးတုၤအထံၣ်လၢအတမၤဃၣ်အီၤဘၣ်ဒီး, ထိးဘၣ်စီၤယၤကိာ်အကံၣ်ဒုၣ်ဆၢ, ဒီးကနိဝဲအဖၢမုၢ်ဒီး, စီၤယၤကိာ်အကံၣ်ဒုၣ်ဆၢတလံာ်လီၤ. ၂၆ ဒီးစံးဝဲဒၣ်, ပျၢ်ယၤတက့ၢ်. အဂ့ၢ်ဒ်အံၤမုၢ်ဆ့ၣ်ဝါထီၣ်လံ. ဒီးစံးဝဲဒၣ်, နမ့ၢ်တဆိၣ်ဂ့ၤဘၣ်ယၤဘၣ်ဒီး, ယတပျၢ်ဘၣ်နၤဘၣ်.
it-2 ၁၉၀
ခီၣ်ဟးဂီၤ, ခီၣ်တကျဲၢ်
စီၤယၤကိာ် အခီၣ်တကျဲၢ်. စီၤယၤကိာ်အသးအိၣ် ၉၇ နံၣ်အခါ အဝဲကနိဒီးမူခိၣ်ကလူးလၢ အပျိာ်လဲအသးဒ်ပှၤကညီအသိးတဂၤ ဒီတနၤကျၢၤလီၤ. အဝဲကနိဒီး မူခိၣ်ကလူးတုၤလၢ အန့ၢ်ဘၣ်တၢ်ဆိၣ်ဂ့ၤတစုလီၤ. ဖဲအဝဲသ့ၣ်ကနိလိာ်သးအဆၢကတီၢ် မူခိၣ်ကလူးန့ၣ် မၤဘၣ်ဝဲစီၤယၤကိာ် အကံၣ်ဒုၣ်အဃိ အကံၣ်ဒုၣ်အဆၢတလံာ်ဝဲလီၤ. အဃိအဝဲဘၣ်ဟးတကျဲၢ်တကျဲၢ်လီၤ. (၁ မိၤ. ၃၂:၂၄-၃၂; ဟိၤ. ၁၂:၂-၄) မူခိၣ်ကလူးတဲဝဲလၢ စီၤယၤကိာ်န့ၣ် ပြၢလိာ်အသး ‘ဒီးယွၤ [ယွၤအမူခိၣ်ကလူး] ဒီးပှၤကညီ ဒီးမၤဃၣ်တၢ်’ သနာ်က့ နီၢ်နီၢ်န့ၣ် အဝဲတမၤနၢၤဝဲ ကစၢ်ယွၤအမူခိၣ်ကလူးလၢ အစိအကမီၤဒိၣ်န့ၣ်ဘၣ်. မ့ၢ်ဒၣ်ကစၢ်ယွၤ တိာ်ပာ်ဒီးပျဲအီၤလၢ အဝဲကကနိဒီးမူခိၣ်ကလူးလီၤ. ဒီးမ့ၢ်တၢ်အုၣ်သးလၢ စီၤယၤကိာ်ပာ်လုၢ်ပာ်ပှ့ၤဝဲ ယွၤအတၢ်ဆိၣ်ဂ့ၤလီၤ.
(၁ မိၤၡ့ ၃၂:၂၇, ၂၈) ဒီးအဝဲဒၣ်စံးဘၣ်အီၤ, နမံၤမ့ၢ်ဒ်လဲၣ်, ဒီးစံးဝဲဒၣ်, စီၤယၤကိာ်လီၤ. ၂၈ ဒီးစံးဝဲဒၣ်, တၢ်တကိးလၢၤဘၣ်နမံၤလၢစီၤယၤကိာ်ဘၣ်. မ့ၢ်စီၤအံၣ်စရ့လးတခီလီၤ. အဂ့ၢ်ဒ်အံၤ, နမၤပဒိၣ်နသးဒီးယွၤဒီးပှၤကညီ, ဒီးနမၤဃၣ်တၢ်လီၤ.
it-1 ၁၂၂၈
အံၣ်စရ့
၁. ဖဲစီၤယၤကိာ်အသးအိၣ် ၉၇ နံၣ်အခါ ကစၢ်ယွၤဟ့ၣ်အီၤ မံၤအံၤလီၤ. မ့ၢ်ဝဲဖဲအဝဲလဲၤလၢ အဝဲၢ်စီၤဧ့ၡီၤအအိၣ် ဒီးခီဂာ်ဝဲထံကျိ ယးဘိ ဒီးကနိဒီးမူခိၣ်ကလူးအနၤလီၤ. ခီဖျိလၢ စီၤယၤကိာ်ကနိဒီးမူခိၣ်ကလူးဆူၣ်ဆူၣ်အဃိ ဘၣ်တၢ်ဆီတလဲအမံၤလၢ အံၣ်စရ့လး လၢအကဲထီၣ်တၢ်ပနီၣ်လၢ အဝဲကဒိးန့ၢ်ဘၣ် ယွၤအတၢ်ဆိၣ်ဂ့ၤလီၤ. ဒ်သိးတၢ်လီၢ်အံၤ ကဘၣ်တၢ်သ့ၣ်နီၣ်အီၤအဂီၢ် ကိးဝဲအမံၤလၢ ပနံၤအ့လးလီၤ. (၁ မိၤ. ၃၂:၂၂-၃၁; ကွၢ် JACOB No. 1.) လၢခံ ဖဲတၢ်လီၢ် ဘ့ၤသ့လးန့ၣ် ကစၢ်ယွၤ ဆီတလဲဝဲစီၤယၤကိာ်အမံၤ ဒီးပာ်ဂၢၢ်ပာ်ကျၢၤဝဲလီၤ. စးထီၣ်ဖဲန့ၣ် တုၤလီၤလၢ စီၤယၤကိာ်သံတစုန့ၣ် ကစၢ်ယွၤကိးအီၤလၢ အံၣ်စရ့လး အဘျီတဖၣ်အဘျီလီၤ. (၁ မိၤ. ၃၅:၁၀, ၁၅; ၅၀:၂; ၁ ကွဲး. ၁:၃၄) ဘၣ်ဆၣ် မံၤလၢအမ့ၢ် အံၣ်စရ့လးလၢ အိၣ်အဘျီ ၂,၅၀၀ ဘျဲၣ်န့ၣ် မ့ၢ်ဝဲကလုာ်လၢ အဟဲလီၤစၢၤလီၤသွဲၣ်လၢ စီၤယၤကိာ်န့ၣ်လီၤ.—၂ မိၤ. ၅:၁, ၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၂:၁၁) မၤပူၤမၤဖျဲးလၢ်ယၤဒီး ယဝဲၢ်အစုလၢစီၤဧ့ၡီၤအစုန့ၣ်တက့ၢ်. အဂ့ၢ်ဒ်အံၤ, ယပျံၤအီၤလီၤ. ကဟဲကျီသံကွံာ်ဘၣ်ဖုးယၤ, ဒီးဖိဒီးမါလီၤ.
(၁ မိၤၡ့ ၃၂:၁၃-၁၅) ဒီးတၢ်လၢမုၢ်တနၤန့ၣ်အိၣ်ဝဲဖဲန့ၣ်, ဒီးဟံးန့ၢ်တၢ်လၢ အအိၣ်လၢအစုပူၤတနီၤနီၤ, တၢ်ခိၣ်ဖးလၢ အဝဲၢ်စီၤဧ့ၡီၤအဂီၢ်, ၁၄ မဲာ်တဲးလဲးအမိၢ်ခံကယၤ, ဒီးမဲာ်တဲးလဲးအဖါခံဆံ, သိအမိၢ်ခံကယၤ, ဒီးသိအဖါခံဆံ, ၁၅ ကီၤလၤအူးအမိၢ် အိၣ်ဒီးအနုၢ်ထံဒီးအဖိသၢဆံ, ဂီၤဖံးအမိၢ်လွံၢ်ဆံ, ဒီးဂီၤဖံးအဖါတဆံ, ကသ့ၣ်ယီၤအမိၢ်ခံဆံ, ဒီးအဖါတဆံလီၤ.
တၢး၁၀ ၆/၁၅ ၂၂ ¶၁၀-၁၁
တၢ်ကတိၤလၢအမုာ် မၤဂ့ၤထီၣ်တၢ်ရ့လိာ်သး
၁၀ တၢ်ကတိၤလၢအမုာ် ဒီးတၢ်ကတိၤတၢ် သ့သ့ဘၣ်ဘၣ်န့ၣ် မၤစၢၤပှၤလၢ ပကအိၣ်ဒီးတၢ်ရ့လိာ်သးလၢအဂ့ၤ ဒီးဆဲးပၢၤဃာ်အီၤလီၤ. တၢ်ဖံးတၢ်မၤလၢ အမၤဂ့ၤထီၣ် ပတၢ်ရ့လိာ်သးဒီးပှၤဂၤတဖၣ်စ့ၢ်ကီး မၤဂ့ၤထီၣ် ပတၢ်ကတိၤသကိးတၢ်ဒီးပှၤဂၤလီၤ. ပတၢ်ဖံးတၢ်မၤလၢ အိၣ်ဒီးတၢ်အဲၣ်တၢ်ကွံ ဒ်သိးဒီး ပဃုတၢ်ခွဲးတၢ်ယၤလၢ ကမၤစၢၤပှၤဂၤ, ဟ့ၣ်တၢ်ဟ့ၣ်လၢ တၢ်သူၣ်အိၣ်သးအိၣ်အပူၤ ဒီးတၢ်တူၢ်လိာ်တမှံၤန့ၣ် မၤစၢၤပှၤလၢ ပကတဲသကိးတၢ်ဂ့ၤဂ့ၤလီၤ. တၢ်အံၤလီၤဂာ်လၢ ပပာ်ထီၣ် “မ့ၣ်အူကဖး” လၢပှၤတဂၤအဖီခိၣ် ဒီးမၤစၢၤအီၤလၢကပာ်ဖျါထီၣ် တၢ်ဂ့ၤတၢ်ဝါတဖၣ် ဒီးကညီထီၣ်လၢ ပကတဲသကိးတၢ်ဂ့ၢ်ကီပျီပျီအဂီၢ်လီၤ.—ရိ. ၁၂:၂၀, ၂၁.
၁၁ စီၤယၤကိာ်န့ၣ် နၢ်ပၢၢ်ဝဲတၢ်ဂ့ၢ်အံၤလီၤ. အဝဲဆိကမိၣ်ဝဲလၢ အဝဲၢ်စီၤဧ့ၡီၤအသးထီၣ်အီၤ ဒီးကမၤသံအီၤအဃိ ဃ့ၢ်ကွံာ်ဝဲလၢအယံၤလီၤ. ပူၤကွံာ်အနံၣ်အါမးဝံၤအလီၢ်ခံ စီၤယၤကိာ်ဟဲက့ၤဝဲလီၤ. စီၤဧ့ၡီၤဟဲဝဲဒီးအပှၤ ၄၀၀ ဒ်သိးကထံၣ်လိာ်သးဒီး စီၤယၤကိာ်အဂီၢ်လီၤ. စီၤယၤကိာ်ဃ့တၢ်မၤစၢၤလၢ ယဟိဝၤယွၤအအိၣ်လီၤ. လၢခံအဝဲဆှၢလီၤဆိဝဲ တၢ်ဟ့ၣ်လၢအမ့ၢ် ဆၣ်ဖိကီၢ်ဖိတဖၣ် ဆူစီၤဧ့ၡီၤအအိၣ်လီၤ. ခီဖျိလၢ တၢ်ဟ့ၣ်အံၤအဃိ အတၢ်တိာ်ပာ်လၢထီၣ်ပှဲၤထီၣ်ဝဲလီၤ. ဖဲအဝဲသ့ၣ်ထံၣ်လိာ်သးအဆၢကတီၢ် စီၤဧ့ၡီၤအသးခုၣ်လီၤလံအဃိ အဝဲဃ့ၢ်ဖိးဟု စီၤယၤကိာ်လီၤ.—၁ မိၤ. ၂၇:၄၁-၄၄; ၃၂:၆, ၁၁, ၁၃-၁၅; ၃၃:၄, ၁၀.
(၁ မိၤၡ့ ၃၃:၂၀) ဒီးမၤထီၣ်တၢ်လုၢ်အလီၢ်ဖဲန့ၣ်, ဒီးယုၢ်အမံၤလၢ ယွၤမ့ၢ်အံၣ်စရ့လးအကစၢ်န့ၣ်လီၤ.
it-1 ၉၈၀
ယွၤမ့ၢ်အံၣ်စရ့လးအကစၢ်
ဖဲစီၤယၤကိာ်ထံၣ်လိာ်အသးဒီး ယဟိဝၤယွၤ အမူခိၣ်ကလူးလၢ တၢ်လီၢ်ပနံၤအ့လး ဝံၤအလီၢ်ခံ ဘၣ်တၢ်ဆီတလဲအမံၤလၢ အံၣ်စရ့လးလီၤ. ဖဲအဝဲမၤဃူမၤဖိးတၢ်ဒီး အဝဲၢ်စီၤဧ့ၡီၤဝံၤအလီၢ်ခံ အဝဲအိၣ်ဝဲဆိးဝဲလၢ စူးကိၤသး ဒီးၡက့ၣ်လီၤ. အဝဲပှ့ၤဝဲဟီၣ်ခိၣ်တကဝီၤလၢ စီၤဃမိၢ်အဖိခွါတဖၣ်အအိၣ် လၢအဘူးဒီးဝ့ၢ်ၡက့ၣ်လီၤ. (၁ မိၤ. ၃၂:၂၄-၃၀; ၃၃:၁-၄, ၁၇-၁၉) “ဒီးမၤထီၣ်တၢ်လုၢ်အလီၢ်ဖဲန့ၣ်, ဒီးယုၢ်အမံၤလၢယွၤမ့ၢ်အံၣ်စရ့လးအကစၢ်န့ၣ်လီၤ.” (၁ မိၤ. ၃၃:၂၀) စီၤယၤကိာ်န့ၣ် ကိးဝဲအနီၢ်ကစၢ် ဃုာ်ဒီးတၢ်လုၢ်လီၢ်န့ၣ် အမံၤလၢအံၣ်စရ့လးအဃိ ပာ်ဖျါထီၣ်ဝဲလၢ အဝဲဘၣ်သူၣ်ဘၣ်သးဝဲအမံၤသီအံၤ ဒီးတူၢ်လိာ်ဝဲ ကစၢ်ယွၤ အတၢ်ဟံးစုနဲၣ်ကျဲ ဒ်သိးကက့ၤဘၣ် ဆူကီၢ်တၢ်စံးပာ် ပူၤပူၤဖျဲးဖျဲးအဂီၢ်လီၤ. လၢလံာ်စီဆှံအပူၤ တၢ်ကတိၤအံၤအိၣ်ထဲတဘျီလီၤ.
တၢ်ဖးလံာ်စီဆှံ
(၁ မိၤၡ့ ၃၂:၁-၂၁) ဒီးစီၤယၤကိာ်လဲၤပိာ်အကျဲ, ဒီးယွၤအကလူးတဖၣ် ဟဲသဂၢၢ်အီၤလီၤ. ၂ ဒီးတုၤစီၤယၤကိာ်ထံၣ်ဘၣ်အီၤဒီး, စံးဝဲဒၣ်, အဝဲအံၤမ့ၢ်ယွၤအပှၤသုးမုၢ်ဂီၢ်မုၢ်လီၤ. ဒီးတၢ်လၢအလီၢ်တပူၤန့ၣ် ယုၢ်ဝဲအမံၤလၢမၤဃန့ၤလီၤ. ၃ ဒီးစီၤယၤကိာ်မၢအကလူးတဖၣ်လဲၤလၢ အမဲာ်ညါဆူ အဝဲၢ်စီၤဧ့ၡီၤအအိၣ်, ဆူကီၢ်စံဧ့ၢ်, အဒိၣ်အပျီပူၤလီၤ. ၄ ဒီးမၤလိာ်အီၤ, ဒီးစံးဝဲဒၣ်, သုဘၣ်စံးယကစၢ်စီၤဧ့ၡီၤဒ်အံၤ, နကုၢ်နပှၤ စီၤယၤကိာ်စံးဒ်အံၤ, ယအိၣ်တမှံၤဒီးစီၤလၤဘၣ်, ဒီးအိၣ်ဖဲန့ၣ်တုၤခဲကနံၣ်အံၤလီၤ. ၅ ယအိၣ်ဒီးဂီၤဖံး, ဒီးကသ့ၣ်ယီၤ, ဒီးသိ, ဒီးမဲာ်တဲးလဲး, ဒီးကုၢ်ပိာ်ခွါ, ဒီးကုၢ်ပိာ်မုၣ်သ့ၣ်တဖၣ်, ဒီးယမၢပှၤလဲၤစံးဘၣ် ယကစၢ် ဒ်သိးယကဘၣ်ဘျုးဘၣ်ဖှိၣ် လၢနမဲာ်ညါလီၤ. ၆ ဒီးအကလူးတဖၣ်န့ၣ် ဟဲက့ၤကဒါက့ၤဆူ စီၤယၤကိာ်အအိၣ်, ဒီးစံးဝဲဒၣ်, ပလဲၤဆူနဝဲၢ်စီၤဧ့ၡီၤအအိၣ်, ဒီးအဝဲဒၣ်န့ၣ်ဟဲသဂၢၢ်စ့ၢ်ကီးနၤ, ဒီးပှၤကညီလွံၢ်ကယၤအိၣ်ဒီးအီၤလီၤ. ၇ ဒီးစီၤယၤကိာ်ပျံၤတၢ်ဒိၣ်မး, ဒီးအသူၣ်ကိၢ်အသးဂီၤလီၤ. ဒီးနီၤဖးပှၤကညီလၢအအိၣ်ဒီးအီၤ, ဒီးသိ, ဒီးမဲာ်တဲးလဲး, ဒီးဂီၤဖံး, ဒီးကီၤလၤအူးသ့ၣ်တဖၣ်လၢတၢ်ခံဖုလီၤ. ၈ ဒီးစံးဝဲဒၣ်, စီၤဧ့ၡီၤမ့ၢ်ဟဲပၢၢ်လၢအဝဲတဖု, ဒီးကျီကွံာ်အီၤဒီး, အဝဲတဖုလၢအအိၣ်လီၤတဲာ်န့ၣ်ကပူၤကဖျဲးလီၤ. ၉ ဒီးစီၤယၤကိာ်စံးဝဲဒၣ်, ယပၢ်စီၤအၤဘြၤဟၣ်အကစၢ်, ဒီးယပၢ်စီၤအံၤစဲးအကစၢ်, ယွၤလၢအစံးဘၣ်ယၤ, က့ၤကဒါက့ၤဆူနကီၢ်, ဒီးဆူနဘူးနတံၢ်အအိၣ်, ဒီးယကမၤဂ့ၤနၤန့ၣ်တဂၤဧၢ, ၁၀ ယဆံးန့ၢ်ကယဲၢ်နဘျုးနဖှိၣ်, ဒီးနတၢ်မ့ၢ်တၢ်တီလၢ နမၤနခ့နပှၤတမံၤလၢ်လၢ် န့ၣ်တက့ၢ်လီၤ. အဂ့ၢ်ဒ်အံၤ, ယခီဂာ်ထံယၢ်ဒ့ၣ်အံၤ အိၣ်ဒီးယနီၣ်ထိးဘိ, ဒီးခဲကနံၣ်အံၤယမ့ၢ်တၢ်ခံဖုလီၤ. ၁၁ မၤပူၤမၤဖျဲးလၢ်ယၤဒီး ယဝဲၢ်အစုလၢစီၤဧ့ၡီၤအစုန့ၣ်တက့ၢ်. အဂ့ၢ်ဒ်အံၤ, ယပျံၤအီၤလီၤ. ကဟဲကျီသံကွံာ်ဘၣ်ဖုးယၤ, ဒီးဖိဒီးမါလီၤ. ၁၂ ဒီးနစံး, ယကမၤဂ့ၤနၤသပှၢ်တၢၢ်, ဒီးယကမၤနချံနသၣ်ဒ်မဲးလၢ ပီၣ်လဲၣ်နံၤအသိး, လၢပဂံၢ်တသ့ဘၣ် လၢအအါအဃိလီၤ. ၁၃ ဒီးတၢ်လၢမုၢ်တနၤန့ၣ်အိၣ်ဝဲဖဲန့ၣ်, ဒီးဟံးန့ၢ်တၢ်လၢအအိၣ်လၢအစုပူၤတနီၤနီၤ, တၢ်ခိၣ်ဖးလၢအဝဲၢ်စီၤဧ့ၡီၤအဂီၢ်, ၁၄ မဲာ်တဲးလဲးအမိၢ်ခံကယၤ, ဒီးမဲာ်တဲးလဲးအဖါခံဆံ, သိအမိၢ်ခံကယၤ, ဒီးသိအဖါခံဆံ, ၁၅ ကီၤလၤအူးအမိၢ်အိၣ်ဒီး အနုၢ်ထံဒီးအဖိသၢဆံ, ဂီၤဖံးအမိၢ်လွံၢ်ဆံ, ဒီးဂီၤဖံးအဖါတဆံ, ကသ့ၣ်ယီၤအမိၢ်ခံဆံ, ဒီးအဖါတဆံလီၤ. ၁၆ ဒီးဟ့ၣ်ဝဲလၢ အကုၢ်အပှၤတဖၣ်အစုပူၤ, တဖုလၢတပူၤဒၣ်, တဖုလၢတပူၤဒၣ်, ဒီးစံးဘၣ်အကုၢ်အပှၤ, လဲၤခီဂာ်တၢ်လၢယမဲာ်ညါ, ဒီးပာ်တၢ်အလီၢ်လၢ တဖုတဖုအဘၢၣ်စၢၤန့ၣ်တက့ၢ်. ၁၇ ဒီးမၤလိာ်ပှၤလၢ အခီၣ်ထံးတဂၤဒီးစံးဝဲဒၣ်, တုၤယဝဲၢ်စီၤဧ့ၡီၤဟဲသဂၢၢ်နၤ, ဒီးစံးဝဲ, နမ့ၢ်မတၤအဝဲလဲၣ်, ဒီးနကလဲၤဖဲလဲၣ်, ဒီးတၢ်အိၣ်လၢနမဲာ်ညါတဖၣ် မ့ၢ်မတၤအဝဲလဲၣ်န့ၣ်ဒီး, ၁၈ နဘၣ်စံး, မ့ၢ်နကုၢ်နပှၤစီၤယၤကိာ်အဝဲ, မ့ၢ်တၢ်ခိၣ်ဖးဟ့ၣ်ယုၢ်လၢယကစၢ်စီၤဧ့ၡီၤအဂီၢ်လီၤ. ဒီးကွၢ်ကွၢ်, အကစၢ်ဒၣ်ဝဲအိၣ်ဝဲစ့ၢ်ကီးလၢပလီၢ်ခံန့ၣ်လီၤ. ၁၉ ဒီးမၤလိာ်စ့ၢ်ကီးပှၤခံဂၤတဂၤ, ဒီးပှၤသၢဂၤတဂၤ, ဒီးကယဲၢ်ပှၤလၢအပိာ် တၢ်အဖုသ့ၣ်တဖၣ်အခံကိးဂၤဒဲး, ဒီးစံးဝဲဒၣ်, တုၤသုထံၣ်န့ၢ်ဘၣ်စီၤဧ့ၡီၤဒီး, သုဘၣ်ကတိၤတၢ်ဒီးအီၤလၢ တၢ်ကတိၤတဖၣ်အံၤလီၤ. ၂၀ ဒီးစံးစ့ၢ်ကီး, ကွၢ်ကွၢ်, နကုၢ်နပှၤစီၤယၤကိာ်အိၣ်ဝဲလၢ ပလီၢ်ခံန့ၣ်တက့ၢ်. အဂ့ၢ်ဒ်အံၤ, စံးဝဲဒၣ်, ယကမၤဘၢအမဲာ်လၢ တၢ်ခိၣ်ဖးလၢအလဲၤလၢညါ, ဒီးယကထံၣ်ဘၣ်အမဲာ်လၢအလီၢ်ခံလီၤ. ဘၣ်တဘၣ်ကကွၢ်ယမဲာ်လီၤ. ၂၁ ဒီးတၢ်ခိၣ်ဖးလဲၤခီဂာ်တၢ်လၢအမဲာ်ညါလီၤ. မ့မ့ၢ်အကစၢ်ဒၣ်ဝဲ အိၣ်သီတနၤကျၢၤလၢမုၢ်တနၤန့ၣ်လၢ အပှၤတဖုအကျါလီၤ.
လါအ့ဖြ့ၣ် ၂၇–လါမ့ၤ ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၃၄–၃၅
“တၢ်ရ့တံၤရ့သကိးလၢအတဂ့ၤ အတၢ်ပိာ်ထွဲ”
(၁ မိၤၡ့ ၃၄:၁) ဒီးနီၢ်လ့ၤအၤအဖိမုၣ်နီၢ်ဒံနၤ, လၢအဆံးစၢ်န့ၢ်လၢ စီၤယၤကိာ်တဂၤန့ၣ် လဲၤအိၣ်သကိး ပှၤကီၢ်ဖိအဖိမုၣ်လီၤ.
တၢး၉၇ ၂/၁ ၃၀ ¶၄
ၡက့ၣ်—ဝ့ၢ်လၢအိၣ်လၢ တၢ်ပၢၤခိၣ်
မုၣ်ကနီၤဖိလၢ ညီနုၢ်ဟဲဟးလၢ အဝဲသ့ၣ်အဝ့ၢ်ပူၤ ထဲတဂၤဧိၤန့ၣ် သးစၢ်ပိာ်ခွါလၢ အိၣ်လၢဝ့ၢ်ပူၤတဖၣ် ကထံၣ်အီၤဒ်လဲၣ်. ကီၢ်အပဒိၣ်အဖိခွါ “ထံၣ်အီၤ, ဒီးဟံးန့ၢ်အီၤ, ဒီးမံဃုာ်ဒီးအီၤ, ဒီးမၤဟးဂီၤအီၤလီၤ.” ဘၣ်မနုၤအဃိ နီၢ်ဒံနၤ ပျဲတၢ်ကီတၢ်ခဲဘၣ်အီၤ ခီဖျိအလဲၤရ့ဒီး ပှၤကနၤဧၣ်ဖိလၢ အသကဲာ်ပဝးလီၤရၢၢ်တဖၣ်န့ၣ်လဲၣ်. အဝဲကဆိကမိၣ်ဝဲလၢ အလိၣ်ဘၣ် အသကိးလၢ အသးထဲသိးအီၤတဖၣ်အဃိန့ၣ်ဧါ. အဝဲမ့ၢ်ပှၤလၢ အခိၣ်ကိၤဒီး မၤဖဲအသး ဒ်အဒီပုၢ်ဝဲၢ်ခွါတနီၤအသိးန့ၣ်ဧါ. ဖးကွၢ်တၢ်ဂ့ၤတၢ်ကျိၤလၢ ၁ မိၤၡ့အပူၤ ဒီးဂုာ်ကျဲးစၢး ဆိကမိၣ်ကွၢ် တၢ်သူၣ်အုးသးအုး ဒီးတၢ်မဲာ်ဆှးလၢ စီၤယၤကိာ်ဒီး နီၢ်လ့ၤအၤ တူၢ်ဘၣ်ဝဲခီဖျိ အဖိမုၣ် လဲၤဟးလၢ ၡက့ၣ်ဒီး တၢ်ကဲထီၣ်အသးဒီးအီၤ တဖၣ်န့ၣ်တက့ၢ်.—၁ မိၤၡ့ ၃၄:၁-၃၁; ၄၉:၅-၇; ကွၢ်စ့ၢ်ကီး The Watchtower, June 15, 1985, page 31.
(၁ မိၤၡ့ ၃၄:၂) ဒီးပှၤဃံၤဝံၤဖိ ကီၢ်အပဒိၣ်စီၤဃမိၢ်အဖိခွါ စီၤၡက့ၣ်ထံၣ်အီၤ, ဒီးဟံးန့ၢ်အီၤ, ဒီးမံဃုာ်ဒီးအီၤ, ဒီးမၤဟးဂီၤအီၤလီၤ.
“ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ”
၁၄ ခီဖျိလၢ စီၤၡက့ၣ်ကွၢ်ဂ့ၤ နီၢ်ဒံနၤအဃိ “ဟံးန့ၢ်” ဝဲနီၢ်ဒံနၤဒီး “မၤဟးဂီၤ” အသူးသ့ၣ်လၤကပီၤန့ၣ်လီၤ. လၢစီၤၡက့ၣ်အတၢ်ထံၣ်န့ၣ် အဝဲမၤဝဲဒ်အံၤ တဘၣ်တၢ်နီတမံၤဘၣ်ဒီး တမ့ၢ်တၢ်လၢအကမၣ်စ့ၢ်ကီးဘၣ်. (ဖး ၁ မိၤၡ့ ၃၄:၁-၄ တက့ၢ်.) ဒီးပှၤလၢအဘၣ်ဒိ လၢတၢ်ဂ့ၢ်အံၤအဃိန့ၣ် တမ့ၢ်ထဲနီၢ်ဒံနၤတဂၤဧိၤဘၣ်. တၢ်လၢအဟဲကဲထီၣ်အသးတဖၣ် မၤမဲာ်ဆှးဒီးမၤကီမၤခဲ အဟံၣ်ဖိဃီဖိခဲလၢာ်လီၤ.—၁ မိၤၡ့ ၃၄:၇, ၂၅-၃၁; ကလၤတံ ၆:၇, ၈.
(၁ မိၤၡ့ ၃၄:၇) ဒီးတုၤစီၤယၤကိာ် အဖိခွါတဖၣ်နၢ်ဟူဝဲဒီး, ဟဲက့ၤထီၣ်ဝဲလၢပှၢ်လၢ်ကျါ, ဒီးအသးဆါဒီးအသးထီၣ်နးမးလီၤ. အဂ့ၢ်ဒ်အံၤ, မ့ၢ်အမံဃုာ်ဒီးစီၤယၤကိာ်အဖိမုၣ်ဒီး, မၤပှၤဟးဂီၤဖိအတၢ်မၤလၢ အံၣ်စရ့လးအကျါလီၤ. ဒီးတဂ့ၤမၤဘၣ်ဒ်န့ၣ်ဘၣ်.
(၁ မိၤၡ့ ၃၄:၂၅) ဒီးတုၤပှၤဆါထီၣ်ဖဲမုၢ်သၢနံၤတနံၤန့ၣ် တၢ်မၤအသးလၢစီၤယၤကိာ်အဖိခွါဒီပုၢ်ဝဲၢ်ဒီးနီၢ်ဒံနၤ, စီၤစူးမ့းအိၣ်ဒီးစီၤလ့ၤဝံခံဂၤန့ၣ်, ဟံးန့ၢ်နးတဂၤတဘ့ၣ်တဂၤတဘ့ၣ်, ဒီးလဲၤနုာ်ဝဲလၢဝ့ၢ်ပူၤအိၣ်ဒီးအသးခူတလ့ၢ်, ဒီးမၤသံပှၤပိာ်ခွါခဲလၢာ်လီၤ.
တၢး၀၉ ၉/၁ ၂၁ ¶၁-၂
ဖဲနသးဘၣ်ဒိအခါ
တဘျီတခီၣ် ပှၤတဂၤ မၤကၣ်က့ၤတၢ် ဒ်သိးအတၢ်သးဘၣ်ဒိ ကလီၤမၢ်ကွံာ်အဂီၢ်လီၤ. အဒိ, လံာ်စီဆှံ ပာ်ဖျါဝဲလၢ ဖဲပှၤဧ့ၤဘြံၤဖိတဖၣ် အဖုဖးဒိၣ် စီၤယၤကိာ် အဖိခွါတဖၣ် နၢ်ဟူဝဲလၢ ပှၤကနၤဧၣ်ဖိ စီၤၡက့ၣ် ဖီၣ်ဆူၣ်မံဃုာ် အပုၢ်ဒ့မုၣ် နီၢ်ဒံနၤအခါ အဝဲသ့ၣ် “အသးဆါ ဒီးအသးထီၣ်နးမးလီၤ.” (၁ မိၤ. ၃၄:၁-၇) စီၤယၤကိာ်အဖိခွါခံဂၤ ကူၣ်ထီၣ်ဝဲလၢ ကမၤကၣ်က့ၤ စီၤၡက့ၣ် ဒီးအဟံၣ်ဖိဃီဖိတဖၣ်လီၤ. စီၤစူးမ့းအိၣ် ဒီးစီၤလ့ၤဝံ သူဝဲတၢ်လီတၢ်ဝ့ၤတမံၤဒီး လဲၤနုာ်လီၤဆူ ပှၤကနၤဧၣ်အဝ့ၢ်ပူၤ ဒီးမၤသံကွံာ်ဝဲ ကယဲၢ်ပှၤပိာ်ခွါခဲလၢာ် ဃုာ်ဒီးစီၤၡက့ၣ်လီၤ.—၁ မိၤ ၃၄:၁၃-၂၇.
တၢ်ဂၢ်သွံၣ်ဂၢ်စီၤ ဒ်န့ၣ်န့ၣ် မၤဘၣ်ဂီၢ်က့ၤ တၢ်သဘံၣ်ဘုၣ်ဧါ. ဖဲစီၤယၤကိာ် နၢ်ဟူဘၣ်ဝဲ အဖိခွါတဖၣ် အတၢ်မၤအခါ ပာ်ဒ့ၣ်ပာ်ကမၣ် အဝဲသ့ၣ်ဒီး စံးဝဲလၢ “သုမၤကိၢ်မၤဂီၤယၤ တုၤယကနၢအုၣ်လၢပှၤကီၢ်ဖိအကျါ, . . . ဒီးကအိၣ်ဖှိၣ်ရိဖှိၣ်ထီဒါယၤ ဒီးကျီသံယၤ, ဒီးယကတုၤလၢ တၢ်ဟးဂူာ်ဟးဂီၤ, ယၤဒီးယပှၤဟံၣ်ဖိလီၤ.” (၁ မိၤၡ့ ၃၄:၃၀) အဝဲသ့ၣ် အတၢ်မၤကၣ်အံၤ တမၤဘၣ်ဂီၢ်က့ၤ တၢ်အိၣ်အသးဘၣ်. လၢတၢ်န့ၣ်အလီၢ် ဒုးအိၣ်ထီၣ် တၢ်အိၣ်သးလၢ အကီအခဲလီၤ. ခဲအံၤ စီၤယၤကိာ် ဒီးအဟံၣ်ဖိဃီဖိတဖၣ် ဘၣ်ပျံၤဝဲလၢ ပှၤလၢအဃၢၤလၢ အသးထီၣ်တၢ်တဖၣ် ကဟဲမၤကၣ်က့ၤအီၤန့ၣ်လီၤ. လၢတၢ်န့ၣ်အဃိ ကစၢ်ယွၤ တဲဘၣ်စီၤယၤကိာ်လၢ ကလဲၤသုးအဟံၣ်ဖိဃီဖိတဖၣ်ဆူ ဘ့ၤသ့လးန့ၣ်လီၤ.—၁ မိၤ. ၃၅:၁, ၅.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၅:၈) ဒီးနီၢ်ဒဘိရၣ်, ပှၤလၢအဒုးအီၣ်နုၢ်နီၢ်ရံးဘကၤန့ၣ်သံဝဲ, ဒီးဘၣ်တၢ်ခူၣ်လီၤအီၤ လၢဘ့ၤသ့လးအလာ်ခီ လၢသ့ထိးဖၣ်တထံးအဖီလာ်, ဒီးပှၤယုၢ်အမံၤလၢ အးလိၣ်ဘၤကူာ်လီၤ.
it-1 ၆၀၀ ¶၄
နီၢ်ဒဘိရၣ်
၁. ပှၤလၢအဒုးအီၣ်နုၢ် နီၢ်ရံးဘကၤ. ဖဲနီၢ်ရံးဘကၤ ဟးထီၣ်လၢအပၢ် စီၤဘသူၤအ့လးအဟံၣ် ဒီးလဲၤဆူ ပၤလဲးစတ့ ဒီးဖျီအသးဒီး စီၤအံၤစဲးအခါ နီၢ်ဒဘိရၣ် လဲၤဃုာ်ဒီးအီၤလီၤ. (၁ မိၤ. ၂၄:၅၉) အဝဲမၤတၢ်လၢ စီၤအံၤစဲးအဟံၣ်ပူၤ အနံၣ်အါမးဝံၤအလီၢ်ခံ ဘၣ်သ့ၣ်သ့ၣ် ကမ့ၢ်ဖဲ နီၢ်ရံးဘကၤ သံဝံၤအလီၢ်ခံန့ၣ် အဝဲကဲထီၣ်က့ၤ စီၤယၤကိာ် အဟံၣ်ဖိဃီဖိလီၤ. လီၤဂာ်လၢ နီၢ်ရံးဘကၤဖျီအသးဒီး စီၤအံၤစဲးဝံၤ အနံၣ် ၁၂၅ န့ၣ်နီၢ်ဒဘိရၣ်သံဝဲ ဒီးဘၣ်တၢ်ခူၣ်လီၤအီၤလၢ သ့ၣ်ထူၣ်ဖးဒိၣ်လၢ အအိၣ်လၢဘ့ၤသ့လးတထူၣ် အခီၣ်ထံးန့ၣ်လီၤ. သ့ၣ်ထူၣ်န့ၣ် ဘၣ်တၢ်ယုၢ်န့ၢ်အမံၤလၢ (အးလိၣ်ဘၤကူာ် လၢအခီပညီမ့ၢ် “တၢ်ဟီၣ်တၢ်ယၢၤအသ့ၣ်သ့ထိးဖၣ်”) န့ၣ်လီၤ. သ့ၣ်အမံၤအံၤ ပာ်ဖျါဝဲလၢ စီၤယၤကိာ် ဒီးအဟံၣ်ဖိဃီဖိတဖၣ် အဲၣ်ဘၣ်အီၤန့ၣ်လီၤ.—၁ မိၤ. ၃၅:၈.
(၁ မိၤၡ့ ၃၅:၂၂-၂၆) ဒီးတၢ်မၤအသးလၢစီၤအံၣ်စရ့လးအိၣ်ဝဲဆိးဝဲ လၢကီၢ်န့ၣ်အဖၢမုၢ်ဒီး, စီၤရူၤဘ့ၣ်လဲၤမံဃုာ်ဒီးအပၢ်သံၣ်မါ, နီၢ်ဘံၤလဟၤ, ဒီးစီၤအံၣ်စရ့လးနၢ်ဟူဝဲလီၤ. ၂၃ ဒီးစီၤယၤကိာ်အဖိခွါအိၣ်တဆံခံဂၤလီၤ. နီၢ်လ့ၤအၤအဖိခွါတဖၣ်မ့ၢ်စီၤယၤကိာ်အဖိဝဲၢ်ကိ, စီၤရူၤဘ့ၣ်, ဒီးစီၤစူၤမ့းအိၣ်, ဒီးစီၤလ့ၤဝံ, ဒီးစီၤယူဒၤ, ဒီးစီၤယံးစၣ်ကၢ်, ဒီးစီၤစဘူလိၣ်လီၤ. ၂၄ နီၢ်ရၤဃ့လးအဖိခွါတဖၣ် မ့ၢ်စီၤယိၤသး, ဒီးစီၤဘံၣ်ယၤမံၣ်လီၤ. ၂၅ ဒီးနီၢ်ရၤဃ့လး အကုၢ်ပိာ်မုၣ်, နီၢ်ဘံၤလဟၤအဖိခွါတဖၣ်မ့ၢ်စီၤဒၣ်, ဒီးစီၤနးသၤလံလီၤ. ၂၆ နီၢ်လ့ၤအၤအကုၢ်ပိာ်မုၣ်, နီၢ်စံၤလပၤအဖိခွါတဖၣ်မ့ၢ်စီၤကး, ဒီးစီၤအၤၡ့ၢ်လီၤ. အဝဲသ့ၣ်တဖၣ်န့ၣ်မ့ၢ်စီၤယၤကိာ်အဖိခွါလၢ ပှၤဆံးစၢ်န့ၢ်အီၤ, လၢပၤဒနါရာ်အပူၤလီၤ.
ပှၤဖးလံာ်ဖိတဖၣ် အတၢ်သံကွၢ်
လၢပှၤအံၣ်စရ့လးဖိအစိၤန့ၣ် ပှၤလၢမ့းၡံအၤ ဟဲလီၤစၢၤလီၤသွဲၣ်န့ၣ် မ့ၢ်ထဲဖိခွါဝဲၢ်ကိတဖၣ်လီၤဧါ
လၢညါန့ၣ် ပနၢ်ပၢၢ်အီၤဒ်အံၤ မ့ၢ်လၢ ဧ့ၤဘြံၤ ၁၂:၁၆ အဃိလီၤ. ဖဲန့ၣ်တဲဝဲလၢ စီၤဧ့ၡီၤ “မၤတရီတပါ” မ့တမ့ၢ် တပာ်လုၢ်ပာ်ပှ့ၤဝဲ ဖိဝဲၢ်ကိအလီၢ်အဃိ “ဆါလီၤကွံာ်အတၢ်ဝဲၢ်ကိအလီၢ် လၢတၢ်အီၣ်ဘျဲးအီၣ်တဘျီအဂီၢ်” လီၤ. လၢတၢ်န့ၣ်အဃိ ပဆိကမိၣ်လၢ ဖဲစီၤယၤကိာ် ဒိးန့ၢ်ဘၣ်ဝဲ “တၢ်ဝဲၢ်ကိအလီၢ်” အခါလီၤဂာ်လၢ အဝဲဒိးန့ၢ်ဘၣ်စ့ၢ်ကီး တၢ်ခွဲးတၢ်ယာ်လၢ မ့းၡံအၤ ကဟဲလီၤစၢၤလီၤသွဲၣ်လၢအီၤလီၤ.—မးသဲ ၁:၂, ၁၆; လူၤကၣ် ၃:၂၃, ၃၄.
ဘၣ်ဆၣ် ဖဲပဃုသ့ၣ်ညါအါထီၣ်လံာ်စီဆှံ တၢ်ကွဲးနီၣ်ကွဲးဃါလၢအဂၤတဖၣ် လီၤတံၢ်လီၤဆဲးအခါ ပသ့ၣ်ညါဘၣ်လၢ ပှၤလၢမ့းၡံအၤ ဟဲလီၤစၢၤလီၤသွဲၣ်ဝဲန့ၣ် တလိၣ်လၢကဘၣ်ကဲ ဖိဝဲၢ်ကိဘၣ်. ပကတဲသကိး တၢ်အုၣ်သးတနီၤလီၤ.
စီၤယၤကိာ်ဒီးနီၢ်လ့ၤအၤ အဖိခွါဝဲၢ်ကိန့ၣ်မ့ၢ်ဝဲ စီၤရူၤဘ့ၣ်လီၤ. ဒီးစီၤယၤကိာ်ဒီး နီၢ်ရၤဃ့လးန့ၣ် အဖိဝဲၢ်ကိမ့ၢ်ဝဲ စီၤယိၤသးလီၤ. ဖဲရူၤဘ့ၣ် မၤကမၣ်မုၣ်ကမၣ်ခွါအခါ အဝဲဘၣ်ဟ့ၣ်ၡူကွံာ်ဝဲ အဖိဝဲၢ်ကိအလီၢ် ဒီးစီၤယိၤသးဒိးန့ၢ်ဘၣ်က့ၤဝဲ တၢ်ခွဲးတၢ်ယာ်အံၤလီၤ. (၁ မိၤၡ့ ၂၉:၃၁-၃၅; ၃၀:၂၂-၂၅; ၃၅:၂၂-၂၆; ၄၉:၂၂-၂၆; ၁ ကွဲးနီၣ်တၢ် ၅:၁, ၂) ဘၣ်ဆၣ် မ့းၡံအၤတဟဲလီၤစၢၤလီၤသွဲၣ်လၢ စီၤရူၤဘ့ၣ် မ့တမ့ၢ် စီၤယိၤသးဘၣ်. အဝဲဟဲလီၤစၢၤလီၤသွဲၣ်လၢ စီၤယူဒၤလီၤ. စီၤယူဒၤန့ၣ်မ့ၢ်ဝဲ စီၤယၤကိာ်ဒီးနီၢ်လ့ၤအၤ အဖိခွါလွံၢ်ဂၤတဂၤလီၤ.—၁ မိၤၡ့ ၄၉:၁၀.
တၢ်ဖးလံာ်စီဆှံ
(၁ မိၤၡ့ ၃၄:၁-၁၉) ဒီးနီၢ်လ့ၤအၤ အဖိမုၣ်နီၢ်ဒံနၤ, လၢအဆံးစၢ်န့ၢ်လၢ စီၤယၤကိာ်တဂၤန့ၣ် လဲၤအိၣ်သကိး ပှၤကီၢ်ဖိအဖိမုၣ်လီၤ. ၂ ဒီးပှၤဃံၤဝံၤဖိ ကီၢ်အပဒိၣ် စီၤဃမိၢ်အဖိခွါ စီၤၡက့ၣ်ထံၣ်အီၤ, ဒီးဟံးန့ၢ်အီၤ, ဒီးမံဃုာ်ဒီးအီၤ, ဒီးမၤဟးဂီၤအီၤလီၤ. ၃ ဒီးအသးစဲဘူးဒီး စီၤယၤကိာ်အဖိမုၣ်နီၢ်ဒံနၤ, ဒီးအဲၣ်ဖိသၣ်ပိာ်မုၣ်န့ၣ်, ဒီးကတိၤတၢ်ဒီး ဖိသၣ်ပိာ်မုၣ်န့ၣ် ဘၣ်သူၣ်ဘၣ်သးလီၤ. ၄ ဒီးစီၤၡက့ၣ်ကတိၤတၢ်ဒီး အပၢ်စီၤဃမိၢ်, ဒီးစံးဝဲဒၣ်, မၤန့ၢ်ယၤလၢပိာ်မုၣ်ဖိသၣ် တဂၤအံၤလၢယမါတက့ၢ်. ၅ ဒီးစီၤယၤကိာ် နၢ်ဟူဝဲလၢ အမၤဘၣ်အၢအဖိမုၣ်နီၢ်ဒံနၤလီၤ. ဒီးအဖိခွါတဖၣ်အိၣ်ဝဲဒီး ဆၣ်ဖိကီၢ်ဖိအဒၢလၢပှၢ်လၢ်ကျါ, ဒီးစီၤယၤကိာ် အိၣ်ဘှီၣ်ဝဲ တုၤအဟဲက့ၤလီၤ. ၆ ဒီးစီၤၡက့ၣ်အပၢ် စီၤဃမိၢ်ဟးထီၣ်ဝဲဆူ စီၤယၤကိာ်အအိၣ် ဒ်သိးအကကတိၤတၢ်ဒီးအီၤလီၤ. ၇ ဒီးတုၤစီၤယၤကိာ် အဖိခွါတဖၣ်နၢ်ဟူဝဲဒီး, ဟဲက့ၤထီၣ်ဝဲလၢပှၢ်လၢ်ကျါ, ဒီးအသးဆါဒီးအသးထီၣ်နးမးလီၤ. အဂ့ၢ်ဒ်အံၤ, မ့ၢ်အမံဃုာ်ဒီး စီၤယၤကိာ်အဖိမုၣ်ဒီး, မၤပှၤဟးဂီၤဖိအတၢ်မၤလၢ အံၣ်စရ့လးအကျါလီၤ. ဒီးတဂ့ၤမၤဘၣ်ဒ်န့ၣ်ဘၣ်. ၈ ဒီးစီၤဃမိၢ်ကတိၤတၢ်ဒီးအီၤ, ဒီးစံးဝဲဒၣ်, ယဖိခွါစီၤၡက့ၣ် အသးစဲဘူးဒီးသုဖိမုၣ်လီၤ. ဟ့ၣ်လၢ်အီၤလၢအမါတက့ၢ်. ၉ ဒီးန့ၢ်မါန့ၢ်ဝၤဒီးပှၤတက့ၢ်. ဟ့ၣ်သုဖိမုၣ်တဖၣ်လၢပှၤ, ဒီးဟံးန့ၢ်ပဖိမုၣ်လၢသုဂီၢ်တက့ၢ်. ၁၀ ဒီးသုကအိၣ်ကဆိးဒီးပှၤ, ဒီးကီၢ်အံၤကအိၣ်လၢသုမဲာ်ညါလီၤ. အိၣ်သုဝဲဒီးကၤတၢ်လၢအပူၤ, ဒီးမၤန့ၢ်တၢ်ဟံးဃာ်လၢအပူၤတက့ၢ်. ၁၁ ဒီးစီၤၡက့ၣ်စံးဘၣ်ပိာ်မုၣ်အပၢ် ဒီးအဒီပုၢ်ဝဲၢ်တဖၣ်, မ်ယဘၣ်ဘျုးဘၣ်ဖှိၣ်လၢသုမဲာ်ညါတက့ၢ်. ဒီးတၢ်လၢသုစံးဘၣ်ယၤယကဟ့ၣ်လီၤ. ၁၂ တၢ်ကလိးဒီးတၢ်ဟ့ၣ်န့ၣ် သုမ့ၢ်ဃ့လၢယၤအါအါကလဲာ်နာ်သက့ဒီး, ယကဟ့ၣ်ဖဲဒၣ်သုစံးတၢ်လီၤ. ဒီးဟ့ၣ်ဖိသၣ်ပိာ်မုၣ်န့ၣ်လၢယမါတက့ၢ်. ၁၃ ဒီးစီၤယၤကိာ်အဖိခွါတဖၣ်စံးဆၢစီၤၡက့ၣ်, ဒီးအပၢ်စီၤဃမိၢ်ဒီးလီတၢ်လီၤ. ဒီးစံးဝဲဒၣ်, မ့ၢ်အမၤဘၣ်အၢပဒီပုၢ်ဝဲၢ်မုၣ်အဂ့ၢ်လီၤ. ၁၄ ဒီးစံးဘၣ်အီၤ, တၢ်တမံၤအံၤ ဟ့ၣ်ပဒီပုၢ်ဝဲၢ်မုၣ်လၢပှၤလၢ အတဒိးဘၣ်တၢ်ကူးတရံးန့ၣ် ပမၤတသ့ဘၣ်. အဂ့ၢ်ဒ်အံၤ, မ့ၢ်တၢ်ဒုၣ်ဒွဲၣ်ပှၤအလီၢ်လီၤ. ၁၅ ဘၣ်ဆၣ်ဒီး ပကအၢၣ်လီၤသုဒ်အံၤ, သုမ့ၢ်ကဲထီၣ်ဒ်ပှၤအသိး, ကယဲၢ်ပိာ်ခွါ ဒိးတၢ်ကူးတရံးကိးဂၤဒဲးန့ၣ်ဒီး, ၁၆ ပကဟ့ၣ်ပဖိမုၣ်လၢသု, ဒီးပကဟံးန့ၢ်သုဖိမုၣ်လၢပဂီၢ်, ဒီးပကအိၣ်ကဆိးဒီးသု, ဒီးပကကဲထီၣ် ပှၤတကလုာ်ဃီလီၤ. ၁၇ မ့မ့ၢ်သုမ့ၢ်တကနၣ်ဘၣ် ပကလုၢ်လၢသုကဒိး တၢ်ကူးတရံးန့ၣ်ဘၣ်ဒီး, ပကဟံးန့ၢ်ကွံာ်ပဖိမုၣ်, ဒီးလဲၤတၢ်လီၤ. ၁၈ ဒီးအတၢ်ကတိၤန့ၣ် ဂ့ၤဝဲလၢစီၤဃမိၢ်, ဒီးစီၤဃမိၢ်အဖိခွါစီၤၡက့ၣ် အမဲာ်ညါလီၤ. ၁၉ ဒီးဖိၣ်သၣ်ခွါန့ၣ် ဒ်သိးအကမၤတၢ်တမံၤန့ၣ်ဒီး, တသုးနံၤသုးသီဘၣ်, မ့ၢ်အဘၣ်အသးလၢ စီၤယၤကိာ်အဖိမုၣ်အဂ့ၢ်လီၤ. ဒီးအဝဲဒၣ်န့ၣ်အလၤအကပီၤဒိၣ်န့ၢ် အပၢ်အပှၤဟံၣ်ဖိ ခဲလၢာ်တက့ၢ်လီၤ.