“ယဘၣ်သးမၤတၢ်လၢ ယဟိဝၤယွၤအဂီၢ်”

တၢ်ကဲထီၣ်ဒံးကၠဲလဲၣ်န့ၣ်​ ယကတဲပၠးသု လၢခံမၣ်. ခဲအံၤ ယကတဲပၠးဆိလၢ ယစးထီၣ်မၤ ကစၢ်ယွၤအတၢ်မၤလၢ ဆၢကတီၢ်လၢပှဲၤဒ်လဲၣ်.

ယအိၣ်ဖျဲၣ်ထီၣ်ဖဲ ၁၉၄၂ လၢကီၢ်ကၠူရးခါ ဖဲကီးခရ့ဘံယၢၤ. လၢညါန့ၣ်​ ယပါအိၣ်လၢ ကီၢ်စူၣ်ရံၣ်န့ ဘၣ်ဆၣ်​ ခီဖျိလၢအတၢ်မၤအဃိ အဝဲဟဲပၠီအိၣ်က့ၤလၢ ကီးခရ့ဘံယၢၤ. တချုးလၢ ယအိၣ်ဖျဲၣ်ထီၣ်​ စှၤကီးနံၣ်န့ၣ်​ ယပါဒိးဘျၢထံ ဒီးလၢပှၤဘျၢထံ အဆိကတၢၢ် တဒူၣ်အကျါန့ၣ်​ အကဲထီၣ်​ ယဟိဝၤပှၤအုၣ်အသး လၢကီၢ်ကၠူရးခါ.a ပဒီပုၢ်ဝဲၢ်အိၣ်ယဲၢ်ဂၤ. တဘျီတခီၣ်န့ၣ်​ ပတဘၣ်သးမၤလိလံာ်စီဆှံဘၣ်​ သနာ်က့ ပပါမၤလိပှၤ လံာ်စီဆှံကီးနွံဒဲး. လၢခံ ဖဲယအိၣ်​ ၁၄ နံၣ်ခါန့ၣ်​ ဒ်သိးဒီး ယပါကွၢ်ထွဲက့ၤ အမိကသ့အဂီၢ် ပဟံၣ်ဖိဃီဖိ က့ၤအိၣ်လၢ ကီၢ်စူၣ်ရံၣ်န့.

သကီးလၢအဂ့ၤတဖၣ်​ မၤစၢၤယၤ

ဖဲယအိၣ်လၢ ကီၢ်စူၣ်ရံၣ်န့အခါ လၢတၢ်အိၣ်ဖှိၣ်န့ၣ်​ ယရ့ဒီးဒီပုၢ်ဝဲၢ်သးစၢ်လၢ အနီၢ်သးဆူၣ်တဖၣ်. အဝဲသ့ၣ်အညါပှၢ်န့ၢ်ယၤတကၠဲး ဒီးအဝဲသ့ၣ်​ မၤဝဲပှၤလဲၤလၢညါ. အဝဲသ့ၣ်မ့ၢ်တဲပၠးဝဲ အတၢ်လဲၤခီဖျိလၢ တၢ်စံၣ်တဲၤတဲလီၤတၢ်မၤန့ၣ်​ ယထံၣ်အဝဲသ့ၣ်​ ဖျါသးခုညါ. ဖဲပထီၣ်တၢ်အိၣ်ဖှိၣ်ဝံၤအလီၢ်ခံ တဘျီတခီၣ်န့ၣ်​ ပလဲၤဆ့ၣ်နီၤလၢတၢ်ချၢ, ကွၢ်ထီၣ်ဆၣ်တဖၣ်​ ဒီးပတဲသကီးတၢ်ဂ့ၢ်လၢ လံာ်စီဆှံပူၤ. တကးဒံးဘၣ်​ ဒ်သီးဒီး ယကသ့ၣ်ညါထီၣ်လၢ ယဘၣ်သးမၤတၢ်လၢ ယဟိဝၤယွၤအဂီၢ်န့ၣ်​ ယသကီးတဖၣ်အံၤ မၤစၢၤယၤ. အဃိ ဖဲယအိၣ်​ ၁၆ နံၣ်န့ၣ်​ ယဒိးဘျၢထံ ဒီးလၢခံဖဲယအိၣ်​ ၁၈ နံၣ်န့ၣ်​ ယစးထီၣ်မၤပှၤလဲၤလၢညါ.

ယမၤလိဘၣ်​ တၢ်မၤလိလၢ အရ့ဒိၣ်တဖၣ်

ယမၤပှၤလဲၤလၢညါခါန့ၣ်​ ယမၤလိဘၣ်တၢ်ဒီဒူၣ်. ဒီးအမၤစၢၤယၤလၢ ယကဆဲးမၤ ယဟိဝၤယွၤအတၢ်မၤလၢ ဆၢကတီၢ်လၢပှဲၤ. အဒိ တၢ်မၤလိ အဆိကတၢၢ်တခါလၢ ယမၤလိဘၣ်န့ၣ်ကဲဝဲ ပကဘၣ်သိၣ်လိက့ၤပှၤဂၤန့ၣ်​ အရ့ဒိၣ်. ဖဲယစးထီၣ်မၤ ပှၤလဲၤလၢညါအခါ ဒီပုၢ်ဝဲၢ်ခွါ ဝ့လဲ ဘဲစၤအံၤ လၢအကဲ မံၤၡၢၤနရံၤန့ၣ်​ အမၤစၢၤယၤအါမး.b ယကဘၣ်မၤ တၢ်အိၣ်ဖှိၣ်အမူဒါဒ်လဲၣ်န့ၣ်​ အဝဲသိၣ်လိယၤ. ဖဲန့ၣ်အခါ ယကလိၣ်ဘၣ်​ တၢ်သိၣ်လိအါထဲအံၤညါန့ၣ်​ ယတဆိမိၣ်ဘၣ်​ နီတဘျီဘၣ်. ဒီးလၢခံတနံၣ်န့ၣ်​ ယကဲထီၣ်ဘၣ်​ ပှၤလဲၤလၢညါလီၤဆီ. ယလီၤဘၣ်မူဒါလၢ ကီၢ်စူၣ်ရံၣ်န့ အပှၢ်ကျါ လၢပှၤလဲၤ တတုၤကြီကြီဘၣ်. ဖဲန့ၣ်​ ယဘၣ်ကွၢ်ထွဲ ကရူၢ်ဆံးဆံးဖိတဖု. ဒီပုၢ်ဝဲၢ်ခွါတဖၣ်​ သိၣ်လိပာ်စၢၤယၤ တၢ်လၢ ယကဘၣ်သ့ၣ်ညါ အဃိ ယသးခုသပှၢ်တၢၢ်. စးထီၣ်ဖဲန့ၣ်​ ယၤနာ်က့ ယကွၢ်လိ အဝဲသ့ၣ်​ အဒိအတဲာ် ဒီးယပာ်လီၤ တၢ်ဆၢကတီၢ်လၢ ကသိၣ်လိက့ၤပှၤအဂၤ.

တၢ်မၤလိ ခံခါတခါလၢ ယသ့ၣ်ညါဘၣ်န့ၣ်​ ကဲဝဲ ပကဘၣ်အိၣ်မူယိယိဖိ ဒီးရဲၣ်ကျဲၤပာ်စၢၤတၢ် မူာ်မူာ်နီၢ်နီၢ်. ဖဲလါထီၣ်သီသီ ကီးလါဒဲးန့ၣ်​ ယၤဒီးယသကီး လၢအမၤ ပှၤလဲၤလၢညါလီၤဆီဒီးယၤန့ၣ်​ ပရဲၣ်ကျဲၤပာ်စၢၤ တၢ်အီၣ်တၢ်အီ ဒီးဟံၣ်ဃီတၢ်ဖိတၢ်လံၤ လၢပလိၣ်ဘၣ်တဖၣ်. ဝံၤဘျီ ယၤမ့တမ့ၢ် ယသကီးန့ၣ်​ လဲၤလၢ ဝ့ၢ်ပူၤ ဒီးပှ့ၤတၢ်လၢပလိၣ်ဘၣ်. ဘၣ်မနုၤဃိလဲၣ်န့ၣ်​ တၢ်လၢပလိၣ်တဖၣ်​ မ့ၢ်လၢၤကွံာ်န့ၣ်​ ပှၤလၢကမၤစၢၤပှၤ တအိၣ်ဘၣ်. အဃိ စ့အတၢ်မၤစၢၤ လၢပန့ၢ်ဘၣ်န့ၣ်​ ဒ်သီးဒီး အကယၢန့ၢ်ပှၤ လၢဒီတလါကျၢၤအဂီၢ် ပကဘၣ်သူအီၤ သ့သ့ဘၣ်ဘၣ်. ဖဲယညါဘီၣ်ဒံးခါန့ၣ်​ ယသ့ၣ်ညါဘၣ်လၢ ပဘၣ်အိၣ်မူယိယိဖိ ဒီးဘၣ်ရဲၣ်ကျဲၤပာ်စၢၤတၢ် မူာ်မူာ်နီၢ်နီၢ်အဃိ မၤစၢၤယၤလၢ ယကဆဲးမၤ ယဟိဝၤယွၤ အတၢ်မၤ လၢယတၢ်အိၣ်မူဒီတစိၤညါ.

တၢ်မၤလိ သၢခါတခါလၢ ယသ့ၣ်ညါဘၣ်န့ၣ်​ ကဲဝဲ ပမ့ၢ်သိၣ်လိပှၤဂၤ လၢအဝဲသ့ၣ်​ အနီၢ်ကစၢ်ကျီာ်န့ၣ်​ ကဲဘျုးဝဲသပှၢ်တၢၢ်. ဖဲယဒိၣ်ထီၣ်ခါန့ၣ်​ ယတဲ ကီၤလၤဝါ, ဒး, ဖၤဖံယၤမဲထိၤ ဒီးစရါနၤထိကိၤကျီာ် (ပှၤသ့ၣ်ညါစ့ၢ်ကီးလၢ စရါနၤ). ဒီးကျီာ်တဖၣ်အံၤန့ၣ်​ ပှၤတဲအီၤလၢ ကီၢ်စူၣ်ရံၣ်န့ အါမး. မ့မ့ၢ် ပှၤလၢ အအိၣ်လၢပှၢ်ပူၤဟီန့ၣ်​ ပမ့ၢ်တဲ တၢ်သးခုကစီၣ်​ လၢအဝဲသ့ၣ်​ အကျီာ်န့ၣ်​ အဝဲသ့ၣ်ကနၣ်ပှၤ အါတကၠဲး. အဝဲသ့ၣ်​ အကျီာ်တနီၤန့ၣ်​ ယတဲဘၣ်ကီညါ. အဒိ ကျီာ်ဒ်သီးဒီး စရါမးခဲန့ၣ်​ အဝဲသ့ၣ်သူဝဲ တၢ်ကတိၤအကလုၢ် အထီၣ်အလီၤ အဃိ ယဘၣ်တဲလိအီၤ ဖးအါညါ ဒီးယမၤဒ်န့ၣ်​ အဃိ ယသးခု. ခီဖျိလၢ ယတဲပှၤတဖၣ်န့ၣ်​ အကျီာ်ဘၣ်​ အဃိ ယမၤစၢၤဘၣ်​ အဝဲသ့ၣ်အါဂၤလၢ ကသ့ၣ်ညါထီၣ်​ တၢ်မ့ၢ်တၢ်တီ.

တဘျီတခီၣ်​ ယလဲၤခီဖျိဘၣ်​ တၢ်အိၣ်သး လၢအလီၤမဲာ်ဆှးကၠ့ၤ. အဒိ ဘၣ်တဘျီ ပှၤမၤလိလံာ်စီဆှံဖိတဂၤ လၢအတဲ စရါမးခဲကျီာ်န့ၣ်​ လၢအပူၤကွံာ် အဟၢဖၢဆါ အဃိ ယဘၣ်သး ကၠးအီၤလၢ မ့ၢ်အကိၢ်ညၢ်က့ၤလံဧါ. ဘၣ်ဆၣ်​ ယကၠးဘၣ်လၢ မ့ၢ်အဒၢဧါ. ယကၠးဘၣ်အီၤကၠဲန့ၣ်​ အဃိ အမဲာ်ဆှးကၠ့ၤ. ယတဲကမၣ်ဘၣ်တၢ်ကၠဲန့ၣ်​ သနာ်က့ ယကျဲးစၢးတဲတၢ်ဒီးပှၤဂၤ လၢအဝဲသ့ၣ်အကျီာ်ဒံး.

ယတူၢ်လိာ်အါထီၣ်​ မူဒါလၢအသီ

ဖဲ ၁၉၇၀ န့ၣ်ယကဲထီၣ်ဘၣ်​ ကဝီၤအပှၤကွၢ်တၢ်. ဒီးဖဲတၢ်တနံၣ်န့ၣ်​ ယဘၣ်လဲၤလၢ ကရူၢ်လၢ အအိၣ်လၢပှၢ်ကျါ လၢပှၤလဲၤတတုၤကြီကြီဘၣ်​ ဒီးပၠးအဝဲသ့ၣ်​ တၢ်ဂီၤတဘ့ၣ်ဘၣ်တဘ့ၣ်​ လၢအဘၣ်ဃးဒီး “တၢ်လဲၤဟးအိၣ်သကီး ယဟိဝၤပှၤအုၣ်အသး အဝဲၤလီၢ်ခိၣ်သ့ၣ်​ လၢဟီၣ်ခိၣ်ဒီဘ့ၣ်.” ဒ်သီးဒီး ပလဲၤကတုၤလၢ ဒီပုၢ်ဝဲၢ်ဖဲန့ၣ်တဖၣ်​ အအိၣ်န့ၣ်​ ပဘၣ်လဲၤဒီးချံဖးထီ လၢပှၤတ့ဝဲလၢသ့ၣ်​ ဒီးလဲၤတၢ်လၢထံကျိပူၤ. လၢချံပူၤန့ၣ်​ ပတီၣ်ထီၣ်​ မ့ၣ်အူစဲး, သိဒၢ, မ့ၣ်အူဒၢ ဒီးတၢ်ဂီၤဒၢ အတၢ်ပီးတၢ်လီ. ဖဲပလဲၤတုၤလၢ ကၢၢ်နံၤခါန့ၣ်​ ပဘၣ်ယိာ်ထီၣ်​ တၢ်ပီးတၢ်လီတဖၣ်န့ၣ်​ ဒီးဆဲးလဲၤတၢ်လၢပှၢ်ပူၤ တုၤလၢ တၢ်လီၢ်လၢ ပကပၠး တၢ်ဂီၤတဘ့ၣ်ဘၣ်တဘ့ၣ်အဂီၢ်. တၢ်လၢယနီၣ်ဘၣ်အီၤ အဒိၣ်ကတၢၢ်တခါန့ၣ်​ ကဲဝဲ ပှၤဖဲန့ၣ်တဖၣ်န့ၣ်​ ကွၢ်ဝဲတၢ်လၢ ပပၠးအဝဲသ့ၣ်တဖၣ်န့ၣ်​ မုာ်ဒိၣ်မး. ယသိၣ်လိဘၣ်​ ပှၤဂၤ လၢယဟိဝၤယွၤအဂ့ၢ် ဒီးအတၢ်ကရၢကရိအဂ့ၢ်န့ၣ်​ ယသးခုညါ. ယဟ့ၣ်လီၤသးလၢ ယကမၤစၢၤပှၤဂၤ ဒ်သီးဒီး အဝဲသ့ၣ်​ ကသ့ၣ်ညါထီၣ်ဘၣ်​ ယဟိဝၤယွၤအဃိ ယသးခုနီၢ်ကီၢ်.

ပျံၤဖိပိၤအသးသၢဘိ

ယကဲပှၤသဘျ့အဃိ ယမၤဘၣ်ယဟိဝၤယွၤ အတၢ်မၤ ဂ့ၤဂ့ၤဘၣ်ဘၣ်​ နာ်က့ ယဆိမိၣ်လၢ ယသးသမူတံၤသကီး မ့ၢ်အိၣ်န့ၣ်ကဂ့ၤ. အဃိ ယဃ့ထုကဖၣ်​ လီၤတံၢ်လီၤဆဲး ဒ်သီးဒီး ယကန့ၢ်ဘၣ်မါလၢ ကမၤ ယဟိဝၤယွၤ အတၢ်မၤဒီးယၤ လၢပှၢ်ပူၤ ဒီးပမ့ၢ်ထံၣ်ဘၣ်ဒီး တၢ်ကီတၢ်ခဲနာ်က့ အကဆဲးသးခု ဒီးအကအိၣ်ဒီးတၢ်တူၢ်န့ၢ်ခီၣ်ကဲ. လၢခံတနံၣ်ဘျီ ယပာ်တၢ်အဲၣ်တီဒီး ဒီပုၢ်ဝဲၢ်မုၣ်​ အံၤသဲ လၢအကဲပှၤလဲၤလၢညါလီၤဆီ တဂၤ. ဒီပုၢ်ဝဲၢ်မုၣ်အံၤ အသးအိၣ်​ ဟ့ၣ်လီၤသးလၢ ယဟိဝၤယွၤအတၢ်မၤအါမး. တကးဒံးဘၣ်​ အကၠဲးဝဲ တၢ်မၢဖိပီလူး အတၢ်သးဆူၣ်လၢ တၢ်စံၣ်တဲၤတဲလီၤ တၢ်မၤအပူၤ လၢအနီၢ်ဆံးခါလံအဃိ အဘၣ်သး ဟ့ၣ်လီၤသး လၢအဂ့ၤကတၢၢ် ဒ်သိးဒီး တၢ်မၢဖိပီလူး. ဖဲလါစဲးပတ့ဘၢၣ်​ ၁၉၇၁ န့ၣ်ပဖျီသး ဒီးပစးထီၣ်မၤ ကဝီၤအတၢ်မၤ.

ဖဲဒီပုၢ်ဝဲၢ်မုၣ်​ အံၤသဲ ဒိၣ်ထီၣ်အခါ အဟံၣ်ဖိဃီဖိန့ၣ်​ အတၢ်တအိၣ်​ အါအါဘၣ်​ အဃိ ဖဲပမၤ ကဝီၤအတၢ်မၤ လၢပှၢ်ကျါခါန့ၣ်​ တကီလၢအဂီၢ် အါအါဘၣ်. အဒိ ဖဲပဘၣ်​ လဲၤအိၣ်သကီး ဒီပုၢ်ဝဲၢ် လၢအအိၣ်လၢ ပှၢ်ပူၤဖးယံၤန့ၣ်​ ပတလဲၤဝံထၢၣ်​ ဃၢဃၢဘၣ်. ပဘၣ်ဆှုၣ်ပတၢ်ကူတၢ်ကၤ ဒီးလုၢ်ထံ လၢထံကျိပူၤ. အဒိ ဒီပုၢ်ဝဲၢ်တဖၣ်န့ၣ်​ အဝဲသ့ၣ်​ ဖီဒုးအီၣ်ပှၤတၢ်အီၣ်​ ဒ်သီးဒီး တခိး, ညၣ်, တၢ်လၢ အဝဲသ့ၣ်ခးန့ၢ်ဝဲ ဒီးဃုန့ၢ်ဝဲ လၢထံကျိပူၤ. ဒီးတၢ်လၢအဝဲသ့ၣ်​ ဟ့ၣ်အီၣ်ပှၤ တမံၤဂ့ၤတမံၤဂ့ၤန့ၣ်​ ပအီၣ်သ့ခဲလၢာ်. တဘျီတခီၣ်န့ၣ်​ လီခီတအိၣ်ဘၣ်​ အဃိ ပအီၣ်တၢ်လၢ တကွံလၣ်ပူၤ ဒီးနီၣ်တၢၤ မ့ၢ်တအိၣ်ဘၣ်န့ၣ်​ ပအီၣ်လၢပစု. ပဟ့ၣ်လီၤသးလၢ ကမၤ ယဟိဝၤယွၤတၢ်မၤ တပူၤဃီအဃိ ယဟိဝၤယွၤ မၤစၢၤပှၤ ဒ်သီးဒီး ပျံၤဖိပိၤအသးသၢဘိ လၢပှၤမၤတဲာ်အီၤတန့ၢ်ဘၣ်. (စံၣ်တဲၤတဲလီၤတၢ် ၄:၁၂) တၢ်လဲၤခီဖျိတဖၣ်အံၤ ပခီလဲအီၤဒီး တၢ်အဂၤ တကဲနီမံၤဘၣ်.

ပအိၣ်သကီး ဒီပုၢ်ဝဲၢ်လၢ အအိၣ်လၢ ပှၢ်ပူၤဝံၤဘျီ ဖဲပက့ၤဒီးချံ လၢထံကျိအခါ တၢ်ကဲထီၣ်သး ဒ်သီးဒီး ယတဲဖျါထီၣ်လၢအခီၣ်ထံး. ဖဲပတုၤလၢထံလီၤဆူၣ်တတီၤအခါ ပချံခိၣ်လီၤဘျၢ လၢထံဖီလာ်ဝံၤဘျီ အဟဲက့ၤဖျီးထီၣ်က့ၤ. ပသီးဃာ်ဆ့ကၤထီၣ်ဖီ ကီးဂၤဒဲး အဃိ ပတလီၤတဲာ် လၢချံပူၤဘၣ်. ဘၣ်ဆၣ်​ လၢချံပူၤန့ၣ်​ ထံအိၣ်ပှဲၤပှဲၤအဃိ ပတၢ်အီၣ်လၢ သပၢၤပူၤန့ၣ်​ ပလူကွံာ်ဘျီ ပသူသပၢၤလၢ ကသးထီၣ်ကွံာ်ထံ.

ပတၢ်အီၣ်​ တအိၣ်လၢၤဘၣ်​ အဃိ ပဒီးချံတခီခီ ပကၠဲၤအီၣ်ညၣ်တခီခီ. ဘၣ်ဆၣ်​ ပကၠဲၤအီၣ်ညၣ်​ တန့ၢ်နီဘ့ၣ်ဘၣ်. အဃိ ပဃ့ထုကဖၣ်​ လၢယဟိဝၤယွၤအအိၣ်​ ဒ်သီးဒီး အကဟ့ၣ်လီၤပှၤ တၢ်အီၣ်​ လၢတၢ်တနံၤန့ၣ်အဂီၢ်. ပဃ့ထုကဖၣ်​ ဝံၤဘျီ ဒီပုၢ်ဝဲၢ်ခွါတဂၤ ကွံာ်လီၤတခွဲပျံၤဘျီ အတခွဲန့ၢ်ညၣ်ဖးဒိၣ်တဘ့ၣ်. ပအီၣ်ညၣ်တဘ့ၣ်န့ၣ်​ ယဲၢ်ဂၤ ဒီးပအီၣ်ဘၣ်ဘျဲကၠ့ၤ အဃိပသးခုညါ.

ယကဲဝၤ, ယကဲပါ ဒီးကဝီၤအပှၤကွၢ်တၢ်

ပမၤကဝီၤအတၢ်မၤ ပှဲၤထီၣ်ယဲၢ်နံၣ်ဘျီ ပန့ၢ်ဘၣ်တၢ်ဆိၣ်ဂ့ၤ အဂၤတခါ လၢပက ကဲထီၣ်ဘၣ်မိပါ. ခါဆူညါ တၢ်ကမၤသးဒီးပှၤ ဒ်လဲၣ်န့ၣ်​ ပတသ့ၣ်ညါဘၣ်​ နာ်က့ ဖဲယသ့ၣ်ညါလၢ ယမါဒၢထီၣ်ခါန့ၣ်​ ယသးခုညါ. ယၤဒီးယမါန့ၣ်​ ပပာ်လီၤသးလၢ တၢ်ခွဲးတၢ်ယာ် မ့ၢ်အိၣ်န့ၣ်​ ပကမၤဒံး ယဟိဝၤယွၤအတၢ်မၤ လၢဆၢကတီၢ်လၢပှဲၤ. ဖဲ ၁၉၇၆ န့ၣ်ပဖိခွါ အဲသနဲ အိၣ်ဖျဲၣ်ထီၣ်​ ဝံၤဒီး ခံနံၣ်ဘျဲၣ်န့ၣ်​ ပဖိခွါ ကၠိဘဲနံ အိၣ်ဖျဲၣ်ထီၣ်.

ပဘၣ်ကွၢ်ဒိၣ်ထီၣ်​ ပဖိခွါခံဂၤ ဒီးဖဲန့ၣ်အဆၢကတီၢ် လၢကီၢ်စူၣ်ရံၣ်န့န့ၣ်​ ပှၤလိၣ်ဘၣ်​ ကဝီၤအပှၤကွၢ်တၢ် အဃိ ဝဲၤတြၢ် ရဲၣ်ကျဲၤဝဲလၢ ယကဘၣ်မၤဒံး ကဝီၤအပှၤကွၢ်တၢ် တၢ်မၤ. ဖဲပဖိခွါ နီၢ်ဆံးဒံးခါန့ၣ်​ ယလီၤဘၣ်​ မူဒါလၢ ကဝီၤအတၢ်မၤ လၢတၢ်အိၣ်ဖှိၣ်​ တအိၣ်အါအါဘၣ်. ညီနုၢ် ယဘၣ်မၤ ကဝီၤအတၢ်မၤ တလါန့ၣ်​ ထဲစှၤကီးနွံ အဃိ တၢ်ဆၢကတီၢ် လၢအဂၤန့ၣ်​ ယမၤပှၤလဲၤလၢညါ လၢပလီၢ်ကဝီၤတၢ်အိၣ်ဖှိၣ်. ယမ့ၢ်လီၤဘၣ်​ မူဒါလၢ တၢ်အိၣ်ဖှိၣ်​ လၢအအိၣ်ဘူးဒီး ပတၢ်လီၢ်န့ၣ်​ ယဖိယမါလဲၤပိာ်ယခံ. ဘၣ်ဆၣ်​ ယမ့ၢ်လီၤဘၣ်မူဒါလၢ တၢ်အိၣ်ဖှိၣ်​ ဒီးကဝီၤတၢ်အိၣ်ဖှိၣ်​ လၢအအိၣ်ဖးယံၤ လၢပှၢ်ပူၤန့ၣ်​ အါတက့ၢ် ယလဲၤတဂၤ.

ယမၤယမူဒါခဲလၢာ် ကန့ၢ်အဂီၢ် ယဘၣ်ရဲၣ်ကျဲၤပာ်စၢၤ မူာ်မူာ်နီၢ်နီၢ်. အဃိ ယရဲၣ်ကျဲၤပာ်စၢၤလၢ ယဟံၣ်ဖိဃီဖိ ကမၤဘၣ်​ ဟံၣ်ဖိဃီဖိ တၢ်မၤလိလံာ်စီဆှံ ကီးနွံဒဲး. ဒီးယမ့ၢ်လဲၤအိၣ်သကီး တၢ်အိၣ်ဖှိၣ်​ လၢပှၢ်ပူၤန့ၣ်​ ယမါအံၤသဲ မၤဝဲ ဟံၣ်ဖိဃီဖိ တၢ်မၤလိလံာ်စီဆှံ ဒီးပဖိခွါ. အါတက့ၢ် ပမ့ၢ်မၤတၢ် တမံၤမံၤန့ၣ်​ ပမၤအီၤ ဒ်သီးသီး. အဒိ ပလိၣ်ကွဲသကီးက့ ဒီးပဟးကသုၣ်ကသီ လၢတၢ်လီၢ်လၢ အအိၣ်ဘူးဒီးပှၤ. မ့မ့ၢ်ယၤန့ၣ်​ ယဘၣ်ကတဲာ်ကတီၤ မူဒါလၢတၢ်အိၣ်ဖှိၣ်အဂီၢ် အဃိ ညီနုၢ်န့ၣ်​ ယမံဘၣ်စဲၤခံ. မ့မ့ၢ်ယမါအံၤသဲန့ၣ်​ အကဲ မါလၢအဂ့ၤ ဒ်သီးဒီး ကတိၤဒိ ၃၁:၁၅ ပာ်ဖျါထီၣ်ဝဲ. တချုးလၢ မုၢ်ဝါထီၣ်ဒံးဘၣ်န့ၣ်​ ယမါဂဲၤဆၢထၢၣ်​ ကတဲာ်ကတီၤ ဂီၤခီတၢ်အီၣ်​ ဒီးတချုးလၢ ပဖိခွါ လဲၤထီၣ်ကၠိဒံးဘၣ်န့ၣ်​ ပဖးသကီး လံာ်စီဆှံ ဒီးအီၣ်သကီး ဂီၤခီတၢ်အီၣ်. ယန့ၢ်ဘၣ်မါလၢ အသးအိၣ်ဟ့ၣ်လီၤသး ဒီးထီဘိန့ၣ်​ အမၤစၢၤယၤ ဒ်သိးဒီး ယမၤယမူဒါလၢ တၢ်အိၣ်ဖှိၣ်ပူၤကန့ၢ်အဃိ ယသးခုသပှၢ်တၢၢ်.

ပကျဲးစၢး မၤစၢၤပဖိခွါခံဂၤ ဒ်သီးဒီး အဝဲသ့ၣ်​ ကအဲၣ်ယဟိဝၤယွၤ ဒီးမၤအတၢ်မၤကမုာ်. ပဘၣ်သးလၢ ပဖိခွါကမၤ ယဟိဝၤယွၤ အတၢ်မၤ လၢဆၢကတီၢ်လၢပှဲၤ ဒီးအဝဲသ့ၣ်​ မ့ၢ်မၤယဟိဝၤယွၤ အတၢ်မၤ လၢဆၢကတီၢ်လၢပှဲၤန့ၣ်​ တဘၣ်မ့ၢ်လၢ ပတၢ်ဘၣ်သးဘၣ်, ကဘၣ်မ့ၢ်လၢ အဝဲသ့ၣ်​ အနီၢ်ကစၢ် တၢ်ဃုထၢဟီ. ညီနုၢ်န့ၣ်​ ပတဲဘၣ်​ အဝဲသ့ၣ်လၢ ပမ့ၢ်မၤ ယဟိဝၤယွၤ အတၢ်မၤလၢ ဆၢကတီၢ်လၢပှဲၤန့ၣ်​ ပကသးခုသပှၢ်တၢၢ်. ဒီးပတဲဘၣ်​ အဝဲသ့ၣ်လၢ ပမ့ၢ်ထံၣ်ဘၣ်ဒီး တၢ်ကီတၢ်ခဲ သနာ်က့ ယဟိဝၤယွၤမၤစၢၤပှၤ ဒီးဆိၣ်ဂ့ၤပှၤ. တကးဒံးဘၣ်​ ပမၤစၢၤပဖိခွါ ဒ်သိးဒီး အဝဲသ့ၣ်ကရ့ဒီး ဒီပုၢ်ဝဲၢ်လၢ အပာ်ဆိ ယဟိဝၤယွၤ လၢနီၣ်ဂံၢ်တၢ.

ပကကွၢ်ဒိၣ်ထီၣ်​ ပဖိအဂီၢ် တၢ်လၢပလိၣ်ဘၣ်န့ၣ်​ ယဟိဝၤယွၤ မၤန့ၢ်ပှၤခဲလၢာ်. ယၤစ့ၢ်ကီးယကျဲးစၢး ကွၢ်ထွဲ ယဟံၣ်ဖိဃီဖိ လၢအဂ့ၤကတၢၢ်. ဖဲယကဲပှၤသဘျ့ ဒီးယမၤ ပှၤလဲၤလၢညါလီၤဆီ လၢပှၢ်ကျါခါန့ၣ်​ ယသ့ၣ်ညါဘၣ်လၢ ပကဘၣ်ရဲၣ်ကျဲၤပာ်စၢၤ တၢ်လိၣ်ဘၣ်လၢ နီၢ်ခိတခီ မူာ်မူာ်နီၢ်နီၢ်. ပကျဲးစၢး လၢအဂ့ၤကတၢၢ်လံ သနာ်က့ တဘျီတခီၣ်​ တၢ်လၢပလိၣ်ဘၣ်န့ၣ်​ ပတန့ၢ်ဘၣ်​ ခဲလၢာ်ဘၣ်. နာ်က့ ဖဲန့ၣ်အဆၢကတီၢ်န့ၣ်​ ယသ့ၣ်ညါလၢ ယဟိဝၤယွၤ မၤစၢၤပှၤသပှၢ်တၢၢ်. အဒိ ဖဲ ၁၉၈၆ တုၤလၢ ၁၉၉၂ အတီၢ်ပူၤန့ၣ်​ တၢ်ဒုးကဲထီၣ်​ လၢကီၢ်စူၣ်ရံၣ်န့. ဒီးဖဲန့ၣ်အဆၢကတီၢ် တၢ်ဃံးထီၣ်ကၤထီၣ်​ အဃိ တၢ်လၢပလိၣ်ဘၣ်​ လၢမုၢ်ဆ့ၣ်မုၢ်ဂီၤအဂီၢ်မၣ်​ ပတန့ၢ်ဘၣ်​ ခဲလၢာ်ဘၣ်. ပထံၣ်ဘၣ်ဒီး တၢ်အိၣ်သးကီခဲနာ်က့ ယဟိဝၤယွၤ ကွၢ်ထွဲမၤစၢၤပှၤ.—မးသဲ ၆:၃၂.

ယဆိမိၣ်ထီၣ်က့ၤ ယတၢ်အိၣ်မူ

လၢပတၢ်အိၣ်မူပူၤန့ၣ်​ ပထံၣ်ဘၣ်လၢ ယဟိဝၤယွၤ ကွၢ်ထွဲမၤစၢၤပှၤထီဘိ. ဒီးအတၢ်မၤစၢၤန့ၣ်​ ဒုးသူၣ်မံသးမုာ်ပှၤနီၢ်ကီၢ်. တကးဒံးဘၣ်​ ပသးခုဒိၣ်မးလၢ အဟ့ၣ်ပှၤ ပဖိခွါခံဂၤ. ပဖိခွါခံဂၤအံၤ ဘူၣ်ထီၣ်ဘါထီၣ်​ ယဟိဝၤယွၤ အဃိ ကဲဝဲတၢ်ခွဲးတၢ်ယာ် လီၤဆီတခါ. ခီဖျိလၢ အဝဲသ့ၣ်​ ဃုထၢလၢ ကမၤ ယဟိဝၤယွၤတၢ်မၤ လၢဆၢကတီၢ်လၢပှဲၤ အဃိ ပသးခုညါ. ပဖိခွါအဲသနဲ ဒီးကၠိဘဲနံန့ၣ်​ ထီၣ်ဘၣ်ဝဲ ကၠိလၢ တၢ်ကရၢကရိ ဒုးအိၣ်ထီၣ်ဝဲ. ဒီးအဝဲသ့ၣ်​ ခံဂၤလၢာ် ဒီးအမါန့ၣ်​ ခဲအံၤ မၤတၢ်လၢ ကီၢ်စူၣ်ရံၣ်န့ အဝဲၤတြၢ်.

အခဲအံၤ ယၤဒီးယမါဒု ပသးပှၢ်ထီၣ်လံ နာ်က့ ပမၤဘၣ်​ ပှၤလဲၤလၢညါလီၤဆီဒံး. ယတၢ်မၤအါဧါ တအါဧါန့ၣ်​ ယကပှီၢ်လိသးလၢထံအဂီၢ်မၣ်​ ယတၢ်ဆၢကတီၢ် တအိၣ်ဘၣ်. ဘၣ်ဆၣ်​ ယသးတဟးဂီၤဘၣ်. ဖဲယညါဘီၣ်ခါန့ၣ်​ ယမၤဘၣ်​ ယဟိဝၤယွၤ အတၢ်မၤ လၢဆၢကတီၢ်လၢပှဲၤ အဃိ ယမ့ၢ်က့ၤဆိမိၣ်က့ၤ ယတၢ်အိၣ်မူလၢအပူၤကွံာ်န့ၣ်​ ယသးခုညါ ဒီးယသ့ၣ်ညါလၢ ယတၢ်ဆၢတဲာ်တခါအံၤ အကဲဝဲတၢ်ဆၢတဲာ်လၢ အဂ့ၤကတၢၢ်.