ပှၤသးစၢ်တဖၣ်အတၢ်သံကွၢ်
ယထီၣ်ကၠိမ့ၢ်တမုာ်ဘၣ်န့ၣ် ယဘၣ်မၤဒ်လဲၣ်
ဖဲနထီၣ်ကၠိအခါ နကၠိသရၣ်မ့ၢ်ဃံး မ့တမ့ၢ် နသကိးမ့ၢ်ဆီၣ်သနံးနၤ မ့တမ့ၢ် နဒိးစဲးမ့ၢ်တဘၣ်ဘၣ် ဒီးနမ့ၢ်ဘၣ် ဟဲက့ၤမၤလံာ် လၢဟံၣ်အါတလၢန့ၣ် ဘၣ်သ့ၣ်သ့ၣ် နထီၣ်ကၠိတမုာ်ဘၣ်. နမ့ၢ်တူၢ်ဘၣ် ဒ်န့ၣ်န့ၣ် ပနၢ်ပၢၢ်စၢၤနၤသ့.a ရ့ခၠိၤb လၢအကဲပှၤသးစၢ်တဂၤန့ၣ် တဲဝဲလၢ
“ယမၤတၢ်အဂၤ မုာ်ဒိၣ်န့ၢ်ဒံး ယလဲၤထီၣ်ကၠိဒံး. ယဃုထၢမ့ၢ်သ့န့ၣ် ယကဃုထၢလၢ ကလဲၤဟးလၢ ပီၣ်လဲၣ်နံၤ မ့တမ့ၢ် ဟးဒီးယသကိး မ့တမ့ၢ် ဖီအီၣ်ဖီအီတၢ် ဒီးမၤစၢၤမိပါ လၢဟံၣ်.”
နမ့ၢ်တူၢ်ဘၣ် ဒ်သိးဒီး ရ့ခၠိၤန့ၣ် ဘၣ်သ့ၣ်သ့ၣ် ဖဲနလဲၤထီၣ်ကၠိအခါ နကတူၢ်ဘၣ် ဒ်သိးဒီးနလီၤဘၣ်လၢ ဃိာ်ပူၤ ဒီးနကဘၣ်လဲၤထီၣ်န့ၢ်ဆူၣ်ကၠိ တုၤလၢနထီၣ်ကၠိဝံၤ. သနာ်က့ ဘၣ်ဃးဒီးကၠိန့ၣ် ဒ်သိးနကအိၣ်ဒီး တၢ်ထံၣ်လၢအဂ့ၤအဂီၢ် နကဘၣ်မၤဒ်လဲၣ်.
နသ့ၣ်ညါဧါ. နမ့ၢ်တအိၣ်ဒီးတၢ်ထံၣ်လၢအဂ့ၤ လၢအဘၣ်ဃးဒီးကၠိဘၣ်န့ၣ် နကထံၣ်လၢ ကၠိန့ၣ် အကဲတၢ်ဝံတၢ်ယိးတခါ. ဘၣ်ဆၣ် နမ့ၢ်အိၣ်ဒီးတၢ်ထံၣ်လၢအဂ့ၤန့ၣ် အကမၤစၢၤနၤ ဒ်သိးနထီၣ်ကၠိကမုာ်ထီၣ် ဒီးနကထံၣ်လၢ ကၠိန့ၣ် အကဲဘျုး ဒီးကမၤစၢၤနၤလၢ နကအိၣ်ဒီးတၢ်သ့တၢ်ဘၣ်လၢ နလိၣ်ဘၣ် ဖဲနဒိၣ်ထီၣ်အခါ.
ဘၣ်ဃးဒီးကၠိန့ၣ် ဒ်သိးနကအိၣ်ဒီး တၢ်ထံၣ်လၢအဂ့ၤအဂီၢ် ဆိကမိၣ်ထံ တၢ်ဂ့ၢ်လၢ တၢ်ဖီလာ်တဖၣ်အံၤ–
တၢ်ကူၣ်ဘၣ်ကူၣ်သ့. နမ့ၢ်မၤလိအါထီၣ်တၢ်န့ၣ် ခါဆူညါ တၢ်ဂ့ၢ်ကီမ့ၢ်အိၣ်ထီၣ်လၢ နတၢ်မၤ မ့တမ့ၢ် တၢ်အိၣ်သးအဂၤအခါ နဘှီဘၣ်က့ၤတၢ်ဂ့ၢ်ကီလၢ နနီၢ်ကစၢ်သ့ ဒီးနတလိၣ် သန့ၤသးလၢ ပှၤဂၤဘၣ်. သံကွၢ်လီၤနသးလၢ ‘လၢကၠိန့ၣ် တၢ်လၢယတကၠဲးဘၣ် မ့ၢ်အိၣ်တမံၤမံၤသနာ်က့ ယမ့ၢ်ဆဲးလဲၤထီၣ်ကၠိန့ၣ် ကကဲဘျုးဒ်လဲၣ်.’
လံာ်စီဆှံ အတၢ်အဟံးစုနဲၣ်ကျဲ– “ပၢၤဃာ် တၢ်ကူၣ်သ့ ဒီးတၢ်သ့ဆိကမိၣ် ပဲာ်ထံနီၤဖးတၢ်တက့ၢ်.”—ကတိၤဒိ ၃:၂၁.
နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်န့ၣ် ဖးကွၢ် တၢ်ဂ့ၢ်လၢအခိၣ်တီမ့ၢ်ဝဲ “ယမၤအီၣ်လံာ် မ့ၢ်တဘၣ်ဘၣ်န့ၣ် ယဘၣ်မၤဒ်လဲၣ်.”
နကအိၣ်ဒီး လုၢ်လၢ်လၢအဂ့ၤ. နမ့ၢ်လဲၤထီၣ်ကၠိ ထီဘိန့ၣ် ကမၤစၢၤနၤဒ်သိး နကသူ တၢ်ဆၢကတီၢ်လၢ တၢ်ကူၣ်သ့အပူၤ, နကအိၣ်ဒီး တၢ်ပၢၤသူၣ်ပၢၤသး ဒီးနကကဲထီၣ် ပှၤလၢအမၤတၢ်ဆူၣ်တဂၤ. ဖဲနဒိၣ်ထီၣ်အခါ နကလိၣ်ဘၣ် တၢ်ဂ့ၤတၢ်ဝါတဖၣ်အံၤ. သံကွၢ်လီၤနသးလၢ ‘ဒ်သိး ယကအိၣ်ဒီး တၢ်ပၢၤသူၣ်ပၢၤသး ဒီးကဲထီၣ် ပှၤလၢအမၤတၢ်ဆူၣ်အဂီၢ် ကၠိတၢ်ရဲၣ်တၢ်ကျဲၤ မၤစၢၤယၤဒ်လဲၣ်. ဒ်သိးဒီး ယကအိၣ်ဒီး တၢ်ဂ့ၤတၢ်ဝါတဖၣ်အံၤအဂီၢ် ယကဘၣ်မၤဒံး မနုၤလဲၣ်.’
လံာ်စီဆှံ အတၢ်အဟံးစုနဲၣ်ကျဲ– “တၢ်မၤလၢ ပှၤမၤအီၤဆူၣ်ဆူၣ် ကိးမံၤဒဲးန့ၣ် အိၣ်ဒီးအဘျုး.”—ကတိၤဒိ ၁၄:၂၃.
နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ်န့ၣ် ဖးကွၢ် တၢ်ဂ့ၢ်လၢအခိၣ်တီမ့ၢ်ဝဲ “ယသူတၢ်ဆၢကတီၢ်လၢ တၢ်ကူၣ်သ့အပူၤ ကသ့ဒ်လဲၣ်.”
နရ့ဒီးပှၤဂၤကသ့. ဖဲနရ့ဒီးနသကိးလၢကၠိအခါ ကမၤစၢၤနၤ ဒ်သိးနကအိၣ်ဒီး တၢ်ဒိသူၣ်ဒိသး ဒီးပာ်ကဲပှၤဂၤ. သးစၢ်တဂၤလၢ အမံၤမ့ၢ် ကၠီၡဝၤ န့ၣ်တဲဝဲလၢ “နကဘၣ်တဲတၢ်ဒီးပှၤဂၤ သ့သ့ဘၣ်ဘၣ် ဒီးရ့ဒီးပှၤဂၤဂ့ၤဂ့ၤန့ၣ် အရ့ဒိၣ်ဒိၣ်မး. မ့ၢ်လၢ အကဲဝဲ တၢ်သ့တၢ်ဘၣ်လၢ နကလိၣ်ဘၣ် လၢနတၢ်အိၣ်မူ ဒီတစိၤ.” သံကွၢ်လီၤနသးလၢ ‘တၢ်လၢ ယမၤလိဘၣ်လၢကၠိန့ၣ် အကမၤစၢၤယၤလၢ ယကရ့ဒီးပှၤလၢ အကလုာ်ဒူၣ်တဒ်သိးဒီးယၤ ဒီးအတၢ်ဘူၣ်တၢ်ဘါ တဒ်သိးဒီးယၤတဖၣ် သ့သ့ဘၣ်ဘၣ်ဒ်လဲၣ်.’
လံာ်စီဆှံ အတၢ်အဟံးစုနဲၣ်ကျဲ– “ဂုာ်ကျဲးစၢး အိၣ်ဃူအိၣ်ဖိးဒီး ပှၤခဲလၢာ်တက့ၢ်.”—ဧ့ၤဘြံၤ ၁၂:၁၄.
နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်န့ၣ် ဖးကွၢ် တၢ်ဂ့ၢ်လၢအခိၣ်တီမ့ၢ်ဝဲ “ယတဲသကိးတၢ်ဒီးပှၤဂၤ ကသ့ဂ့ၤဒိၣ်ထီၣ်အဂီၢ် ယဘၣ်မၤဒ်လဲၣ်”
ကဲဘျုးလၢနဂီၢ် လၢခါဆူညါ. ကၠိန့ၣ် အကမၤစၢၤနၤ ဒ်သိးနကသ့ၣ်ညါလီၤ နနီၢ်ကစၢ်တၢ်သ့တၢ်ဘၣ် ဒီးပာ်လီၤဖီတၢၣ်တဖၣ်. ဘြူၣ် လၢအကဲ ပိာ်မုၣ်သးစၢ်တဂၤ တဲဝဲလၢ “ဖဲယထီၣ်ကၠိအခါန့ၣ် ယမၤလိသ့ထီၣ်ယသးလၢ တၢ်တမံၤ. အဃိနၤစ့ၢ်ကီး နမ့ၢ်မၤလိတၢ်တမံၤမံၤန့ၣ် ဖဲနဖျိထီၣ်ကၠိအခါ နမၤတၢ်မၤတခါန့ၣ် ကသ့ဝဲ. သံကွၢ်လီၤနသးလၢ ‘ယမ့ၢ်ယဖျိထီၣ် ကၠိန့ၣ် ယကလုၢ်အီၣ်လုၢ်အီ ယနီၢ်ကစၢ်သးဒ်လဲၣ်. ဒ်သိးယလုၢ်အီၣ်လုၢ်အီယသး ဒ်န့ၣ်ကသ့အဂီၢ် ဖဲယထီၣ်ကၠိအခါ ယကဘၣ်မၤလိ တၢ်မနုၤလဲၣ်.’
လံာ်စီဆှံ အတၢ်အဟံးစုနဲၣ်ကျဲ– “မၤဘျ့ထီၣ် ကျဲလၢနလဲၤအီၤ.”—ကတိၤဒိ ၄:၂၆.
a လံာ်စီဆှံအတၢ်ဟံးစုနဲၣ်ကျဲလၢ တၢ်မၤလိတခါအံၤအပူၤန့ၣ် ကမၤစၢၤစ့ၢ်ကီး သးစၢ်လၢ အထီၣ်ကၠိလၢဟံၣ်တဖၣ်.
b ပှၤမံၤတနီၤန့ၣ် ပှၤဆီတလဲဝဲ.