လါနိၣ်ဝ့ဘၢၣ် ခဲၣ်ဖ့လီၤဆီလၢ ပကစံၣ်တဲၤတဲလီၤ ယွၤအဘီအမုၢ်အဂီၢ်

ယ့ၣ်ၡူးစံၣ်တဲၤတဲလီၤဝဲ “ယွၤအဘီအမုၢ်အတၢ်သးခုကစီၣ်” လီၤ. (လူၤ. ၄:၄၃) အဝဲ သိၣ်လိစ့ၢ်ကီးပှၤဂၤလၢ ကဃ့ထုကဖၣ်လၢ ယွၤအဘီအမုၢ်အဂီၢ်လီၤ. (မး. ၆:၉, ၁၀) ဖဲလါနိၣ်ဝ့ဘၢၣ်န့ၣ်​ ပကဂုာ်ကျဲးစၢးအဂ့ၤကတၢၢ်လၢ ပကတဲဘၣ်ပှၤဂၤလၢ ယွၤအဘီအမုၢ်အဂ့ၢ်န့ၣ်လီၤ. (မး. ၂၄:၁၄) ရဲၣ်လီၤကျဲၤလီၤ ဒ်သိးနပၣ်ဃုာ်လၢ ခဲၣ်ဖ့အံၤအပူၤ ကသ့လၢလၢပှဲၤပှဲၤအဂီၢ်န့ၣ်တက့ၢ်. ဖဲလါနိၣ်ဝ့ဘၢၣ်န့ၣ်​ ပှၤလၢကမၤ ပှၤလဲၤလၢညါ မၤစၢၤတၢ်တဖၣ်​ ဃုထၢဝဲ အနၣ်ရံၣ်​ ၃၀ မ့တမ့ၢ် ၅၀ သ့လီၤ.

တသ့ဖဲအသ့ ဂုာ်ကျဲးစၢး တဲဘၣ်ပှၤအါဂၤ လံာ်စီဆှံအဆၢလၢ အဘၣ်ဃးဒီး ယွၤအဘီအမုၢ်န့ၣ်တက့ၢ်. ဖဲနဃုထၢလံာ်စီဆှံအဆၢအခါ ဆိကမိၣ်ထီၣ်​ နပှၤဒိကနၣ်တၢ်ဖိတဖၣ်​ အတၢ်ဘူၣ်တၢ်ဘါအဂ့ၢ်တက့ၢ်. ပှၤတဂၤဂၤ မ့ၢ်ပာ်ဖျါထီၣ်​ တၢ်သးအိၣ်ဒိကနၣ်တၢ် ဖဲနထံၣ်အီၤအဆိကတၢၢ်တဘျီအခါန့ၣ်​ ဟ့ၣ်လီၤအီၤ တၢးထီခိးတၢ် ၂၀၂၀, နီၣ်ဂံၢ်ခံ လၢကမျၢၢ်အဂီၢ်န့ၣ်တက့ၢ်. ဝံၤအလီၢ်ခံ ဂုာ်ကျဲးစၢး က့ၤကဒါက့ၤဆူအအိၣ်​ လၢအဆိအချ့ ဒီးစးထီၣ်တၢ်မၤလိလံာ်စီဆှံဒီးအီၤလၢ လံာ်တဘ့ၣ်ဘ့ၣ်လၢ အအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ်အပူၤတက့ၢ်. တယံာ်လၢၤဘၣ်န့ၣ်​ ယွၤအဘီအမုၢ် ကမၤဟးဂီၤကွံာ်ဝဲ ဘီမုၢ်လၢအထီဒါအီၤတဖၣ်န့ၣ်လီၤ. (ဒၤ. ၂:၄၄; ၁ ကရံၣ်. ၁၅:၂၄, ၂၅) အဃိ, မ်ပကပၣ်ဃုာ် လၢလၢပှဲၤပှဲၤလၢ တၢ်ခွဲးတၢ်ယာ် လီၤဆီအံၤအပူၤ ဒ်သိးပကပာ်ဖျါထီၣ်လၢ ပတီဒီးယဟိဝၤယွၤ ဒီးအဘီအမုၢ်အဂီၢ်န့ၣ်တက့ၢ်.